使徒保羅一直無bē記得耶路撒冷教會內有貧困信徒tú-tio̍h生活困境ê問題。所以伊每到一個所在，教會開拓起來後，就勸勉信徒tio̍h奉獻濟助耶路撒冷教會ê貧困信徒。伊會án-ne用心tī chit件事頂面，主要是beh hō͘耶路撒冷教會信徒bē用鄙視（siùⁿ）ê眼光看待外邦人ê教會，而ē-tàng感受tio̍h外邦教會ê信徒mā是真有疼心，會關心貧困者ê需要，這就是teh實踐耶穌ê教示，mā是teh完成摩西律法ê「愛人如己」ê規律。Koh講，伊認為猶太人基督徒分享屬靈ê恩賜hō͘外邦人，外邦人信徒就應該tī猶太人物質生活上ê欠缺hō͘ in必要ê資助（參考羅馬書十五：25—27），換句話講，這是外邦信徒應該有ê責任。

使徒保羅希望哥林多教會信徒會先準備好beh捐助耶路撒冷教會信徒ê需要，伊可能會親自去訪問in，m̄-koh mā可能會派該教會所熟悉ê人去the̍h，chit種人應該就是第10節所提起ê提摩太。伊希望真正ē-tàng實chit-má去訪問哥林多教會。

第1到4節，使徒保羅Tī chit段經文就真清楚講tio̍h伊ài哥林多教會準備好beh捐助hō͘耶路撒冷教會ê錢。第1節提起伊bat吩咐加拉太教會ê信徒án-ne做（參考加拉太書六：9—10）。M̄-koh tī hō͘加拉太教會ê書信中，並無明確講出ài怎樣救助耶路撒冷教會信徒，m̄-koh卻提起大家「tī信仰上同屬一間ê人」，因此就應該tī公眾ê「善事」上互相協助。這是一件重要ê認bat：大家lóng是一家人，彼此互相關心。雖然屬tī無仝ê族群、教會系統，m̄-koh lóng是屬tī耶穌基督ê信徒，chit-ê認bat是非常重要ê。chit-má使徒保羅要求哥林多教會信徒，tio̍h用存「小錢」ê方式來累積救助ê捐款。伊採用每一個禮拜日參加聚會ê時chūn，就「按家己ê收入照比例撥出一kóa錢，積存起來」。伊之所以án-ne建議，是無希望等伊到哥林多教會ê時，大家chiah想辦法beh khêng救助ê款項。續落來伊講in ē-tàng選派thang信任ê人將此款項帶到耶路撒冷去。這mā thang看出早期教會對tī財物lóng真小心，因為奉獻ê金錢一定tio̍h非常審慎處理，稍一不慎可能就會hō͘教會chit-ê信仰團契發生彼此m̄信任ê問題。

第5到7節，原本tī第4節記載使徒保羅講「如果需要」伊親自行一chōa哥林多，伊真願意。可能時間上有困難，á是行程iáu未確定，m̄-koh可能會路過而已。其實，tī第四章19節伊就án-ne講過：「總是，主若允准，我liâm-piⁿ to̍h會去lín hia。Hit 時，我to̍h 會知hiah-ê驕傲自大ê 人teh 講甚麼話，mā 會知in ē-tàng 做甚麼。(全民版)」tī第十一章34節，伊koh講：「若有人iau，tio̍h tī 厝裡先食，chiah免得聚會ê 時soah 變做受上帝審判。其他ê tāi-chì，等我去lín hia ê 時chiah 來解決。(全民版)」咱thang想像會tio̍h使徒保羅是一再期待，希望ē-tàng到哥林多教會去一chōa。根據使徒行傳第十九章21到第二十章3節，使徒保羅確實達成了chit-ê心願，而且tī哥林多教會tòa三個月久ê時間。這就是伊tī第6節所講ê過了一個寒天，因為每年ê十一月到隔年ê三月，有長到四個月時間，海上風湧強勁，無適合船隻航行ê緣故。Koh講，伊離開哥林多真可能tī時間上mā是提前，因為tī哥林多有人準備ài殺害伊（參考使徒行傳二十：3），所以逼hō͘伊一定tio̍h提前離開tńg去馬其頓。

第8到9節，chia提供了真重要ê資料，就是使徒保羅一直留tī以弗所。Án-ne，chit封寫hō͘哥林多教會ê書信，就是tī以弗所停留期間所寫ê。根據使徒行傳第二十章31節ê記載，伊tī以弗所停留長到三年之久，ē-sái講是伊tī外邦人地區宣教停留siōng久長ê所在。Tī第9節講以弗所ê門「大開」，意思是有真好ê傳福音機會。對tī傳福音ê工作者來講，掌握機會是非常重要ê。

第10到12節，使徒保羅tī chia提起可能會派提摩太到哥林多教會去。提摩太是使徒保羅第二pái傳福音ê時所得tio̍h一位少年傳福音ê同工。伊是路司得ê人，老母友妮基、外祖母羅綺lóng是猶太人（參考提摩太後書一：5），老父是希臘人。提摩太tī路司得kah以哥念lóng受信徒ê o-ló，使徒保羅帶伊同行傳福音ê時，為tio̍h減少不必要ê困擾，mā為伊行了割禮（參考使徒行傳十六：1—3）。使徒保羅非常喜愛提摩太，甚至稱伊是「tī信仰上ê真kiáⁿ」（提摩太前書一：2）。使徒保羅先差派提摩太去訪問哥林多教會，希望該教會ê信徒ē-tàng好好á款待提摩太。伊之所以差派提摩太，是肯定伊ê工作能力。Tī哥林多前書第四章17節使徒保羅就bat肯定過提摩太，可見使徒保羅對伊真信任。

Chia mā提起亞波羅，伊是出身亞歷山大城ê人，真有口才，而且對聖經非常熟悉。歡喜傳福音，後來得tio̍h百基拉kah亞居拉ê幫忙，tī傳福音ê事工上有真好ê見證（參考使徒行傳十八：24—28）。Tī第一章十二節提起哥林多教會結黨分派ê中間，有一陣人是非常擁護亞波羅ê。可見伊tī哥林多教會bat lóng受禮遇kah尊崇。使徒保羅知影亞波羅對哥林多教會有影響力，所以希望伊ē-tàng協助該教會，á是處理一kóa教會ê紛爭。可惜ê是，亞波羅tī時間上有困難。