经文：雅歌 1:1-1:7 注释:
Chit节开宗明义就讲此本诗歌集是：「所罗门之歌，是诗歌中siōng美ê诗歌。」m̄-koh chit句「所罗门之歌」，mā thang看做是「献hō͘所罗门ê歌」，á是「为所罗门编写ê诗歌」。因为tī希伯来文ê「之」字，有真chē解释。既thang解释为「为」，mā thang解释为「有关」等意思。在列王纪上第四章32节án-ne记载所罗门王，讲：「伊做三千句箴言kah一千零五首诗歌。」chia所讲ê「一千零五首诗歌」，是teh指toh一kóa诗歌，并无明确说明，是m̄是有包括「雅歌」chia面ê诗歌，并无清楚。
所罗门王是以色列第三任国王，m̄-koh mā是tùi伊开始，王位tùi原本由先知膏立转变成世袭，伊并m̄是先知膏立ê，却是由老父大卫王世袭传承落来，m̄-koh khah实际ê讲，是宫廷内斗、争夺了后，伊夺tio̍h ê。伊在位ê年代大约是主前972到932年，在位将近四十年。Tī伊ê任内kā以色列帝国带到siōng高峰。非常可惜ê是，伊晚年tī信仰上显得脆弱，竟然是带头弃sak上帝，去拜偶像神明，「无亲像in父亲大卫hit种一心忠于上主—伊ê上帝」（参考列王记上十一：4）。引起上帝艰苦心，mā 致使以色列帝国失去上帝赐福，致使tī伊死后，国家就分裂à。
这是第一首诗歌，先由少女[新娘]开始唱。伊唱出心中对爱情ê渴慕，而俊男[新郎]并不在现场。
Tī第3节中ê「名」kah「芬芳」（原本是teh指膏油）是同音。恋爱中ê情人，一听tio̍h爱人ê名，心中ê感觉就真舒畅，ná亲像香膏油ê馨气thang提神。M̄-koh chia所讲ê芬芳背后含意是「油膏」，mā teh表示男方是一位君王ê意思。若是君王，ná亲像有kóa学者所强调ê，这是teh指耶和华上帝。Teh表示以色列人民对上帝渴慕之爱。
第4节，「愿你kā我带走」，这mā是一种下愿，表明愿一生kah跟tòe chit位俊男[新郎]、君王行，永远bē后悔ê意思。「寝室」、「欢乐」、「畅饮」、「爱河」等，chiah-ê词lóng teh表明二者之间亲密ê疼，无法度分离。
第5节，「o͘-khia̍t-khia̍t」，是因为kui工lóng tī葡萄园中工作，致使曝日头过久（参考第6节），皮肤变色ê缘故。M̄-koh并无因为án-ne hō͘ cha-bó͘-gín-á ê心内mā变乌à。颠倒，cha-bó͘-gín-á ê心iáu是仝款「秀美」。Mā就是讲，谈爱情，就m̄-thang用貌取人，ài beh看心内chiah重要。
「基达」，这是设tī大马士革东南方ê沙漠地带，以盛产乌山羊出名。Mā因为án-ne，chit-ê所在ê顾羊人ài用乌山羊皮作帐棚，tī内面歇困过瞑。Á「所罗门宫中ê帐帷」，意思是teh指非常豪华、súi。
第6节，chit位cha-bó͘-gín-á kā其他cha-bó͘-gín-á讲，m̄-thang笑伊皮肤o͘-khia̍t-khia̍t，其实伊ê心内美得像「基达」ê帐棚一般，hō͘人一入去，就感受tio̍h温暖、爽快。伊ê心内美得ná亲像华丽、人见人爱ê王宫中之帐帷。
「tī葡萄园工作」，圣经一再表示以色列人民就是上帝ê葡萄园。上帝就是园主。因为无闲看管兄弟ài伊代替整理ê葡萄园，致使kā家己ê葡萄园hō͘荒废à。这有隐喻ê内涵，表示伊bē记得整理家己。对一个iáu未出嫁ê姑娘来讲，曝乌了，是真oh过ê事，bē记得整理家己ê仪容，甚至无有时间去谈情讲爱，就会致使爱情生锈。这cha-bó͘-gín-á开始担心起来。
第7节，这是teh追求心所kah意ê对象发出ê声音，若对象是上帝，这mā讲出以色列人民teh chhōe牧养in ê牧者。讲得koh khah贴切，就是in迷路à。Ná亲像第6节所提起ê，这cha-bó͘-gín-á可能疏忽了，因为太无闲别ê tāi-chì而bē记得家己心爱ê cha-po͘人。若是án-ne，mā隐喻tio̍h以色列人民因为无闲tio̍h别ê神明，却kā siōng重要ê牧者耶和华上帝hō͘疏忽了，甚至bē记得，m̄知上帝tī tó位，想beh chhōe，却chhōe bē-tio̍h踪迹。
