使徒保羅Tī chit段經文中，提起一個重要觀念：上帝會賜福hō͘ hiah-ê幫助貧困ê人，m̄-nā án-ne，chit項幫助別人，等於teh見證上帝ê慈愛，自然會得tio̍h上帝賞賜ê koh khah chē恩典。

第10到12節，tī chia使徒保羅koh一pái用「種籽」，說明上帝對甘心樂意行善賑濟sàn-chhiah人ê賜福，就是賜hō͘ chit種人koh khah chē ê種籽。換句話講，甘心樂意行善ê人，就kah-ná掖種籽仝款，而上帝賜福hō͘ chit種人ê方式，就是賜福hō͘ chit種人koh khah chē ê種籽，這就產生一種循環：種籽掖jú chē，收成自然就會增加。使徒保羅提醒哥林多教會信徒，會幫助別人ê，等於是teh幫助人知影怎樣感謝上帝。Tio̍h注意ê是感謝上帝，m̄是感謝濟助ê人，因為所有ê一切，lóng是tùi上帝來ê賞賜。

第13到14節，使徒保羅講chit項救助別人，等於是忠實tī福音ê事工，chit點認bat非常重要。一間教會有否忠實tī福音事工，就kah這間教會是m̄是有teh救助需要者ê事工上盡心盡力。因為án-ne做，就是teh榮耀上帝。而捐贈á是施與ê人，所得tio̍h ê 回報，就是受贈ê人ê代禱。祈禱乃是kah上帝對話。Chiah-ê受tio̍h救助ê人ê祈禱中，如果提起捐贈者ê名，等於是tī kah上帝對話中提起捐贈、施與者ê名，這意義是非常大ê。

因為祈禱mā是hō͘人kah上帝結連做伙siōng好ê方法，當受tio̍h恩惠ê人，tī祈禱中記念幫助伊ê人ê時chūn，mā等於是teh祈求上帝永遠記念甘心樂意幫助人ê人。這mā就等於是teh祝福chit-ê人仝款。