路得记 1:1-1:5

注释:

Chit章主要是绍介以利米勒chit-ê人ê家庭发生变故，然后开始讲tio̍h伊ê遗孀拿娥美带tio̍h坚持跟tòe伊tńg去故乡ê摩押新妇路得。Tī这章中，真清楚看tio̍h chit位摩押cha-bó͘-gín-á路得对约ê坚持，mā透过路得ê性命告白，thang看tio̍h上帝→人→土地之间ê亲密关系。

Chit段经文mā是此本经册ê序言，绍介故事ê背景，m̄-koh ná亲像头前绍介此卷经册ê时有讲过ê，所谓「士师治理」ê时代，并无一定就是真实背景，真可能是借用而已。

第1到2节，「真久以前」，这是写小说ê方式，mā teh说明是一个故事题材。「士师治理」ê时代，chit-ê名词是tùi士师记第二章16节「上主为以色列人指派士师来领导in，解救in脱离侵略者」chit节经文来ê。年代大约是tī主前1380到1050年之间。只要一提起「士师」，意思表示he是一个非常混乱ê世代，当时以色列人民心中已经弃sak了上帝、违背上帝旨意（参考士师记二：11、17、19、三：7、12、四：1、六：1、八：33—34、十三：1），mā因为án-ne，kui个社会ê伦理道德差不多完全沦丧。

Koh讲「士师治理」ê时代，另外一个值得注意ê社会景象，就是「以色列无君王」（参考士师记十七：6，十八：1、十九：1、廿一：25），这mā反应出当时ê社会呈现动荡不安ê原因，就是无人teh治理，人人lóng照家己欢喜ê去做，无整体社会ê规律。

「伯利恒」，原本ê地名有含「粮食之仓」ê意思，m̄-kohtaⁿ却出现「地方上发生饥荒」，chit种饥荒，真可能m̄是气候带来ê欠收有粮荒，真可能是人为ê因素，亲像囤积á是社会动乱不安hō͘作物无法度照时掖种á是收割致使ê结果。

「以利米勒」，chit-ê名原文ê意思是「上帝是我ê王」（参考士师记八：23）。Chit-ê名ê意思，kah伊带全家去摩押避难呈现非常明显ê对照。「拿娥美」，chit-ê名ê意思是「愉快」、「甜美」。

因为饥荒，以利米勒带tio̍h全家移民去「摩押国，暂时tòa tī hia」，表示in原本只是单纯去避难，并m̄是beh久居á是移民。「摩押」，这是teh指罗得kah伊ê cha-bó͘-kiáⁿ乱伦生落来ê gín-á ê kiáⁿ孙（参考创世记十九：37）。Tī以色列人民ê眼中，chit种族群是真「lah-sap」ê，加上以色列人民tī旷野漂流期间，bat受tio̍h摩押人诱惑而弃sak上帝ê旨意，犯了淫乱罪，为tio̍h án-ne有chē kah二万四千人遇tio̍h瘟疫疾病ê惩罚（参考民数记廿五：1—9），因为án-ne，摩押人久长以来就是以色列人民眼中真无清气koh带有世仇ê对象，所以规定m̄ hō͘摩押人进入上帝ê圣所参加聚会（参考申命记廿三：3）。以利米勒可能本来想tio̍h ê是暂时去寄居，避过饥荒ê生活困境。

第3到5节，以利米勒mā想bē到chit pái去摩押暂时寄居，竟然是长到「十年」之久。M̄-nā án-ne，伊ê gín-á玛伦kah基连mā tī当地分别「娶摩押ê cha-bó͘-gín-á—娥珥巴kah路得」做bó͘。M̄-koh tī十年后，包括以利米勒kah伊ê两个gín-á玛伦kah基连lóng相继往生，而siōng悲哀ê是留落来三个cha-bó͘人，lóng是会失去丈夫。

路得记 1:6-1:22

注释:

Chit段经文讲述拿娥美决定家己tńg去故乡伯利恒，伊认为上帝hō͘伊受苦。M̄-koh伊ê摩押新妇路得却chiù-chōa坚决要紧跟tòe伊tńg去。

Chit段经文ê重点tī寡母拿娥美有连续四次发言，tī四pái发言中，有三pái lóng是teh苦劝她ê两个新妇离开她，m̄-thang跟tòe她。因为伊认为上帝hō͘伊遭遇苦难，若是跟tòe伊，kan-taⁿ会连带受苦而已。

