撒母耳記下 3章31節 到 3章39節   背景資料  上一筆  下一筆
Chit段經文koh一pái強調有關約押刣死押尼珥ê事件,大衛完全是無辜ê。因為大衛若是刣死無辜ê命,就會ná親像拿八ê bó͘亞比該當時阻止大衛殺害拿八ê時所講ê:「Hit 當時,我ê 主m̄ 免為tio̍h 流無罪ê 人ê 血,申家己ê 冤,致使有甚麼憂悶,á 是心內家己責備。(全民版)」(撒母耳記上廿五:31)身為一國之君,若是濫刣無辜,bē是一個好君王,chit-ê觀念是非常重要ê信仰認知。因為án-ne,當約押殺害押尼珥了後,引起大衛極大ê憤怒,m̄-koh mā顯示大衛對tī擁兵自重ê約押,已經無約束能力。因為án-ne,伊chiah會感慨ê講「我無法度應付」chit句話。大衛用非常哀榮ê方式,辦理押尼珥ê喪事,這mā說明大衛beh hō͘北方ê以色列人知影,大衛對押尼珥ê死,確實是無辜ê。

第31到32節,tùi chia thang看出大衛ê憤怒kah悲傷之深,伊直接「命令約押kah伊ê部屬lóng拆裂衫褲、穿麻衣,為押尼珥哀哭」,這無疑是對約押極大ê譴責,m̄-koh大衛mā只有ē-tàng án-ne,卻無法度對約押ê違抗命令hō͘ in任何制裁、懲罰。伊親自為押尼珥舉行隆重ê葬禮,有ná國葬ê隆重,而伊「親自跟tòe tī棺木後面行」,單是án-ne就hō͘北方以色列人心服。大衛án-ne做,thang講達tio̍h兩個效果,一是對約押有震撼kah教示ê作用,二是hō͘北方以色列人感受tio̍h安慰,而認同大衛是無辜ê。

第33到34節,這是大衛為押尼珥所寫ê輓歌,清楚表示押尼珥是hō͘謀害ê。Tī大衛ê心目中,押尼珥是一個有智慧、聰明人,若無,伊bē主動來kah大衛談和解ê事,因為伊知影國家局勢ê轉變,而且知影怎樣tī雙方對敵之下,hō͘傷害降到siōng低ê程度。Mā thang講,大衛ê詩句,已經teh說明約押chiah「像戇子」,卻m̄是押尼珥。Tī chit首詩中,大衛o-ló押尼珥是一個自由人,是一個腳手都無被捆綁ê人,mā tī chit輓歌中,伊控訴約押是親像暴徒仝款殺害押尼珥。

第35到39節,大衛用真chē方式來表明對押尼珥被殺害ê事件,伊是清白ê。並且因為án-ne得tio̍h全體以色列人民ê信賴,知影伊無參與chit件謀害ê事。大衛甚至肯定講以色列「死去一位偉大ê 將領」,伊並無因為伊是對敵一方ê 將領,就抹滅伊生前ê功績。至少,押尼珥帶領北部以色列歸順大衛統治,減少了以色列民族彼此之間ê仇恨、互相殘殺,這就是「偉大ê 將領」應該有ê態度。M̄-koh大衛mā同時感慨家己雖然是上帝選立ê王,卻是「bē-tàng為力」、「無法度應付」,約押殺害押尼珥ê行踏,因為約押確實是伊手下ê大將,擁有強大ê軍權。這mā說明大衛心中一直會記tiâu chit件事,等待懲罰約押ê機會來到。

重新查詢 專卷研經 撒母耳記下系列
錯誤回報,請聯繫comm[@]fhl.net