列王紀上 8章22節 到 8章53節   背景資料  上一筆  下一筆
這是所羅門ê一篇祈禱文,主要是teh祈求上帝祝福以色列人民。Tī chit段祈禱文中,伊主要提出七點:祈求上帝繼續帶領以色列人民(第25到30節);祈求上帝作in ê審判者,hō͘ pháiⁿ人無法度逍遙法外,好人得tio̍h祂ê垂憐(第31到32節);懇求上帝赦免懺悔ê以色列人民,hō͘ in tùi敵人手中ē-tàng tńg來(第33到34節);祈求上帝眷顧以色列人民khiā起ê土地有甘霖(第35到36節);hō͘以色列人民tī chit塊土地頂面會得thang安居,免除災禍(第37到40節);mā為外族人祈求上帝ê賜福(第41到43節);祈求上帝幫助以色列人民tī戰爭中得勝(第44到45節);為得罪上帝,á是被俘虜ê以色列人民祈禱(第46到51節)等。

第22到24節,這是歌頌上帝確實信守kah以色列人民所立ê約。伊講上帝所應允ê每一件事,lóng有實現。

第25到26節,所羅門祈求上帝,祂bat應允老父大衛,講伊後代kiáⁿ孫若lóng會順從上帝ê命令,in就永遠作以色列ê王,希望chit項應允lóng會實現。

第27到30節,雖然聖殿並m̄是ē-tàng hō͘上帝khiā起得下,m̄-koh祈求上帝ē-tàng垂聽伊kah以色列人民tī-chia聖殿ê祈禱。祈求上帝日夜看顧這間聖殿,hō͘伊成做名符其實ê祈禱殿宇。

第31到32節,祈求上帝成做以色列人民ê審判者,hō͘作惡ê人會受tio̍h應該得tio̍h ê懲罰,hō͘被冤枉ê人會得thang得tio̍h伸冤。

第33到34節,如果以色列人民得罪上帝而被敵人phah敗,被俘虜伊去。若是in悔改認罪,祈求上帝赦免、憐憫,並且chhōa in tńg來chit塊上帝所賞賜ê土地。

第35到36節,若是以色列人民因為得罪上帝,致使發生乾旱ê時,若是in知影悔改認罪,懇求上帝赦免in ê罪,並且教導in行正確ê道路,koh一pái落雨tī in所khiā起ê chit塊土地頂面。

第37到40節,如果有發生大災難,á是飢荒、瘟疫等等,甚至被敵人包圍,chit時,若有人tùi心內發出真實哀求ê聲音,懇求上帝會垂憐,照in各人應得ê賞賜hō͘ in,án-ne,以色列人民就會知影敬畏上帝。

第41到43節,如果有外族人聽tio̍h上帝奇妙ê作為,而願意向上帝祈求ê時,懇求上帝mā會垂聽這外族人ê聲音,án-ne,全世界ê人就lóng認bat真神上帝,知影敬畏上帝,並且知影這聖殿就是敬拜上帝ê所在。

第44到45節,若是因為上帝旨意而出征,懇求上帝會保守in,hō͘ in tī戰場上ē-tàng得勝。

第46到到51節,若是以色列人民得罪上帝,而被phah敗並俘虜到異鄉去,若是in知影悔改認罪,懇求上帝ē-tàng因為in真心悔改而赦免in,垂聽in ê祈禱,hō͘俘虜in ê人生出慈悲ê心好款待in。

以上chiah-ê祈禱,lóng有一個共同中心點:以色列人民無論tī tó位,只要in是向聖殿祈禱,期待上帝會垂聽,並且伸出救助ê手。換句話講,chit座聖殿就是上帝khiā起ê所在,而且上帝kah以色列人民立約ê記號,是一座實實在在用來祈禱ê殿宇。

後來,先知以賽亞tī以色列人民tùi巴比倫被tháu放回鄉了後,伊就一再強調重建起來ê聖殿,應該是「稱做萬民祈禱ê殿」(參考以賽亞書五十六:7)。M̄-koh tī耶穌ê時代,聖殿反tńg因為hiah-ê虛假ê宗教領袖,變成耶穌所譴責ê「賊窩」、「市場」了(參考馬太福音廿一:13,馬可福音十一:17,路加福音十九:46,約翰福音二:16)。

    第52到53節,所羅門向上帝祈求永遠看顧以色列人民,因為in是上帝tùi萬民中揀選出來ê子民。

重新查詢 專卷研經 列王紀上系列
錯誤回報,請聯繫comm[@]fhl.net