列王紀上 11章26節 到 11章43節   背景資料  上一筆  下一筆
Chit段經文是描寫北pêng十個支派ê領袖耶羅波安,伊是屬tī以法蓮支派ê領袖,tī先知亞希雅傳達上帝ê信息下,伊帶領北pêng十支派想beh脫離所羅門ê統治,耶羅波安ê事件,thang講是「叛變」ê行動。因為án-ne,引起所羅門決定beh殺害耶羅波安,伊只好逃走去埃及避難,一直到所羅門去逝chiah tńg去以色列。

第26到28節,chit三節紹介尼八ê kiáⁿ耶羅波安,伊是用法蓮族ê洗利達人。有真好ê能力而得tio̍h所羅門ê賞識,派伊「監督所有tī瑪拿西kah以法蓮支族地區ê勞工」,真可能伊ê工作hō͘伊發見所羅門ê勞工政策kah第九章22節所記載ê有cheng差。

第29到32節,chia講示羅人亞希雅先知帶來上帝hō͘耶羅波安ê信息,伊用肢體語言做象徵,向耶羅波安表示上帝beh tùi所羅門手中kā伊ê國分裂做做兩部分,而beh hō͘耶羅波安ê是「十個支族」,hō͘所羅門ê soah只有「保留一個支族」,chia講一個支族,是因為西緬已經被猶大併入à。Á便雅憫支族已經非常軟弱(參考士師記第二十到廿一章),mā是掃羅王ê後裔族人。因為án-ne,所羅門後代統治ê範圍,mā kan-taⁿ tī象徵性ê「正統傳承」而已,其他十族ê版圖lóng脫離了南部猶大ê管轄獨立去à。無論án怎,北部ê十支派應該是比南部ê猶大為領導中心ê大部分à。

第33到36節,chit段經文繼續講tio̍h上帝會án-ne處置所羅門,是因為伊違背上帝無遵守上帝,ê律法誡命。M̄-koh上帝iáu是留落來一個最後機會hō͘伊,chit-ê機會kah耶路撒冷有密切關係。因為tī chit城有聖殿,聖殿裡有上帝kah以色列人民立約ê約櫃,teh代表上帝ê榮耀。上帝希望留落來大衛ê後裔繼續管理聖殿,敬拜祂。希望猶大ê子民會因為án-ne而清楚明白上帝chiah是in性命ê主宰。其實,第36節mā是teh提醒耶羅波安,若是無敬拜上帝,就算上帝賞賜hō͘伊十個支派,mā會失去上帝ê帶領而失去所有ê一切。

第37到39節,先知亞希雅提醒耶羅波安,上帝揀選伊,就是beh伊帶領北部十支派ê人民會記得敬拜上帝,忠實tī上帝,ná親像大衛仝款,只有án-ne,chiah ē-tàng hō͘伊kah伊ê後裔永遠統治chiah-ê支派。先知亞希雅特別提醒耶羅波安tio̍h聽從上帝ê命令,做上帝歡喜ê事。Á上帝懲罰所羅門並m̄是永遠ê,意思是teh指若是耶羅波安不聽從上帝ê話,而所羅門ê後裔悔改,上帝iáu是會改變chit項懲罰ê。

Tùi第32節開始ê chit段經文一再強調,上帝之所以iáu保留一部分hō͘所羅門ê後代,是因為上帝對大衛ê疼。因為án-ne,thang看出kui個重點就是用大衛為主體。大衛ê一生,chiah是以色列人民所beh學習ê,m̄是所羅門。

第40節,可能因為耶羅波安開始有beh對抗所羅門ê動作,引起所羅門ê不滿,決定beh刣耶羅波安。

第41到43節,chia講所羅門統治以色列共計四十年,kah大衛仝款,羅波安繼承伊當以色列ê王。

重新查詢 專卷研經 列王紀上系列
錯誤回報,請聯繫comm[@]fhl.net