第6到10节，原本是为tio̍h逃避饥荒而离开犹大到摩押地去，无想到落尾tī异乡却发生家庭变故，丈夫、kiáⁿ连续往生，只chhun拿娥美kah两位新妇。Á tī chit时soah koh听tio̍h上帝hō͘犹大地「有好收成」，因为án-ne hō͘拿娥美想起tńg去故乡ê决定。两个摩押新妇mā tòe伊行，m̄-koh tī半途中，拿娥美改变了想法，伊劝两个摩押新妇tńg来到家己ê娘家去。会有chit种改变，真可能是想tio̍h两个新妇lóng是「摩押」ê cha-bó͘-gín-á，m̄-nā无法度参加「上主ê聚会」（这等于讲伊chit两个新妇――路得kah娥珥巴――将无法度参与社交活动，因为in是属tī所谓「无清气」ê族类，无人会欢喜kah in接触、来往），而且会因为in是外国cha-bó͘-gín-á，又koh是寡妇，真容易受tio̍h欺负（参考二：9、22）。因为án-ne，伊劝chit两位新妇tńg来到家己ê故乡――摩押国。伊mā祝福in thang chhōe-tio̍h好对象koh再结婚，这是真好ê祝福。M̄-koh，两个新妇却表示beh跟tòe伊tńg去伯利恒丈夫ê家乡。

Chia ê「tńg来到」，并m̄是指身躯语言，却是指tńg来到婚姻关系ê定位。In beh表明ê态度是：boài拿娥美kā in当做外人，虽然in是摩押cha-bó͘-gín-á，m̄-koh却是以色列人ê新妇。因为án-ne，「tńg来到」，是teh指ài in 犹原到婚约中ê角色。

第11到13节，作者写Chit篇故事借用摩西律法ê规定，就是申命记第廿五章5到10节所记载ê：一个人如果结婚后，iáu未生gín-á就往生，伊ê兄弟有责任娶chit位阿嫂á是弟新妇过门，kah伊同房，好替兄弟传宗接代，以继承财产。圣经中有chit种故事，包括创世记第三十八章犹大kah她玛ê故事；新约马可福音第十二章18到27节，有撒都该派ê人以chit-ê律法背景编造故事问耶稣有关koh活ê问题。拿娥美就是beh hō͘伊ê摩押新妇知影，in若继续跟tòe伊，会kah伊仝款永远守寡，chit种cha-bó͘人tī当时社会teh过真痛苦ê生活。

Tī chit段经文有一个中心词字，就是「等」，拿娥美强调家己无法度「等」chhōe-tio̍h丈夫，然后「等」生gín-á；当生gín-á了后，又ài「等」gín-á长大。续落来，伊mā提醒两位新妇无法度「等」伊koh再婚，「等」伊有娠生kiáⁿ，koh「等」伊生落来ê gín-á长大。Chiah-ê「等」所表达ê mā是一种性命ê转逝，bē出现新ê生机。因为án-ne，拿娥美真清楚下了个结论讲「这是无可能ê」。

「我真为lín艰苦心」，chit句话mā thang解释做：「我为lín ê遭遇感觉艰苦心。」á是讲：「我比lín koh khah难受！」chia ê「艰苦心」，mā表示对性命已经「绝望」，而且tùi án-ne感觉「悲伤」，甚至chiah-ê「绝望」、「悲伤」，是带有忿怒ê意思。

第14到15节，两个新妇中有一个已经离开，chhun落来路得iáu是m̄甘离开，tio̍h kah ta-ke拿娥美tńg去伯利恒故乡。因为án-ne，ta-ke拿娥美koh一pái劝伊一定tio̍h离开。

Tio̍h注意ê是，chia用ê「伊ê神」之「神」字，是teh指复数ê神ê意思，kah耶和华宗教ê独一神是无仝ê。这mā说明拿娥美并无阻止新妇tī她厝里继续敬拜摩押ê神明。Á chit点mā tú好凸显后来拿娥美接纳路得ê另外一个原因，是路得表明拿娥美ê上帝就是伊ê上帝（第16节）。

第16到17节，chit段话ē-sái讲是路得ê性命告白。伊表达了完全认同夫家所有ê一切，包括土地、人民、上帝。第17节ê意思真清楚，即使是死mā无法度hō͘伊kah ta-ke拿娥美ê性命分开。Chit对路得来讲，mā是一种性命完全ê付出，伊将不保留，因为án-ne，无论会面对jōa大ê痛苦，伊lóng愿意承受。

