哥林多前書 11章17節 到 11章34節   背景資料  上一筆  下一筆
這是一段非常重要ê經文,使徒保羅將主耶穌所留落來ê最後晚餐,mā就是Pôaⁿ過節暗頓定位為基督教會ê「聖餐」。早期ê教會有所講ê「愛筵」(參考使徒行傳二:46)。原本耶路撒冷教會ê愛筵是不分彼此,有錢ê人kah sàn-chhiah ê同齊分享。所以使徒保羅kā福音傳到外邦地區,mā Kā chit種聚會後ê愛筵帶到外邦教會,chit種方式就成做基督徒聚會ê一種模式。M̄-koh使徒保羅koh khah進一步將聚會後ê愛筵kah聚會中ê聖餐kā它區隔出來,chit點認bat非常重要,因為二者之間是有差別ê。

第17到19節,使徒保羅先指出哥林多教會信徒錯誤 ê行為,就是teh聚會中mā結黨分派,chit點tī第一章已經有指出。使徒保羅知影這是無法度改變ê現象,感觸地講了chit句「這thang hō͘人看出甚麼人有正確ê主張」,chit句話mā teh說明真理會jú辯jú明。因為真正真理並m̄是tī人ê學識,是 tī上帝ê疼。

第20到22節,chit兩節就講出第19節最後一句話ê意思,若是無實際ê疼ê行動,講了一大堆知識語言mā是枉然。顯然地,哥林多教會kā主耶穌ê聖餐kah愛筵混淆做伙。Á是講早期教會並無chit種分別,因為耶穌kah門徒守最後Pôaⁿ過節暗頓,就是一種重要筵席。所以基督徒聚會就是一種筵席,而chit種筵席siōng重要ê所在,是無論甚麼身分,大家lóng是同齊分享。M̄-koh,哥林多ê教會卻無án-ne,卻是「各人lóng急tio̍h食家己帶來ê物件,soah致使有ê iau餓,有ê醉飽」,這就kah所講ê愛筵完全無仝ê意義à。Koh講,如果教會內部有紛爭,則即使有愛筵,mā會失去它ê意義。Ài有愛筵,就m̄-thang有結黨分派ê事。所以使徒保羅真不細jī地指出,in ê愛筵是等於是teh藐視上帝ê教會仝款ê khiap-sì。

第23到26節,chit段經文真重要,mā是今á日基督教會舉行聖餐ê時,主持者所用詞句ê根據。新約福音書中所使用ê(參考馬太福音廿六:26—28,馬可福音十四:22—24,路加福音廿二:19—20),其實就是引用使徒保羅tī chia所詮釋ê聖餐ê意思。使徒保羅tī chia特別講聖餐所用ê餅,就是耶穌ê身軀。其實mā teh暗示:教會是基督ê身軀,若是結黨分派,就等於是撕裂基督ê身軀仝款。Á杯表明性命。所以lim杯中耶穌ê血,所表明ê就是kah耶穌ê性命連結,chit種連結mā teh表明一種新ê約開始,是kah上帝建立新ê約。這已經清楚teh說明基督信徒,就是kah耶穌ê性命親密相結連,永遠bē分離。Koh khah重要ê,用聖餐,就是teh宣告舊ê性命已經死去,全新ê性命teh beh開始,這是koh活ê ǹg望。

第27到32節,使徒保羅提醒哥林多教會信徒,每pái享用聖餐ê愛筵,就是需要先tùi反省家己,認罪悔改開始。若是無清楚chit點,食用聖餐,mā等於是teh藐視聖餐ê神聖意義。使徒保羅強調聖餐所beh表明ê,就是面對koh活ê主ê審判,所以面對審判ê主,大家享用聖餐ê時,態度就koh khah需要謙卑、謹慎。

第33到34節,既然聖餐是teh分享上帝tī耶穌裡拯救ê疼,所以「彼此thèng候」,chit句話mā teh說明彼此之間互相接納,而且會關心hiah-ê iáu未出現ê信仰伙伴,mā是一種彼此關心ê方式。若此,就會減少分黨結派之現象繼續惡化落去。

重新查詢 專卷研經 哥林多前書系列
錯誤回報,請聯繫comm[@]fhl.net