創世記 31章22節 到 31章44節     上一筆  下一筆
創世記第三十一章22節到第三十七章
1.第三十一章22到44節:
利用拉班無tī家ê時刻,雅各帶tio̍h全家大細kah所有ê財產「偷偷á離開」,離開伊khiā起長到二十年久ê丈人mā是a舅拉班ê厝。

第22到25節,「三工」,這表示有一段真長ê距離ê意思,拉班chiah得tio̍h消息知影chit件事。因為án-ne,伊需要用一倍ê時間七工來追趕,chiah tī「基列山區」jiok-tio̍h雅各。拉班帶領「族人」來追jiok,而且ē-tàng jiok-tio̍h,表示伊ê能力iáu-koh比雅各khah強真chē。M̄-koh第24節是真重要ê一節,chit節講上帝警告拉班,「bē-tàng隨便威脅雅各」,表示上帝一直teh庇護tio̍h雅各,只要拉班出手攻擊,上帝一定會反擊。

第26到30節,chit段經文是拉班對雅各ê譴責。Tī chit段譴責中,主要有兩項:一是雅各為甚麼不告á別?二是為甚麼beh偷伊ê神像?其實拉班chit種譴責mā包含了兩件事:一是雅各chit種作法,hō͘拉班tī宗族之間面子sià了了。因為連tī in-tau工作二十年ê kiáⁿ婿lóng會瞞伊來離開,甚至包括伊ê cha-bó͘-kiáⁿ、孫á,竟然無一個人kā伊講、向伊告辭。二是伊認為雅各kā貴重ê財產mā偷偷á帶走了(參考三十二:13—15),hō͘伊損失非常重。原因是神像具有保證財產權ê含意。Á雅各卻kā伊ê神像mā偷,意思是teh指神像若是被偷,等於伊無法度證明雅各手中所擁有ê牛、羊、駱駝、驢等,是屬tī伊ê。最後伊強調有能力傷害雅各,m̄-koh因為有上帝阻止,chiah hō͘伊決定不出手。

第31到32節,chit兩節是雅各ê回答。伊承認家己真驚拉班「用武力」,因為伊知影拉班比伊ê力量khah強。M̄-koh伊強調家己並無「偷」拉班ê財物(神像)。伊願意在拉班ê親族面前接受搜查。原來伊並m̄知影拉結暗地偷行了老父ê一kóa神像。

第33到35節,雅各因為m̄知影拉結偷the̍h伊老父ê一kóa神像,因為án-ne任由拉班搜查。Á拉結則因為偷the̍h了神像,一定tio̍h想辦法隱藏。伊利用中東地帶視婦女生理週期來無清氣,bē-tàng接觸作為理由,阻擋了老父拉班搜查伊kah伊ê行李。拉結chit種坐tī裝神像ê袋子上ê行為,mā teh表示chiah-ê神像並m̄是真正神。因為án-ne,用chit種方式侮辱它們,mā bē有任何反應。

第36到42節,雅各因為拉班搜chhōe bē-tio̍h任何贓物,就用強硬ê語氣質問拉班,伊當tio̍h拉班帶來ê親友面前提出兩項反控:一是拉班指控伊偷行物件,一定tio̍h提出搜查後ê證據,hō͘親族作公親審判。二是拉班非常刻薄,欺負伊。因為過去二十年tī in-tau中工作,拉班並無好款待伊,而且iáu tī最後六年期間,有chē kah「十pái」改應該有ê工錢,這tú好thang證明是拉班偷伊ê錢。最後,雅各強調是因為上帝kā伊庇護、帶領伊,chiah hō͘伊bē致使「空手離去」,意思是teh指hō͘伊bē致使淪為奴隸。第42節是雅各脫離災難ê中心經文,伊強調若m̄是有上帝ê保護,伊無可能逃離得了拉班ê手。

第43到44節,拉班所講,tú好說明雅各心中ê忿怒kah giâu疑。
注意第43節,拉班強調包括利亞、拉結,kah所有ê孫á lóng是屬tī伊ê。原因是當年雅各是「逃亡」到伊hia去「避難」ê。因為án-ne,這二十年來,雅各tī拉班ê眼中一直是「奴隸」ê身分,並無真正kā伊當做姪á á是kiáⁿ婿看待。奴隸ê財產是屬tī主人ê,即使伊結婚所生落來ê gín-á mā是(參考出埃及記廿一:3—4)。不過有一點無仝款ê所在,就是當年雅各娶bó͘ kah得tio̍h有斑點ê羊群、牛群等,lóng是kah拉班事先講好ê「約」。這mā就是為甚麼當雅各向兩個bó͘解釋想beh逃離丈人之家時,兩個bó͘同時講老父拉班kā in「當做外人,賣了咱,koh吞食賣咱ê身價」ê理由。

重新查詢 專卷研經 創世記系列
錯誤回報,請聯繫comm[@]fhl.net