彼得前書 1章13節 到 1章25節   背景資料  上一筆  下一筆
Tī chit段經文中thang看tio̍h一再出現「聖潔」chit-ê詞,就ē-tàng知影作者有強烈ê期待,希望所有ê基督徒lóng ē-tàng親像聖經所教導ê,過「聖潔」ê生活,用chit種方式來顯明有正確信仰á無之間ê差別。

	Tī前一段經文作者bat提起過一個真正有信心ê人,是ē-tàng通過考驗ê chiah算數,並且用chit種方式來考驗家己是m̄是真正有夠額堅定ê信心ē-tàng抵擋惡質世代ê誘惑、迫害。Tī chit段經文中,作者提醒信仰上一個重要ê認bat:性命ê價值tī tó位?作者khah強調性命ê真正價值是tī得tio̍h永恆ê性命,而這永恆ê性命是建立tī耶穌基督ê救贖上。

第13節,「Lín ê心tio̍h準備好勢」,chit句話原本ê意思是「tio̍h lín ê腰束起來」。Chit句話ê背景如果參考出埃及記第十二章11節就會koh khah清楚,hit時摩西轉告以色列人,食Pôaⁿ過節暗頓ê時chūn,是beh「束緊腰帶,穿鞋á,the̍h-tio̍h杖」án-ne ê姿勢食。這是teh表示情況非常緊急,真可能食到一半就beh趕緊離開,á是逃走。

另外一方面,古代中東ê人若講「束上你ê腰」,意思就是teh指tio̍h好好á做工,m̄-thang pîn-tōaⁿ ê意思。衣帶寬鬆是teh散步ê時chiah有ê樣式。

「時時警戒」,原本ê意思是teh指「清醒」,特別tio̍h注意ê是tī chia ê「清醒」,並m̄是一般所講ê頭腦清醒,卻是指心靈上ê清醒。換句話講,對信仰ê事真清楚,mā是teh指對上帝忠心,無一絲á懷疑ê意思。
作者koh一pái提起「耶穌基督顯現」ê事,表示當時大家lóng teh ǹg望耶穌基督趕快來,而且深信耶穌基督就beh來臨。因為án-ne,若無保持清醒ê心靈,就看bē-tio̍h耶穌基督koh再臨kah顯chit-má眾人面前。Ē-tàng看見耶穌基督koh再臨kah顯現,he就是siōng大ê恩典。

第14節,chia提起tio̍h「順服上帝」,意思是teh指tio̍h聽從上帝ê話ê教導。相對tī chit節ê末句講「以前愚昧無知」,就是teh指iáu未明白聖經ê話語,á是不遵從聖經ê教示ê意思。換句話講,信耶穌基督ê人應該有無仝款ê所在,就是用上帝ê話當做準則,會順服上帝Tī聖經中ê教示,而bē放縱私慾,敗壞生活紀律。

第15到16節,chit兩節tú好kah第14節成顛倒ê句話;tī第14節ê末後句講「以前愚昧無知」kah「hō͘私慾支配」。Á chit兩節所提起ê是「聖潔」。

作者這是引以利未記第十九章1到2節講上帝是聖潔ê,祂mā要求所有被揀選出來ê子民lóng tio̍h仝款聖潔,tī生活上有所節制,bē放縱私慾。
Chia ê「聖潔」是有一個基本標準,he就是用上帝為主。因為上帝創造人ê時chūn,就是根據祂ê形像創造ê,上帝ê形像mā teh表示上帝ê神聖。因為án-ne,一個放縱私慾ê人,等於是teh污穢上帝ê形像仝款,必定會引起上帝ê震怒。

第17節,「祈禱」,是teh kā上帝講話。Tio̍h kah上帝講話一定tio̍h用誠實ê心靈,因為上帝察驗人ê心內,上帝bē因為人用súi ê言詞祈禱就受tio̍h感動,mā bē因為人拙tī口才,就bē注意聽hit人ê祈禱。Chit節mā提供了另外一個早期教會共有ê觀念,就是人tī chiah-ê世界上只是「寄居世間」ê旅客。Chit種「寄居」者ê觀念tī第二章11節koh一pái提起。希伯來書ê作者mā有chit種看法,認為有信心ê人會承認活tī chiah-ê世界上ê日子,ná親像生活「在世間不過是出外人kah旅客」而已(參考希伯來書十一:13)。Koh講,chia mā提起上帝chiah是性命真正審判者,因為án-ne,對上帝chit位性命ê主宰、審判者,人應該心存「敬畏」ê態度,因為上帝是神聖ê性命之主。