经文：雅歌 1:8-1:11 注释:
Chit段是俊男[新郎]回应ê诗歌。Chhōe顾羊人，thang先tùi chhōe羊群ê脚迹着手，因为顾羊人必定会kah伊ê羊群做伙。Chia mā ē-sái讲是上帝teh回应以色列人民，他tio̍h以色列人民tńg来到他身边，只要认真注意chhōe tńg来ê路径，并无难chhōe，必定thang真轻易ê就发见，上帝teh thèng候伊tńg来。
第8节，chit位俊男[新郎]讲耶路撒冷ê cha-bó͘-gín-á是siōng súi ê。因为hit-ê城就是上帝所khiā起ê所在，hông称做siōng美好ê城市。
古代ê顾羊人辨识失去ê羊，就是tùi羊行过而留落来ê脚印来辨别该羊行过ê路径，循tio̍h这路径去chhōe，一定会chhōe得tio̍h。
第9节，所谓「牝马」，这是当teh青春期ê雌马，mā是雄马siōng欢喜追chhōe ê。另外一种翻译是：「法老车上套ê骏马。」埃及ê战车是有名ê，因为它ê战马lóng经过精挑细选。Á法老王战车上所用ê战马koh khah是精选ê。因为án-ne，人看见法老战车上ê战马，自然就会想beh去摸它、骑它。Chit位俊男[新郎]唱出chit种诗句，是teh o-ló chit位cha-bó͘-gín-á ê súi，是众人所欣慕ê对象，大家lóng想拥有伊。Ná亲像耶路撒冷城，自古以来，lóng是兵家必争之地仝款。
第10节，用来形容这cha-bó͘-gín-á ê súi，m̄-nā tī面貌，koh tī伊身上ê装饰koh khah是án-ne。
第11节，「为你制金链á，为你配上银ê饰物」，这是类似文定ê物。俊男[新郎]深知cha-bó͘-gín-á ê心内感受，为tio̍h hō͘伊安心，伊愿意kā伊先定落来终身，hō͘伊知影努力是有结果ê。
经文：雅歌 1:12-1:14 注释:
短短ê三节经文，是少女[新娘]回应俊男[新郎]ê诗歌，thang看出in bat有过一段美好ê约会ê时光。
第12节，「我ê君王」，这是第二pái提起（参考一：4）。Cha-bó͘-gín-á身上充满tio̍h珍贵香料ê气味。Chia ê「香水」，是种极珍贵ê香油。
第13节，chit位少女[新娘]讲她ê爱人是倒tī她ê「胸怀」，而伊身上则散发tio̍h如一袋子ê「没药hiah-ni̍h芳」。
「没药」，这是非常高贵ê香料。当耶稣降生ê时chūn，东方来ê星象学家就是呈献hō͘耶稣chit种极高贵ê香料（参考马太福音二：11）。
第14节，chit位少女[新娘]描述她ê爱人ná亲像「一丛凤仙花」，是巴勒斯坦地区出产ê一种灌木，属tī香柏树ê一种，其花芬芳。
「隐・基底」，这是设tī死海附近一大旷野中ê一片绿洲。大卫王为tio̍h beh躲避扫罗ê追杀，bat逃到chit所在避难（参考撒母耳记上廿四：1）。
这thang看tio̍h作者teh表达爱情ê真意：真实ê爱情，是hō͘爱人得tio̍h芬芳ê活气，koh tī倦tah-tah ê时chūn，得tio̍h安息ê所在。甚至tī灾难来临ê时，成做避难所。只有仇敌chiah会hō͘人感受tio̍h有被落井下石ê压迫，却m̄是性命ê解放。
经文：雅歌 1:15-1:17 注释:
Chit三节是俊男[新郎]kah少女[新娘]teh对话。
第15节，俊男[新郎]回应少女[新娘]ê话。伊o-ló cha-bó͘-gín-á ê美，用「目睭像粉鸟ê目睭」，这是teh表示：纯洁、温顺，像粉鸟仝款，m̄是la̍h-hio̍h hit种凶刣之眼，koh khah m̄是仇敌眼中ê愤怒。
第16到17节，当少女[新娘]听tio̍h俊男[新郎]án-ne o-ló伊后，伊mā回应讲愿意终生委身tī伊身上，就算无床榻，thang kā「青草」当做牀铺，就tī香柏树下，mā thang做厝。这是真爱中闪烁出来ê性命亮光，即使无房屋，mā thang tī野地里看tio̍h siōng súi ê房舍，就算tī siōng野外之地，mā会看tio̍h kui片树林遮蔽、ná亲像天花板一般ê大寝室。
