撒母耳記上 15章1節 到 15章9節   背景資料  上一筆  下一筆
有關以色列建立君王制度,一直有兩種無仝ê觀點:一是支持君王制度,這是比較早期ê資料。另外一個是反對君王制度,這是晚期ê資料。Á撒母耳記上第十五章,是比較晚期ê作品,作者主要teh表明反對無照上帝旨意做tāi-chì ê君王,持chit種觀點ê強調:只要設立君王就會有chit種危險。掃羅就是無確實遵照上帝所指示ê話去做,因為án-ne,上帝決定beh廢掉伊,並且指示先知撒母耳膏立一位新ê人來替接掃羅ê王位。

Chit段經文是為掃羅不koh受上帝歡喜作了解釋,主要內容是說明上帝交帶掃羅ê事,掃羅並無照去行。值得注意ê是,為甚麼上帝要求kā亞瑪力人全部剷除,並且連所有ê一切財產lóng bē-tàng當做勝利品使用?原因是chit pái ê戰役是一場「聖戰」,意思是teh指chit場戰爭並m̄是為國防上ê防禦之需要,mā m̄是beh擴張以色列國ê疆域,卻是為tio̍h beh執行上帝ê命令相刣。因為án-ne,chit pái ê戰爭並m̄是以色列軍隊teh相刣,卻是上帝beh以色列人民去為祂執行「審判」ê工作。

若是án-ne,戰利品就m̄是屬tī以色列人民ê,卻是屬tī上帝ê。Chit種觀念m̄-nā是tī以色列人民中間存在tio̍h,tī當時ê中東地帶mā非常普及。申命記第二十章描述chit種tùi上帝來ê命令之「聖戰」規則,m̄是出tī勉強,只要懍neh,á是有家務纏身者,lóng thang m̄免參加出征ê行列。Koh講,tī開戰chìn前,一定tio̍h hō͘ in對敵一方有和解ê機會,卻m̄是一味地進行殺戮。因為上帝歡喜人認罪悔改。M̄-koh,甚麼人ē-tàng決定chit項命令真正出tī上帝旨意?á是統治者個人ê喜好而利用上帝ê名?án-ne chiah是真正ê問題所在。

第1到3節,先知撒母耳一開始就對掃羅講「你tio̍h聽上主ê話」,chit點是kui本聖經ê中心思想。聽從上帝ê話,就thang存活到永遠。Mā是申命記派作者ê中心思想(參考申命記八:1、3、6、11、20)。Chia提起「亞瑪力人」,這是當時Tī曠野中非常強猛ê遊牧民族(參考民數記廿四:20)。當以色列人出埃及進入曠野了後,不時受tio̍h in ê騷擾(參考出埃及記十七:8,民數記十四:45),即使以色列人已經進入迦南地,mā一直深受亞瑪力人侵犯ê威脅(參考士師記三:13、六:3—5、七:12、十:12)。In不時利用以色列人過Pôaⁿ過節、收藏節(to̍h是「Tòa棚節」)ê時chūn,入去搶劫、掠奪。造成以色列人非常大ê困擾。因為án-ne,先知撒母耳ài掃羅帶以色列軍隊去懲罰亞瑪力人,而且嚴厲懲罰。Chia講「毀滅in所有ê一切」,意思是teh指亞瑪力人所有ê,lóng是tùi以色列人身上搶奪tio̍h ê,上帝全lóng tio̍h索tńg來。

Koh講,chit句「毀滅in所有ê一切」,mā是teh表明chit pái屬tī上帝ê戰爭,戰利品就是上帝ê。因為án-ne,一定tio̍h kā它看做是「無條件獻hō͘上主ê物件」,bē-tàng有任何一部分存留落來(參考利未記廿七:28—29),就是一定tio̍h徹底毀滅ê意思,ná親像所多瑪城kah蛾摩拉城仝款,被徹底毀滅。

第4到6節,掃羅召集ê軍隊iáu-koh是用北方ê以色列十個支派為主要兵力來源,共出兵二十萬人,而南部猶大只有一萬名。聚集chiah-ni̍h chē ê兵力,顯然是有點á誇張ê意思。Á聖經中mā無「亞瑪力城」chit-ê所在,有可能是表明亞瑪力人聚集比較多ê所在,á是in ê領袖khiā起ê所在。「基尼人」是tī西奈半島上ê遊牧民族,kah米甸人有親族關係(參考士師記一:16),因為án-ne,有時米甸人kah基尼人無分別(參考民數記十:29)。因為驚chit pái ê毀滅mā同時損傷到基尼人,因為án-ne,掃羅派人先去警告基尼人,ài in避開免得tú-tio̍h池魚之殃。Chia特別提起當年以色列人出埃及進入曠野ê時,基尼人bat幫助過以色列人(參考民數記十:31—32)。

第7到9節,chit pái phah亞瑪力人ê戰役是成功ê,ná親像撒母耳記上第十四章48節所講ê,伊過去mā bat phah敗過亞瑪力人仝款。M̄-nā án-ne,連亞瑪力人ê國王「亞甲」mā被以色列軍隊hō͘生擒。以色列軍隊照上帝hō͘ in掃羅ê指示,beh kā chiah-ê亞瑪力人消滅。掃羅確實做到à「刣滅所有ê人民」。M̄-koh掃羅kah伊ê軍隊雖然生擒了亞瑪力人ê國王亞甲,卻無kā伊刣死,這m̄是上帝ê意思。作者teh暗示,有kóa亞瑪力人是逃脫à。因為若是刣死人民,留落來國王並無意義。設若有人逃脫了,á是大部分人逃脫了,則留落來國王就有koh khah好ê籌碼thang用。至少thang用國王ê性命來做交換。Koh講,上帝原來ê意思是beh kā一切lóng刣死(參考第3節)。Ē-sái講是,掃羅並無án-ne執行,伊是kā「siōng好ê」,包括家禽、cheng-seⁿ,以及「其他ê好物件mā lóng留着」,這明顯是違背上帝ê旨意。照掃羅後來解釋,講伊會án-ne做,是beh kā chiah-ê siōng好ê「牲祭獻hō͘上主」ê(參考第21節)。M̄-koh這若是屬tī上帝ê戰爭,mā就是「聖戰」,就一定tio̍h完全聽從上帝ê旨意,若無,就無法度kā它稱做聖戰,mā m̄免kā所有ê一切lóng獻hō͘上帝。因為án-ne,掃羅ê決定已經違背上帝ê旨意。

重新查詢 專卷研經 撒母耳記上系列
錯誤回報,請聯繫comm[@]fhl.net