哥林多前書 4章14節 到 4章21節   背景資料  上一筆  下一筆
Chit段經文kah前段經文顯然有真大ê無仝;前段讀起來有真強烈ê指責ê意思,而chit段經文,讀起來就會感覺鼓勵、勸勉ê意味真chiok厚。

Chit段經文ē-tàng看出使徒保羅對哥林多教會信徒信仰上ê缺失確實受氣à;伊為tio̍h án-ne事iáu特別差派伊siōng kah意ê門徒提摩太專程走了一chōa哥林多教會,並且表示若提摩太去了iáu是無法度解決問題,án-ne他就beh親自行一chōa。伊提醒哥林多教會ê信徒,重要ê m̄是在tī言語,卻是tī實際ê生活見證,就是tī耶穌裡有新ê生活,chit點mā是使徒保羅siōng強調ê信仰態度(請參考羅馬書十二:1—2,哥林多後書五:17,加拉太書六:15)。

第14 kah 15節,使徒保羅提起「導師」kah「老父」之間ê差別;所謂「導師」,是teh指hiah-ê tī知識上ê幫助者、指導者,古早時ê「導師」mā充當監護安全、生活ê角色。M̄-koh「老父」,是teh指性命ê延續關係。使徒保羅開拓哥林多教會,是伊kā耶穌ê信息傳hō͘哥林多城ê信徒,hō͘ in tī性命ê旅途上,因為kah耶穌ê連結而得tio̍h新ê性命。所以當伊講「老父」ê時chūn,就是用耶穌做媒介講ê。

第16節,chit節ē-sái講是寫hō͘哥林多教會書信ê主要目的之一,伊tī chia講「Lín tio̍h學我ê模樣」,tī第十一章1節伊koh講:「Lín tio̍h效法我,像我效法基督仝款。」使徒保羅常對伊建立ê教會眾信徒án-ne勸勉(參考腓立比書三:17,帖撒羅尼迦後書三:7—9)。

第17節,使徒保羅講beh派伊看做像家己信仰上ê kiáⁿ提摩太(參考提摩太前書一:2)到哥林多教會去訪問,tī chit-ê封信ê結尾處,伊koh一pái提醒哥林多教會tio̍h好款待提摩太(參考十六:10)。提摩太,伊是使徒保羅tī第二、三pái旅行傳道ê時ê得力助手,老母是猶太人,老父是希臘人,m̄-koh為tio̍h傳福音ê緣故,使徒保羅替伊行割禮(參考使徒行傳十六:1—5)。因為in bat同齊tī哥林多城同工傳福音,被真chē信徒o-ló有加(參考使徒行傳十六:2、十八:5,哥林多後書一:19),所以伊認為派提摩太去,一定ē-tàng解決分裂ê問題。

第18到21節,chit段經文thang清楚看tio̍h tī哥林多教會內,有人歡喜亂放話,講不實在,因為有人講使徒保羅beh派提摩太去,是因為伊m̄敢去哥林多教會看in。這mā是教會分裂ê主要因素之一,就是有人講不誠實。使徒保羅就是beh看māi hiah-ê專門teh教會內部散佈謠言ê人到底是怎樣à。使徒保羅說明一個真正屬tī上帝國度ê子民,是靠實際ê生活行為來顯明順服上帝ê教示,改變家己,hō͘家己成做一個新造ê人,chit種人chiah是teh成全上帝國度ê實現。Tī第21節,使徒保羅問哥林多教會ê信徒:如果in承認伊是大家得tio̍h信仰ê「老父」,án-ne in希望伊用嚴厲管教ê方式帶tio̍h鞭子去責罰in,iáu是beh伊帶tio̍h關心保護ê疼去看in?這就beh看哥林多教會怎樣回應使徒保羅ê勸勉。

重新查詢 專卷研經 哥林多前書系列
錯誤回報,請聯繫comm[@]fhl.net