诗人用chit种方式表明siōng真实ê信仰，是无需要看起来súi建筑ê礼拜堂，mā m̄免有富丽堂皇ê外表装饰，因为信仰所beh表达ê是心内ê美，chit种美，hō͘咱看tio̍h上帝kah-ná就tī咱性命ê四周铺上了siōng好ê床、地毯、天花板，mā hō͘咱看tio̍h性命如粉鸟ê眼光一般，知影该行ê道路，mā知影怎样chhōe tńg去厝里ê路途，bē耽搁，koh khah bē失迷，因为伊知影往tó位去。
经文：雅歌 2:1-2:7 注释:
「沙仑」，这是设tī地中海东岸，约帕kah chē耳之间ê一个海边平原，土地非常肥。Chia盛开tio̍h真chē hō͘人一看tio̍h就喜爱ê野花，包括百合花、水仙花等lóng是。
「野玫瑰」，到底是甚么款ê花？无jōa清楚。Tī《中文和合本》有附注讲是「水仙花」。
「百合花」，表明纯洁ê意思。Tī耶路撒冷圣殿前ê两条大柱，就是雕刻tio̍h百合花ê样式，表明ê是：进入圣殿者，一定tio̍h是心地纯洁ê人（参考诗篇廿四：3—4），chit种人chiah ē-tàng得tio̍h上帝ê欢喜。
俊男[新郎]唱出chit种歌声，讲爱人ná亲像长tī「刺phè里ê一朵百合花」。这就非常有涵意了；因为刺phè原本是别人所无欢喜ê，m̄-koh，百合花却是大家喜爱ê。Tī siōng难成长ê刺phè环境中，看tio̍h siōng纯洁、súi ê百合花，这是jōa-ni̍h-á珍贵ah！性命mā是án-ne，tī siōng恶质ê环境中活出siōng美好ê性命力，chit种人就是无仝款。
这是少女[新娘]回应俊男[新郎]ê诗歌。
第3节，「我ê爱人tī男子中」tú好kah第2节ê「我ê爱人tī cha-bó͘-gín-á中」成对应。Cha-po͘人讲cha-bó͘-gín-á是「刺phè里ê一朵百合花」，而cha-bó͘-gín-á则o-ló cha-po͘人是「树林内ê一丛苹果树」。苹果是会发生香味ê果子。苹果树生做无koân，m̄-koh却ē-tàng生出好koh香甜ê果子。不过咱知影tī巴勒斯坦是无苹果树ê，因为án-ne，如果有苹果，则属tī进口ê果子。Án-ne，它就是非常珍贵ê食品à。一般ê树虽然chē、高大，m̄-koh，bē结出果子。少女[新娘]ê爱人（俊男[新郎]）ná亲像一丛苹果树，远比树林中所有ê树木iáu koh khah实在、突出。
第4节，「旗帜」，这原本是teh指军队ê意思。Tī chia表示teh向对方「示爱」ê意思。
第5节，chia提起葡萄干kah苹果，lóng是siōng好ê营养果子食品。
第6节，表示两人ê疼已经进入不分离ê状态。
第7节，「羚羊kah母鹿」lóng是象徵一种真有性命力、洋溢tio̍h欢喜ê对象。换句话讲，诗人希望chit种ê爱情bē受tio̍h干涉搅扰，即使是siōng欢喜ê、siōng hō͘人phut-phut-tiô ê事来临，mā m̄-thang因为án-ne受tio̍h搅扰。
信仰mā是án-ne，无tī外表ê壮观，却在tī实际发出香甜、thang口ê果子。真实ê信仰，会亲像羚羊kah母鹿一般，发出极强ê性命力，thang排除诱惑ê来临。
tùi第二章8节到第三章5节是第二首诗
经文：雅歌 2:8-2:15 注释:
Chit段是少女[新娘]唱ê诗歌。
少女[新娘]「听见了」伊熟悉ê声音，而且是jú来jú接近。第9节续接第8节所讲ê「羚羊」kah「母鹿」，chia看tio̍h ê是「小鹿」，mā teh说明新性命ê出世所发出ê欢喜声音。In跳跃pôaⁿ过山岭，正表明in性命之强。爱情就ná亲像chiah-ê初生之犊，纯洁无顾虑ê心，只为tio̍h探望心中所期待ê对象，thang排除所有ê障碍，ē-tàng翻山jú岭，当来到爱别人ê窗口ê时，就是为tio̍h beh尽量讲出心中渴慕ê话语。
