列王紀上 6章1節 到 6章14節   背景資料  上一筆  下一筆
Chit章是teh描寫聖殿建造ê過程。Tī瞭解chìn前,先有一個概念是必要ê,就是tī大衛kah所羅門時代,in lóng想beh建造聖殿,主要原因是:聖殿kah一般神明ê殿宇仝款,主要lóng m̄是用來禮拜ê,而是beh hō͘所敬拜ê神有一個「家」thang tòa,這就是希伯來文ê「殿」字,就是「家」ê意思。Ná親像國王有王宮,王所崇拜ê神,koh khah需要有「神宮」,觀念上是án-ne ê。這mā是後來先知以賽亞傳出上帝ê信息,做矯正以色列人民ê觀念ê時所講ê:「天是我ê 座位,地是我ê 腳踏椅。Lín beh kā 我起甚麼款ê 厝?甚麼款ê 所在是beh 做我安息ê 所在? Chiah-ê lóng 是我ê 手所創造ê,所以,chiah-ê 就lóng 有。總是,我所看顧ê,就是hiah-ê 謙卑、痛悔,kah 因為我ê 話來phi̍h-phi̍h-chhoah ê 人。(全民版)」(以賽亞書六十六:1—2)而先知以賽亞傳ê chit-ê信息,已經是回鄉重建聖殿完成了後,伊koh一pái警告以色列人民m̄-thang陷入迷信,認為重建聖殿完成,就ē-tàng安然無恙,若m̄是遵守上帝ê教導,照祂ê旨意做tāi-chì,chit種聖殿iáu是仝款,有一工會koh再像主前586年仝款被巴比倫帝國hō͘摧毀。

Chit段經文說明整座聖殿ê基本結構,包括有三層樓高,以及整座聖殿ê寸尺大細。
第1節,chit節真重要,講出所羅門建造聖殿ê開工日期,是tī伊登基ê第四年二月,mā是「以色列人離開埃及後ê四百八十年」。若kā chit-ê「四百八十年」ê數字,koh加上所羅門登基ê年代是tī主前966年,共計是1446年,這就kah一般學者考據以色列人出埃及大約是tī埃及第十九王朝蘭塞二世ê時chūn,mā就是主前1290年左右(參考創世記四十七:11),相差真chē。因為án-ne,有kóa聖經學者認為chit-ê年代無一定是正確ê時間,只是講出一個整數ê年代,á是「象徵」性ê數字,mā就是「 12」乘以「40」,chit兩個數字lóng真有特殊意義,因為「12」表示以色列民族十二支派,「40」表示一段「tú好」ê時間,ná親像摩西tī埃及「40」年,tī丈人葉特羅ê厝「40」年,然後受命帶領以色列人民tī曠野漂流「40」年,摩西tī西奈山頂領受上帝ê誡命tio̍h「40天」等等,lóng teh表示以色列人民離開埃及kah「40」有關ê特殊意義。

因為án-ne,chia ê「四百八十年」並m̄是beh說明確實時間,這是一個「整數」,kā建造聖殿kah出埃及ê時間連結起來,主要用意teh說明建造聖殿,beh表明ê是kah上帝拯救有關。Mā用來表明:有上帝ê拯救,in chiah ē-tàng脫離奴隸ê鎖枷,而成做有性命尊嚴kah自由ê人。因為án-ne,重要ê,不是beh去推算距離到chit-má tī toh一年。

第2到10節,chit段經文描述聖殿建築體ê結構,大部分起來講,聖殿是仿照會幕ê樣式建造ê,是長方形,分做三個主要部分,一是至聖所、二是聖所、三是外院。包括有內部長「二十七公尺,寬九公尺,高十三公尺半」,共有三層樓高。第7節特別說明建造聖殿ê過程中,無大鎚子ê聲音,mā無斧頭kah其他鐵器ê響聲,原因是所有ê「石料是tī石礦場裡開鑿ê」。Mā thang án-ne講,建造聖殿ē-tàng聽tio̍h ê,是只有鋸木材ê聲音,kah工人搬運建材ê聲音。 

第11到13節,chit段經文koh一pái說明kui個以色列民族邁向自由ê一個基本信念:就是beh以色列人民一定會遵守上帝ê律法誡命。只有án-ne,chiah ē-tàng hō͘上帝kah以色列民族連結做伙。相對ê,若是棄sak上帝,無遵守上帝ê律法誡命,就算有koh再堅固ê聖殿,mā是枉然。因為ná親像先知以賽亞所講ê,上帝並不住tī人ê手所建造ê厝裡。上帝是kah遵守祂ê教導ê人同在。

第14節,「所羅門起殿已經完成。(全民版)」chit句話是一種概略ê講法,表示頭前講述ê聖殿外型結構體,就是照ná方式建造起來ê。

重新查詢 專卷研經 列王紀上系列
錯誤回報,請聯繫comm[@]fhl.net