列王紀上 15章9節 到 15章24節   背景資料  上一筆  下一筆
續接亞比雅繼任為猶大王ê亞撒,ē-sái講是分裂後猶大王國中siōng被o-ló ê一位國王,mā因為án-ne,伊執政ê時間長到四十一年之久(主前910到869年)。這mā表示伊治理之下南國猶大,雖然iáu是親像伊ê阿公羅波安仝款,不時kah北國以色列ê王巴沙之間常相戰,m̄-koh因為伊像祖先大衛hit種做上帝看做對ê事,上帝賞賜hō͘伊有非常穩定ê政情,chit種穩定ê政情,就是透過外交手路,促成hō͘敘利亞kah以色列交惡,解除以色列侵犯in ê危機。Chit段經文thang參考歷代志下第十五章16節到第十六章6節,mā tùi歷代志作者ê資料中,看tio̍h亞撒án怎進行宗教改革,hō͘猶大人民全部lóng對上帝忠實。亞撒ê成功,siōng主要就是進行宗教改革,hō͘ hiah-ê混淆純潔信仰ê偶像神明,kah污穢上帝祭壇ê異端信仰無立足之地。

第9到15節,tùi chit段經文thang看tio̍h當時拜巴力偶像ê宗教信仰行為中,已經出現「男娼」,而chit種行業一定會影響tio̍h以色列人民對上帝忠實ê聖潔態度。為tio̍h beh進行宗教改革,伊大力剷除了祖母瑪迦時代所引進ê巴力偶像神明崇拜ê行為,拆毀神像、祭壇等。列王記作者認為亞撒ê老父亞比雅失敗ê原因,就是因為伊ê祖母瑪迦引chhōa in父親棄sak上帝。因為án-ne,tī伊執政ê時chūn,就kā祖母ê「太后」地位hō͘廢掉。

第11節thang用來對照第3節,作者非常清楚說明一個國王是m̄是得tio̍h上帝ê喜愛kah祝福,就看hit-ê國王是m̄是有像in ê祖先大衛hit種地敬奉上帝,獨獨以耶和華上帝做中心。

第16到19節,chit段經文說明以色列王巴沙已經入侵猶大,而且切斷了猶大ê對外交通,chit對猶大來講是真嚴重ê威脅。因為án-ne,亞撒用財物去建立kah敘利亞王便‧哈達ê外交關係,雖然chia講亞撒用chit種方式,確實得tio̍h了敘利亞王便‧哈達ê善意回應,其實mā是teh說明亞撒雖然進行宗教改革,卻同時mā有心理上ê矛盾──對上帝ê信心無夠。

第20到21節,便‧哈達知影猶大亞撒王ê意思,kah猶大結盟了後,隨時派出伊ê bē落去攻打以色列ê城鎮,逼kah原本tī拉瑪築壘設防ê巴沙不得不趕緊將軍隊退tńg來到得撒去。

第22到24節,亞撒王chit pái ê外交是成功ê,而且伊mā趁猶大撤tńg來軍隊而留落來無完成ê拉瑪防線,kā所有建材全部運tńg來猶大,tī米斯巴kah迦巴做築壘設防ê建材。

晚年ê亞撒kah-ná有離開上帝jú來jú遠ê現象,根據歷代志作者tī第十六章ê記載,講伊晚年連先知哈拿尼kā上帝ê信息傳達hō͘伊聽,伊聽了後m̄是謙卑悔改認罪,卻是「非常氣憤」,然後就kā先知關起來,而且開始「虐待一kóa人民」,家己已經病重跛腳mā boài向上帝祈求幫助,kan-taⁿ求問醫生,結果兩年後就死去à。

重新查詢 專卷研經 列王紀上系列
錯誤回報,請聯繫comm[@]fhl.net