那鸿书 1:1-1:15

注释:

「那鸿书」chit本先知文献用伊ê名mā是真有意思ê一件事，因为chit-ê名字就是「安慰」ê意思。Á先知那鸿所传达ê信息中心，就谈起亚述帝国ê首都尼尼微城真紧to̍h会受毁灭，而南国犹大繁荣重现，因为上帝kā伸出大能ê手来拯救他ê子民以色列人民。

	原因是主前721年，亚述帝国毁灭了北国以色列，并且kā人民掠到亚述帝国去，然后转卖到各地去做奴隶。Koh kā附近国家、族群强制移居到撒马利亚城内，kah北国以色列人民混居做伙。

	因为án-ne，当先知那鸿传出信息讲上帝会惩罚亚述帝国，首府尼尼微城会受毁灭ê时，chit对正面临威胁ê犹大之以色列人民来讲，实在是大快人心ê好消息。Á对hiah-ê被掠到亚述kah外国奴隶市场等待贩卖ê以色列人民来讲，确实是tùi chia得tio̍h真大ê安慰。

	其实，tùi先知ê文献来看会发见一个真重要ê信息，he就是一个国家ê兴旺，是因为该国ê统治者知影用谦卑ê心带领人民建造公义、和平ê社会，却m̄是家己扮演神明ê角色，chit点是非常重要ê。Ná亲像主前第八世纪ê先知弥迦所讲ê，上帝ê要求是「伸张正义，实行无变ê疼，谦卑kah咱ê上帝同行」（参考弥迦书六：8）。一个无公义ê社会，就无法度见证上帝ê疼。因为上帝是公义ê，他希望人类社会有公义；无爱ê社会、国家，真紧to̍h会灭亡，自古以来lóng是án-ne。

	另外一方面，圣经ê作者mā提起上帝siōng无法度容忍ê事，就是统治者kā家己神化了，这m̄-nā是先知那鸿所指出亚述帝国ê问题（参考那鸿书一：2），mā是先知以赛亚指出巴比伦帝国毁灭ê原因（参考以赛亚书十四：12—15）。

第1节，chit节只提起先知那鸿是「伊勒歌斯人」，头前已经有提过，确定ê地点已经bē-tàng考。M̄-koh chia讲先知那鸿所传出ê信息kah当时亚述帝国ê首府尼尼微城有密切关系。上帝hō͘先知那鸿所看见ê「异象」。这「异象」mā thang当做「启示」解释。

第2节，tùi chit节开始，kui本那鸿书lóng是用诗歌ê型态写出来ê信息。先知那鸿真清楚讲「上主是不容忍对立ê上帝」。Chia ê「对立」，是teh指「嫉妒」ê意思，是出埃及记第二十章5节所用ê「忌邪」是仝一个字，mā kah约书亚记第廿四章19节所用ê「忌邪」chit-ê字仝款。Chit点thang tùi亚述皇帝西拿基立tī主前701年围攻耶路撒冷ê时，伊对希西家王kah大臣所讲ê话，等于是teh侮辱上帝仝款，因为伊轻视上帝，认为上帝庇护不了耶路撒冷，并且自认kah上帝仝款伟大。

先知那鸿得tio̍h上帝ê启示，讲上帝对chit种自扮神明角色ê统治者非常不满，因为án-ne，一定会采取「报复」ê行动，而且上帝对亚述皇帝chit种傲慢ê态度感觉非常地忿怒。

第3节，「上主不轻易受气」，chit句子Tī圣经中一再出现（参考出埃及记三十四：6，民数记十四：18，尼希米记九：17，诗篇八十六：15、一○三：8节、一四五：8，约珥书二：13，约拿书四：2），描述上帝ê慈悲。M̄-koh chit句话mā同时是teh表示当上帝会受气ê时，事态已经非常严重à。

「绝无用有罪为无罪」，chit句话mā说明了上帝就是公义ê，这是上帝ê特性。先知那鸿讲chit句上帝「绝无用有罪为无罪」，已经说明了独裁统治者ê真正ê问题，in不时会冤屈人民，杀害无辜ê人。

