撒母耳記上 1章1節 到 1章8節   背景資料  下一筆
Chit章先紹介先知撒母耳出世ê家世背景,kah伊ê出世。Ná親像東方社會ê婦女仝款,伊ê老母哈娜因為無生gín-á而感覺苦悶,上帝垂聽伊ê祈禱,而伊下願beh kā上帝賞賜hō͘伊ê gín-á撒母耳終生獻hō͘上帝,果然照伊所下ê願帶撒母耳去祭司以利hia,hō͘撒母耳留tī祭司以利hia學習事奉上帝。

Chit段經文先紹介撒母耳ê父母kah家庭,mā thang看出早期東方社會,對不孕婦女ê鄙視(siùⁿ)。同時,chit段經文mā為撒母耳出世埋落來伏筆,beh說明後來哈娜透過祈禱,上帝垂聽伊ê祈求,hō͘伊有娠生撒母耳。M̄-koh伊koh下願kā撒母耳奉獻hō͘上帝,因為伊求ê,是beh除去不孕ê恥辱。

第1到2節,「以法蓮山區」、「以法蓮支族」,thang參考約書亞記第廿一章20節,就會發見屬tī利未支族ê哥轄宗族,tùi以法蓮支族ê土地分得一kóa城khiā起。因為án-ne,chia雖然講以利加拿是屬tī「以法蓮支族」,m̄-koh ná親像約書亞記所講ê,伊是利未族人,tùi以法蓮支族分配得tio̍h以法蓮所在ê城市khiā起。根據歷代志上第六章33到34節ê記載,撒母耳、以利加拿 lóng是利未族人。摩西律法非常清楚規定,只有利未族人chiah ē-tàng擔任祭司ê工作(參考民數記三:5—13)。

Chia講以利加拿每年lóng tùi「拉瑪」到「示羅」去敬拜上主,這是因為以色列男子每年至少ài有三pái到所謂「一個特定ê場所」(參考申命記十二:5、11、14、18、21、26;十四:25;十五:20;十六:2、5、11、15、16)敬拜上帝,chit三個節期就是包括Pôaⁿ過節在內ê除酵節、收藏節、收成節等等(參考出埃及記廿三:14-19)。Á「示羅」是當時ê宗教中心,約櫃就khǹg tī hia(參考約書亞十八:1,士師記廿一:19)。

以利加拿有兩個bó͘,真可能是因為原配bó͘「哈娜」無生育,伊koh再娶「比尼娜」做bó͘,這tī早期社會非常普遍,因為無法度有娠ê婦女,tī家族中會hō͘藐視,地位差不多kah「女婢」仝款,而且會hō͘ ē-tàng有娠生kiáⁿ ê 妻妾欺負,亞伯拉罕ê bó͘撒萊就有chit種經歷(參考創世記十六:4)。「哈娜」chit-ê名ê意思是teh指「恩典」,而「比尼娜」意思是teh指「珍珠」,表示伊tī以利加拿ê家族中享受ê地位,ná親像「珍珠」hit種ê貴重。原因是伊ē-tàng有娠生kiáⁿ ê緣故。

第3到5節,以利加拿照規定lóng會teh獻祭了後,分配所得tio̍h ê祭物hō͘伊ê bó͘,伊真疼哈娜,雖然伊無法度生育,伊並無因為án-ne就鄙視(siùⁿ)伊。

第6到8節,因為哈娜無法度有娠而遇tio̍h有生gín-á ê另外一個bó͘比尼娜嘲(sau)笑、侮辱,hō͘哈娜艱苦心到極點。因為án-ne,伊向上帝祈禱,甚至祈禱到流目屎而m̄食物件,這tī大節期中án-ne悲傷引起丈夫以利加拿 ê關注。

重新查詢 專卷研經 撒母耳記上系列
錯誤回報,請聯繫comm[@]fhl.net