第10节a句，伊听见chit位疼伊ê爱人tùi门缝中teh呼叫伊。
Chit段是俊男[新郎]唱ê诗歌。
「起来！，亲爱ê」，这是用非常温柔ê呼hoah声，ài少女[新娘]kah伊同行。
第11到12节，chit两节指出巴勒斯坦ê寒天mā是雨季，春天大约是tī三、四月间。寒天一过，春天来临，这mā是自然界性命力siōng旺盛ê时刻。无论tī甚么所在，只要是春天ê季节，就是充满tio̍h一片性命力，chia描述百花齐放、飞鸟齐鸣，特别是「斑鸠」，春天季节来到，就会tńg去。Tī以色列人民，这是in siōng期待ê Pôaⁿ过节活动期间。
第13节，chit节讲「无花果开始成熟了」，比较khah正确ê讲法应该是「无花果开出新ê叶á了」chiah-tio̍h。因为无花果ê果子成熟ê时，是tī六、七月间。巴勒斯坦ê春天是tī三、四月间，chit期间tú好是无花果发出新叶ê时chūn。「葡萄树mā开花放香」，kā葡萄kah无花果树连接来看，就会明白巴勒斯坦地区siōng出名ê两种果子，lóng用来象徵以色列人民kah上帝之间亲密关系ê特别记号。
第14节ê「粉鸟」，通常hông用来象徵「温驯」、「和平」ê意思。Chit节形容少女[新娘]ê súi带温驯、柔kah ê性情，hō͘俊男[新郎]一下见tio̍h就倾心陶醉。
第15节提起「狐狸」，它会捣毁葡萄园。这是时常发生tī巴勒斯坦ê现象，当地ê人通常会kā葡萄园用篱笆围起来，就是为tio̍h防范狐狸ê侵袭。
经文：雅歌 2:16-3:5 注释:
Chit段是少女[新娘]回应俊男[新郎]ê诗歌。
第二章16节，「我ê爱人是我ê，我是伊ê」，这就亲像上帝kah以色列人民立约ê时所讲ê：「我beh做lín ê上帝，lín beh做我ê子民。」（参考出埃及记六：7，利未记廿六：12，耶利米书七：23、十一：4、廿四：7、三十一：1、33，以西结书十四：11、三十四：31、三十六：28、三十七：27，撒迦利亚书八：8、十三：9）。形容二者之间是无法度分开ê亲密关系。彼此相疼ê情人就是án-ne，性命ân-ân地结合做伙。人kah上帝之间ê关系ná亲像án-ne，无法度分开，因为一旦分开，就会失去性命。人kah上帝之间立有「性命ê约」、「永远ê约」，chit-ê约teh表明永远bē分离。
第17节，这是一种迫切ê期待，ná亲像teh ǹg望爱人tńg来hit-ê羚羊跳跃ê速度hit种快。
第三章1到4节，这是teh chhōe，行遍大街小巷，chhōe ê烧热切之心，只要逢人必问，一直到chhōe-tio̍h了为止，就无koh放手hō͘伊离开。
第5节，tī第二章7节、第八章4节lóng出现过。Chhōe心爱ê情人，讲出chit位痴情者ê心。无放弃，除非chhōe-tio̍h了chiah肯罢休。chit-má chhōe-tio̍h了，就无koh hō͘爱人离开，而且是带入老母ê厝kah出世ê房间，chiah-ê lóng tī说明被接纳成做厝内ê一员。
tùi第三章6节到第五章1节，是第三首诗歌
经文：雅歌 3:6-3:11 注释:
大概是因为所罗门王结婚ê时chiah有ê排场，引起大家ê仰慕。Ná亲像近代贵族á是王室ê成员结婚仝款，会引起许多年轻爱人ê学习。Mā隐喻tio̍h上帝kah以色列人民之间ê关系，ná亲像婚姻，hit种亲密kah爱，是thang用来向列国万邦展宝ê。
Chit段诗歌讲为tio̍h chit对爱人结婚，动用ê人力、所用ê香料，以及娶过程所出现ê排场，lóng tī说明这是一pái非常隆重ê婚礼。这tī偏僻ê乡村是真少见ê，mā非常无容易。M̄-koh，为tio̍h表示非常重视chit pái ê婚礼，所以绝对无法度随便，因为这是「性命ê约」。
第8节，代表去迎亲ê，lóng是siōng勇猛ê战士，日夜守护tio̍h队伍ê安全。
第9节，「黎巴嫩木」，这是teh指香柏树ê材质，是中东地区siōng珍贵ê木材。
第10节，chit节ê描述有án-ne用来载运约柜ê车。「紫色」，这是圣经时代siōng-kài高贵ê布料。
