彼得前書 1章1節 到 1章12節   背景資料  下一筆
Tùi彼得前書ê內容、討論ê問題等,就thang看出lóng是kah初代教會遇tio̍h ê背景有真密切ê關係。第一世紀ê初代教會是tú-tio̍h極大苦難,親像:tī主後65年左右羅馬皇帝尼祿火燒羅馬城,然後嫁禍hō͘基督徒ê事件,然後伊用非常殘酷ê手段,狠(hiông)狠迫害基督徒。Á使徒彼得就是tī hit段迫害ê時期被釘死tī十字架上ê。Tùi chia就知影統治者beh迫害基督徒chìn前,lóng會開始出現一kóa小動作,這就是此本書信出現ê一個背景。這ná親像《現代中文譯本》tī chit本書信chìn前簡介中所講ê:

「本冊ê主要目的teh鼓勵hiah-ê為tio̍h信仰tú-tio̍h苦難kah迫害ê信徒。作者一再以耶穌基督ê福音—伊ê死、koh活,kah koh來ê應允—勸勉in,hō͘ in希望。因為án-ne,in一定tio̍h忍受苦難,確信苦難是對in信心ê考驗,並且ē-sái hō͘ in tī『耶穌基督顯現ê日子』得tio̍h獎賞。」
Tùi chit段簡介ê話中,thang看tio̍h早期教會確實面臨了羅馬帝國非常大ê殘酷迫害手段,致使真chē信徒teh期待末日趕緊來臨,上帝ê審判ē-tàng快快來到。

Chit章經文mā是離bē開chit種內容,勸勉信徒受苦是暫時ê,m̄-koh透過受苦,卻thang清楚知影信徒ê堅忍程度是m̄是夠額承受chiah-ê苦難。Koh講,tī苦難中間,iáu是beh堅持維護信仰生活ê聖潔。Chit對每一個信徒來講,mā是一門真重要ê功課。

    Ná親像其他書信仝款,羅馬時代ê書信起頭lóng會有請安語。續落來,作者就講tio̍h tī信仰內面tú-tio̍h苦難,會帶來性命ê ǹg望。因為án-ne,伊期待所有ê信徒一定會堅持落去,m̄-thang改變á是放棄。

    第1到2節,這是羅馬治理時代書信寫法ê方式,信ê開始就是先自我紹介,koh來是提起信徒,續落來是請安kah祝福。

Chia講寫此書信ê人使徒彼得,並且伊講家己是「耶穌基督ê使徒」。Chia ê「使徒」ê意思是teh指耶穌基督所揀選揀選ê十二位門徒。當猶大出出賣耶穌基督而且自刣死亡了後,早期教會bat討論過beh補選一位續接猶大ê使徒位置,為tio̍h án-ne使徒彼得建議一定tio̍h tùi行洗禮約翰開始直到耶穌基督死去koh活而且升天ê時,lóng kah in同在同齊ê人才有資格被推選(參考使徒行傳一:21—22)。大家就tùi眾人中間推選出兩個人,koh再以抽籤ê方式抽出馬提亞來遞補猶大ê「使徒」位置。Tùi chia就thang看出「使徒」chit位號mā teh表示特殊ê身分。

作者講伊寫chit封書信ê對象,是「hō͘上帝選召ê子民」,chit句話已經清楚指出就是針對基督徒講ê。Á chiah-ê信徒是「因逃難散居tī本都、加拉太、加帕多家、亞細亞、庇推尼」等五個地區。Tùi chit句話thang看tio̍h作者寫chit本書信ê時,迫害ê問題已經非常嚴重了,而chiah-ê地區tī當時lóng是屬tī羅馬行省。

Koh講,作者特別強調chiah-ê信徒lóng是「按照上帝預定ê旨意,是藉tio̍h聖神而成做聖潔ê」子民。這lóng teh表示ē-tàng成做上帝ê子民,是照上帝ê旨意kah計畫而揀選,ná親像舊約時代揀選以色列民族仝款,m̄是根據人ê條件,卻是上帝照家己拯救ê計畫來進行揀選工作。因為án-ne,揀選出來就是「成做聖潔」ê,表示分別為聖ê意思。Án-ne,所有被揀選ê子民(信徒)一定tio̍h「順服耶穌基督」,chia所講ê「順服」,意思就是注意聽,意思是teh指聽從耶穌基督ê話kah教示ê意思。

第3到5節,chit三節經文mā講tio̍h基督教信仰上非常重要ê認bat:
一是上帝乃是慈愛ê上帝,而且祂ê慈愛是「無限ê」。

二是上帝偉大ê疼就是tùi耶穌基督自「死裡koh活」ê神跡顯明出來。
作者tī chia強調因為耶穌基督ê koh活,帶hō͘所有信伊ê人有「新ê性命」,chit種新ê性命帶來ê就是有「活ê ǹg望」。

Chia mā提起上帝揀選ê子民必定會得tio̍h美好ê獎賞,就是「不敗壞、不污損、無衰退殘」ê福澤。注意作者特別強調是「天頂ê福澤」,表示kah世間ê無仝;在世間ê賞賜,是會敗壞ê,而tī天頂ê則bē敗壞ê,是永恆ê。這ná親像耶穌基督teh勸勉大家ài kā「財寶積存在天頂」,因為tī天頂就bē被盜賊偷the̍h,mā bē被蟲蛀pháiⁿ(參考路加福音十二:33)。M̄-koh chiah-ê獎賞並m̄是平白得tio̍h,卻是需要努力到「終點」ê人ē-tàng享受。