Koh讲，路得tī chia用「离开」，tī希伯来文ê用字是「‘azab」，是teh指「弃sak」、「放弃」ê意思。换句话讲，路得是kā家己kah ta-ke拿娥美间ê关系以「约」ê关系表达出来，这是对ta-ke拿娥美表示：bē-tàng将伊弃sak。因为弃sak伊，等于毁了婚约仝款严重。

Siōng重要ê是路得讲「你ê上帝就是我ê上帝」chit句话，真清楚表示出伊kah娥珥巴siōng大ê差别，就是路得愿意放弃家己ê信仰，归属以色列人ê耶和华宗教信仰。

第18到19节，就án-ne拿娥美无koh拒绝路得跟tòe伊，婆媳两人就同齐tńg来到了伯利恒。Á城内ê人看见lóng非常惊奇地叫起来，可能以利米勒chit-ê家族tī伯利恒人人lóng知、熟识ê，m̄-koh khah可能是in看见拿娥美kah新妇路得lóng穿tio̍h寡妇ê衫裤，而且无看tio̍h有cha-po͘人跟tòe tī身边，就知影chit-ê家族出了问题。

第20到21节，「拿娥美」chit-ê名ê意思原本是teh指「愉快」，chit-má她拒绝接受，她宁可家己被称做「玛拉」，chit-ê意思是teh指「苦」、「苦难」（参考出埃及记十五：22—23）。因为她认为家己ê性命遇tio̍h极大ê苦难。她用chit句话来表示苦难：「我出去ê时chūn富足，tńg来ê时chūn上主却hō͘我空无一物。」表示她m̄-nā丧失丈夫，mā会失去kiáⁿ，chhun落来ê就是家己，已经一无所有。续落来她讲「上主责罚我」，这是一句反省，表示拿娥美虽然无可能tī受苦中，m̄-koh她显然并无tùi苦难中失去信心，颠倒认为这是上帝teh「惩罚」她，chiah致使她受苦。Á这mā teh表示拿娥美反省出来ê结果是：她之所以有苦难，是kah离开故乡—上帝所赏赐ê土地有关。因为伯利恒原本就是迦南地ê粮仓，目nih-á ê饥荒，必定是kah「乱」（指士师治理）有关。M̄-koh对上帝无信心，chiah是致使人遭遇苦难ê结果。

第22节，chit节讲拿娥美kah路得tńg来到伯利恒ê时chūn，「to̍h是开始收割大麦ê时chūn」，这是teh指Pôaⁿ过节kah除酵节开始ê时间。Mā teh回应第6节所讲ê「上主眷顾伊ê子民」。表示伯利恒无koh有饥荒ê意思。Chit节mā为第二章预留一记序言。

路得记 2:1-2:16

注释:

Tī第一章记载路得跟tòe ta-ke拿娥美tńg来到犹大伯利恒城ê时chūn，tú好是收割大麦ê时期（参考一：22）。Tī迦南地，大麦收割ê时期通常是tī三到四月间，大约就是tī Pôaⁿ过节kah除酵节ê时chūn。照摩西律法ê规定，收割ê时chūn，bē-tàng割田边ê谷物，mā bē-tàng回头拾ka-la̍uh ê穗，因为chiah-ê是beh留hō͘ sàn-chhiah人kah外侨ê（参考利未记十九：9—10，申命记廿四：19—22）。因为án-ne，第一章22节讲拿娥美带路得tńg来到伯利恒ê时，to̍h是收割大麦ê季节，mā是为以后故事ê发展留落来一个伏笔。因为án-ne，这第二章就是teh描述路得tio̍h波阿斯麦田里去拾麦穗tú-tio̍h ê各种境遇。

Chit段经文描述路得kah ta-ke拿娥美tńg来到故乡伯利恒，tú好是开始采收农作物ê季节，因为án-ne，路得主动表示beh去麦田拾麦穗，伊tī拾麦穗ê田里认bat hit田ê主人波阿斯，二者之间ê对话，thang看出路得kah ta-ke拿娥美回乡了后ê表现，tú好回应了伊tī第一章16到17节ê性命告白，伊确实做到à chiù-chōa所讲ê话。Á波阿斯mā确实照摩西律法ê规定，好款待贫困ê外出者，á是用仁慈对待贫困ê至亲、寡妇。

