撒母耳記上 17章41節 到 17章54節   背景資料  上一筆  下一筆
Chit段經文描述大衛phah敗歌利亞ê經過。重要ê是大衛非常清楚,hō͘伊phah敗歌利亞ê,並m̄是因為伊ê能力,卻是上帝幫助伊ê結果。因為伊是óa靠上帝ê名去迎戰歌利亞。Koh講,作者mā用chit段經文講出以色列人民久長以來ê觀念:人想beh óa靠軍事武器phah贏戰,是錯誤 ê觀念。因為如果無上帝ê幫助,就算有siōng精準ê武器,á是精銳ê部隊mā是枉然,因為上帝必定會幫助敬畏祂ê人(參考詩篇三十三:16—18)。

第41到44節,大衛ê身材kah歌利亞相比,明明是就是小巫見大巫,因為án-ne,歌利亞以藐視ê態度看大衛,認為大衛只不過是一個生做好看ê小伙子而已。M̄-koh伊bē記得有上帝kah大衛同在。伊會有chit種反應,kah一般人仝款lóng是看外表(參考十六:7)。伊指家己ê神明chiù-chōa ài kā大衛刣死,並且kā伊ê屍體丟hō͘飛鳥野獸食。

第45到47節,kui個大衛phah歌利亞ê事件,就是用chit段經文做中心。作者beh表明一個重要ê信念:有上帝同在,就有性命;失去上帝ê帶領,就會失去所有。因為真正會保護人性命ê,就是賞賜人性命ê上帝,卻m̄是軍事武器。Á大衛tī chia公開宣告:伊khiā tī上帝chit pêng;上帝是伊ê保護者。因為án-ne,伊beh奉上帝ê名對付歌利亞ê挑釁。伊同時表示用phah贏,來向天下所有ê人見證伊所óa靠ê神,chiah是真實ê。

第48到50節,果然,大衛the̍h伊手上用來護衛羊群ê投石器甩向歌利亞,而歌利亞連刀lóng iáu未出鞘,就被大衛甩出ê石頭phah中頭部倒落去死去。這是非常hō͘人奇怪ê結局,講出上帝奇妙ê作為tī大衛身上顯現出來。

第51節,大衛用歌利亞ê大刀剉落來伊ê頭,非利士人因為án-ne lóng嚇(heⁿh)驚逃走。

第52到53節,以色列軍隊看見歌利亞已經死,而非利士人lóng驚惶逃走,chit時in就出來tui-jiok,刣死真chē非利士人軍隊,並且掠奪in ê營地。大衛就án-ne凱旋式ê tńg來到耶路撒冷。

第54節,chia講大衛「Kā歌利亞ê武器留tī家己ê帳棚裡」,chit句話為第廿一章9節預留伏筆,講這kā武器(一支刀)後來被挪伯ê祭司亞希米勒收留,tī大衛逃亡ê時取tńg去。

重新查詢 專卷研經 撒母耳記上系列
錯誤回報,請聯繫comm[@]fhl.net