撒母耳記上 19章1節 到 19章10節   背景資料  上一筆  下一筆
Chit章開始紹介掃羅ê kiáⁿ kah大衛之間深厚而且真誠懇ê情感,in為tio̍h beh保護大衛,故意冒tio̍h性命ê危險,想出所有ê辦法beh保護大衛,hō͘伊免tī受家己ê老父掃羅殺害ê危險。

Chit章kah第二十章ê資料來源顯然無仝;chit章一開始就講掃羅kā想beh殺害大衛ê事kā約拿單kah其他臣僕講,m̄-koh第二十章2節卻講約拿單並m̄知掃羅有想beh殺害大衛ê計劃。第十九章講約拿單為大衛向伊ê老父掃羅參詳拜託,得tio̍h圓滿ê結果。M̄-koh第二十章卻講約拿單m̄-nā無說服in老父掃羅成功,甚至家己mā差一點á被老父掃羅所刣。M̄-koh mā有另外一種看法,認為這是兩個無仝ê事件,發生ê時間可能並無相仝。M̄-koh lóng強調一點:掃羅確實是真積極想beh除掉大衛。原因就是第二十章31節掃羅所講ê,只要大衛活teh一工,約拿單就別想beh做國家ê王。M̄-koh掃羅bē記得,伊ê王位並m̄是傳承ê,卻是上帝揀選ê。

Chit段經文主要teh強調約拿單kah大衛之間ê「約」,有ná「性命ê約」仝款,因為in兩人立誓結為「性命之交」(參考十八:3)。Á掃羅koh一pái想出所有ê辦法beh殺害大衛。顯然地,前段所描述約拿單化解掃羅kah大衛之間ê緊張,只不過是Kā chit種危機延後而已。Tī掃羅ê心目中,大衛iáu-koh是伊siōng痛恨ê「仇敵」,非kā伊除掉bē-tàng。

第1到3節,這是第一pái記載掃羅公開表示「beh設法除掉大衛」,chit種寫法已經真清楚說明過去大衛tī掃羅宮廷中受歡迎ê tāi-chì(參考十八:16),已經有真大ê變化。可能是kah第十八章30節所講ê大衛ê名聲已經贏過其他重要將軍,這mā可能威脅tio̍h其他眾將軍tī國王掃羅面前ê地位。M̄-koh約拿單kah大衛之間帶有「生死之交」ê chiok厚友誼,伊深teh疼大衛。因為án-ne真明白kā大衛講伊ê老父掃羅想beh刣伊。然後伊對大衛提出一個保全ê意見,就是chhōe一個thang hō͘大衛藏匿ê「秘密」之地。Á hit所在只有拿單知影而已。然後,約拿單表示beh去kah家己ê老父懇談chit件事。

第4到5節,chit兩節記載約拿單確實照對大衛ê應允去做;伊tī掃羅面前o-ló大衛美好ê事蹟,包括了:(1)大衛所做ê事,對掃羅只有幫助,無傷害。(2)大衛確實是擊退非利士人ê主要功臣,因為伊刣死了以色列人siōng驚惶ê巨人歌利亞。(3)大衛是無辜ê。殺害無辜ê人,絕m̄是上帝所歡喜kah賜福ê事。約拿單chit種講法是teh提醒家己ê老父掃羅殺害大衛,會為家己帶來上帝koh khah大ê懲罰。

第6到7節,掃羅雖然是chiù-chōa不刣大衛,m̄-koh續落來就發生伊the̍h手上ê矛beh鑿死大衛,這表示伊chiù-chōa ê話並無會算數。

第8節,簡單ê一節經文,表示大衛繼續興旺起來。相對ê,就是掃羅漸漸teh沒落中。大衛ē-sái講是非利士人ê剋星,只要有大衛出征,就ē-tàng phah敗非利士人。Á以色列軍隊siōng驚ê就是非利士人,因為án-ne,強化大衛tī以色列軍隊中ê聲望。Á以色列人民一定會親像婦女所歌頌ê,街頭巷尾四界lóng會teh唱「掃羅刣死千千;大衛刣死萬萬」ê詩歌。這就koh khah hō͘掃羅感覺m̄是滋味,jú想beh殺害大衛。

第9到10節,chit兩節隨時反應出第8節所提起ê,大家jú o-ló大衛,掃羅就jú想beh殺害伊。Chit pái是tī lóng無預警之下,掃羅忽然向大衛拋tàn伊手上ê矛,佳哉大衛躲開了,chiah倖免tī難。

重新查詢 專卷研經 撒母耳記上系列
錯誤回報,請聯繫comm[@]fhl.net