歷代志上 6章1節 到 6章15節   背景資料  上一筆  下一筆
Chit章全部lóng是kah利未家族ê kiáⁿ孫有關。有一個前題小khóa注意一下,就是利未原本因為kah西緬參與屠殺示劍城ê事件(參考創世記第三十四章)而遇tio̍h雅各ê詛咒(參考創世記四十九:5—7)。後來,利未人ê kiáⁿ孫因為tī出埃及入曠野時代,「服從摩西ê命令」,刣死hiah-ê敬拜金牛ê人民(出埃及記三十二:26—30),tùi án-ne得tio̍h摩西ê祝福(參考申命記三十三:8—11)。因為án-ne,tùi原本雅各詛咒ê分散,到落尾摩西對in ê祝福,變成明顯ê對照,就是in分散tī各族khiā起之地,m̄-koh卻成做各族tī心靈上ê指導者,in主要ê工作是帶領人民敬拜上帝,替以色列人民「贖罪」(第48到49節),mā因為chit種工作,in漸漸變成以色列社會ê意見領袖,特別是亡國tī巴比倫帝國了後,祭司ê角色扛頭,而且占有非常重要ê份量,成做後來猶太人社會ê領袖。

Chit段經文是紹介利未ê家族之族譜。Mā可能是kah祭司ê資料有密切關係,因為án-ne,chit份族譜ē-sái講是siōng詳細祭司族譜。其他ê資料thang參考歷代志上第九章10到12節,以及以斯拉記第七章1到5節,以及尼希米記第十一章15到24節等等。

第1到4節,chit份tùi利未到非尼哈ê族譜,ē-sái講是tùi出埃及記第六章16到25節ê資料節錄出來ê。

第5到15節,chit段族譜tùi第4節就thang清楚看tio̍h主要是teh紹介以利亞撒ê後代,mā是用撒督ê直系家族為主軸。

Tī第15節特別指出tī主前586年猶大亡國,人民hông掠去巴比倫做奴隸ê時,祭司約薩答mā tī受掠ê行列中。其實,大部分ê祭司lóng是,mā因為祭司tī奴隸之地無法度koh再維護祭祀禮儀,in轉而推動「會堂」研讀聖經kah祈禱ê活動。直到主前538年巴比倫亡國,波斯帝國hō͘以色列人民回鄉,當猶大人民tńg來到故鄉,雖然重建了聖殿,m̄-koh in猶原維護tio̍h「會堂」聚會ê方式。

重新查詢 專卷研經 歷代志上系列
錯誤回報,請聯繫comm[@]fhl.net