撒母耳記下 24章1節 到 24章9節   背景資料  上一筆  下一筆
Tī大衛執政ê時代,m̄-nā發生第廿一章ê旱災,mā發生第廿四章chia所提ê「瘟疫」,這lóng teh表示雖然大衛是上帝所賜福、揀選ê君王,m̄-koh並無表示一切lóng安然無事,mā是會tú-tio̍h極大ê困境kah災難。Á tī chiah-ê大災難來臨ê時,怎樣去走chhōe解決之道?án-ne chiah是一位領袖呈現出來ê信仰內涵。

Chit件發生tī大衛治國期間ê瘟疫災難,mā同時記載tī歷代志上第廿一章1到28節,表示確實有發生過chit件災難,後來大衛懇求上帝憐憫kah赦免,而hō͘瘟疫會得thang解除。M̄-koh因為瘟疫ê緣故,已經造成高達七萬以色列人民死亡。

Chit段經文記載大衛命令約押去進行人口調查,m̄-koh約押遲疑,而大衛卻執意ài beh進行chit件人口調查ê事件。Chit件記事thang對照歷代志上第廿一章1到7節所記載ê來看。

第1到2節,撒母耳記講「上主koh向以色列人發大受氣,所以激動大衛來對敵in」。M̄-koh作者並無說明到底發生甚麼事,á是以色列人民有甚麼無好ê行為,hō͘上帝會koh一pái發出大受氣?koh講,chia有一個真重要ê介系詞「koh」,表示這是續接第廿一章1到14節所發生ê旱災之災難後無久所發生ê事件。

Chia講大衛決定去調查人口,是因為上帝「激動大衛來對敵」以色列人民。M̄-koh歷代志作者認為是「撒旦對敵以色列人,hō͘大衛定意進行戶口普查」。值得注意ê是chia用「上帝激動」,表示上帝hō͘大衛kā心內中ê意念hō͘暴露出來,hō͘伊隱藏不住,並m̄是大衛本來無chit種企圖,其實伊是有chit種用意,這thang tùi第10節ê描述看出來。因為án-ne,歷代志作者ê用句就真清楚表示,這是大衛受tio̍h撒旦控制有ê結果。

原本統計人口,對一個國家來講是非常重要ê事。因為這kah徵兵、抽稅有密切關係。民數記第一到四章lóng有記載以色列人出埃及進入曠野了後,bat進行一pái全面性ê人口普查。耶穌降生ê hit年,羅馬皇帝就bat下令進行戶口普查(參考路加福音二:1)。後來大衛晚年透過chit項人口調查,徵召人民當義務勞工,並且為tio̍h án-ne iáu設立了「勞工部長」(參考二十:24)。Á所羅門則發揮了chit項「徵召勞工」ê政策非常「成功」(參考列王記上五:13、15)。大衛命令約押去執行chit項全國人口普查ê工作。

第3到4節,約押所講ê chit句「為甚麼ài做chit項事neh」,就thang看出伊對大衛chit項命令有淡薄á有意見。歷代志上第廿一章3節甚至加上約押講了chit句「做chit項事hō͘全民犯罪」,可見chit件事並m̄是出tī上帝旨意,卻是大衛家己想beh做ê事。因為án-ne,約押認為大衛chit pái想beh清查人口,背後一定有無好ê動機。即使約押已經提出警告,大衛iáu是「堅持beh約押kah伊ê部屬服從伊ê命令」去做chit件招惹民怨ê事。值得注意是,大衛並m̄是beh行政官去執行chit項命令,而是beh約押kah伊ê部下去執行,這已經teh暗示chit項人口調查確實是kah相刣ê計劃有關係,因為需要動員thang用兵力。

第5到9節,真詳細地描述約押kah伊ê部下去執行大衛chit項調查人口之政策,而伊mā確實徹底地完成chit項命令。Chit項人口普查所花費ê時間,共計長到「九個月koh二十工」。約押提出調查結果ê報告是:以色列thang帶「武器ê壯丁總數八十萬」,而tī猶大則有「五十萬」。Chia所講ê「帶武器ê壯丁」,意思是teh指「二十歲以上ē-tàng作戰ê cha-po͘人」(參考民數記一:3、18、20)。M̄-koh這數字kah歷代志所登錄ê人口無仝;tī歷代志登記ê人數是「以色列ē-tàng相刣ê壯丁有一百一十萬名;猶大ē-tàng相刣ê壯丁有四十七萬名。」歷代志作者特別說明約押「無調查利未支族kah便雅憫支族ê人數」,理由是「因為伊無贊成王ê命令」。約押án-ne做mā有另外一種理由,一是利未族人lóng是屬tī祭司族,in本來就m̄免參與軍事行動。Á無對便雅憫族ê人民進行調查,真可能是為tio̍h避免koh一pái發生分裂ê事件(參考二十:1)。

重新查詢 專卷研經 撒母耳記下系列
錯誤回報,請聯繫comm[@]fhl.net