帖撒羅尼迦前書 5章1節 到 5章28節   背景資料  上一筆
會有等待耶穌基督koh再臨ê信仰,tī早期教會看起來,he mā是世界末日ê時刻來到。因為án-ne,大家就聚集做伙,kā所有ê金錢、財產lóng the̍h-tio̍h聚會ê所在,這mā是早期教會信徒一個重要信仰告白。Tùi使徒行傳第二到五章,thang看tio̍h甚至有ê信徒是為tio̍h beh等待耶穌基督ê koh再臨,變賣所有ê家產,the̍h來教會hō͘大家同齊公用,因為in認為耶穌基督真緊to̍h會koh再臨,伊一再臨,就是世界末日來到。Chit-ê世界lóng會消失,一切lóng會變成新ê。世間chiah-ê財物等物件,lóng會變成無用ê物件。

M̄-koh,「等待」mā是對信心siōng嚴酷ê考驗,一般thang等待一工、一禮拜á是一個月,m̄-koh,若得等待半年、一年了後,甚至teh等待一年、兩年以上,恐驚就需要koh khah chē ê信心來支持。Á當有kóa信徒因為等不及就往生,信徒內面開始有人承受不了chit種失望,漸漸變kah失去信心,帖撒羅尼迦教會mā發生chit種問題。因為án-ne,使徒保羅寫chit本書信,就是用討論chit-ê問題做主題。

第1到3節,chit段經文thang參考馬太福音第廿四章36到37節,耶穌基督真清楚講,無人知影上帝ê審判甚麼時chūn會來臨。使徒保羅就是借用耶穌基督所講ê教導來說明:主koh再臨ê日子,ná親像賊á tī暗時忽然來到仝款,mā像災禍、像有娠ê婦女,忽然陣痛臨盆來到仝款。伊用chit種方式來說明無任何人thang知影主耶穌koh再臨ê日子ê真確時間。

第4到8節,使徒保羅用「烏暗」kah「白晝」來表明基督徒應該是屬tī「白晝」ê人,mā就是有性命希望ê人。因為án-ne,m̄免擔心m̄知koh活ê耶穌基督koh再臨ê日子,因為信靠耶穌基督ê人,lóng會知影怎樣準備,因為án-ne,隨時隨地lóng tī為迎接koh活主耶穌koh再臨而活。伊特別強調基督徒應該是每工lóng真「警醒」,ná親像tī日時仝款hit種清醒,無法度「沉睡」,卻是需要「警醒戒備」。伊tī chia mā用「沉睡」,以及「酒狂」來說明,chit兩個詞lóng是teh指無信耶穌基督ê人,mā就是無真確信仰ê人,chit種人因為m̄知性命ê ǹg望何在,因為án-ne,bē有警醒ê生活態度。伊希望基督徒teh生活態度上是積極、認真正,而且會珍惜每一個時刻,因為伊知影所有ê準備,lóng是為tio̍h beh迎接主耶穌基督ê忽然koh再臨。伊特別提起tio̍h「用信kah疼」做為「頭盔、護胸甲」,表示親像一個勇士準備ài上戰場去相戰一般發揮力量,án-ne就ē-tàng阻擋所有ê誘惑。

第9到11節,tī chit段經文中,使徒保羅提起基督教信仰一個基本ê認bat:所有信靠耶穌基督ê救恩ê人,lóng會因為耶穌基督ê緣故得tio̍h拯救。這mā是聖經所講ê,上帝差遣耶穌基督到世界起來就是beh拯救所有信伊ê人(參考約翰福音三:16)。第10節ē-sái講是chit本書信siōng重要ê一節經文,mā是伊寫chit封書信ê主要原因之一,因為有真chē信徒來不及等到耶穌基督koh再臨,就已經死去à。Ná親像伊寫hō͘羅馬教會ê書信中所提起ê,kah耶穌基督同死ê人,必定mā會kah耶穌基督同koh活(參考羅馬書五:8)。使徒保羅tī chia特別強調,一個信靠耶穌基督為救主ê信徒,無論是已經死去,á是iáu未死,lóng仝款,當koh活ê耶穌基督來臨ê時,lóng bē有區別,大家lóng beh同時享受kah koh活ê耶穌基督同koh活ê歡喜kah福氣。因為án-ne,伊tī chia mā講出一個信仰團契siōng重要ê信仰態度,就是beh彼此鼓勵、幫助。Chia所用ê「幫助」,是teh指「建造」,ná親像起厝仝款,單獨一個人無辦法完成一間安全ê厝thang khiā起,而是beh真chē人同心協力chiah ē-tàng建造出一間安全ê厝。信仰團契mā是án-ne,如果單靠一個人ê努力,chit種厝是真脆弱ê,只有大家同齊來,仝款ê心志,仝款ê疼心,互相扶持,án-ne建造起來ê信仰團契tī根基上chiah會koh khah堅固。

第12到13節,chia提起tio̍h「尊重」chit-ê動詞,其希臘文是「eidenai」,意思是teh指「認bat」、「了解」。Tī chia mā包含「體諒」ê意思。Ài beh特別注意ê是,使徒保羅tī chia所提起ê「尊重」,是因為chiah-ê被揀選出來ê福音同工是真正有認真「辛勞」工作,chiah會受「尊重」。Chia使徒保羅mā提起tio̍h用「疼心」對待chiah-ê被按立來傳福音ê工作者,chit-ê「疼心」所用ê希臘文就是「agape」chit-ê字。Chit種「疼心」,是真實ê,m̄是表面ê。