第11节，所罗门王建造耶路撒冷圣殿，teh代表以色列人民完成了siōng大ê心愿，kā约柜移送入圣殿里。
经文：雅歌 4:1-5:1 注释:
这是一首形容少女[新娘]súi ê诗歌。差不多kā少女[新娘]ê面部kah胸坎lóng o-ló了，包括目睭、嘴齿、嘴唇、嘴舌、胸坎等。
第1节，提起少女[新娘]面部用面纱全部遮，m̄-koh头毛ê秀长，ná亲像一阵乌山羊盖tòa整座山丘。
第2到3节，续接头毛了后，chit两节描述ê是少女[新娘]ê嘴唇kah伊ê面颊之美。
第4节，讲少女[新娘]ê「颔颈像大卫ê高塔，圆直牢固」，这是非常特别ê形容，原来是teh指少女[新娘]ê颔颈上，挂tio̍h súi ê phōa链，phōa链上配tio̍h真chē装饰品。诗人用它来形容ná亲像勇士ê盾牌。
第5到7节，描述胸坎ê发展非常完美、对称。Tùi面部到胸坎，lóng是完美无缺，hō͘人看tio̍h lóng会惊叹。
第6节提起「没药山」kah「乳香冈」，并无chit种地名，真可能就是用来形容双乳ê美。
第8节，「我ê少女[新娘]」，俊男[新郎]继续唱出歌颂ê诗歌。Tùi第8节到第五章1节，一再重复chit句话。Chit节所提起ê山岳ê名，lóng是属tī北部ê山脉。Chia有「狮、豹子」等野兽隐藏其间。
第9到11节，koh一pái表示少女[新娘]ê súi，勾引tòa俊男[新郎]ê心魂。Á第11节用来表示二者之间有亲密关系。
第 12节，爱人是「一座关闭ê花园，kā低围墙围teh，泉源封锁tio̍h」，意思是teh指爱人乃是非常贞洁ê，ná亲像发见泉源ê水池一般ê宝贵，m̄ hō͘外人使用。
第15节为第13 到14节做siōng好ê诠释。
第16节，chit节是少女[新娘]回应俊男[新郎]ê诗歌。伊用「北风」kah「南风」来形容kui片空气中lóng「洋溢tio̍h芬芳」之气，真正会hō͘人沉醉其中。
第五章1节，chit节是俊男[新郎]ê回应。「没药kah香料」、「蜜房kah蜂蜜」等，lóng是用来形容甜美、芬芳ê意思。
真正体会tio̍h信仰ê奥秘后，就ná亲像发见性命甘泉一般ê美，它是性命ê泉源。当人得tio̍h性命甘泉ê时chūn，就会用尽所有ê方法kā它顾守tio̍h，m̄ hō͘这泉源流失，á是hō͘别人hō͘污染à。
经文：雅歌 5:2-5:8 注释:
tùi第五章2节到第六章3节是第四首诗歌。
Tī chit段诗歌中，thang分做三个段落，一是第五章2到8节、二是第五章10到16节、三是第六章2到3节等等。Tī chit三段诗歌中，以第五章9节kah第六章1节做chit三段诗歌ê连结诗句。
五：2—8节，chit段诗歌thang对照第三章1到5节，lóng是论到俊男[新郎]「失踪」。
第2节，这是真关键ê一节，因为chit节讲「梦见爱人tī门外敲门」，因为án-ne一定tio̍h先清楚这是tī眠梦中，á是tī清醒ê实况中。困难ê所在是两个可能lóng存在。当少女[新娘]准备入睡ê时，俊男[新郎]来到门外敲门，并且希望少女[新娘]起来开门hō͘伊进入厝内，伊ê头毛已经因为露水湿透à。
第3到4节，伊无马上起来开门，反tńg chhōe了真chē理由来推辞，其实chiah-ê理由并m̄是真实ê，只是家己lán-si得起来而已。Chit时，门中有隙缝，爱人tùi隙缝中「伸手入来」，这hō͘少女[新娘]ê「心跳无停」。
第5到6节，当少女[新娘]起来准备去开门，伊先涂上「没药」tī「双手」上，为tio̍h beh hō͘心爱ê人ē-tàng tùi门缝中闻到香味。M̄-koh，就tī chit-ê时chūn，俊男[新郎]「已经行了」。伊chiah忽然感受tio̍h非常ê失落，而且非常紧张。就án-ne，上街去chhōe，m̄-koh「chhōe bē-tio̍h」；mā大声叫伊，m̄-koh「听无看tio̍h 回音」。