上帝一阵动，会有「暴风骤起」，chit-ê词tī《台语汉字本》圣经用得khah súi，是用「卷螺风」。先知那鸿用chit种方式teh形容，当上帝进行审判ê时，kui个大地ná亲像起了「暴风」般ê扬起「飞尘」，hō͘看见ê人lóng心生懔neh。

第4到5节，chit两节讲出上帝ē-tàng改变他所创造ê天地kah大海。因为kui个宇宙大地lóng是tī上帝ê旨意之下创造出来ê，所有受造万物lóng会听从上帝ê命令，若无，就无法度存在。Chia用「责备海」，表示上帝ē-tàng hō͘海水分开hō͘海床「干涸」。

Chia提起「巴珊」、「迦密山」、「黎巴嫩」等地，原本都是teh指肥ê土地，草原茂密、花朵遍地盛开ê所在。M̄-koh上帝却ē-tàng hō͘伊lian去，hō͘原本肥ê土地因为án-ne而如焦土成做发黄贫瘠、寸草不生之地。换句话讲，原本人看做性命siōng可靠ê肥土地，会因为上帝ê大受气而丧尽生机。

第6节，kā头前chit段诗歌做一个结论：如果上帝真正发出大受气，iáu有甚么人ē-tàng生存落来？连海水lóng会枯干，江河会干涸，原本肥ê土地lóng会变做贫瘠荒凉之地，甚至连岩石lóng会「粉碎」，绝对无人ē-tàng「活teh」。

第7节，chit节thang参考诗篇第三十三篇18到19节ê诗歌。
先知那鸿讲上帝会看顾ê是óa靠他救恩ê人。上帝绝对会「保护tī患难中ê子民」，甚么人投靠上帝，甚么人就会得tio̍h上帝ê「照顾」。

注意「至善」ê「善」字，指ê是良善、美好、快乐、福气等。

第8节，chit节讲上帝会惩罚「敌人」。Tī第1节真清楚讲，先知那鸿所传ê信息对象，就是欺压上帝子民ê亚述帝国。因为án-ne，chia所讲ê「敌人」就是teh指亚述帝国。因为亚述皇帝自比为上帝，并且用非常轻藐ê语句亵渎上帝ê神圣。

第9节，真清楚说明了亚述一直teh「阴谋反抗上主」，m̄-koh有chit种阴谋ê人只是teh自chhōe死路。「无人ē-tàng koh一pái反抗伊」，意思是bē koh再有第二pái ê灾害出现。因为上帝ê惩罚只要一pái就有够，除非上帝怜悯，若无，无人ē-tàng tī上帝大受气下惩罚后，iáu ē-tàng生存落来，而且koh有能力继续反抗上帝ê。

第10节，tī《现代中文译本》中少了一句无翻译出来，就是「像lim醉了ê人」，chit句tī其它版本ê圣经lóng有。因为án-ne，chit节提起像「刺phè」、「枯干ê麦hiūⁿ」、「lim醉ê人」等三种人会「被火烧」到lóng无所chhun。前二项lóng是teh指lóng无价值ê物件，无人会拾，只有ē-tàng当做野草一般弃sak。第三种「lim醉ê人」，意思就是teh指无理智思考，á是疯狂ê人。

第11节，chit节提起有一个「诡计多端ê人」tùi「尼尼微」出来，虽然无写明chit-ê人是甚么人，m̄-koh应该就是teh指头前提过ê亚述皇帝西拿基立，伊就是用非常亵渎ê话语「图谋攻击上主」。

    第12到13节，chia m̄-nā提起上帝beh毁灭亚述帝国，mā同时teh安慰以色列人民。

    所讲「我ê子民」，是teh指南部犹大国ê以色列人民，因为hit时ê南国犹大一再受tio̍h亚述ê搅扰、侵犯、威胁。上帝应允以后be7 koh hō͘他ê众子民受tio̍h痛苦。现在上帝beh「终止亚述」对以色列人民ê「辖制」，mā tio̍h「phah断捆缚」in ê「锁链」。Chia原本用「枷担」kah「锁链」，表示以色列人民tī亚述人ê控制下，ná亲像田里ê动物一般被赶逐tio̍h从事辛苦ê劳役生活，被ná亲像cheng-seⁿ一般对待，甚至kā in看做像囚犯仝款。现在上帝beh释放in，hō͘ in thang过自由、快乐ê生活。

