歷代志上 28章1節 到 28章8節   背景資料  上一筆  下一筆
第廿八到廿九章,是記載大衛王kā伊ê王權移交hō͘伊ê kiáⁿ所羅門。Chit兩章無親像列王記上第一到二章記載有關大衛王晚年,王室發生內鬥ê情形,包括亞多尼雅密謀奪取王位;大衛王交帶所羅門整肅約押、示每等人。作者省略án-ne資料ê原因,真可能是beh kā chit pái ê政權轉移,描寫做是一pái和平、順利,並且是全以色列所有ê族群lóng接受ê。Koh khah重要ê一點,tùi大衛王到所羅門,以後以色列君王(包括北國ê以色列、南國ê猶大),政權ê轉移無koh是由先知á是大祭司直接tùi上帝受命膏立,卻是成做世襲(除了奪權篡位者外)。可見歷代志作者所持ê觀點是屬tī官方資料ê立場khah-chē。

Chit章經文thang分做兩部分來看,一是大衛王對全國各支族代表、政府高級官員講話,主要koh再說明建造聖殿ê事。等於是為所羅門以後beh建造聖殿ê事,做重要ê背書,ài全國代表一定tio̍h協助所羅門達成任務。二是對所羅門講話,hō͘伊知影關係建造聖殿ê所有大細事。

Ná親像每一個統治者所期待ê,就是beh穩定國家政權,除了有堅強ê國防、經濟、政治之外,koh khah需要有宗教力量ê支撐,若無,民心真oh安定,這情況是古今中外lóng然。大衛王向以色列各支族ê族長、政府各級重要官員,包括軍事將領等說明,伊無建造聖殿,而需要由伊ê kiáⁿ所羅門建造ê原因,mā希望藉tio̍h in ê幫助,tī伊往生後,in thang支持所羅門完成建造聖殿ê工作。這mā等於是大衛王teh交帶遺言。

第1節,chit節thang看出大衛王召集全國siōng koân代表大會,出席者包括各支族代表,以及政府高級官員、軍事將領,kah王室代表等,全部lóng召集到耶路撒冷。

  	第2到5節,chit段經文大衛王真清楚說明伊原本是想beh建造聖殿,好安置上帝ê約櫃,好榮耀上帝。M̄-koh,上帝不准,主要原因是大衛王因為不時出兵相戰,致使伊ê手「流過真chē人ê血」。然後伊講上帝猶大支族中,伊被揀選出來做王,而且揀選伊ê kiáⁿ所羅門thang續接伊ê王權。這等於確認所羅門就是王位ê繼承人。

第6到7節,tī chit chit兩節經文中,大衛講有兩件事,是上帝對伊交帶ê事:一是講所羅門beh建造聖殿。二是上帝會kah所羅門同在,而且看待所羅門ná親像kiáⁿ仝款ê疼伊。M̄-koh基本要件是所羅門一定tio̍h遵行上帝一切律法命令chiah thang。

第8節,伊命令頂面所講以色列全國各界代表一定tio̍h完成上帝交帶ê這兩件事,除了協助所羅門完成建造聖殿ê工作,mā tio̍h遵行上帝ê命令旨意。

重新查詢 專卷研經 歷代志上系列
錯誤回報,請聯繫comm[@]fhl.net