第1节，chit节绍介波阿斯，已经先为第四章ê结局留落来伏笔。Chia讲伊是一个「既有钱koh有地位」ê人，koh khah重要ê，伊mā是拿娥美已往生ê丈夫以利米勒ê亲族。

第2到3节，ná亲像路得ê性命告白仝款，伊认同了ta-ke所有ê一切，因为án-ne，伊主动向ta-ke拿娥美讲，beh去麦田拾麦穗。Á tī第3节作者用了「真tú好」chit-ê词，表示每件事ê发生，背后lóng有上帝奇妙ê旨意在。

有关到麦田拾麦穗ê tāi-chì，tī摩西ê律法中有真清楚ê规定，包括有：
利未记第十九章9节记载：「Lín收割ê时chūn，bē-tàng割田边ê谷物，mā bē-tàng回头拾ka-la̍uh ê穗。Lín bē-tàng摘光葡萄园ê葡萄，mā不拾ka-la̍uh地上ê葡萄。Lín ài kā chiah-ê留hō͘ sàn-chhiah人kah外侨。我是上主――lín ê上帝。」

利未记第十九章9节记载：「Lín 收割田 ê 五谷，田 ê 角头 m̄-thang 割到尽，ka-la̍uh-ê mā m̄ -thang 拾。葡萄园果子m̄ -thang 挽了了，mā m̄-thang拾葡萄所 lak ê 果子，tio̍ h 留 hō͘ sàn-chhiah 人kah出外人。我是上主—lín ê 上帝。(全民版)」

利未记第廿三章22节：「Lín 收割田ê 五谷，田ê 角头m̄ -thang 割到尽，ka-la̍uh-ê mā m̄-thang 拾，tio̍ h 留 hō͘ sàn-chhiah 人 kah 出外 ê 拾。我是上主—lín ê 上帝。」 (全民版)」

申命记第廿四章19到22节mā án-ne记载讲：「你tī 田里收割五谷，若bē 记得一束tī 田里，m̄ -thang koh oat 去the̍h，tio̍ h 留 hō͘ 出外人 kah 孤儿寡妇，án-ne上主— 你ê 上帝会tī 你ê 手所做一切êtāi-chì，kā 你赐福。你phah 你ê 橄榄树以后m̄-thang koh 巡hiah-ê 树枝，tio̍h留 hō͘ 出外人 kah 孤儿寡妇。你挽你 ê 葡萄，所chhun 落来ê m̄ -thang koh 挽，tio̍ h留hō͘ 出外人kah孤儿、寡妇。你mā tio̍h 会记得你tī 埃及地bat 做奴隶，所以，我命令你tio̍h án-ne 行。」(全民版)」

因为有chiah-ê规定，真chē外族人、sàn-chhiah人、寡妇、孤儿等lóng会到麦田拾ka-la̍uh ê麦穗。

第4到7节，麦田ê主人波阿斯到麦田去巡视，看见一个生份又koh是外族ê cha-bó͘-gín-á，因为án-ne，伊问工头he是甚么人家ê cha-bó͘-gín-á。Chiah知影原来是拿娥美ê新妇。Koh khah重要ê，是tī chia回答波阿斯ê工头讲，路得tùi「透早就开始工作，chit-má tú停落来」，表示路得确实是非常用心、认真地tī工作，mā说明路得确实是真用心在学习「认同」夫家ê一切生活风俗。

第8到9节，波阿斯mā确实是尽了「亲族」ê本份，m̄-nā留路得tī伊ê麦田拾麦穗，而且交带「男工m̄-thang欺负」她，iáu thang lim工人phah过来ê水。Chiah-ê lóng teh表示波阿斯对路得非常「好款待」（第2节）。另外一方面，这mā teh暗示上帝已经开始介入路得kah拿娥美chit两个寡妇ê性命中。

第10到12节，因为波阿斯ê好款待，让路得非常感动，随时向伊下拜，这是一种衷心感谢之态。Á波阿斯ê回应mā tú好说明路得tī拿娥美厝里确实有ná伊tī第一章16到17节所做ê性命告白仝款，伊忠实tī所讲ê约定，确实对ta-ke尽了伊当新妇ê责任。Á这mā是hō͘波阿斯深受感动，而用chit种方式来肯定kah 回报路得。

