撒母耳記上 22章1節 到 22章10節   背景資料  上一筆  下一筆
撒母耳記作者teh描述第廿二章有關掃羅去挪伯處分祭司亞希米勒chìn前,先插入幾段大衛逃往迦特王亞吉(參考廿一:10—15)、亞杜蘭城(參考廿二:1—2),以及摩押ê米斯巴(參考廿二:3—4),了後,大衛接受先知迦得ê預警,伊逃往哈列ê樹林(參考廿二:5)。會編入chit三段記事,並m̄是時間上前後ê問題,卻是想說明tī chiah-ê過程中,大衛漸漸累積伊ê人脈kah勢力。

Tùi kui個逃亡ê過程中,thang看tio̍h大衛到亞杜蘭城走chhōe庇護,是一個重要ê轉捩點。因為tùi chia開始,大衛無koh是孤獨一個人,卻是有一陣人跟tòe伊,而chit群人中間,除了厝內人以外,iáu包括了祭司在內(參考廿二:20),chit點對伊來講非常重要。為tio̍h án-ne後,伊身邊lóng有thang協助伊ê氣力,m̄-nā退thang守,進mā thang攻。Koh khah重要ê,伊thang隨時透過祭司詢問上帝ê旨意(參考廿三:6)。相對ê,掃羅卻殘刣死上帝ê祭司,換句話講,作者已經teh表示掃羅m̄-nā會失去上帝ê靈保守,伊koh khah棄絕了上帝ê旨意。這tú好說明大衛雖然是teh過逃亡ê生活,m̄-koh有上帝ê話語一直伴tòe tī伊身邊,而掃羅則因為無上帝ê話,而不時感覺「失落」,伊一直無法度如心所願ê追緝到大衛就是一個siōng明顯ê例。

掃羅殺害上帝ê祭司亞希米勒kah伊ê家族,chit件殺害上帝ê奴僕祭司ê事件,hō͘上帝非常受氣。聖經作者表達一個觀念:任何統治ê氣力,若是欠缺宗教信仰ê支撐(輔導、協助),真緊to̍h會衰微。掃羅殘害祭司,以及亞比亞他投靠大衛,tú好說明一個政權ê衰微,另外一個政權ê興起ê原因。

Chit段經文thang分做兩個段落,一是講述大衛得tio̍h摩押王ê幫助,替伊照顧父母,並且得tio̍h先知迦得hō͘ in ê信息。二是描述掃羅埋怨伊ê臣僕不支持伊,就tī he ê時多益提供掃羅情報講大衛bat逃難到挪伯祭司亞希米勒hia去。

第1到2節,短短兩節記載大衛離開迦特城,到亞杜蘭去避難,m̄-koh卻mā說明大衛tùi án-ne了後,有新ê轉機,伊無koh是單獨一個人,卻是有群眾kah跟tòe伊,chiah-ê跟隨者中間,有真chē是不滿掃羅政權ê民眾。Án-ne,大衛一下á身邊就增加四百個跟隨者,而伊mā成了chiah-ê投靠者ê首領。

第3到4節,大衛koh逃到摩押人ê地區,這說明tī掃羅統治ê以色列地區,已經真oh hō͘大衛有藏身ê所在。伊tī chia請求摩押王允准伊ê父母khiā落來,hō͘伊lóng無後顧之憂。Á摩押王願意庇護大衛ê厝內人,可能kah掃羅bat攻打摩押有關係(參考十四:47)。

第5節,先知迦得會án-ne來幫忙大衛,必定是kah上帝hō͘伊ê啟示有關。因為大衛是上帝所揀選準備ài替接掃羅成做以色列人ê新王。前有先知撒母耳膏立大衛並且協助伊ê逃亡,chit-má koh有先知迦得加入大衛ê陣營,這說明tī大衛身邊,有上帝ê奴僕先知,以及後來koh有祭司亞希米勒參與幫忙大衛,kah祭司亞比亞他加入大衛陣營中等等,這致使大衛實力koh khah強大。Chit位先知迦得,mā是後來參與編撰大衛一生事蹟ê作者之一(參考歷代志上廿九:29—30)。Á先知迦得會建議大衛tńg來到猶大去,mā teh表示大衛ê勢力已經夠額hō͘伊安全tńg去。M̄-koh是m̄是就是chit-má?Chit節經文可能是比較晚期ê資料。為tio̍h án-ne ê時ê大衛iáu未夠額ê能力。M̄-koh有另外一種講法是:大衛此後lóng tī南部猶大地區活動。掃羅lóng tī猶大北面、便雅憫支派ê基比亞地區。因為án-ne,mā有一種講法,講大衛kah掃羅之爭,就是南kah北兩方勢力ê對抗,也kah此逃亡ê事有關。

第6到8節,chia講掃羅可能tùi其他人ê報告中,知影有便雅憫支派ê人去投靠大衛(參考歷代志上十二:16—18),因為án-ne chiah會講第7節chiah-ê話,認為大衛就是用「田地kah葡萄園」來o͘-se便雅憫支族ê勇士。掃羅ài大家清楚知影chit時ê大衛根本就無chit種能力,而會傳出chit種謠言ê人,是故意ê,主要目的是想beh對抗、謀害掃羅而已。伊mā埋怨家己ê kiáⁿ約拿單竟然kah大衛結盟,而伊ê臣僕卻無人向伊報告。M̄-koh伊講「大衛正teh chhōe機會刣我」,chit種話tú好kah事實顛倒。

第9到10節,chia講掃羅ê畜牧長以東人多益,tī發見大衛藏身tī挪伯ê亞希米勒處ê時,已經有想向掃羅報告à。Tī掃羅ê認知中,chit種幫助大衛,而且借刀hō͘大衛,lóng是teh協助大衛謀害伊(參考第13節)。多益是以東人,伊可能是hō͘擄來當看管掃羅家畜ê奴工。Taⁿ ē-tàng kah其他臣僕khiā tī掃羅身邊,真可能就是因為伊向掃羅報告有關祭司亞希米勒資助大衛逃亡ê事而升官。多益舉發亞希米勒替大衛求問上帝旨意,並且提供食物kah歌利亞ê刀hō͘大衛。值得注意ê是:多益指控祭司亞希米勒ê罪狀中有兩項,一是為大衛「求問上主」,m̄-koh這是屬tī祭司ê職責,伊無法度拒絕。二是hō͘ in大衛「食物」kah「歌利亞ê刀」,chit項指控致使亞希米勒全家族kah hit-ê城ê人慘遭掃羅屠刣。


重新查詢 專卷研經 撒母耳記上系列
錯誤回報,請聯繫comm[@]fhl.net