這是非常特別ê一章，因為chit章tùi頭到尾都無提起但以理chit-ê人，只有提起kah伊同時被徵選入王宮內ê另外三個人，而chit三個人原本ê名叫：哈拿尼雅、米沙利、亞撒利雅（參考但以理書一：6、二：17），m̄-koh tī chit章中lóng是用巴比倫人ê名（參考三：12、16、19、23、26、28）。

	Koh講，tī chit章中hō͘咱看tio̍h ê kah-ná但以理對tī chit項國家政策ê決定kah-ná是置身tī外，一點á關係mā無，這kah第二章48節提起ê「王賞賜但以理真chē貴重ê禮物，koh提升伊，委派伊管理巴比倫省，並任伊做王家顧問之首」，有真大ê cheng差，因為kā chit節用來對照第三章開始就提起尼布甲尼撒王beh實施重大ê政策ê時，卻無提起但以理是m̄是參與，顯然bē合常理。因為án-ne，chit章真有可能是獨立ê資料。真可能編撰者用這資料是為tio̍h beh鼓勵當時tī希臘化政策之下受tio̍h嚴重迫害ê猶太人，希望in m̄-thang放棄信仰，tio̍h對上帝有信心，而kā此資料插編tī-chia。

	因為án-ne，mā thang kā chit章單獨tùi但以理書中抽出來成做一個獨立ê單元來讀，因為這是一篇真好ê「殉教者文獻」，thang看tio̍h tī政治迫害之下，忠於上帝信仰ê子民怎樣忍受迫害，mā學習認bat上帝怎樣帶領hiah-ê忠實tī祂ê子民行過hit種驚惶、不安，以及性命隨時有危險ê旅途。

	Chit章比較khah特別ê所在，乃是有一種希臘文版本聖經，包含另外一段長到六十六節ê經文，提起chit三位青年tī火爐中ê情景。Chit段經文tī天主教《思高聖經學會版版》ê聖經中保存，m̄-koh teh改革宗ê基督教聖經中，chit段長到六十六節ê經文則被列入tī「次經」中。

Chit段經文提起巴比倫王尼布甲尼撒鑄造一座家己ê金像，不過並無夠額ê資料thang證明伊確實做過chit件事。M̄-koh卻有史料hō͘咱知影tī希臘帝國時代，安提阿哥四世bat tī「達夫內」（Daphnae）chit-ê所在鑄造一座亞波羅（Appollo）金神像，mā bat tī耶路撒冷聖殿khiā立一座「宙斯」（Zeus）ê金神像，安提阿哥四世並且自稱做神ê化身，ài人民向伊膜拜（參考Ammianus Marcellinus 22.13.1.），主要目的就是beh摧毀猶太人ê耶和華宗教信仰。

安提阿哥四世為tio̍h beh推動統治之轄區內所有ê人民「希臘化」，下令猶太人bē-tàng為gín-á舉行割禮，甚至ài in食豬肉，mā親自刣豬並kā它獻tī耶路撒冷聖殿ê祭壇頂，為tio̍h chit-ê tāi-chì，猶太人bat全力反抗，史學家講至少有四千個法利賽人為tio̍h beh維護聖殿ê聖潔遇tio̍h屠殺。因為án-ne，thang án-ne了解：chit段經文ê背景就是kah安提阿哥四世推動ê「希臘化」有密切關係。

	Chit段經文mā thang看tio̍h chit三個猶太菁英確實真有信仰原則，並無因為tī巴比倫享受高級官員ê位階，就kā應該有ê信仰原則hō͘疏忽了á是放棄、妥協。

    第1節，tùi chit節所描述ê chit座金像來看，這是一座非常高大ê金像，ē-tàng看出當時ê巴比倫帝國之富裕。

    第2節，當巴比倫王尼布甲尼撒kā chit座金像造好khiā立起來了後，召集所有ê文武官員參加金像ê揭幕典禮。有kóa學者認為chit座金像並m̄是尼布甲尼撒本人ê金像，卻是teh代表巴比倫帝國ê主神「拿布」（Nabu）。巴比倫人認為chit-ê「拿布」神ē-tàng庇護巴比倫人民。

    第3到7節，chia講參加ê人是包括「大臣kah百官」，而tùi第2節提起所邀請ê官員共計分七級，是tùi中央到地方lóng有代表出席，換句話講，這是全國性ê一pái大典。第4節提起講chiah-ê代表來自巴比倫帝國轄區之內ê所有國家、族群、語言系統等lóng包括在內。Tī第5節提起只要聽tio̍h各式樂器ê號聲一響，所有聽tio̍h ê人，無論是甚麼身分，lóng tio̍h對chit座「尼布甲尼撒王所立ê金像」坦覆 (thán-phak）下拜。注意chia提起ê樂器，lóng是希臘時代盛行ê樂器。

    Siōng重要ê經文是tī第6節，chia講「甚麼人不坦覆 (thán-phak）敬拜，就beh馬上被hiat入去燄火熊熊ê窯裡」，意思真清楚，就是處死刑。因為án-ne，所有參加ê人lóng照國王ê命令拜了金像。

    第8到12節，chit段經文講有人利用chit-ê機會向國王尼布甲尼撒控告猶太人，chiah-ê人真可能就是巴比倫ê hiah-ê術士、占星家等所謂有學問ê人，可能是為tio̍h但以理ê事件，hō͘ in tī國王面前á是巴比倫帝國ê官場上失寵而心生嫉妒。In特別指名講chit三位「管理巴比倫省政務」ê猶太人—沙得拉、米沙、亞伯尼歌「不拜王ê神明，mā boài向王所立ê金像下拜」。

第13到15節，巴比倫王一聽chit項指控，就「大發雷霆」，下令kā in三人帶來，並且真無客氣ê質問in為甚麼beh抗拒命令，beh kā in「hiat入去燄火熊熊ê窯裡」。王並警告in m̄-thang「認為會有神明來救in」。伊án-ne講，tú好teh表示伊比任何神明lóng iáu有權威、力量。

    第16到18節，chit三節是kui章經文ê中心，siōng主要是teh說明chit三位青年深信in所信ê神一定會來拯救in。就算無，in mā bē敬拜尼布甲尼撒王所立ê神像。這已經完全否定了尼布甲尼撒王自認偉大，以及伊想beh扮演神明ê念頭，chit對尼布甲尼撒王來講，是一個真大ê侮辱，特別是chit三位青年竟然是tī大家金金teh看之下講出chit種話來，對尼布甲尼撒王來講，koh khah是嚴重ê侮辱。In深信in所信ê上帝一定會來救in「脫離燄火熊熊ê窯」kah國王ê手，就算無，mā bē下拜。

第6節、第11節、第15節、第17節等等，lóng一再提起「燄火熊熊」ê句話，這有點á ná親像古代teh刑罰hiah-ê重要罪犯ê時所用ê「火刑」仝款，ná親像tī羅馬帝國統治之下，真chē基督徒就是hō͘綁tī十字架上，然後用火活活燒死仝款。直到中世紀時代，歐洲基督教宗教法庭mā不時以chit種刑罰對待hiah-ê被判做「異端」ê信徒。

這事件表面上看起來kah-ná是一件政治事件，其實應該講是一件正港ê宗教迫害事件，只是以政治手段來進行。其實mā tùi chia thang看tio̍h尼布甲尼撒清楚，beh kā以色列人民消滅siōng好ê方法，就是先消滅in ê宗教信仰，如果宗教信仰無了，chit-ê以色列民族就會瓦解，因為chit-ê民族之所以ē-tàng連結做伙，就是in ê耶和華宗教信仰之緣故。