值得注意ê是，为甚么波阿斯会听tio̍h路得对ta-ke ê孝行？Chit件拿娥美厝内ê厝务事，若m̄是伊ta-ke拿娥美对人chiap-chiap o-ló家己ê新妇路得，甚么人会知影in婆媳间ê事？这mā就是为甚么路得记中，除了记载路得之外，mā teh说明拿娥美chiah是一位既聪明koh有智慧ê ta-ke；伊为tio̍h帮助新妇路得tī异乡—犹太人ê伯利恒城ē-tàng生存落去，而且ē-tàng chhōe-tio̍h好ê归宿，不断对乡人o-ló路得ê美kah孝行。因为路得是摩押人，tī伯利恒无亲无戚，家己无可能对外人讲任何家务事。

第13到16节，chit段经文内底，波阿斯koh khah进一步让路得kah伊同齐食饭，而且食波阿斯准备ê饭，而且命令麦田ê工人hō͘ in路得特别ê优待，即使tùi麦穗禾捆中抽取麦穗都无关系。Chit种好款待ê方式，已经超出一般人所ē-tàng得tio̍h ê礼遇à。

因为tùi收割大麦到小麦期间约有七到八个礼拜。Tī chit段期间中，sàn-chhiah人tī麦田即使真认真拾ka-la̍uh ê麦穗，以及割田边角落ê麦穗，所得tio̍h ê iáu是非常有限。因为即使一个人一工手中怀抱tio̍h满满ê麦穗，mā只不过thang维持一个人大约八到十工ê需要。若是两个人食，ē-tàng维持ê时间就会相对减少，大约kan-taⁿ ē-tàng支撑五到七工。何况tī麦田中m̄是只有一个人teh拾，iáu有真chē sàn-chhiah人、外出ê人lóng tī拾。因为án-ne，真正ē-tàng拾到怀抱kui个胸前ê，实在真少。Án-ne，全部秋收季节所拾获ê，beh度过kui个寒天确实真困难。Á波阿斯讲路得thang tùi捆缚好ê麦捆中抽取麦穗，mā teh表示路得kah拿娥美m̄免担心怎样渡过寒天。

路得记 2:17-2:23

注释:

Chit段经文是路得tńg去向ta-ke拿娥美报告tī麦田所tú-tio̍h ê经历，hō͘ ta-ke拿娥美经历到上帝并无遗弃伊，mā hō͘伊知影tī困境中，有上帝ê手teh带领、扶持。

第17到19节，chit段经文是路得拾麦穗直到beh暗á chiah tńg去厝里，这mā表示伊确实是非常认真地tī工作，一点mā不偷lán-si。伊拾tio̍h ê麦穗真chē，大约有「一篓」，这大约有四公斤重，thang供in婆媳两人食一礼拜。Koh khah值得注意ê，是她koh kā波阿斯hō͘她ê午餐食物带tńg去hō͘ ta-ke拿娥美食，这hō͘拿娥美惊kah gāng去怎样会tú-tio̍h án-ne好款待新妇路得ê麦田主人，chit时，路得讲ná好款待伊ê人就是波阿斯。

第20节，这是路得记信息非常重要ê一节经文。Chit节说明两个基本ê信仰观念：一是上帝m̄-nā是活人ê上帝，mā是死人ê上帝，这表示人ê生kah死lóng是tī上帝掌权之下。二是即使tī siōng困境中，上帝iáu是照顾tio̍h他ê子民。

Koh讲，拿娥美mā发见波阿斯就是伊丈夫以利米勒ê「至亲，有义务照顾」伊kah路得。换句话讲，上帝安排了至亲来照顾守寡ê拿娥美kah路得。
第21节，路得进一步hō͘ ta-ke知影波阿斯ài她留tī伊ê麦田拾麦穗，一直到收割结束。

第22到23节，chia thang看tio̍h寡妇真可能受tio̍h欺负，特别是外族人ê寡妇koh khah是án-ne。因为án-ne，既然是家己ê至亲，koh chiah-ni̍h好款待路得，拿娥美就叫路得mài换麦田，继续留tī波阿斯ê麦田拾麦穗。

「路得继续kah ta-ke tòa做伙。」chit句话有真特别ê隐喻作用，表示路得并无tī麦田中去kah其他ê工人来往、亲密，伊iáu是仝款忠实tī伊ê夫家，虽然丈夫已经往生，伊iáu少年，m̄-koh ná亲像伊对ta-ke拿娥美所告白ê，伊绝对bē离开。

