撒母耳記下 3章2節 到 3章21節   背景資料  上一筆  下一筆
Chit章記載押尼珥已經意識tio̍h若情勢繼續落去,會完全失去生存ê機會,因為án-ne決定私下kah大衛談判和解。M̄-koh,押尼珥將軍因為bat殺害大衛身邊ê猛將亞撒烏,為tio̍h án-ne事約押一直想beh替小弟亞撒烏報仇。果然就tī伊kah大衛談妥和解條件了後,tī tńg去厝裡途中反被約押派人押tńg來而刣死,報了小弟亞撒烏ê仇(參考三:26—28、30)。M̄-koh mā因為約押刣死押尼珥,hō͘大衛警覺tio̍h伊已經無法度管轄、約束約押。因為án-ne,tī伊臨終前交帶後事ê時,特別交帶kā chit-ê tāi-chì記tī備忘錄裡,hō͘伊ê kiáⁿ所羅門利用宮廷內部鬥爭ê機會刣死約押(參考列王記上二:31—34)。Chiah-ê lóng說明一個重要ê中心主題:m̄是tùi上帝來揀選、膏立ê君王,lóng bē為國家帶來真正和平、安定。

Chit段經文描述押尼珥計畫帶兵投效大衛ê經過。伊是一個會一時風駛一時船ê幕僚,原本是「擁護」他施波設為王ê,m̄-koh後來卻私落去chhōe大衛談投降ê事。這是背叛他施波設。

第2到5節,是一份簡單ê族譜,chit-ê族譜thang參考歷代志上第三章1到3節。清楚kā大衛ê kiáⁿ依大細ê次序排列出來,作者用chit種方式,主要teh表達一個意思:tī大衛厝內有資格繼承王位順位ê名單。M̄-koh值得注意ê是所羅門ê名chit時iáu未出現。Chia所列出來ê kiáⁿ,lóng是大衛tī希伯崙作猶大王ê時chūn所生ê。一直到第五章13到16節koh一pái出現一份新ê族譜,記明大衛作以色列王了後,tī耶路撒冷所生ê kiáⁿ,chit時chiah有所羅門ê名出現。Tī chit份簡短ê族譜中,並無說明第3節所提起ê「基述王達買ê cha-bó͘-kiáⁿ瑪迦」,mā就是押沙龍ê老母,是甚麼時chūn,á是tī甚麼情況之下,成做大衛ê bó͘,以及第4節ê「哈甲」、「亞比伊」、「以格拉」等等chiah-ê bó͘是tùi何而來,chiah-ê lóng欠缺資料。雖是短短四節經文,卻講出大衛娶米甲了後,至少koh娶六個bó͘。若是koh加上第五章13節所記載ê,講大衛「到à耶路撒冷後koh選了真chē妃嬪」,卻無說明娶jōa-chē位,m̄-koh已經thang看出大衛iáu感不足,最後koh發生一件伊計畫謀害部下烏利亞,奪取in bó͘拔示芭ê事件等,án-ne已經講出大衛ê pháiⁿ模樣,是後來所羅門敗壞ê主因。Á chiah-ê記錄mā為後來宮廷ê內鬥留落來了一則伏筆。Koh講,chit份簡單族譜並無kā米甲列tī名單中,原因可能是大衛kah米甲無生兒育女,mā有可能後來米甲被伊ê老父掃羅改嫁hō͘拉億ê kiáⁿ帕提有關(參考撒母耳記上廿五:44)。

第6節,chit節講出以色列民族分裂ê一個遠因。北部ê以色列人因為他施波設被押尼珥將軍所控制有關。因為án-ne,作者特別tī chia加上chit句「押尼珥元帥ê勢力jú來jú大」,來形容伊已經擁兵自重,而且無受以色列王他施波設ê控制,因為án-ne chiah會「不斷來爭戰」。 

第7到11節,tùi chit段經文thang看出押尼珥ê權柄之大kah囂張ê態度,已經大大超過他施波設所ē-tàng駕馭。伊雖然不滿押尼珥ê囂張,m̄-koh卻無辦法制裁伊。Á押尼珥mā當tio̍h伊ê面chiù-chōa講,beh帶兵去投效大衛,這hō͘他施波設m̄敢出聲。

第12到16節,經過一陣子ê深思熟慮了後,押尼珥chiâⁿ實採取行動beh背叛伊ê主人他施波設去投效大衛ê陣營。伊派心腹去大衛hia講,如果大衛kah伊立聯盟ê約,伊就會幫助大衛統一以色列全國。就án-ne大衛同意押尼珥ê提議,問題是:大衛為甚麼肯hō͘押尼珥做chit種動作?真可能是:大衛認為án-ne ē-tàng減少真chē不必要ê「爭戰」,thang避免造成koh khah chē以色列同胞ê傷害。Á過去帶兵kah大衛爭戰ê,就是押尼珥。因為án-ne,伊來歸降等於kui個北部以色列lóng投降仝款。大衛則提出另外一個條件, ài押尼珥kā伊ê前bó͘米甲帶tńg來。大衛會提出chit-ê條件真可能有一個用意:beh hō͘以色列國ê人民認同大衛是掃羅王ê kiáⁿ婿,án-ne,大衛tī繼承王位ê身分上會koh khah合理化。Á米甲mā是他施波設ê阿姊。

其實,大衛chit-ê要求說明伊已經準備好勢,beh統治北國以色列ā。伊會對他施波設提出chit-ê要求,mā是beh hō͘他施波設用國王ê身分正式承認米甲原本就是大衛ê bó͘。Á當大衛提出chit-ê要求ê時,他施波設只有ē-tàng照辦無法度拒絕。他施波設只有ē-tàng硬kā米甲tùi「帕鐵」身邊帶走,而chit件歸還米甲hō͘大衛ê行動,顯然是由押尼珥執行。因為án-ne,當in行到接近希伯崙ê邊界ê時,押尼珥下命令ài帕鐵離開米甲。

第17到19節,為tio̍h beh達成kah大衛立盟約ê動作,押尼珥去對北部以色列族群ê長老說明chit件事。然後mā走去到便雅憫支派去遊說,這是因為便雅憫支派是siōng擁護掃羅ê族群,因為掃羅就是出tī便雅憫支派ê人(參考撒母耳記上九:21)。結果mā得tio̍h便雅憫支派ê人ê同意。押尼珥kā chit pái遊說ê結果帶去希伯崙向大衛報告,目的是beh hō͘大衛知影伊所做ê努力kah成果。Án-ne,tī南kah北兩地ê以色列人聯合起來了後,有可能伊就thang被看做是主要功臣之一。

第20到21節,當伊遊說各支派成功了後,就帶北部支派ê代表二十個長老去見大衛,而大衛則用siōng熱情ê方式,設宴款待chiah-ê代表,這mā是立約應該有ê儀式之一,用來表示歡迎kah接納。押尼珥當tio̍h chiah-ê代表講beh「號召全以色列來擁戴」大衛做王。這mā說明in無koh擁護他施波設做王,等於是廢了他施波設仝款,至少部隊bē koh再支持他施波設,hō͘伊無koh是北部以色列ê國王。Á大衛回應押尼珥ê酬勞,是「保證押尼珥ê安全」,因為押尼珥án-ne做,等於背叛他施波設。Koh講,押尼珥mā真清楚知影約押對亞撒烏被刣ê事件,當teh等機會beh報仇。因為án-ne,大衛答應hō͘ in保證「安全」,這mā是in彼此之間立盟約ê一個附帶條件。

重新查詢 專卷研經 撒母耳記下系列
錯誤回報,請聯繫comm[@]fhl.net