撒母耳記下 11章1節 到 11章17節   背景資料  上一筆  下一筆
第十一到十二chit兩章是記載有關大衛王犯姦淫、刣死無辜ê之罪行,以及先知拿單受上帝差遣對大衛王講出嚴厲譴責ê記事。M̄-koh chit件事並無出現tī官方文獻ê歷代志中,真有可能chit-ê資料是記載tī先知拿單所記載之史料裡(參考歷代志上廿九:29),m̄-koh並無被官方史料所接受。Chit兩章ê背景,是第十章所記載以色列軍隊正teh對抗亞捫軍隊,大衛並無親自帶兵出征,卻是派大元帥約押帶兵出去攻打亞捫,伊留tī宮中,結果因為看見家己愛將 ê bó͘拔示芭而做出無應該做ê罪惡之行為。

Chit段經文是記載大衛無tòe軍出征,家己留tī耶路撒冷王宮內,m̄-koh卻因為án-ne而看tio̍h附近房舍中,當teh沐浴ê烏利亞bó͘拔示芭。Tī大衛王看起來,拔示芭ê美,有ná仙女般ê豔麗,因為án-ne,隨時想出所有ê辦法beh奪tio̍h拔示芭入室做bó͘。其實,本來大衛並無想beh娶拔示芭入宮ê念頭á是計劃,卻是只想beh kah拔示芭同床而已。M̄-koh卻因為拔示芭有娠,而且烏利亞koh拒絕tī交戰期間kah bó͘同房,hō͘大衛原本計畫kā有娠歸入tī烏利亞身上ê事失敗。M̄-koh大衛驚此姦淫ê醜事暴露出來,就án-ne chiah想出所有ê辦法beh害死拔示芭ê丈夫烏利亞。Chit段經文就是teh描述大衛想beh盡一切辦法,beh利誘烏利亞tńg去厝裡kah bó͘拔示芭同房ê計劃,m̄-koh都無成功ê經過。

第1節,chia一開始講「第二年春天」,tī第十章14節記載以色列軍隊kah亞捫、敘利亞等聯軍第一回合交戰,以色列軍隊phah贏了後,隨時班師tńg來營,無趁勝追擊,原因就在tī寒天季節已經來臨,tī補給kah軍伍調動上並m̄是真方便。Chia講是tī「第二年春天」chit-ê時間真可能就是春季收割了後ê時間,mā是氣溫tńg來升ê時刻,是適合軍事行動ê時chūn。「大衛派約押率領部隊」出征,伊家己留tī耶路撒冷,而值得注意ê是chit pái mā kā「約櫃」扛出tòe軍隊去征(第11節),為甚麼大衛會án-ne做?咱無清楚。Chit pái ê戰役,mā是以色列軍隊phah贏。

第2到5節,大衛因為看見拔示芭teh洗身軀而起了淫亂ê心念,派人kā拔示芭帶來同房,致使拔示芭有娠。拔示芭是迦南地原住民「赫人」烏利亞ê bó͘,而伊mā是屬tī外族人「以連ê cha-bó͘-kiáⁿ」。Tī大衛ê軍隊中,有「赫人」加入伊ê行列中(參考撒母耳記上廿六:6)。烏利亞mā是大衛軍營中ê kā官,並且是大衛軍隊中被列為「三十勇士」ê成員之一(參考廿三:39)。Á「以連」mā是大衛身邊ê「三十勇士」之一,是基羅人亞希多弗ê kiáⁿ(參考廿三:34)。Tùi chia可見烏利亞kah以連之間ê關係是非常密切ê,in lóng是大衛手下siōng忠實ê部下。Tī第4節ê「拔示芭ê月經tú潔淨」chit句話非常重要,表示拔示芭有身孕,是kah大衛同房ê關係,而chit對拔示芭來講,是一件非常嚴重ê事,因為這表示伊犯淫亂罪。Tùi伊寫phoe而且託人帶去hō͘大衛王,thang看出問題ê嚴重性已經到à牽涉生kah死ê性命大事。