Tī巴勒斯坦，收割大麦ê时间是tī三、四月间，chit期间kah除酵节、Pôaⁿ过节有关。小麦是tī五、六月收割，kah五旬节有关。葡萄是tī十月采收，kah Tòa棚节、号角节有关。

路得记 3:1-3:13

注释:

Chit本经册真正重要ê人物应该是拿娥美，m̄是路得。因为kui本经册lóng是teh讲拿娥美怎样替伊ê新妇路得tio̍h想。伊知影tī收割完毕ê季节中，犹太人怎样举办庆祝活动，以及一般人会怎样过收成节á是Tòa棚节。伊m̄是beh kā新妇留tī身边，koh khah重要ê是希望伊ê新妇ē-tàng chhōe-tio̍h好ê归宿，若因为án-ne ē-tàng生gín-á，则以利米勒ê家产就ē-tàng继续传承落来，并为夫家以利米勒留落来后代。如果将路得留tī身边，chit种机会kā永远得bē-tio̍h。

因为上帝坚守所立ê约，因为án-ne，当拿娥美听tio̍h新妇路得得tio̍h波阿斯好ê款待ê时，伊第一个反应就是感谢波阿斯，续落来是o-ló上帝讲：「愿伊得tio̍ h 上主赐福，就是施恩 hō͘ 活人 kah 死人无soah-.ê。(全民版)」（路得记二：20）chit句话真清楚说明上帝坚守tio̍h对祖先所立ê约，他bē因为人已经往生，就疏忽了往生者ê后代kiáⁿ孙，mā bē因为活teh ê人tú-tio̍h困境，tùi富有变成贫困、一无所有时，就袖手不管。上帝不会án-ne，只要他讲过ê，他应允过ê，他一定坚守tio̍h。

路得是一个摩押cha-bó͘-gín-á，却tī以色列人民ê社区lóng受赞誉，这mā teh表示以色列人民对tī亚扪人kah摩押人ê态度已经有改变。

Chit段经文记载ta-ke拿娥美怎样教导伊ê新妇路得利用机会kah kah波阿斯做伙过瞑。伊ê chiah-ê策略lóng tī说明拿娥美一切lóng是为新妇路得tio̍h想，却m̄是自身ê需要，mā讲出拿娥美确实是一个有才智ê ta-ke。
Koh讲，有关波阿斯kah路得之间ê对话，lóng是kah摩西律法中「至亲」应尽ê义务有关（参考申命记廿五：5—10）。Á路得会向波阿斯提起，讲伊是伊ê「至亲」，这mā是拿娥美教导伊该讲。

第1节，其实，当拿娥美决定beh为新妇路得chhōe翁婿ê时chūn，mā teh表示伊对性命重新燃起了希望，因为tī第一章8到13节中，拿娥美表现出来ê是希望ê幻灭，m̄-koh chit-má则希望tī目睭前，这mā说明上帝是一个「信实仁慈」ê上帝，m̄-nā对已经往生ê人仁慈，mā对活teh ê人仁慈信实。续落来tī第二章22节记载拿娥美对路得所讲中，就隐藏tio̍h伊已经看重波阿斯。因为án-ne，伊一直teh计画tio̍h怎样hō͘波阿斯表态愿意娶路得。

第2节，chia讲波阿斯会tī禾场上「簸麦á」，chit句话说明chit时真可能是大麦已经收割完毕，准备收藏起来ê时刻。一般来讲是Tòa棚节ê时chūn。M̄-koh mā有可能是tī收割完毕，随时筛麦á。Chit时chūn，主人通常会困tī麦田里，一面监督收工，mā一面清点收成，看收成有jōa-chē，并且防范盗贼á是野兽鼠辈偷食。M̄-koh对照第15节来看，应该是收割ê大麦已经曝干了，thang kā它先簸起来收藏。

第3到4节，chia ê描述lóng kah Tòa棚节ê活动真接近，原因是以色列人民庆祝Tòa棚节ê时，mā同时是青年男女相识、论婚事ê机会。拿娥美ài路得好好á打扮，然后利用波阿斯酒醉了后进入伊ê帐棚，kah伊睡做伙。「伊会kā你讲该做甚么」，chit句话mā teh表示拿娥美对波阿斯真有信心。