第18到19節,chit兩節ē-sái講是彼得前書真重要ê經文。Tī chit兩節經文中,作者用人看做siōng貴重ê金銀財寶kah耶穌基督所流ê寶血互相比較。作者希望所有耶穌基督ê信徒lóng會明白,ē-tàng贖人ê罪,kā人tùi因為罪所帶來ê死亡(參考羅馬書六:23)中贖回來ê,就是耶穌基督tī十字架上「所流寶貴ê血」,hō͘有罪ê人因為án-ne ē-tàng得tio̍h新ê性命,而且永恆ê性命。性命是無價ê,並m̄是用金子á是銀á chit種人間看做siōng貴重ê財寶ē-tàng換來ê。

作者用猶太人非常清楚ê「贖罪」觀念,來說明耶穌基督就是救贖者,因為人ê性命並m̄是用金銀財寶ē-tàng換來ê,耶穌基督就是用伊ê性命—被釘死tī十字架上—來贖回人ê罪,hō͘人thang kah上帝和好,並因為án-ne享受上帝所賞賜ê永恆性命。

第20節,tī第一章2節作者就已經有講過,所有耶穌基督ê信徒lóng是「按照父上帝預定ê旨意」揀選出來ê。Chit-má koh進一步講上帝chit種揀選,是遠tī「創世以前」就已經決定好ê。使徒保羅ê書信mā有chit種看法,就是上帝遠tī創造之初,就已經開始進行拯救ê計畫(參考羅馬書八:29—30,以弗所書一:5)。作者beh表達一件事:tī真早ê時chūn,上帝就已經開始祂ê拯救計畫,這計畫是包括耶穌降生到世界上,lóng是tī祂拯救ê計畫裡。所謂「預先」,其實beh表明ê就是一個有細密計畫ê拯救工作。

第21節,chit節mā是早期教會非常重要teh表明信仰ê基礎,he就是:m̄是人ē-tàng明白上帝ê救恩,是透過耶穌基督,chiah hō͘人ē-tàng認bat上帝。換句話講,是因為上帝beh幫助人認bat祂ê疼,祂特別差遣祂ê獨生kiáⁿ耶穌基督降生到世界上,並且透過耶穌基督ê死,來表明對人類siōng koân ê疼,he是一種奉獻ê疼,mā是犧牲ê疼,koh khah是分享ê疼。Mā因為án-ne,chiah hō͘人因為án-ne相信koh活ê耶穌基督就是上帝拯救ê記號。Koh khah重要ê就是一定tio̍h有信心kah ǹg望。因為án-ne,thang án-ne了解:有信心kah ǹg望,就是用耶穌基督koh活ê疼連結起來ê,這愛就是tī上帝ê救恩裡見證出來(參考羅馬書五:8)。

	第22節,chia作者提起「順服真理」。請注意,tī chia「真理」指ê就是上帝ê話。耶穌基督teh為門徒祈禱ê時án-ne向上帝祈求講:「求祢用真理 kā in 聖化;祢ê 話就是真理。(全民版)」(約翰福音十七:17)真理就是上帝ê疼。只有真實、犧牲、奉獻ê疼,chiah是真理,是永遠bē改變ê價值,mā是只有tī疼ê內面,chiah會發見性命ê可貴kah無法度抵擋ê氣力。

	作者tī chia koh強調:基督徒應該知影怎樣將領受自上帝來ê疼見證出來,而這見證ê方式就是tùi「彼此相疼」開始。Chit-ê「彼此相疼」就是tùi身邊有「手足之情」ê對象開始。

第23節,作者koh khah進一步說明基督徒就是「重生」ê人。Chia ê「重生」kah第22節ê「潔淨」是相對應ê詞字;「潔淨」就是teh指kā污穢、無好ê去除掉。「重生」mā就是重頭koh來,kā過去無好ê、不清氣ê,lóng放棄,kah-ná一個新ê面貌出現tī眾人面前。作者特別指出基督徒teh過去iáu未信靠耶穌基督ê時chūn,ná親像連連tī he已經lian去、「朽pháiⁿ」ê樹枝頂,chit-má則連接tī he充滿tio̍h性命力量ê樹幹中,性命有活力,thang發出新枝綠葉。Chit種賦予性命ê枝幹,就是tùi上帝ê話來得tio̍h ê。

第24 kah 25節,chia是引用以賽亞書第四十章6到8節ê詩歌。作者引用先知ê chit段詩歌主要目的,是beh強調只有上帝ê話chiah是真理,mā只有上帝ê話帶來真實ê疼。人間ê一切lóng真緊to̍h會改變,ná親像野地ê草、花仝款,lóng是真緊to̍h會lian去死去,m̄-koh若是tùi上帝ê話做基礎延伸出來ê,lóng會永遠長存。

最後一句話講「道」就是「福音」,chit句話thang比較約翰福音第一章1節所講ê「道是上帝」,然後koh講「道成做人,tòa tī咱中間」(參考約翰福音一:14),án-ne咱thang看tio̍h,上帝ê道就是福音,chit-ê福音就是耶穌基督(參考馬可福音一:1,羅馬書一:1)。
重新查詢 專卷研經 彼得前書系列
錯誤回報,請聯繫comm[@]fhl.net