列王紀上 15章1節 到 15章8節   背景資料  上一筆  下一筆
列王記作者tùi第十四章開始,撰寫王國歷史ê特色,就是紹介南、北兩國ê君王治國之情景交替編撰做伙,而且lóng有一定ê格式,親像:「以色列王XXX在位第X年,XXX登基做猶大王。」這是紹介猶大王用ê句話。仝款ê,紹介北國以色列王ê時,就會án-ne寫tio̍h:「猶大王XXX在位ê第X年,XXX登基作以色列王。」

列王記上第十五章分別記載猶大亞比雅(第1到8節)kah雅撒(第9到24節)chit兩個王,然後紹介以色列拿答(第25到32節)kah巴沙(第33到34節)chit兩個王。

Chit段經文是記載猶大王羅波安死後,伊ê kiáⁿ亞比雅繼承伊ê王位。作者只有短短ê八節篇幅記載亞比雅當猶大王ê事蹟。仝款ê記事mā記載tī歷代志下第十三章1節到第十四章1節。Tùi歷代志下第十三章ê資料就會知影,亞比雅執政期間bat kah北國以色列ê耶羅波安王有過一場大戰。北國出兵八十萬,南國出兵四十萬,tú好是北國ê一半。M̄-koh,南國猶大走chhōe上帝ê幫助,tī祭司pûn號筒聲中,上帝出力協助南國猶大,hō͘兵員只有一半ê南國猶大大勝北國以色列ê八十萬大軍,並且iáu消滅了北國以色列五十萬精兵。Koh khah重要ê是,chit pái戰役,猶大王亞比雅佔領了北國ê城市:伯特利、耶沙拿、以弗倫,kah附近庄頭。

第1到2節,chit兩節記載亞比雅登基作猶大ê王,m̄-koh伊統治ê時間真短,只有短短「三年」而已。比起伊ê老父羅波安統治耶路撒冷長到十七年,確實是短了真chē。其實,認真講起來,伊在位尚且不滿三年,只有兩年gōa而已。

Ē-sái講是第2節chia有點á問題,因為chia講亞比雅ê母親叫「瑪迦,是押沙龍ê cha-bó͘-kiáⁿ」。M̄-koh根據撒母耳記下第十四章27節ê記載,押沙龍有三個kiáⁿ,一個cha-bó͘-kiáⁿ,而這cha-bó͘-kiáⁿ ê名叫「她瑪,非常súi」。Án-ne,瑪迦kah她瑪應該是仝一個人。M̄-koh若koh再對照歷代志下第十三章2節ê記載,瑪迦是「基比亞城烏列ê cha-bó͘-kiáⁿ」。Án-ne看起來,比較正確ê看法是:烏列娶押沙龍ê cha-bó͘-kiáⁿ她瑪,然後生瑪迦。所以,瑪迦應該講是押沙龍ê孫女。

第3節,列王記作者ài用「無親像伊a祖大衛hit種一心一意忠於上主—伊ê上帝」chit種句型,來形容歷代君王是m̄是順從上帝ê旨意。Á大衛是成做列王記作者衡量一個君王ê標準。無達tio̍h chit-ê標準,就是棄sak上帝,去拜偶像神明。

第4到5節,chit兩節特別提起大衛,表示大衛因為對上帝忠實,因為án-ne上帝應允大衛ê kiáⁿ孫ē-tàng繼續統治耶路撒冷,雖然大衛ê kiáⁿ孫一再悖逆上帝ê旨意,m̄-koh上帝iáu是賞賜hō͘亞比雅有一個kiáⁿthang繼承伊ê王位,這mā講出上帝永遠信守應允。Chia特別指出大衛有做錯一件非常錯誤ê事,就是有關「赫人烏利亞」ê事件(參考撒母耳記下第十一章)。作者認為chit件事以外,大衛並無棄sak上帝ê旨意。

第6到8節,第6節只提起tī亞比雅活teh ê時chūn,伊ê老父「羅波安kah耶羅波安」之間常有戰事(參考十四:30),tī歷代志下第十三章則有提起羅波安用少tī耶羅波安一倍ê軍力,phah敗北國以色列,並且kā伊龐大軍隊之精兵「消滅了」chē kah「五十萬」。Á chit種戰事,並無因為時間ê消失去,以及北國以色列bat有過慘敗而收斂,亞比雅iáu是tio̍h不時kah耶羅波安統治ê北國以色列發生戰爭,這可能mā是致使伊chiah統治三年就往生ê原因。伊ê kiáⁿ亞撒繼承伊作猶大ê王。

重新查詢 專卷研經 列王紀上系列
錯誤回報,請聯繫comm[@]fhl.net