第6到10節,大衛聽tio̍h了拔示芭有娠ê事,開始緊張起來。照摩西律法ê規定,tio̍h處死刑(參考利未記二十:10)。大衛隨時ài約押kā chit位饒勇善戰ê軍官烏利亞tùi前線kā伊chhōa tńg來。大衛假做關心前線戰況,其實chit種問話,只不過是一種藉口而已。伊真正用意是命令烏利亞「tńg去厝裡歇睏一下」,並且iáu派人帶「禮物」跟tòe去,這是企圖盯tio̍h烏利亞是m̄是真正有tńg去厝裡。若是有,就ē-tàng掩蓋bó͘有娠是kah大衛有關係。M̄-koh tī以色列軍隊有一個傳統,就是tī戰爭期間,戰士bē-tàng kah bó͘同房。因為án-ne,如果烏利亞tńg去厝裡,即使無kah bó͘同房,m̄-koh只要tī厝裡過瞑,就thang被以戰ê時kah bó͘同房ê罪名被起訴判處死刑。因為根據摩西律法ê規定,以色列軍隊「tī戰地紮營ê時chūn」,tio̍h「遠避」任何會hō͘軍人tī「禮儀上無清氣ê事」,甚至包括cha-po͘人暗時睏有「夢洩而無清氣」ê事,lóng需要離開軍營,而且tio̍h先潔身了後chiah thang tńg來營區(參考申命記廿三:9—11)。Á tī戰爭期間若tńg去厝裡bó͘同房,就會hō͘人看做是無清氣ê行為(參考撒母耳記上廿一:5)。因為án-ne,以色列軍隊絕對m̄准戰爭期間發生tńg去厝裡kah bó͘同房ê事。因為in會kā相刣看做是一件神聖ê事,何況chit pái ê戰役有約櫃參與出征(參考十一:11)。

「m̄-koh烏利亞並無tńg去厝裡」,chit句話講出kui個故事ê重點。伊堅持遵守以色列軍隊ê傳統軍紀,而且,為tio̍h beh表示確實清白,伊m̄-nā無tńg去厝裡,iáu kah「王ê守衛睏tī宮殿門口」,án-ne,王ê守衛mā thang當伊ê證人,證實伊確實無tńg去厝裡kah bó͘同房。Á大衛問烏利亞「為甚麼不tńg去厝裡」ê話,並m̄是teh表示伊關心,卻是伊koh khah擔心烏利亞聽tio̍h了bó͘有不軌ê風聲。其實,這mā看出了君王家己不守規律,而部下卻堅守規矩,tùi chia看出二者之間ê差別,mā是引起上帝憤怒ê原因。

第11到13節,chit段經文是烏利亞回應大衛詢問為甚麼不tńg去厝裡睏ê理由。伊提起軍隊lóng tī前線,約櫃有tī hit-pêng,部隊tī野外紮營(表示生活lóng真精省),伊絕對bē-tàng家己tńg去厝裡kah bó͘同床。M̄-koh大衛卻一再ài烏利亞tńg去厝裡睏,m̄-koh烏利亞無當面抗拒,iáu是仝款堅持不tńg去厝裡。Á大衛卻故意hō͘伊lim醉酒,想用chit種方式hō͘烏利亞陷落in設計ê陷阱中。M̄-koh烏利亞照常堅持守tiâu前線戰爭期間,不tńg去厝裡kah bó͘同床ê規律。

第14到17節,chit段經文描述大衛第三pái計謀陷害烏利亞,伊為tio̍h beh殺害烏利亞已經是到à無所m̄免其極ê惡質手段。前兩pái ê失敗,chit pái伊決定kā烏利亞刣死。伊寫phoe hō͘元帥約押,信ê內容真清楚,就是beh hō͘烏利亞tī前線siōng危險ê地帶,陷入孤單一個人,lóng無奧援而「戰死」戰場。大衛chit種做法真清楚是teh無辜ê人,這mā是上帝siōng無法度原諒ê行為(參考出埃及記廿三:7,列王記下廿一:16、廿四:4,箴言六:16,耶利米書七:6、廿二:3)。Á約押是參與chit件害死烏利亞ê共犯。大衛認為伊這殺害無辜ê密令無人知影,m̄-koh約押是執行這命令者,至少伊知影大衛做chit件無應該做ê事loh。Tùi第17節ê「敵軍tùi城裡出來,突擊約押ê部隊」tùi chit句話,thang看tio̍h兩點:一是以色列軍隊原是kā亞捫人ê「拉巴城」包圍teh(參考撒母耳記上十一:1),taⁿ圍城ê以色列軍隊被亞捫人看tio̍h有個缺口,chiah hō͘ in想beh突破重圍,走chhōe外援,á是用突破被圍城ê困境,展開內外夾攻ê策略。二是這真可能是約押故意弄出來ê破口,為tio̍h beh完成大衛計劃陷害烏利亞ê命令,m̄-koh卻因為án-ne hō͘ koh khah chē ê軍官有kóa戰死,thang看出大衛為tio̍h beh殺害烏利亞,卻mā因為án-ne而害死其他軍官,代價ē-sái講是非常大。伊完成了「赫人烏利亞mā陣亡」chit-ê任務。M̄-koh伊bē記得上帝痛恨這一切。

重新查詢 專卷研經 撒母耳記下系列
錯誤回報,請聯繫comm[@]fhl.net