撒母耳記上 10章17節 到 10章27節   背景資料  上一筆  下一筆
Chit段經文描述先知撒母耳用抽籤ê方式,為以色列人選出第一位君王,結果就ná親像上帝所預定beh揀選ê人,chit種人就是掃羅。Tī這chìn前,只有先知撒母耳kah掃羅in二人知影,m̄-koh in都無對外講出先知撒母耳已經用油膏立掃羅ê事。民眾mā kan-taⁿ只知影由先知撒母耳為in chhōe一位君王,in mā一直teh期待chit件事早日有消息。因為án-ne,chit段經文mā ē-sái講是續接第八章,說明撒母耳照以色列人ê要求,chhōe一位君王來統治帶領in。

第17到19節,先知撒母耳傳達上帝beh hō͘以色列人民ê信息,主要teh說明下列幾件事:

一是:祂是用大能ê手,帶領以色列人出埃及ê神。Chit句話ē-sái講是聖經中非常重要ê提醒話語,tio̍h以色列人注意,in ē-tàng存活到chit-má,lóng是因為上帝用大能ê手帶領in出埃及ê結果。Chit句話mā是用來警告以色列人,若是bē記得上帝拯救ê恩典,in無論chit-má擁有甚麼,lóng會化做烏有。

二是:「伊是lín ê上帝」,這是一句立約ê用語。完整ê句型是:「我beh做in(指以色列人)ê上帝,in beh做我ê子民。」(參考耶利米書十一:4、廿四:7、三十:21、三十一:33、三十二:38,以西結書十一:20、十四:11、三十七:23、27,撒迦利亞書八:8)。

三是:以色列人「厭棄」上帝。會有chit種講法,是認為君王制度會破壞in kah上帝之間立約ê關係。

四是:tio̍h以色列人民選出家己ê君王。先知撒母耳採取ê方式是「按支族kah宗族ê秩序集合」。Chia ê「支族」,是teh指「大支派」,ná親像呂便、西緬、猶大等秩序排列。Á「宗族」mā thang講「一千人」ê意思。

第20到22節,chit段經文描寫kui個揀選ê經過,就是用「抽籤」ê方式進行。Chia ê「揀選」,原文就是「抽籤」。先知撒母耳會用chit種「抽籤」方式,真有可能是伊並無支持chit種君王制度,因為án-ne,以此方式來表示責任並無tī伊。先是抽中便雅憫支族,續落來tùi便雅憫支族中抽籤選出「瑪特利家族」ê人。Koh再tùi chit-ê家族選出「基士」ê kiáⁿ掃羅。比較奇怪ê是,就tī chit時,掃羅竟然bih起來。這可能kah第九章21節所講ê話有關,伊自認不配當以色列民族ê領導者。Ná親像chit章27節所講ê,有kóa人非常懷疑掃羅是m̄是有能力「救」in,in甚至有點á看bē起掃羅。

第23到24節,雖然掃羅bih起來,m̄-koh上帝既然揀選伊,就指示大家伊bih起來ê所在。先知撒母耳就tī眾人面前宣佈掃羅就是以色列人民所祈求beh設立ê君王。「吾王萬歲」,chit句話並無表示in lóng是誠心實意地支持,卻是因為這是in抽籤選出來ê王,就一定tio̍h接受。

第25節,thang參考第八章11到18節,先知撒母耳bat警告過以色列人ê事,tī chia koh一pái說明一pái。另外根據申命記第十七章18節摩西律法ê規定,beh抄寫一份摩西ê律法規章hō͘新任ê國王掃羅,thang hō͘伊知影遵行上帝透過摩西所頒布hō͘以色列人ê典章律例。「存khǹg tī上帝面前」,這表示chit份抄寫落來ê摩西律法,以及警告國王ê話語,lóng以上帝做見證人。用chit種方式來表示chiah-ê記錄抄本ê內容,就是以色列國王治國ê基準。

第26到27節,有一陣支持掃羅ê人,跟tòe掃羅去,chiah-ê人可能有意思beh保護掃羅ê安全。M̄-koh mā有看bē起掃羅ê人,真可能是kah掃羅是出身便雅憫支派有關係,因為chit-ê支派tī以色列十二支派中,是siōng弱小ê一族。因為án-ne,即使in看bē起掃loh,mā只有ē-tàng接受。M̄-koh「掃羅卻無講甚麼」,因為伊真清楚家己ê處境。

重新查詢 專卷研經 撒母耳記上系列
錯誤回報,請聯繫comm[@]fhl.net