一般來講，第一到九章是hō͘人看做使徒保羅寫hō͘哥林多教會ê第四封書信。使徒保羅寫書信lóng有一個共同特色，就是先會自我紹介，然後請安，續落來就是o-ló，koh來就會討論伊書信中想beh講ê問題。其實，使徒保羅書寫ê信件之模式，mā是當時流行ê一種書信格式。

使徒保羅一開始就說明家己是「奉上帝ê旨意作基督耶穌ê使徒」，這真清楚teh表明伊m̄是經過使徒會議票選出來ê「使徒」（參考使徒行傳一：21—22）。Koh講，伊表明家己就是「使徒」，chit-ê詞ê意思是teh指「奉差遣」，這kah使徒行傳第九章15節有關係。

Koh講，chia真清楚表示伊寫chit封信，是kah「提摩太」同齊聯名寫ê。提摩太是使徒保羅tī第二pái傳福音ê時，tī路司得tú-tio̍h ê而揀選出來當伊ê助手ê，是一個人人o-ló ê少年人，老父是希臘人，老母是猶太人，使徒保羅親自為伊行割禮（參考使徒行傳十六：1—3），並當伊是「tī信仰上ê真kiáⁿ」（參考提摩太前書一：2），後來差派伊去哥林多教會訪視該教會ê情形（參考哥林多前書十六：10）。因為án-ne，哥林多教會信徒lóng認bat提摩太，伊講寫chit張phoe，mā帶tio̍h提摩太ê請安hō͘ in。