撒母耳記上 5章1節 到 5章12節   背景資料  上一筆  下一筆
Tùi第五章到第七章1節,chit段經文是記載上帝ê約櫃被非利士人搶奪去了後,所發生ê各種狀況,hiah-ê狀況hō͘非利士人大感不安,並且in認為所遭遇ê各種病症mā lóng是因約櫃所引起ê。因為án-ne,非利士人主動地kā上帝ê約櫃koh送tńg去hō͘以色列人。

約櫃是耶和華宗教ê「聖器」,表面上看起來無甚麼特別,實際上它是代表上帝之聖物。既然是上帝ê聖物,就bē-tàng用隨便ê態度處理,這是非常重要ê一個認bat。Ná親像聖殿是敬拜上帝ê所在仝款,雖講並無表示上帝一定tòa tī其中,m̄-koh既然是屬tī敬拜上帝ê所在,就應該tio̍h用敬虔ê態度看待。若無,kan-taⁿ會惹起上帝koh khah大ê憤怒,而帶來嚴厲ê懲罰,ná親像瑪拿西王tī聖殿裡做上帝無歡喜ê事,tùi án-ne引起上帝發怒,降災懲罰in(參考列王記下廿一:1—6)。

Chit段經文主要teh說明:約櫃雖然kan-taⁿ是一個神聖之記號,m̄-koh卻teh代表是耶和華上帝。任何褻瀆神聖上帝ê行為,lóng會受tio̍h嚴厲ê懲罰。

第1到5節,chit段經文講非利士人擄獲上帝ê約櫃後,就帶tńg來家己ê城市亞實突城,這是非利士人五個城市中ê一個,其餘四個是:亞實基倫、以革倫、迦特、迦薩等(參考六:17)。古代社會,每一個城市lóng有各自ê守護神。Chia提起亞實突城ê守護神就是「大袞神」,這神mā是迦南人所敬拜ê神明巴利神明ê老父,mā是非利士人主要ê神明。被供奉tī迦薩,參孫tī迦薩ê大袞神廟中,最後摧毀了當時在場ê非利士人(參考士師記十六:21-30)。另外一點,古早時相刣,戰敗國ê重要神明mā常常是hō͘對敵ê一方搶奪ê重要物件之一,因為thang kā它當做獻祭hō͘家己ê神明ê禮物。因為án-ne,非利士人kā約櫃扛進大袞神廟裡,mā teh代表講:kā以色列人民ê神用來獻祭hō͘大袞神。M̄-koh非利士人所想ê,tú好kah呈現出來ê景象顛倒;約櫃m̄-nā無成做獻祭hō͘大袞神ê祭品,反tńg是大袞神成做約櫃ê「祭品」仝款,倒塌à。

第5到8節,koh khah慘ê,m̄-nā是大袞神像斷裂四散tī土腳,連亞實突城kah周圍村鎮ê居民lóng因為án-ne連帶受拖累,因為人民身上lóng長了「毒瘡」,chit種病真親像中世紀發生tī歐洲ê「烏死病」仝款,由老鼠傳播ê病菌。為tio̍h án-ne,亞實突城派人去請其他四個非利人ê城市首領來會商,了後,決定kā約櫃轉移到迦特城去。

第9到10節,非利士人怎樣想mā想bē到ê,當約櫃轉移送到迦特城了後,hit-ê城仝款地發生亞實突城人所遇tio̍h ê傳染病「毒瘡」。因為án-ne,in koh再kā約櫃轉送到另外一個城市—以革倫城,結果mā是仝款發生傳染病。

第11到12節,因為án-ne,非利士人ê眾領袖koh一pái會商,因為只要tó一個城市接放約櫃,就會遇tio̍h嚴重ê災難。非利士人即使是向in ê神明求救,mā是枉然。

Chit章經文已經清楚講出,非利士人ē-tàng phah敗以色列人民,m̄-koh,對神聖ê約櫃,這象徵上帝威嚴ê記號是絕對bē-tàng褻瀆。任何褻瀆上帝ê神聖ê人,即使有koh khah大ê能力,mā會遇tio̍h上帝嚴厲ê懲罰。

重新查詢 專卷研經 撒母耳記上系列
錯誤回報,請聯繫comm[@]fhl.net