哥林多前書 12章12節 到 12章31節   背景資料  上一筆  下一筆
Tī chit段經文中,使徒保羅特別用人ê身軀來譬喻教會chit-ê信仰團體。並且強調教會就是基督ê身軀。Án-ne,每一個人tī教會內ê信徒,lóng是連結tī耶穌chit-ê身軀上ê一個肢體。Á每一個肢體是無相仝ê,任何一個肢體lóng無法度講別個肢體不重要,á是家己認為khah輸別ê肢體,因為大家只不過lóng是基督ê肢體而已,m̄-koh連結做伙chiah是siōng重要ê事。

第12到13節,使徒保羅tùi身軀只有一個,而這身軀就是「基督」講起,續落來伊講大家lóng是tī基督chit-ê身軀上,續落來,伊kā重點指出來:無論是甚麼人,á是猶太人,á是外邦人(tī chia用「希臘人」作代表),是奴隸,是自由人,lóng tī這基督ê身軀上領受仝款ê聖神洗禮。

第14到20節,tī chit段經文中,使徒保羅強調每一個肢體lóng有特別功用,lóng是上帝特別ê創造,祂按照家己ê旨意造每一個肢體。換句話講,無任何人ē-tàng批評上帝ê創造,因為人是hō͘造物,而上帝是造物者。Kā無仝功能ê肢體安置tī身軀上ê,是上帝,m̄是肢體家己。

第21到26節,chit段經文非常重要,已經teh講出哥林多教會ê問題,就是有人會自認比別人koh khah重要,這並m̄是正確ê觀念。使徒保羅koh khah進一步強調,若是有人自認真重要,就應該伸手去幫助hiah-ê hō͘人認為不重要ê,hō͘每一個肢體lóng有仝款ê地位,這就bē致使分裂ê現象出現。使徒保羅tùi chia提出對肢體ê一個siōng重要mā是siōng基本ê共同體ê觀念。一個肢體受苦,所有ê肢體同齊受苦;一個肢體得榮耀,所有ê肢體就同齊快樂。

第27到31節,tī chit段經文中,使徒保羅先是koh一pái強調每一個信徒lóng是基督ê肢體,而後講述tī教會內面有領受各種無仝恩賜ê人,包括有使徒、先知、教師、行神跡ê、醫病ê、幫助人ê、管理者、講靈語ê等等。伊勸勉哥林多教會信徒ài有chit種認bat,chiah是避免教會分裂ê第一課。Tī第31節,使徒保羅ài大家追求hit-ê koh khah重要ê恩賜—愛。

重新查詢 專卷研經 哥林多前書系列
錯誤回報,請聯繫comm[@]fhl.net