撒母耳記上 20章1節 到 20章23節   背景資料  上一筆  下一筆
Chit章記載大衛繼續伊ê逃亡走chhōe庇護ê路線,伊去chhōe約拿單,並hō͘伊知影掃羅beh殺害伊ê事,而後來約拿單mā證明了in老父掃羅的確beh殺害大衛。原因是掃羅想beh kā王位由kiáⁿ約拿單繼承,m̄-koh若是大衛iáu存在,kā無法度hō͘以色列軍隊心服口服,mā無容易得tio̍h民眾支持。只有除掉大衛,chiah會hō͘約拿單順利繼承王位。

Chit段經文記載大衛tī先知撒母耳ê幫助下,順利躲過掃羅三pái ê追刣,了後伊就離開拉瑪,去chhōe伊「生死之交」約拿單ê幫忙。約拿單是掃羅ê kiáⁿ,掃羅心中ê王位繼承人。

大衛會án-ne chhōe約拿單,真可能是頂pái約拿單bat說服in老父掃羅mài殺害伊ê事有關。M̄-koh khah可能就是因為這是無仝ê資料,若是kā chit章經文編輯tī第十九章9到10節後面,則整體讀起來會koh khah連貫。Mā有kóa學者認為,chit段經文應該發生時間會比第十九章1到7節所記載ê事件koh khah早。

第1到2節,大衛tùi先知撒母耳ê 拿約處離開,伊去chhōe掃羅ê kiáⁿ mā是伊ê好友約拿單,hō͘伊知影家己ê遭遇。M̄-koh約拿單向大衛保證,若是掃羅有謀害伊ê計畫,一定會hō͘伊知影。伊用chit種方式beh保護大衛。

第3到4節,大衛提醒約拿單mài認為伊ê老父掃羅會kā所有ê事lóng kā伊講。為tio̍h beh hō͘大衛安心,約拿單用chiù-chōa ê語氣向大衛表示:願意盡所ē-tàng地聽從大衛。

第5到8節,chit段經文是大衛kā約拿單講伊ê計畫,為tio̍h beh確認掃羅是有殺害大衛ê證據。伊hō͘約拿單ê建議是:故意在kah掃羅ê定期餐會中缺席ê方式,來測試掃羅王ê態度。伊ài約拿單利用大衛tńg去故鄉去參加家族ê「獻年祭」,chit-ê祭原本是teh指每月ê「初一」。M̄-koh大衛ê話ê意思,是teh指「每年一pái」,伊ê家庭利用此節日聚會一pái。大衛ài好朋友約拿單用chit種方式,檢測掃羅是m̄是真正生大衛ê氣。大衛強調伊kah約拿單之間結盟ê重要性。In彼此之間有「生死之交」ê盟約tī teh,因為án-ne,伊希望即使是真正非ài伊死,mā希望是由約拿單來執行「死刑」,卻m̄是由掃羅來刣伊。

第9到10節,約拿單認為大衛想得siuⁿ chē,原因是伊iáu-koh相信老父掃羅並無想beh殺害大衛ê計劃á是想法。伊用真肯定ê語句hō͘大衛知影,一旦明明確知影掃羅有殺害大衛念頭,一定會hō͘大衛知影,m̄-koh大衛iáu-koh m̄放心。有kóa學者認為大衛chit種態度,顯然是真有「心機」,á是心思真「細膩」,m̄-koh mā tùi chit-ê話語中,表示伊對約拿單並m̄是完全信任。

第11到16節,chit段經文thang看出約拿單確實是teh表明伊kah大衛之間ê關係,是「性命之交」ê關係,伊用性命作賭注chiù-chōa,無論án怎一定會hō͘大衛清楚知影in老父掃羅ê態度。就算付出性命代價,伊mā會hō͘大衛得tio̍h逃離掃羅ê手ê機會。Á伊mā肯定大衛有一工必定會掌權,伊希望大衛mā chiù-chōa,一定會照顧伊ê全家。

第17節,約拿單tī-chia要求大衛chiù-chōa,確認伊kah大衛之間「生死之交」ê盟約ē-tàng永續存在。後來大衛確實遵照約拿單所要求ê,好款待伊ê kiáⁿ米非波設(參考撒母耳記下第九章、廿一:7)。

第18到23節,這是約拿單繼續講tio̍h大衛頭前所提kah掃羅王同齊用餐ê事,大衛ê問題是:萬一掃羅王發大怒,「甚麼人來kā我講」chit-ê危險信號,約拿單tī-chia kā大衛講án怎得tio̍h明確ê答覆kah保障。約拿單tio̍h用射箭ê方式來表明,伊會利用命令奴僕拾取伊發出ê箭所講ê話,當做暗號。若是tī「你後面」,這就表示安全。M̄-koh相對ê,若是講「tī你頭前」,這就表示危險,大衛一定tio̍h馬上逃走。

重新查詢 專卷研經 撒母耳記上系列
錯誤回報,請聯繫comm[@]fhl.net