撒母耳記下 17章15節 到 17章29節   背景資料  上一筆  下一筆
當戶篩ê計謀取代了亞希多弗了後,伊tī宮廷中ê地位自然就水漲船高。伊知影大衛採用伊ê意見,隨時差密hō͘去通報大衛知影,thang hō͘大衛先躲過押沙龍ê追殺,同時mā等於是kā此計而誘hō͘押沙龍離開耶路撒冷城,chit點chiah是kui個計謀ê重點。Koh講,chit段經文mā說明一個重要ê信仰告白:戰爭並m̄是在tī兵員jōa-chē,武器chē少,重要ê是有無上帝ê幫助?大衛chit-ê邊雖然人單力薄,m̄-koh卻有上帝感動民眾主動提供補給品,這說明以色列民眾iáu-koh支持伊,tī siōng危急ê時刻,lóng願意幫助伊。

第15到16節,就ná親像大衛ài戶篩tńg來到宮廷,繼續伊本來tī宮廷ê謀士角色,m̄-koh主要目的是beh成做大衛ê「眼線」,kā押沙龍ê一舉一動通報大衛知影(參考十五:34)。照頂pái大衛交帶伊ê,kā所知影ê情報轉告hō͘兩位耶路撒冷祭司—撒督kah亞比亞他(參考十五:35)。戶篩就照指示做。伊同時建議hō͘大衛,ài伊趕緊帶兵kah所有隨從、家眷lóng到約旦河東邊去避難,án-ne,大衛kah所有跟隨者「chiah bē致使被消滅」。因為押沙龍beh聚集全國大軍,尚且需要一段時間,而這為大衛爭取渡過約旦河避難ê時間。

第17到20節,照第十五章36節ê記載,撒督ê kiáⁿ亞希瑪斯kah亞比亞他ê kiáⁿ約拿單,就是負責擔任信差,走腿傳達消息hō͘大衛。M̄-koh in兩人可能因為形跡thang疑,終其尾hō͘人發見而通報hō͘押沙龍,押沙龍特別派去搜查,in趕緊bih起來tī「巴戶琳」一口人ê井內。chit家人願意收留,而且kā in兩人隱藏起來,而且協助藏匿chit兩位信差ê,m̄-nā是先生,卻是連bó͘ mā參與有份,而且真聰明地用麥á掖tī井蓋頂面,thang好掩遮藏匿ê所在。果然這方式奏效。押沙龍派去搜查ê人,最後只好無功而tńg去。

第21到22節,chit兩位信差趕緊kā所得tio̍h ê消息傳達hō͘大衛。In同時建議大衛「趕快渡河」,這是照戶篩提出ê建議。Chia講是「亞希多弗籌謀追擊王」,這是teh指此追擊大衛ê計謀是亞希多弗提出來ê。M̄-koh押沙龍採用ê卻是戶篩ê策略。大衛m̄敢怠慢,趕緊帶領侍衛軍隊kah所有跟tòe ê家眷、臣僕lóng渡過約旦河,而且連夜行動,顯示情況危急。

第23節,當亞希多弗因為chit件計謀無被採納,就tńg來故鄉「基羅城」(參考十五:12)去自刣。伊先kā死後ê事辦理好chiah自刣,thang看出伊是一個思路非常細膩ê人。伊知影當沙龍無採用伊ê策略,而用戶篩,伊就知影押沙龍一定會失敗。因為án-ne,若是大衛班師tńg來朝,重掌政權,伊必死無疑,因為這等於是叛國罪。Koh講當押沙龍聽伊ê意見了後,koh去詢問戶篩,ná mā表示伊tī押沙龍ê陣營中已經「失勢」。就算chit pái出征討伐成功,kan-taⁿ會hō͘戶篩tī押沙龍面前koh khah受重視而且重用,而伊koh khah可能teh鬥爭中被侮辱得koh khah chē。

第24到26節,「瑪哈念」是約旦河東岸ê一個市集城市,mā是重要大城,chit-má大衛逃難來chia城,免得被押沙龍追殺。Á當押沙龍聽tio̍h大衛已經渡過約旦河,伊一屑á 都無躊躇地就率領大軍渡河。

第25節ē-sái講是一份簡略ê族譜。作者用chit份族譜tī chia,是有用意beh說明仝款tī大衛家族內部,因為同父異母兄弟姊妹之間ê關係,並m̄是真和諧,甚至有對立ê現象,ná親像押沙龍刣死暗嫩ê事件。

chit-má是兩軍分別紮營;押沙龍kah伊ê部隊tī「基列」紮營。Á大衛則tī瑪哈念。

第27到29節,作者khah強調一個重點:無論大衛tī tó位,lóng會tú-tio̍h支持伊ê人。相對ê,押沙龍並無一定是án-ne,巴戶琳ê cha-bó͘人隱藏大衛ê信差就是一個例。這真清楚表示出押沙龍ê叛變,並無被以色列人民所支持。

亞捫族ê「拉巴人朔比」是歡迎大衛ê三位代表之一。伊真可能就是第十章1節所記載拿轄王ê kiáⁿ哈嫩ê兄弟。亞捫人bat侮辱大衛ê特使,後來被大衛派兵攻打,而且投降tī大衛統治之下(參考十二:26—31),in並無利用大衛落魄逃難ê時,宣告獨立伊去,顛倒,是提供各種豐富ê食物hō͘大衛kah伊ê跟隨者。

「羅‧底巴人亞米利ê kiáⁿ瑪吉」,伊bat幫助過大衛好朋友約拿單ê kiáⁿ米非波設(參考九:4)。伊應該是一個富有ê財主,對受難者lóng會伸手救助。

「基列ê羅基琳人巴西萊」,第十九章31節講伊是一個八十歲ê老人,真富有,後來大衛beh大大將伊犒賞,伊婉謝。

以上chit三個人提供食物kah補給品hō͘大衛kah跟隨者,這是一件非常危險ê事,因為若是押沙龍討伐大衛得勝,in一定會有性命危險,而且會tú-tio̍h抄家滅族ê威脅。M̄-koh in敢án-ne公然支持大衛,mā是teh表明in對大衛ê忠心。而且in提供ê,是非常重要ê軍糧,對大衛來講,若是無chiah-ê補給品,大衛kah伊ê跟隨者m̄免押沙龍來追緝,就會自告投降。

重新查詢 專卷研經 撒母耳記下系列
錯誤回報,請聯繫comm[@]fhl.net