使徒保羅強調tī疼ê內面，人ê心思意念是會成長ê，一個有成長ê人，tī chit時chūn就會發見家己過去ê幼稚行為，就會知影怎樣改正過來。

第11節，一個細漢gín-á，無論所想ê，á是行為舉止，lóng會充滿tio̍h gín-á氣，這是真自然ê現象。M̄-koh若是長大，就會kā過去gín-á氣ê表現漸漸棄sak掉。

第12節，chit節講「tùi鏡子裡看見ê影像，霧霧無清不清」，chia ê「鏡子」是teh指古代ê銅鏡，無親像今á日ê玻璃鏡片。古早時ê鏡子真貴，所以m̄是一般人買得起。若此，一般人所用ê「鏡子」就是koh khah普通ê材料，只要ē-tàng顯像出來to̍h ē-sái。使徒保羅引用chit種鏡子做譬喻來說明，每一個人無論怎樣有才華，對事物ê看法lóng會有霧霧無清不清ê一面。伊chit種講法，已經teh隱喻哥林多教會內面，有真chē人對別人所講，所做ê批評，並無一定是正確ê。「將來就會面對面」，這是teh指審判ê時刻，是非曲直lóng會顯露出來。仝款，mā無任何一個人thang講家己對上帝ê認bat siōng正確。只有tńg來到上帝面前，人chiah會真正認bat上帝。

第13節，是chit章ê結論。Tī使徒保羅ê書信中，會看tio̍h伊強調「信心」是得救ê泉源（參考羅馬書十：9—10）。伊mā強調基督徒應該心存ǹg望。有人講基督教ê信仰乃是「ǹg望ê宗教」。M̄-koh，使徒保羅tī chia強調，愛chiah是性命ê本質，若是無愛，則信心、ǹg望並無會真正對人ê性命有益處，因為信心、ǹg望lóng是屬tī人ê，只有愛chiah是屬tī上帝。Á上帝是永恆ê。所以只有愛，chiah會永遠存在。屬tī人ê部分，lóng會跟tòe人而消失。