撒母耳記下 15章1節 到 15章12節   背景資料  上一筆  下一筆
Ná親像頭前已經提起過ê,大衛犯罪了後,伊ê厝就發生連串風暴,而chiah-ê lóng kah大衛犯罪ê事件有密切關係。約押是大衛ê外甥,m̄-koh mā是大衛手下大將,而且知影大衛設計害死烏利亞事件。因為án-ne,tī約押心目中,大衛已經m̄是一位值得尊敬、驚惶ê國王。約押設計hō͘殺害兄哥暗嫩ê押沙龍,tùi基述tńg來到京城耶路撒冷,並且替伊向大衛請求,hō͘伊ē-tàng kah大衛王見面。M̄-koh押沙龍顯然並無因為án-ne感謝約押ê保薦,mā無因殺害兄哥暗嫩有悔改ê意思。反tńg tī tńg來到京城耶路撒冷後,積極進行爭奪王位ê計劃。伊當時會謀害長兄暗嫩,mā是為tio̍h藉這獲取繼承王位ê優先權。這tú好說明大衛多妻所帶來ê惡果。因為bó͘多,kiáⁿ眾多,大家lóng想beh爭奪koh khah chē ê利益,chiah會發生勾心鬥角、爭權奪利ê宮廷事件。摩西律法就有教導講「王bē-tàng有真chē后妃,免得被誘惑棄sak上主」(參考申命記十七:17a句)。撒母耳記下第十五章就是記載押沙龍設計奪取王位ê經過,以及大衛為tio̍h beh保命,逃離王宮ê記事。

可能因為連年戰事不斷ê關係,致使大衛疏忽了民政事務,m̄-koh大衛ê真chēkiáⁿ並無替伊分擔chiah-ê國家事務,而chiah被赦免tńg來ê押沙龍,iáu看準了大衛chit-ê缺失想趁機會打擊;伊m̄-nā無因為家己犯錯,得tio̍h老父大衛ê赦免、接納,而願意好好á協助老父大衛料理國政,kā功贖罪。顛倒,伊利用chit-ê機會為大衛製造koh khah chē民怨,以爭取家己tī以色列人民中ê美好聲譽,為奪取王位作準備,這tú好mā為大衛王朝末期國政、家事變亂留落來了一個伏筆。

第1到4節,tùi第1節來看,大衛kah-ná已經恢復了伊ê官職,因為án-ne伊ē-tàng擁有「一台戰車kah真chē馬匹」、「派五十個護衛為伊開路」,表示伊有王儲ê角色á是身分。伊故意利用人siōng chē ê時chūn出現tī耶路撒冷「城門口」、並且熱心地替民眾解決糾紛,以提高伊tī民間ê地位kah聲望。伊mā利用機會挑撥民眾對大衛重南輕北ê怨恨,而且iáu故意加上chit句「可惜王無派人來聽你ê訴訟」,kah「jōa-ni̍h-á希望我是一個法官」,這兩句話表示如果伊來掌王權,一定bē出現chit種現象。這teh暗示伊會比大衛koh khah好,因為伊ē-tàng hō͘人民一個公道、公正ê司法。Chit種話,其實mā teh暗示:因為老父大衛ê放縱,無hō͘暗嫩強暴小妹她瑪ê事,受tio̍h應得ê審判。所以押沙龍私自懲罰暗嫩—hō͘ in死刑,就是beh為小妹她瑪討回一個「公正ê審判」。

第5到6節,chit兩節koh khah thang看出押沙龍為tio̍h beh奪取王位,用極柔軟ê身段,m̄-nā拒絕人民向伊伏拜,並且「chim嘴」人民,hō͘以色列人民有一個錯覺,認為伊是一個親民、愛民ê siōng好君王人選。

第7到8節,chia講「四年後」,意思是teh指過了一段適當ê時間。M̄-koh希伯來文聖經是用「四十年」。若是án-ne,押沙龍就至少已經三十gōa歲以上,而chit時ê大衛,應該mā有七十gōa歲à。因大衛是三十歲ê時tī希伯崙登基為以色列ê王,伊統治以色列共計有四十年(參考五:4)。

Án-ne,押沙龍chiah-ê動作真可能是發生tī大衛執政ê最後十年左右。押沙龍藉tio̍h想beh去「希伯崙」iáu伊向上帝所許ê「願」,請求老父大衛hō͘伊去。伊會想beh去希伯崙,真可能是因為當大衛kā首都遷往耶路撒冷ê時,希伯崙ê人民非常不滿意,因為大衛是tī希伯崙被猶大人膏立為王(參考二:4),後來北部以色列人mā是來希伯崙膏伊為王(參考五:3)。結果大衛卻是tī攻落耶路撒冷了後,就離開希伯崙。因為án-ne,這jōa-chē kah希伯崙人心中不滿ê情緒有關。Án-ne,伊thang kā希伯崙當做奪取王位ê基地,萬一奪權計畫失敗,大衛想beh掠伊,希伯崙人有可能mā會支持伊,á是hō͘伊有夠額時間逃離。

第9到10節,大衛怎樣想無想tio̍h,押沙龍是一個奸巧ê kiáⁿ,其實,tī伊謀害兄哥暗嫩ê事件上,應該就thang看tio̍h伊ê chit種詭計。大衛不防,允准伊去希伯崙。Á押沙龍就利用chit pái到希伯崙ê機會,另派密hō͘去各支派串連背叛大衛,擁護伊tī希伯崙做王。

第11到12節,押沙龍mā tùi耶路撒冷帶兩百個m̄知內情ê跟隨者,以及大衛ê顧問「亞希多弗」同齊到希伯崙去,就án-ne,押沙龍ê聲勢大漲,依附者jú來jú chē。「亞希多弗」,是大衛ê「親家公」,伊是拔示芭ê阿公(參考十一:3、廿三:34),伊為甚麼beh參與chit項政變?是m̄是mā被押沙龍欺騙而跟tòe去?á是伊mā是押沙龍參與政變ê獻策者之一?並無資料thang參考。M̄-koh伊確實是一個足智多謀ê策士。M̄-koh mā因為伊ê獻策,hō͘大衛感覺非常懊惱kah艱苦心。

重新查詢 專卷研經 撒母耳記下系列
錯誤回報,請聯繫comm[@]fhl.net