Tùi第七章開始到第十五章：Lóng是teh回答哥林多教會所提出ê問題。

Chit章談ê是有關婚姻ê問題。有ê人認為不應該結婚，保持獨身以示聖潔；有ê人認為即使結了婚，mā應該避免一切性ê生活；tī chit章經文中mā論到訂婚了後，是m̄是ē-tàng無結婚ê問題等等。Tī chit章經文thang分做下列幾個段落來看：
第1到7節，對已經結婚者，勸勉tio̍h保持夫妻關係，包括維持性生活。
第8到9節，對鰥夫kah寡婦ê勸勉。
第10到11節，勸勉siōng好mài離婚，因為這是聖經ê教導。
第12到16節，論到信徒kah非信徒ê婚姻關係。
第17到24節，對受呼召ê時是m̄是有受割禮ê問題，以及原本是m̄是奴隸ê事。
第25到38節，論到是m̄是保持獨身ê看法。
第39到40節，對寡婦是m̄是thang koh再婚ê看法。
會有頂面所講chiah-ê婚姻關係ê問題出現，真可能是kah該教會有信徒對耶穌koh再臨ê事有關。

Chit段就是討論到有關已經結了婚ê夫婦，bē-tàng假借任何理由而hō͘原本該有ê夫婦之關係受tio̍h影響。

第1到2節，chit節thang看出使徒保羅開始beh回答in信中所提起ê問題。「一個cha-po͘人ē-tàng無結婚顛倒是好ê」，chit句話真可能是引用該書信上，並m̄是使徒保羅所講，m̄-koh mā有可能是伊家己ê想法。因為伊家己就是無結婚，á是保持獨身。M̄-koh，因為tī哥林多城有真chē淫亂ê事發生，甚至tī教會內mā發生。所以伊認為避免誘惑siōng好ê方法，就是有婚姻關係。

第3到7節，說明夫妻tio̍h彼此互相扶持kah盡各自ê責任，無甚麼人比較重要ê問題，卻是彼此互相關係。「除非為tio̍h beh專心祈禱」，chit句話指出頂面所講過ê，有人認為耶穌teh beh koh再臨，所以kah婚姻對象分開，伊認為就算是án-ne，mā是有一定ê時間m̄是久長，若無，真容易受tio̍h誘惑致使婚姻關係受tio̍h影響。M̄-koh使徒保羅認為tio̍h beh像伊án-ne保持獨身，mā需要有上帝ê恩賜，心志chiah有辦法堅持。