哥林多前書 3章10節 到 3章23節   背景資料  上一筆  下一筆
Tī chit段經文中,使徒保羅用建築物做譬喻,用怎樣ê材料,建造怎樣ê厝,這主權lóng是tī建造者,m̄是奴僕á是材料本身thang決定ê。

第10到11節,建築物siōng重要ê,就是根基。好ê根基,chiah ē-tàng hō͘建造起來ê建築物屹立不搖。上帝已經立耶穌基督做教會唯一ê根基,無其它ê根基thang取代,chit點m̄-nā tī早期教會非常重要,tī今á日ê時代mā是仝款。無任何人ē-tàng取代耶穌tī十字架上ê救贖恩典。

第12到15節,tī chit段經文中,使徒保羅特別提起有kóa人建立ê根基m̄是用基督,卻是各式各種ê物件,意思是teh指chiah-ê物件,無在tī價值chē少,而在tī審判ê日子來臨ê時,其他ê根基lóng會露餡,經不起考驗。Chia提起「大火」,就是審判ê意思。Ná親像台灣俗語所講ê:「真金m̄驚火。」好ê信仰根基,火jú燒,會jú光華亮麗。信仰mā是án-ne,奠立tī耶穌基督之基礎上ê信仰,無論受tio̍h怎樣ê考驗只會發生閃亮ê光芒。

第16到17節,chit兩節是chit章ê中心經文;使徒保羅用「上帝ê殿」來形容教會kah上帝之間ê親密關係,信主耶穌ê人應該有chit種認bat。教會就是用基督為體(參考以弗所書一:23),所以分裂ê教會,等於是teh分裂基督ê身軀,teh毀損上帝ê聖殿仝款,會做chit種事ê人,bē是信主耶穌ê人。Á上帝一定會對chit種分裂教會ê人採取嚴厲ê審判。

Koh講,chit兩節mā teh提醒哥林多教會ê信徒,tī日常生活中,一定tio̍h有頂真ê態度,而bē-sái有淫蕩ê行為。因為每一個人ê身上lóng有上帝ê記號。

第18到20節,tī教會內部,每一個人lóng m̄-thang自認為真有智慧,因為每一個人tī上帝面前lóng是愚拙ê。使徒保羅引用約伯記第五章13節語,說明上帝會hō͘ hiah-ê自命聰明ê人,掉落tī家己認為周全ê詭計中,這表示人無論jōa-ni̍h-á聰明,一定會謙卑落來,chiah會看見上帝ê大能。

第21到23節,chit三節真清楚說明使徒保羅ê觀點:基督徒身上所有ê一切,全部lóng是tùi上帝來ê賞賜。一個真正有美好信仰ê人,bē kā所做ê事,全lóng看做是家己ê成就,應該tio̍h清楚知影,是上帝ê賞賜chiah有ê結果。無論是甚麼人lóng仝款,只要進入基督教會ê信仰團契,大家lóng仝款同屬tī基督、屬tī上帝。

第22到23節,chit兩節被「日本無教會主義」ê創始者內村鑑三引用有類似ê名言:「我為日本、日本為基督、基督為世界。」仝款ê,基督徒應該有chit種看法:我為福音,福音為基督,基督為上帝。

重新查詢 專卷研經 哥林多前書系列
錯誤回報,請聯繫comm[@]fhl.net