第7到8节，当去街á去chhōe ê时，夜间「巡逻ê守夜者」遇tio̍h了少女[新娘]，m̄-nā无同情协助，iáu「phah」伊，kā伊「phah伤」，可能是因为伊半暝上街，而且全身散发tio̍h没药ê香味，被误会为阻街女郎，掠做是伊是出来chhōe cha-po͘人ê浪荡cha-bó͘-gín-á。Chiah-ê人侮辱了伊，kā伊用来遮身ê「披肩」hō͘「夺行」。即使án-ne，伊iáu是四界去询问，虽然tú-tio̍h阻碍，伊iáu是无停止。甚至因为chhōe爱人而病倒了，这thang看出伊对伊用情之深，以及需要ê迫切性。
想看māi甚么时chūn，圣神来敲咱ê心门，而咱却用真chē理由推辞，无愿意起来开门？m̄-koh，当圣神离开咱ê时，咱chiah想tio̍h需要圣神tī咱ê性命中，hit时咱chiah赶紧起来，却chhōe mā chhōe bē-tio̍h，四界去chhōe访，mā无下落。有一幅图画是咱时常看tio̍h ê，he就是耶稣khiā tī门外敲门。启示录ê作者传出圣神ê话án-ne讲：「听pah，我khiā tī门外敲门；若有人听见我ê声音而开门，我beh入去。我beh kah伊同齐食饭，伊mā tio̍h kah我同齐食饭。」（启示录三：20）
经文：雅歌 5:9-5:16 注释:
五：9—16节，这是一段少女[新娘]teh歌颂俊男[新郎]ê诗歌。
第9节连结了前段kah chit段诗歌，第10节后面ê回答，tú好是chit段诗歌所提出ê问题。大家提出ê问题是少女[新娘]为甚么beh冒hiah-ni̍h大ê险，夜间出来chhōe爱人？伊有甚么「比别人ê koh khah好」ê mah？「伊有甚么特别ê所在」，「值得」大家来协助伊chhōe？
第10到16节，chit段诗歌用尽所有súi ê词汇，描述chit位俊男[新郎]ê帅、美、俊。
为tio̍h beh回答其他cha-bó͘-gín-á询问伊所chhōe ê俊男[新郎]有甚么好，ná亲像本来俊男[新郎]teh讲述少女[新娘]ê美貌仝款（参考四：1—7），chit位少女[新娘]teh回答ê时，mā是kā头、头毛、目睭、双颊、嘴、嘴唇、双手、身躯、双腿、仪表等，tùi上到下lóng描述，而且每一个部分lóng搭配tio̍h贵重ê金银珠宝、香料、花卉等。换句话讲，kui个人ê每一部分lóng是值得o-ló ê所在。若beh称得上完美，大概就是án-ne pah。
经文：雅歌 6:1-6:3 注释:
大家一听tio̍h chit位少女[新娘]描述伊ê爱人竟然是án-ne ê俊美，就想beh帮伊chhōe。
第1节，这是第二段诗歌kah chit段短诗ê连接句。大家lóng听tio̍h这少女[新娘]描述伊ê cha-po͘人竟然是án-ne ê帅气、俊美，大家lóng真想beh帮助chit位少女[新娘]chhōe-tio̍h伊ê爱人。因为án-ne，in问「伊往toh条路去」？
第2到3节，伊kah-ná已经知影了，原来伊ê爱人就tī「家己ê田园」，he是一个súi ê花园，tú好「盛开tio̍h凤仙花」，而且mā有「百合花」到处绽开tio̍h，伊mā发见伊心爱ê人正tī hia「顾羊群」。
路加福音第廿三章38到43节，记载一位kah耶稣同时被钉十字架ê犯人，因为祈求耶稣「做王临到ê时chūn」记念伊，而得tio̍h耶稣ê接纳。耶稣因为án-ne对伊讲：「今á日你tio̍h kah我同齐tī乐园里。」chia讲ê「乐园」，就是ná亲像kah国王同齐tī花园散步、食饭ê所在。Chit位少女[新娘]回答其他ê cha-bó͘-gín-á，讲伊ê爱人tīsúi ê花园。
tùi第六章4节到第八章4节，是第五首诗歌。
经文：雅歌 6:4-6:12 注释:
chit段俊男[新郎]o-ló少女[新娘]ê诗歌，kah第四章1到7节所写ê诗歌真接近。
第4节，「得撒」，这是古代迦南人ê一座城市，位tī撒马利亚ê附近。当耶罗波安治理北国以色列期间，直到主前879年北国建lóng撒马利亚chìn前，大约有五十年时间，得撒lóng是北国ê首都（参考列王记上十四：1—20、十六：8—26）。有丰沛ê水源，koh tī战略位置上非常重要。Tī chia用来kah耶路撒冷相对称，表示无论tùi tó一个角度看，lóng是非常美。
