哥林多前書 1章18節 到 1章31節   背景資料  上一筆  下一筆
Tī chit段經文中,ē-tàng看出使徒保羅寫chit本書信siōng主要ê中心題旨,就是beh說明基督死tī十字架上ê信息,khah贏過世間任何一切。使徒保羅強烈而且明確地指出:只有耶穌死tī十字架上ê信息,chiah是屬tī耶穌基督chit-ê信仰團契ê中心。如果疏忽chit-ê重要信息,真緊to̍h會曲解福音ê本質。

第18到20節,chit節明確指出基督死tī十字架上ê信息,就是上帝拯救ê大能。然後tī第19節,使徒保羅引用以賽亞書第廿九章14節,經文ê背景是耶路撒冷有危機,被亞述帝國包圍,為tio̍h beh解決圍城ê危機,猶大bē記得走chhōe上帝ê協助,卻是去chhōe hiah-ê所謂國家「智囊團」,想beh kah埃及聯盟,認為óa靠人ê氣力ē-tàng解決城被圍困ê問題,結果是徒然無功。

第21到25節,這是真重要ê一段經文,使徒保羅tī chia提出一個真重要ê認bat:認bat上帝m̄是óa靠人ê知識,想以人ê知識明白耶穌死tī十字架上ê意義真oh。Ná親像先知以賽亞書講述ê,上帝kah人之間ê認知相差之遠,就ná親像天kah地之間cheng差仝款地遠(參考以賽亞書五十五:8—9)。認bat上帝,一定tio̍h用謙卑ê心靈,tùi認罪開始,因為知影認罪ê人,chiah體會得出十字架ê意義。伊特別提起希臘人講究智慧,而猶太人走chhōe神跡,m̄-koh只有信耶穌ê人chiah會知影十字架救贖ê可貴。

第26到31節,tī chit段經文中,使徒保羅講出伊tī外邦人地區傳福音ê心得,就是會接受福音信息ê人,lóng是tùi自認真卑微ê人開始ê,相對ê,hiah-ê自認真有學問、地位ê人,卻無機會藉tio̍h耶穌kah上帝連結起來。

第26到29節,上帝揀選人,是teh表明祂ê主權,m̄是根據人ê條件。其實這mā是使徒保羅ê親身經驗,伊原本看家己真高貴,而且鄙視(siùⁿ)信耶穌為救主ê基督徒,伊chiah會用殘酷ê手路迫害信徒,最後,當伊tú-tio̍h koh活ê主耶穌ê時,感覺萬分見笑,mā tùi hit時起,伊改變了性命態度,並投入一生ê氣力奮力傳福音。使徒保羅講上帝án-ne揀選ê方式,是beh hō͘心中驕傲ê人感覺見笑,而知影謙卑落來。

第30到31節,使徒保羅講信耶穌ê人,就ē-tàng藉tio̍h耶穌ê救恩kah上帝有合宜ê關係,並且因此而成做聖潔ê子民。所以真正thang誇口ê,就是伊認bat上帝ê救恩。第31節是引用耶利米書第九章23到24節語。

重新查詢 專卷研經 哥林多前書系列
錯誤回報,請聯繫comm[@]fhl.net