歷代志上 15章25節 到 16章7節   背景資料  上一筆  下一筆
Chit段經文mā thang參考撒母耳記下第六章。大衛帶所有ê重要官員、將領、民間長老代表等去搬運約櫃。為tio̍h beh搬運約櫃,大衛真隆重地舉行獻祭禮儀。Tī撒母耳記ê資料中,特別提起利未人kā約櫃扛tī肩頭上,chiah行六步,大衛就beh隊伍停落來,先舉行獻祭了後,chiah koh再繼續行動。

第25到28節,chia講伊共獻了「七隻公牛kah七隻綿羊」為祭,chia lóng用「七隻」,表示神聖ê意思。M̄-nā án-ne,大衛mā kah利未人穿插仝款ê麻紗長袍,而大衛iáu同時穿「以弗得」,chit點有點á奇怪,因為這以弗得ê衫褲是只有祭司chiah thang穿(參考出埃及記第廿八章,撒母耳記上二:18;廿二:18),至少mā若是利未族人才有資格。大衛並m̄是利未族人,可能是伊想beh參與祭司服事祭祀禮儀ê工作。特別ê所在是kui個搬運ê過程,是用siōng優美ê音樂、舞蹈來迎接約櫃,顯示出來ê,m̄-nā是kā約櫃看做siōng珍貴ê寶物,而是beh表明對上帝ê疼,以o-ló ê態度做出回應。

第29節,大衛因為ē-tàng順利搬運約櫃,因為án-ne,tī搬運ê過程中,伊真盡情ê搭配音樂而跳起舞來,而且沿路一面跳,近óa跟tòe tī搬運ê隊伍中。Á chit-ê鏡頭hō͘伊ê bó͘,mā是掃羅ê cha-bó͘-kiáⁿ米甲看tio̍h,撒母耳記下第六章20節,記載米甲講出chit種話:「「以色列王今á 日有gōa 大ê 榮光!今á 日露體tī 人臣ê 女婢目睭前,親像一個無hē 落ê 人無驚見笑露體 (全民版)。」米甲chit種話,是teh表示大衛穿ê是麻紗長袍,卻m̄是穿插王服。可能因為伊tī跳舞中無經過意ê露出下體,而hō͘米甲感覺真見笑。撒母耳記下第六章21到22節記載大衛聽米甲ê話了後,mā真無歡喜,就講伊跳舞是為tio̍h beh榮耀上帝,因為上帝揀選伊當以色列ê王。伊會án-ne跳舞,除了是榮耀上帝外,mā teh表明伊ê謙卑,而且mā得tio̍h宮中女婢ê o-ló。結果撒母耳記下作者特別tī第23節講,米甲tùi chit-ê生都無生養kiáⁿ,有意用chit種話表示米甲受tio̍h上帝ê懲罰。

M̄-koh有關米甲終生不有娠生kiáⁿ ê事mā thang án-ne瞭解:因為伊是掃羅ê cha-bó͘-kiáⁿ,因為án-ne,生落來ê kiáⁿ mā算是掃羅ê後代,真可能對大衛ê政權有威脅。因為án-ne,大衛mā趁此機會chhōe-tio̍h理由m̄ kah伊同房。

第十六章1到3節,當約櫃安置tī大衛準備好勢ê會幕裡了後,大衛隨時就舉行獻祭禮儀,表示感謝上帝。真清楚,chit項獻祭禮儀有大衛參與其中,m̄-nā是祭司而已大衛因為參與獻祭ê工作,因為án-ne,伊kā祭司獻祭後所得tio̍h ê食物分hō͘所有參加ê人民,並且祝福了in。

	第4到7節,chit段經文說明大衛開始,tī會幕舉行敬拜ê時,有利未人擔任樂師負責歌唱ê工作。

重新查詢 專卷研經 歷代志上系列
錯誤回報,請聯繫comm[@]fhl.net