哥林多前書 10章23節 到 11章1節   背景資料  上一筆  下一筆
Chit段經文是使徒保羅kui個論點ê中心:基督徒ê自由。頭前有提過,哥林多城ê人往往將祭壇頂ê食物當做in社交活動ê佳餚,kā它用來宴請親朋好友,而且地點就是tī in獻祭ê廟宇。有時iáu會因準備siuⁿ過chē而會kā chhun落來ê食物送到市場上去販售。所以tī一個基督徒極少數,而異教徒佔絕大多數ê環境中,像哥林多城án-ne ê所在,tio̍h講m̄食到、不買tio̍h獻祭過ê食物,確實是真困難ê事。使徒保羅特別提出信徒應該tio̍h注意ê事。

第23到24節,使徒保羅一再提醒hiah-ê自認為信心真堅強ê信徒,in siōng kah意ê一句口頭禪,就是「我有自由做任何事」,m̄-koh每pái有人án-ne講,使徒保羅就會接落一句話講:「並m̄是每件事lóng有益處。」(參考六:12)這是使徒保羅ê重點,mā是伊做tāi-chì為人ê中心思想。一個真正有信仰ê耶穌信徒,一定會想tio̍h別人ê需要,m̄是只關心家己ê利益而已(參考腓立比書二:4)。

第25到26節,使徒保羅mā相信市場上買來ê食物lóng是thang食ê。因為無人會真清楚toh一kóa是拜過偶像後被送到市場上販售ê食物。M̄-koh食hiah-ê食物並無會損pháiⁿ身軀,所有食物lóng是tùi上帝來賞賜。Hiah-ê祭拜ê行為並bē hō͘上帝賞賜ê食物有任何影響。

第27到30節,使徒保羅講若是有人「請lín食飯」,這m̄是指tī廟前ê宴席,tī chia所講是teh指一般家庭、餐館ê。伊講出席hit種ê宴席,thang安心食每仝款食物,m̄免去問每一道菜ê出處。仝款ê,tī菜市場販賣ê食物,有獻祭過kah無獻祭過ê食物,通常lóng是混雜做伙了,m̄免每樣lóng問,因為連hiah-ê販賣ê商人mā分無清楚。M̄-koh使徒保羅講如果有人已經提醒toh一kóa食物是祭拜過ê,án-ne就mài食,無需要koh khah chē ê理由á是辯解,因為別人知影有基督徒對tī祭拜過ê食物真敏感,所以in提醒基督徒tī宴席中準備出來ê食物裡有祭拜過ê物件。In會án-ne提醒,是因為in ê良心催hō͘ in一定tio̍h清楚kā受邀請ê基督徒講,chit種善意,是彌足珍貴ê。注意第28節,chia講如果有人邀請你參加宴席,而且kā你講桌頂ê食物是祭拜過ê,hit人其實已經考慮tio̍h你ê信仰需要,chiah會kā你講。你就beh知影hit位親友真可能是teh試探你,ài beh看你食á是m̄食、lim á是不limà。如果你m̄食、不lim hiah-ê in已經祭拜過ê食物,以後hit人會koh khah小心ê準備食物。反之,如果無án-ne明確ê態度,有第一步ê食物誘惑,續落來ê,連串ê誘惑就pái tī目睭前teh等待你去承受。M̄-thang siuⁿ過自信,認為家己lóng thang贏過,總是ài時刻記tiâu:遠離誘惑。Án-ne chiah是正確ê觀念。

第31節,chit節thang講tùi第八章開始,討論有關基督徒社會生活ê總結論:一切lóng是為tio̍h榮耀上帝。Chit點mā ē-sái講是基督徒siōng koân ê原則,m̄是為tio̍h家己,卻是為tio̍h榮耀上帝ê名。

第32到33節,thang參考第九章19到23節所講ê,為tio̍h beh爭取koh khah chē ê人來信耶穌,無論對甚麼人,包括了猶太人、希臘人、外邦人等等,使徒保羅講寧可放棄家己ê需要、條件,只為tio̍h beh爭取koh khah chē ê人成做上帝國度ê子民。使徒保羅teh傳道生活中一直就是信徒ê表率,伊mā希望大家kah伊學,主要目的就是hō͘ koh khah chē ê人來信耶穌。

第十一章1節,tī第四章16節使徒保羅已經勸勉哥林多教會ê信徒效法伊。現在伊koh一pái ài哥林多教會信徒「效法」伊,ná親像伊學習耶穌。伊寫hō͘腓立比教會ê書信中án-ne講:「Lín tio̍h有基督耶穌ê心志(全民版)」(腓立比書二:5)

重新查詢 專卷研經 哥林多前書系列
錯誤回報,請聯繫comm[@]fhl.net