Chit节形容chit位cha-bó͘-gín-á像「林立ê军旗hiah-ni̍h显（hiáⁿ）目」，chit句话主要是teh讲，chit位cha-bó͘-gín-á ê勇敢，家己一个人四界去chhōe俊男[新郎]，m̄惊tú-tio̍h危险kah困难，chit种信心、勇气、智慧，虽是一个单身cha-bó͘-gín-á，其所发出来ê气力，ná亲像一支勇猛ê队伍，出征ê时五彩缤纷ê军旗飘扬tio̍h，甚至súi得hō͘人看了lóng会望旗生畏。
第5到7节，chia重复第四章1到3节ê诗歌。形容cha-bó͘-gín-á ê面貌之皎美，hō͘人看了lóng会心慌意乱，既无法度移开目睭，koh无法度隐藏心中ê疼意、渴慕。
第8到9节，第8节是真oh解说ê经文，因为chia讲「君王有六十王后八十妃嫔」，这到底是teh指甚么，无法度明白。有ê讲是所罗门王内宫王后妃嫔ê数目。M̄-koh，所罗门王所有ê数目koh khah chē（参考列王记上十一：3）。无论数目án怎，kah第9节对照来看，就会明白chit位俊男[新郎]心中ê意思，只要有一位贤慧、美好ê cha-bó͘-gín-á，赢过千百ê宫女、妃嫔，伊讲只爱chit位少女[新娘]（参考箴言三十一：29）。
第10节，chit节ê诗句通常lóng会被用来形容老母ê美、慈爱。月娘用来表示宁静、安详；日头用来形容亮丽、光芒。
第11到12节，俊男[新郎]进入这充满tio̍h果子树ê súi花园里，渴望少女[新娘]会跟tòe入来，ná亲像进入伊ê心田。
经文：雅歌 6:13-7:9 注释:
这是一段跳舞ê诗歌。Thang án-ne了解：有爱ê所在，就有诗歌；有诗歌ê所在，就有舞蹈、跳跃，表示兴奋、满足。Chit种庆祝ê方式，就成做今á日中东地区婚礼中ê景象，少女[新娘]tī婚宴中，伊跳舞会成做siōng重要ê中心角色。
第13节，甚么人是「书拉蜜」ê cha-bó͘-gín-á？有可能是teh指所罗门之cha-bó͘-gín-á。不过mā有可能是teh指「书念」（参考撒母耳记上廿八：4）ê cha-bó͘-gín-á。chit-má大家lóng同齐跳舞，m̄-koh lóng会kā焦点khǹg tī少女[新娘]ê身上，因为伊是所有cha-bó͘-gín-á中siōng-kài súi ê一个。
第七章1到9节，chit段诗歌仝款是teh o-ló cha-bó͘-gín-á súi动人，ná亲像前述几段teh歌颂少女[新娘]ê súi仝款。M̄-koh chia无仝ê是，chit首诗歌采用ê譬喻是：酒杯、美酒、百合花、小鹿、羚羊、象牙塔、水池、塔、山、棕树、葡萄等物件。
第4节，「希实本」，头前讲这súi ê cha-bó͘-gín-á ê目睭像粉鸟ê目睭一般（参考四：1、五：12），chit-má soah讲是亲像「希实本城ê水池」。希实本，这是泉水丰富ê城市， bat是亚摩利王西宏ê首都（参考民数记廿一：26）。Chia用「水池」，指ê m̄是水泉，却是水池，意思是该cha-bó͘-gín-á有水汪汪ê目睭。有含súi、宁静ê意思。「黎巴嫩塔」，这是teh指黎巴嫩ê高山ê意思。
第5节，「迦密山」，这是巴勒斯坦北部唯一ê高山，在地中海边。以色列文学传统上lóngài用迦密山来譬喻高高在上、俯视一切。
第6到9节，形容cha-bó͘-gín-á ê súi，真自然tek就会hō͘人陶醉。
「棕树」，以色列文学上ài用棕树teh代表性命力旺盛、chē产（参考诗篇九十二：13—15）。然后串串葡萄、苹果ê芬芳，加上葡萄酿成ê美酒，真是hō͘人陶醉。
经文：雅歌 7:10-8:4 注释:
chit段是叙述双方已经结合，而且已经达tio̍h siōng爱ê境界，因为án-ne，in相招到thang互相尽量讲出爱情心意之地。
