列王紀上 19章1節 到 19章18節   背景資料  上一筆  下一筆
Chit章講出上帝奴僕ê孤獨、無奈。因為以色列人民ê心已經剛硬,聽bē落去上帝奴僕先知以利亞所傳出上帝ê信息。伊bat表示寧可死去,因為非常痛苦。Mā同時向上帝控訴以色列人民ê悖逆行為。M̄-koh上帝iáu是照顧先知以利亞,並且為伊準備一位門徒以利沙。

這是一段難解ê經文,因為先知以利亞既然ē-tàng勇敢地「鬥」倒耶洗碧總共八百五十名御用ê先知,怎樣koh驚耶洗碧一個人?當伊恐嚇講beh刣伊ê時chūn,先知以利亞卻驚惶了起來,真奇怪。為甚麼會án-ne?mā可能kah耶洗碧是外邦cha-bó͘-gín-á有關,tī伊ê觀念中,根本to̍h無上帝,mā m̄驚上帝ê審判kah懲罰,因為án-ne,伊chiah敢恐嚇上帝ê奴僕先知。Á先知以利亞則暴露了人性siōng大ê弱點,當耶洗碧威脅beh殺害伊ê時chūn,伊認為性命已經有危險,因為án-ne,用死來向上帝控訴。Chit種用死表明當先知ê「孤獨心境」,伊講所有ê先知lóng已經被刣死,只chhun家己一個人,iáu被恐嚇kā遇tio̍h殺害。若是比較第十八章4節,俄巴底bat救出一百個先知,因為án-ne,m̄是lóng死去,至少iáu有一百個先知活teh。不過chit種用死來向上帝控訴,表明家己心內孤獨ê心境,先知耶利米(參考耶利米書二十:14-18)、約拿(約拿書四:3)lóng有共同ê經驗。

第1到4節,以色列王亞哈因為迦密山頂ê失敗,伊就kā先知以利亞tī迦密山頂所做ê每一件事lóng詳細kā bó͘耶洗碧講。一個真tú好ê王后,一定會幫助國王帶領人民趕緊tńg來到真實ê上帝身邊,悔改認罪。M̄-koh王后耶洗碧m̄是án-ne,卻是差遣使者去恐嚇先知以利亞,講「明á載」beh殺害先知以利亞。Chia ê「明á載」,表示真緊、馬上ê意思。因為án-ne先知以利亞驚惶,帶奴僕逃到南國猶大去避難。M̄-koh chit種逃亡ê生活,hō͘伊感覺真oh受,chìn前已經有為tio̍h避開亞哈ê追緝殺害,伊四界bih起來。chit-má是王后耶洗碧下令tio̍h殺害伊。因為王后耶洗碧已經刣死真chē先知,hō͘先知以利亞膽戰心驚。伊留落來奴僕,行到距離奴僕約有一工ê路程ê一個杜松樹下求死。伊向上帝表示家己已經「受不了了」,伊寧可死去。

第5到8節,真可能因為太thiám ê關係,先知以利亞就tī chit棵杜松樹下睏去à。上帝差派天使來服侍伊,有食物kah水。伊lóng食過、lim過,m̄-koh卻繼續躺落去,kah-ná表明死ê意願真強ê款。

天使第二pái出現,ài伊起來繼續食物件,就án-ne,hō͘先知以利亞有體力,ē-tàng繼續行長到「四十暝日」來到「何烈山」。Chia mā是摩西hō͘ 上帝呼召ê所在(參考出埃及記三:1)。
第9到10節,上帝親自對先知以利亞講話,問伊tī何烈山chia做甚麼?第10節是先知以利亞向上帝控訴以色列人民棄sak kah上帝所立ê約,m̄-nā拆毀上帝ê祭壇,而且iáu殺害上帝ê先知,chit-má只chhun伊一人。其實,俄巴底就bat救出一百位先知。因為án-ne,先知以利亞講只chhun伊一人,只是teh表示伊ê孤獨。

第11到12節,chit兩節描述上帝tùi以利亞面前經過ê情景,m̄-koh,無論是出現強烈ê大風、地動、火,都無看tio̍h上帝,只聽tio̍h上帝對伊講話ê聲音。換句話講,人無法度看見上帝ê面,ná親像摩西雖然上了上帝ê山,ē-sái講是就是無法度看見上帝ê面。人只有ē-tàng看tio̍h chiah-ê hō͘人性命感覺懍neh、驚惶ê景象。Á chiah-ê景象mā不過是因上帝ê命令出現。

第13到14節,這是先知以利亞第二pái聽tio̍h上帝ê聲音teh問伊。伊回答上帝ê話,lóng是teh控訴以色列人民悖逆上帝命令,無koh遵守kah上帝所立ê約。In刣死先知,只chhun伊一人。

第15到17節,chit段經文講述上帝賦予先知以利亞ê三項使命:一、ài伊膏立哈薛當敘利亞ê王;二、ài伊膏立耶戶當以色列ê王,這teh暗示亞哈王ê死期已經到à。三、膏立以利沙續接伊ê工作。這teh表明上帝準備ài接先知以利亞tńg去。

第18節,這是真重要ê一節經文,tī先知運動中一再出現chit種所謂「上帝餘民」ê觀念。這七千個人就是「上帝ê餘民」。M̄-koh,「七千」卻有含「神聖」、「夠額」ê含意。意思是講:上帝賜福hō͘忠心ê子民m̄免多,即使是「七千」人mā是真大ê氣力。另外一方面,「七千」mā thang當做龐大ê數目的意思。

重新查詢 專卷研經 列王紀上系列
錯誤回報,請聯繫comm[@]fhl.net