第6到7節,chit段經文tú好說明第5節所提起,天頂ê獎賞是為hiah-ê有經過努力ê人準備ê。Chia真清楚講出一個耶穌基督ê信徒,必定會面對真chē信仰上ê「試煉」á是「受苦」,作者鼓勵信徒講即使án-ne,mā tio̍h「喜樂」,表示用甘願ê心去承受。Chia提起「種種ê試煉」,表示迫害ê樣式有真chē種,照當時羅馬治理之下,包括有ê被送去競技場去拼死活,有ê被丟入野獸群中去相ián生死,有ê被送到奴隸市場去販賣,有ê被強暴,有ê做奴工到死去等等。M̄-koh有苦難臨身ê時,人chiah會清楚知影家己到底有jōa-chē信心thang擋會tiâu考驗。作者強調信心ná親像teh煉金,jú經歷苦難,好ê信心就會用明亮,有信心ê人tī耶穌基督顯現ê日子來臨ê時會「得tio̍h o-ló、光榮,kah尊貴」。

作者tī chia已經提起一個非常重要ê信息:就是耶穌基督ê koh再臨,這mā是早期教會非常重要ê信仰告白。Mā是彼得前書重要ê信息之一。其實chit三項指ê lóng仝款ê內容,因為被耶穌基督o-ló就是一項極大ê榮耀,chit種信徒mā是上帝國度裡有份ê人,chit種人ê性命tī上帝眼中就是非常尊貴。

Koh講,chia所提起tī末日耶穌基督koh再臨時刻顯現ê時,有堅定信心而且經過考驗了後證明屬實ê,會得tio̍h「o-ló、榮耀、尊貴」。

第8到9節,當做者寫chit封書信ê時,耶穌基督iáu未koh再臨,因為án-ne,大家看bē-tio̍h耶穌基督,而且有真chē信徒lóng是後來tī眾使徒傳福音ê時,chiah得tio̍h福音ê信息而信耶穌基督ê。因為án-ne,in並「無見過」耶穌基督。雖然án-ne,作者對信徒ê表現非常肯定,因為in是「愛」kah「信」耶穌基督,並無受tio̍h任何影響。這ná親像希伯來書作者所講ê:「信是所ǹg 望ê tāi-chì ê 憑據,是所未看tio̍h ê tāi-chì ê 確據。(全民版)」(希伯來書十一:1)。彼得前書ê作者tī chia認為只有tī chit種絕對不疑ê信心基礎上,chiah會帶hō͘人「靈魂ê得救」ê結果。注意chia所講ê「靈魂ê得救」,意思是teh指性命ê得救。

第10節,作者講上帝tī耶穌基督內面拯救ê恩典,tī舊約先知時代就已經有ê預言。其實,thang án-ne了解:新約ê作者有一個努力目標,就是beh kā舊約時代先知所預言teh beh來臨ê拯救者kah耶穌基督連結做伙。這mā是馬太福音作者siōng努力ê工作之一,因為該福音書是寫hō͘猶太人看ê。彼得前書ê作者mā是朝chit-ê方向努力,為beh hō͘早期教會ê信徒明白,耶穌基督就是舊約先知所預言hit位beh來臨ê拯救者。

第11節,chia提起眾先知是經過「探索」了後,發見上帝拯救ê恩典是「基督一定tio̍h受苦難」來表明上帝ê疼。Beh了解chit句話就需要回顧到kui本舊約聖經ê歷史背景。主前721年北國以色列被亞述帝國滅亡了後,以色列人被俘虜販賣到外國做奴隸,tùi hit時開始,哀哭、呼求上帝拯救ê聲音就從來m̄-bat間斷,mā tùi hit時chūn開始,上帝透過先知ê話傳出拯救ê信息。直到南國猶大tī主前586年被巴比倫消滅,這呼求ê聲音頻率jú來jú chē,而先知ê預言mā相對ê jú來jú明顯,特別是tī先知以賽亞ê預言中,就真清楚描述出hit位beh來ê拯救者(基督)kā以受難者ê形像出現,這mā就是用賽亞書第五十二章13節到五十三章12節ê背景。
chit-má彼得前書ê作者講耶穌基督就是chit位先知以賽亞所預言ê拯救者,伊tī十字架上ê受難,就是一個明顯ê記號,伊ê死,就是為tio̍h所有信靠伊ê人而獻上性命ê。

第12節,上帝藉tio̍h耶穌基督拯救ê信息是透過「聖神ê能力」傳達出來,chit點tùi使徒行傳第二章描述tī五旬節ê時,聖神充滿tī眾使徒身上,hō͘ in勇敢見證福音,就因為án-ne,福音開始廣傳出來。Chit-ê福音ê好消息是「連天使」mā想beh「明白」chit-ê大好消息。換句話講,ē-tàng聽tio̍h chit-ê消息,是非常珍貴難得ê。

重新查詢 專卷研經 彼得前書系列
錯誤回報,請聯繫comm[@]fhl.net