歷代志上 25章1節 到 25章31節   背景資料  上一筆  下一筆
聖殿記載tī敬拜ê時需要唱歌。唱歌是o-ló ê方式之一,除了跳舞,唱歌siōng ē-tàng表現出感恩ê心境。Tùi聖經中thang看出以色列人民m̄-nā是一個宗教心真強ê民族,而且是一個tī音樂、詩歌方面真有恩賜ê民族。Tùi chit章thang看tio̍h聖殿詩班ê成形。

第1節,chit節講聖殿ê樂團是由「大衛王kah利未人ê領袖分派亞薩、希幔、耶杜頓三個利未宗族主持禮拜ê事」。

Chia講chiah-ê樂團ê工作,就是「beh唱出上帝ê信息」。因為án-ne,thang理解為甚麼真chē先知講預言ê時,ná親像teh唱歌仝款搖晃tio̍h身軀,大概就是chit種唱歌ê方式。甚至真chē先知差不多lóng是詩人,像以賽亞、耶利米、以西結、約珥、阿摩司、俄巴底亞、那鴻等lóng是詩人。
Koh講,chit節mā提起tī聖殿ê樂團會用豎琴、七弦琴、鐃鈸等樂器伴奏。

第2到8節,chit段經文寫出亞薩、希幔、耶杜頓等三個宗族ê人以詩歌唱出上帝ê信息,以及頌讚kah感謝ê詩歌。

Chia mā講in teh敬拜上帝ê時chūn,希幔beh指導伊ê眾kiáⁿ彈奏頂面所講ê豎琴、七弦琴、鐃鈸等樂器。詩篇第一五○篇作者講in除了頂面所講chiah-ê樂器外,iáu有吹號(號角)、打擊大細無仝ê鼓等,所有chiah-ê樂器lóng是為tio̍h配合聖殿ê禮拜而用。

Tùi亞薩ê四個kiáⁿ、耶杜頓ê六個kiáⁿ,加上希幔ê十四個kiáⁿ,án-ne共計廿四個人,in「lóng是專家」,koh加上受過專業訓練ê利未人音樂家,就總共有chē kah「兩百八十八人」tī聖殿投入音樂ê工作。Thang想像會tio̍h聖殿音樂工作ê重要性和美。

第8節,chit節是chit章經文ê中心,說明擔任聖殿職務m̄是根據背景,卻是用抽籤決定所擔任ê職務。原因是無人ē-tàng the̍h家己ê專長á是特殊條件選擇家己認為「好」ê工作。敬拜上帝ê事,即使是人看做siōng卑微ê事,mā是siōng神聖、重要ê事務。Chit種信仰ê認知kah觀念是非常重要ê。

第9到31節,chit節是續接第7節所提起ê,kā chit二百八十八人根據家族分做「二十四組,每組十二人,由一個組長管理」。Mā是仝款,用抽籤ê方式排出服事ê順序表。

重新查詢 專卷研經 歷代志上系列
錯誤回報,請聯繫comm[@]fhl.net