第10节一开始，女方表达得真清楚：伊属tī对方，而对方mā属tī伊。彼此相属，无koh有分离。Chit种句型mā有含立约ê意思，就亲像上帝kah以色列人民ê约。Tī chia用「恋慕」，chit-ê字mā出现tī创世记第三章16节ê「欲望」一字，是仝款ê意思。
第11到13节，tī彼此相疼ê时chūn，即使是野外（第11节ê「乡村」），mā thang看tio̍h上帝创造ê美，包括各种果子、野花，lóng会发生扑鼻而来ê香味。颠倒，如果是彼此相恨，即使是tòa tī高贵ê别庄，kah花团锦簇ê园内，mā会感觉恶臭难闻。夫妻之间ê关系án-ne，兄弟姊妹之间ê亲情mā是án-ne，tī教会内信徒彼此之间ê关系mā不例外。
第八章1到4节，这是一段cha-bó͘-gín-á tī心中暗自teh唱，m̄-koh bē-tàng流露出来ê爱慕诗歌。因为早期中东社会，若有cha-bó͘-gín-á公开表示对cha-po͘人（即使是家己ê爱人）ê爱慕，lóng会hō͘人认为是不正经ê cha-bó͘-gín-á，严重ê时会hō͘惩罚。因为án-ne，chia用ná亲像同生兄妹仝款ê亲密关系，án-ne，公开tī众人面前相约，mā bē hō͘人看出来。同进厝内，甚至相揽，mā无人会追来偷窥。
经文：雅歌 8:5-8:14 注释:
tùi第八章5节到14节，是雅歌最后一首诗歌。
tī头前少女[新娘]bat请求耶路撒冷cha-bó͘-gín-á协助chhōe伊心爱ê cha-po͘人（参考五：8—9），chit-má tńg来ê时，手边是牵tio̍h俊美ê cha-po͘人，因为án-ne引起chiah-ê cha-bó͘-gín-á ê羡慕。
第5节，chia提起tī苹果树下，老母临盆忍痛生gín-á，chit款tāi-chì tī早期ê社会真有可能发生，尤其是tī游牧社会koh khah是常见，而tī农业社会里mā m̄是新鲜事。因为农务无闲ê时，即使是有娠ê妇女mā得外出田野工作。因为án-ne，tī chit孕育性命ê所在尽量讲出爱情，á是定落来终身互相óa靠ê关系是非常有意义ê。
第6到7节，chit两节lóng teh讲述爱情ê气力，赢过任何一切，thang lóng无障碍来散发出性命ê气力。
第8到9节，chit两节是少女[新娘]ê厝内人提出ê意见，讲tio̍h in心中ê挂虑，以年纪轻来表示in对这门亲事ê忧心。M̄-koh，随时有少女[新娘]对家己终身大事ê主见。
Chia用「双乳」ê成熟来表示gín-á是m̄是已经长大。Tī台湾民间mā有chit种俗语，是用「凸肚脐」来表示。如果一个cha-po͘-gín-á被形容iáu未「凸肚脐」，he表示chit-ê cha-po͘-gín-á iáu软chiáⁿ，无适合担当重大ê责任，á是成立家庭。
第10节，chit节则清楚表示：cha-bó͘-gín-á已经成熟，伊家己ē-tàng独当一面，无问题。伊hō͘父母安心，mā hō͘厝内人知影伊ê决定是正确ê。
第11到12节，chit两节是真无对tâng ê经文，无清楚为甚么会出现tī chia。真可能因为有「所罗门」chit-ê名ê关系pah，因为雅歌一直hō͘人认为是所罗门写ê。不过，头前已经讲过不尽然是án-ne。Chit两节主要teh表示财富非常大，大到租耕此园地ê人需缴纳租金高达一千银á。「m̄-koh我拥有我家己ê葡萄园」，是teh指少女[新娘]ài俊男[新郎]耕耘ê葡萄园。换句话讲，只要有伊所疼ê cha-bó͘-gín-á，其他即使koh再好、koh再高贵，伊mā不希罕。这充分说明真实爱情ê可贵kah意义à。
第13节，俊男[新郎]tī园中对少女[新娘]讲，ài伊公开宣告对伊ê疼，hō͘所有来参加婚礼ê人lóng听得见。就ná亲像在婚礼中ê誓约仝款。
第14节，少女[新娘]ê回应，beh kah俊男[新郎]同游tī山岭各地。表明无论jōa-ni̍h-á oh行ê山路，mā会因为携手同行而充满性命ê欢喜，像羚羊、小鹿奔跳tī山phiāⁿ仝款。
重新查询