這是詩篇中七首懺悔詩中ê一首（另外六首是：第六首、第三十二首、第三十八首、第五十一首、第一三○首、第一四三首等），tùi第23到24節thang明顯看出是屬tī個人ê懺悔詩歌，因為án-ne真少用tī公眾ê場合裡。

第1到12節，chit段是詩人teh向上帝傾訴伊性命所tú-tio̍h ê苦難。Tī chit段傾訴ê詩歌中，詩人採用「野鳥」、「貓頭鷹」、「雀鳥á」來描述家己ê孤獨無助。因為伊感受bē-tio̍h上帝ê垂憐，即使向上帝祈禱mā得bē-tio̍h回應。

第4到5節、第11節等等，lóng清楚顯示作者已經面臨性命ê終點，陷入奄奄一息中間。詩人ê意思是若上帝iáu m̄出手救助，伊隨時就會死亡。伊甚至認為仇敵敢囂張地辱罵、戲弄、詛咒伊，就是因為上帝受氣ê緣故（第9到10節）。

第13到22節，chit段詩歌thang看出詩人真可能是hō͘掠到巴比倫做奴隸，tī苦難中所寫ê詩歌。因為tī巴比倫時常受tio̍h戲謔，ná親像第一三七篇ê詩人描述in受掠tī巴比倫做奴隸ê時所經歷到ê境遇仝款。Chia詩人清楚表示，in雖然活tī奴隸生活中，iáu-koh確信上帝就是in性命ê救主，深信有án-ne ê一工，上帝一定會救助in，帶領in重回厝裡園，並且復興in ê國家。因為án-ne，in beh「為後代kā上主ê作做記號錄落來，hō͘ hiah-ê未出世ê人曉得頌讚伊」，chit種信仰情操chiah是真實ê。

第23到24節，chit段詩歌thang看出詩人感受tio̍h家己壯年ê日子，卻面臨死亡ê來臨，因為án-ne，祈求上帝ê憐憫，hō͘伊ē-tàng koh再繼續生存落去。

第23到28節，thang看tio̍h詩人kā上帝ê永恆kah家己ê目nih-á做對比，寫出家己心中ê感受，mā是伊ê信仰告白：詩人知影家己ê有限，kah上帝無窮ê能力。

第25到27節被新約希伯來書作者引用（參考希伯來書一：10—12）。