Chit段經文真清楚說明，先知撒母耳tī上帝ê指示下，知影掃羅就是上帝為以色列人揀選ài做君王ê人，而掃羅本人是根本lóng m̄知chit件事。

第15到16節，上帝揀選，上帝會啟示hō͘相關ê人知影。Chit兩節是kui個揀選掃羅為王ê中心經文，表明揀選乃是出tī上帝ê旨意，m̄是出tī人民ê意思。用油膏立一個人為王，有he用油膏立一個人為祭司（參考出埃及記廿九：7），表明chit-ê人身上負有上帝所交託ê使命，伊非常重要ê工作，就是聽從上帝ê旨意做tāi-chì。

第17到18節，上帝hō͘先知撒母耳知影掃羅就是上帝beh揀選出來當以色列人民ê王。

第19到21節，掃羅因為m̄-bat先知撒母耳，iáu teh詢問怎樣chiah ē-tàng chhōe-tio̍h「先見」（kah「先知」仝款意思）ê時，先知撒母耳回答掃羅，並且hō͘ in知影in老父失去ê驢á會chhōe tńg來，同時hō͘伊知影上帝beh揀選ê對象就是伊，這hō͘掃羅感覺驚kah gāng去kah不安。因為伊是屬tī便雅憫支族，而便雅憫支族是以色列十二支派中siōng微小ê，taⁿ，若ài伊出來帶領以色列十二支派，恐驚是一件非常嚴重ê負擔，所以伊chiah-tio̍h撒母耳講「你為甚麼對我講chit種話」。