第5节，简单ê一句话，便讲出路得就是一个完全顺服ê新妇，原因是伊真清楚ta-ke拿娥美lóng是teh为伊设想，这是hō͘伊顺服ê主要因素。
第6到9节，波阿斯tī半暝醒起来ê时，看见身边有一位cha-bó͘-gín-á，就惊kah gāng去地问伊是甚么人？而路得就照伊ta-ke拿娥美教导伊，hō͘波阿斯知影，伊是伊ê「至亲，有义务照顾」伊，并且请波阿斯「娶」伊。

Tio̍h注意，chia ê「娶」一词，mā thang表示：「请用你ê衣襟遮盖我」ê意思。这已经真真明显说明路得ê意思就是：「我是一个被运命弃sak、裸露身躯ê可怜cha-bó͘人，请你娶我，hō͘我bē致使见笑、面临性命ê危险。」ná亲像以西结书第十六章8节所讲ê「用外套遮盖你ê裸体」仝款，表示对一个hō͘人放sak ê cha-bó͘-gín-á ê怜悯、同情。

第10到13节，chit段经文是chit章经文ê中心，波阿斯肯定路得ê行为，因为路得án-ne做，m̄是为tio̍h家己，却是为tio̍h已经往生ê丈夫家族，想beh帮助丈夫ê家族财产ē-tàng继续传承落去。Koh讲，hō͘丈夫家族ê名ē-tàng tī宗族中继续存在，chit点对以利米勒ê家族来讲是非常重要ê。Á波阿斯已经表明伊将为路得chhōe翁婿ê事尽力。波阿斯对路得ê孝心非常感动，因为án-ne，伊除了让路得知影有人比伊kah以利米勒ê家族koh khah接近至亲关系外，m̄-koh伊mā用chiù-chōa表示，一定会尽责任处理伊ê婚事问题。

路得记 3:14-3:18

注释:

Chit段经文描述波阿斯真体贴路得kah拿娥美，因为án-ne，m̄-nā实践了至亲ê责任，并且一再护tio̍h伊免受伤害。Á路得则tńg去将所发生ê境遇全部hō͘伊ê ta-ke拿娥美知影。

第14到15节，为tio̍h beh保护路得免受伤害，波阿斯利用天iáu未亮，就beh路得赶紧起来，整理好衣物了后，iáu hō͘她大约二十公斤ê大麦，这就够额路得kah她ê ta-ke拿娥美过一个温暖而且食饱ê寒天。

第16到17节，路得将所tú-tio̍h ê全部境遇，一五一十kā ta-ke拿娥美讲，因为kui个计画lóng是拿娥美ê，hō͘伊完全清楚，就会知影该怎样进行。

路得mā讲波阿斯ài她「bē-tàng空手」tńg去，chit句话tú好回应了第一章21节，上帝并无真正hō͘拿娥美空手，却是装满所有上帝ê恩典。

第18节，chit节充分说明拿娥美ê智慧kah聪明，伊kā路得讲thang「等看chit件事ê发展」，并且真肯定波阿斯一定会kā chit件事「办妥」chiah会歇困。Tùi chia mā thang看出拿娥美确实是一个有智慧ê女性。愚笨ê人常常单看外表ê反应，m̄-koh伊是一个有智慧ê ta-ke，ē-tàng根据波阿斯过去到chit-má ê反应，推断波阿斯会采取「至亲」ê动作。

路得记 4:7-4:12

注释:

Chit段经文是根据申命记第廿五章5到10节律法规定而延伸出来ê风俗，hit位至亲放弃购买土地kah娶路得ê权利kah义务，因为án-ne，波阿斯tī所有长老ê见证下，ē-tàng娶路得过门。

第7节，chia讲hit-ê时chūn以色列人买卖财产有一种「惯例」，其实是kah申命记第廿五章5到10节ê律法规定有关。

Tī《中文和合本》kah《台语汉字本》圣经lóng有「以前」á是「前」chit-ê字tī chit句话头前，表示该「惯例」是古老ê事件，m̄是作者写作ê时代。照申命记第廿五章9节ê记载，路得ē-tàng tī众长老ê面前thǹg掉chit位无想beh尽责任ê至亲ê鞋á，并kā它hiat-ka̍k，然后吐唾沫tī伊ê面上，以表示侮辱chit种亲人。M̄-koh问题是chit位至亲并m̄是boài尽责任，却是tī连带娶「摩押ê寡妇路得」ê chit件事顶面，伊无愿意，因为án-ne，是伊主动thǹg掉鞋á表示愿意放弃这购买土地ê机会，不反悔。Chit件连带娶「摩押ê寡妇」一事，可能tī当时社会mā hō͘人认为是一项沉重ê负担，而无一定需要。因为án-ne，大家是thang接受chit位至亲ê反应。