第14到15節,使徒保羅勸勉帖撒羅尼迦教會ê信徒,tio̍h「警告pîn-tōaⁿ ê人」,chia「pîn-tōaⁿ」一詞,希臘文是「ataktous」,這是借用軍事用語ê詞彙,指士兵不聽從指示,不按照規矩行動。Mā就是脫隊了,á是違抗命令仝款。這mā表示tī帖撒羅尼迦教會中,有人進入教會中,卻偏偏不守教會規矩,認為家己ê見解siōng正確,bē合群,mā bē合作,無願意遵守大家共同約定ê秩序。使徒保羅認為chit種人,m̄是只有傳道者beh苦勸伊,所有ê信徒lóng有責任約束伊。
	
「灰心」kah「軟弱」對照,這是teh指懍neh ê意思。Tī教會中,lóng是有kóa人真容易就對信仰失去信心,特別是teh指hiah-ê tú-tio̍h迫害就想beh放棄信仰ê信徒。Tī帖撒羅尼迦教會有tú-tio̍h chit種案例,使徒保羅鼓勵大家面對chiah-ê迫害ê時,大家koh khah需要彼此互相鼓勵,m̄-thang受tio̍h外力ê影響而放棄信仰。

「m̄-可惡報惡」,chit句話mā是伊寫phoe hō͘羅馬教會講過ê話(參考羅馬書十二:17)。使徒保羅認為伸冤ê主權tī上帝,上帝一定會「報應」。「為別人ê好處設想」chit句話,是比前一句ê「bē-tàng惡報惡」來得koh khah積極。

第16到18節,這短短三節,卻講出使徒保羅對一間有信仰見證ê基督教會ê期待kah ǹg望,mā ē-sái講是伊為一間真正有美好信仰見證ê教會,擬出了一個準則,就是常常「喜樂、祈禱、感謝」chit三項ê心境。Chia ê「tio̍h常常喜樂」,指ê是tī受tio̍h迫害ê chit種惡質ê環境下,tio̍h憑對koh活性命ê ǹg望,心中有喜樂。因為受迫害是為tio̍h福音ê緣故。Á tio̍h「常常祈禱」,這mā是不時被引用來勸勉今á日ê信徒ê一節經文。祈禱乃是kah上帝對話,mā是基督徒性命力量ê來源。會祈禱ê人,就是teh表明伊ê心中有上帝。然後伊講「tī任何環境中lóng tio̍h感謝」,chit句話koh khah清楚講出基督教信仰ê特性,因為一個有真實基督教信仰ê人,伊真清楚知影有án-ne ê一工,性命會koh活tī上帝面前。因為án-ne,在世間所經歷到ê各種境遇,lóng是為tio̍h將來koh活作準備。

使徒保羅強調以上三項lóng是tùi上帝來ê旨意,伊án-ne講,是為tio̍h beh鼓勵帖撒羅尼迦ê信徒努力以赴,m̄-thang聽tio̍h伊án-ne講,就認為無可能,因為信仰乃是一門性命ê功課,需要用心學習,mā需要學習克服所tú-tio̍h ê困難。

第19到22節,chia「抑制」一詞,原本是teh指kā火消滅ê意思。聖神ná親像一把火,會hō͘人ê性命火燒起來。有聖神充滿ê人,就是性命充滿活力ê人。仝款ê,有聖神充滿ê教會,會充滿tio̍h活力,hō͘人感受tio̍h教會積極tī福音ê事工上做見證。「m̄-thang輕視信息ê傳講」,chia所講ê「信息」,是teh指上帝ê話。使徒保羅強調聖神siōng好ê恩賜,就是傳講起帝拯救ê信息。M̄-koh上帝ê話一定tio̍h忠實傳達,chit點是非常重要ê。使徒保羅tī chia koh一pái說明等待耶穌基督koh再臨ê要件,就是眾信徒想beh保有siōng好ê心靈,就一定tio̍h棄絕邪惡,堅持保守美好ê見證,án-ne chiah ē-tàng談得上準備siōng好ê心靈,thèng候主koh再臨ê日子來到。Á「查驗每一件事」,這對當時瀰漫tio̍h真chē怪異論調誘惑人心ê傳說,確實是一件真重要ê功課(參考歌羅西書二:4、20—23)。

第23到24節,使徒保羅寫chit封書信hō͘帖撒羅尼迦教會一開始就用「平安」,這字原本表示ê意思是「無驚惶」、「無koh有死亡ê威脅」。緊接「平安」ê,就是「聖潔」,而且「完全聖潔」。「聖潔」所表示ê乃是「分別為聖」ê意思。Mā就是有無仝ê意思。伊tī chia特別提起「靈、魂、體」ê「完全聖潔」,意思是teh指一個全人格ê「聖潔」。使徒保羅強調上帝是「信實可靠」ê上帝。所謂上帝是「信實」上帝,就是teh指上帝會照祂所答應ê事去完成。聖經ê作者一再kā咱講,上帝是遵守約ê上帝。

第25到28節,chit段是本書信ê結尾。使徒保羅一再期待帖撒羅尼迦教會ê信徒為伊kah其他同工代禱。伊寫hō͘歌羅西教會ê書信mā是án-ne, ài大家為伊kah其他眾同工傳福音ê事工祈禱(參考歌羅西書四:3)。使徒保羅寫chit封書信,並m̄是只hō͘某某教會ê長老á是執事、代表看ê,而是beh hō͘全體信徒看ê。因為án-ne,伊要求chit封書信tio̍h公開朗讀hō͘大家知影。Mā因為án-ne,chit-ê書信會流傳落來,因為必定有真chē人聽了後,iáu想koh再閱讀一pái á是幾pái。最後chia用「恩典」一詞,表示ê就是koh活ê救恩ê意思。

重新查詢 專卷研經 帖撒羅尼迦前書系列
錯誤回報,請聯繫comm[@]fhl.net