撒母耳記上 14章16節 到 14章23節   背景資料  上一筆  下一筆
Chit段經文看出掃羅確實是後知後覺ê領導者,伊是看tio̍h非利士人軍營大大混亂,chiah發覺敵方有狀況,而且發見chit種狀況kah-ná kah家己ê軍營可能連帶密切關係。因為án-ne,下命令清查軍隊ê人員。

第16到17節,chit時chūn掃羅ê哨兵發見非利士人軍營有真大變化,chit種變化ê特別在tī敵方軍隊中有慌忙奔逃ê現象,表示是出了極大ê問題chiah會有ê景象,就án-ne馬上去通報掃羅。會有chit種景象ê原因,當然kah上帝引起ê地動有密切關係,因為只有tī強大ê地動之下,馬匹chiah會驚惶大聲呼叫,而且會用力掙扎beh脫離繮繩奔逃。Koh加上約拿單kah伊ê侍衛,刣死了二十個非利士人ê士兵,hō͘非利士人koh khah心慌焦急kah不安。Á chit時掃羅下令清查人數,伊可能mā擔心家己ê部隊會受tio̍h敵方ê影響,所以想先查清楚到底是甚麼人無tī營區。結果竟然查出是家己ê kiáⁿ約拿單kah伊ê侍衛。

第18到19節,chia講掃羅ài祭司亞希亞「Kā以弗得捧來」,這是因為tī以弗得頂面安tio̍h「烏陵」kah「土明」,thang用之來詢問上帝ê旨意(參考民數記廿七:21)。Á chit-má亞希亞穿插以弗得,而且tī基比亞營區。因為án-ne,掃羅叫亞希亞來,為tio̍h是beh想透過祭司詢問上帝ê旨意。M̄-koh後來koh放棄,無koh詢問à。掃羅看tio̍h是攻擊非利士人ê大好機會,就無想beh koh再問上帝,這mā表示tī伊心中,上帝已經漸漸無koh重要à。

第20到23節,掃羅利用非利士人陣營大亂ê時,進攻非利士人陣營,而chit時,原本擔心而bih起來ê,包括原本已經背叛非利士人ê,看tio̍h情況大好,lóng轉向kah tī掃羅chit-ê邊。這lóng teh表示:chiah-ê臨時轉向ê人,ná親像掃羅仝款,看見機會來臨,就bē記得需要上帝仝款。
重新查詢 專卷研經 撒母耳記上系列
錯誤回報,請聯繫comm[@]fhl.net