另外一点，chia讲ê惯例，是teh指商场买卖ê时，对仝一件财产，若有两方有仝款要件，就用顺位来排序，优先者若表示放弃，chiah需要thǹg掉鞋á当做hō͘渡ê证明。这kah原本申命记强调尽至亲之责任问题，已经无仝款。

第8到10节，chit-ê比波阿斯koh khah近亲ê亲人公开表示beh放弃购买拿娥美丈夫以利米勒留落来ê土地，因为伊无愿意为tio̍h买chit片土地而需连带娶路得过门。因为án-ne，伊表示愿意让hō͘波阿斯去购买，同时娶路得做bó͘。就án-ne，波阿斯达tio̍h愿望地得tio̍h娶路得做bó͘ ê机会。伊mā tī he十位长老ê面前表示：愿意保留以利米勒留落来ê产业，而且一直用以利米勒家族ê名传承落去。这表示波阿真有心胸，是真正疼惜路得kah关心拿娥美。

第11到12节，这十位长老听了后，深受感动，表示愿意做证人。而且chiah-ê长老kah众人lóng祝福波阿斯娶ê路得会「生湠chē-chē」，chit句话表示有上帝赐福ê意思。因为创世记第一章28节讲tio̍h上帝赐福人类ê时，就是用「生湠chē-chē，遍满大地」。

Chia mā特别讲出两件真特ê祝福话语，一是teh指出「像雷洁kah利亚hō͘雅各生真chē子女」，其实，当年雅各因为拉结kah利亚ê缘故有两个细姨「辟拉」、「悉帕」。这已经teh隐喻路得bat对波阿斯讲，她thang做伊ê「女婢」（参考三：9）仝款ê意思。二是「像犹大kah她玛所生ê kiáⁿ－法勒斯ê厝仝款昌盛」，chit句话真有意思。因为她玛mā是寡妇，她ê ta-koaⁿ犹大因为无按照律法规定，促成hō͘第三个kiáⁿ示拉娶伊，就án-ne她玛就打扮成妓女，kah ta-koaⁿ上床而生法勒斯（参考创世记三十八：29）。Koh讲，她玛是「迦南人书亚ê cha-bó͘-kiáⁿ」（参考创世记三十八：2），伊是迦南人，mā是以色列人民所无欢喜ê对象，m̄-koh却是一个真有才智ê cha-bó͘-gín-á，知影怎样突破生存环境ê困难。Á路得仝款mā是一个寡妇，伊仝款是tī异邦中求生存。她玛生法勒斯，而法勒斯又koh是波阿斯ê祖先（参考马太福音一：3—5，路加福音三：33）。因为án-ne，chiah-ê长老kah民众就以chiah-ê故事做祝福ê隐喻。

路得记 4:13-4:22

注释:

Chit段经文是路得记ê结尾，说明波阿斯并无因为娶摩押cha-bó͘-gín-á，伊ê地位就被贬低，mā无因为án-ne就失去上帝ê赐福。伊反而成做以色列民族siōng大荣誉君王大卫ê祖先。

第13节，chit节讲出圣经一贯ê思想：性命是tùi上帝来ê赏赐（参考创世记三十：1—2）。路得嫁hō͘基连ê时chūn，iáu未生gín-á，基连就死去。chit-má路得嫁hō͘波阿斯，就tī上帝赐福下有gín-á。

第14到16节，第14到15节chit两节是伯利恒城里ê妇女对拿娥美ê o-ló，表示伊虽然丧失了kiáⁿ，m̄-koh摩押cha-bó͘-gín-á路得为伊所做ê，比一般人拥有「七个kiáⁿ」koh khah chē，表示价值koh khah大。拿娥美因为路得生chit-ê孙á，hō͘伊晚年ê性命感受tio̍h性命ê活力。

第18到22节，这是一份族谱。主要teh说明波阿斯kah路得后来成做大卫王ê祖先。Chit份族谱mā thang参考马太福音第一章5到6节。Mā tùi chit份族谱，hō͘真chē学者认为tio̍h án-ne书写作ê主要目的，就是beh对tī尼希米、以斯拉时代所在进行ê犹太种族「净化主义」提出无仝ê声音，hō͘ hiah-ê一工到晚喊「排外主义」者，有一个重新反省ê机会。