	第14节，chit节是「宣告」上帝对亚述人ê惩罚；第一个就是完全消灭亚述人。因为chia讲「bē有后代thang保存in ê姓氏」，《台语汉字本》圣经真清楚讲「无koh传种」，意思真清楚是teh指完全灭亡，无后代kiáⁿ孙。

	第二个是beh除掉亚述人「神庙中ê偶像」，意思就是in所敬奉ê皇帝á是神明，lóng成做被鞭phah、惩罚ê对象。

	第三，真清楚讲tio̍h beh为亚述人「预备坟墓，in不配活teh」，这表示in会被敌人残杀。过去亚述帝国siōng兴旺ê时chūn，in对待战败国人民ê行踏lóng是真残酷ê，mā因为án-ne，当巴比伦帝国kah玛代军队联合kā尼尼微城摧毁了后，亚述人所面临ê灾难，差不多是hō͘屠杀殆尽。

    第15节，chit节thang参考以赛亚书第五十二章7节ê诗歌。

	Tī chia先知那鸿传出ê信息真清楚，就是「和平ê好消息」。原因是战争已经结束loh。Ná强大ê侵略者—亚述已经hō͘上帝惩罚，而且灭亡à。所以m̄免koh再惊惶、不安，mā因为án-ne，先知那鸿讲大家lóng tio̍h欢喜庆祝。因为这是性命ê解脱，是tùi死亡中行出来，tùi惊惶中得tio̍h释放ê大好消息，应该好好á庆祝一下。

原本以色列人民siōng重要而且siōng欢喜ê节期就是Pôaⁿ过节，chit节期是当年teh庆祝脱离埃及奴隶ê统治，性命得tio̍h重生ê节期，taⁿ则用来庆祝欺负in、侮辱in ê亚述帝国灭亡，相对ê，就表示以色列人民kā不koh受到欺负、奴役。

那鸿书 2:1-2:13

注释:

先知那鸿是为tio̍h beh鼓励tī受困中ê以色列人民而传出希望ê信息。当时ê以色列人民受困tī亚述帝国，一再被欺压，而且被威胁一定tio̍h顺从亚述帝国皇帝ê命令。当亚述帝国国势强盛到siōng颠峰ê时chūn，其统治者认为家己ná亲像神明仝款ê伟大，m̄-nā ài伊ê人民kā伊当做神明敬拜，mā tio̍h以色列人民kā伊看做神明仝款ê供奉。Koh khah严重ê，乃是tī亚述帝国皇帝西拿基立率兵围耶路撒冷城ê时，hit种狂傲ê语气kah话语，藐视上帝ê态度明明是恶质到极点。

	Tī希西家王ê时代，以色列人民真正是为tio̍h beh守护耶路撒冷免除沦陷tī亚述帝国手中，bat委曲求全地「送上一万公斤ê银á kah一千公斤ê金子」（参考列王记下十八：14）。M̄-nā án-ne，koh kā耶路撒冷「圣殿kah王宫宝库里ê银á lóng送过去，koh kā圣殿门上ê金子kah包tī殿门柱á顶ê金子lóng刮落来，同齐送hō͘西拿基立」（参考列王记下十八：15—16）。M̄-koh亚述皇帝西拿基立显然iáu bē满足，iáu想beh koh khah chē。其实，讲穿了，伊就是beh占领耶路撒冷，好kā城内ê以色列人民当做奴隶统治tio̍h。

	m̄-koh犹大希西家王听从先知以赛亚ê指导，有坚定ê信心óa靠上帝ê带领，伊mā带领耶路撒冷ê以色列人民听从先知以赛亚ê信息，就án-ne，tī非常危急ê时chūn，上帝果然出手帮助耶路撒冷ē-tàng脱离亚述帝国ê侵犯。这就是先知那鸿所传siōng重要ê信息，伊ê信息是teh反应主前612年，亚述首都尼尼微城被巴比伦帝国毁灭ê惨状。

	第二章就是一首描述外国军队攻击亚述首都尼尼微城ê诗歌，因为án-ne，mā有人认为这是一首「史诗」，记录了尼尼微城毁灭ê诗歌。

	第1节，真清楚讲出诗歌所指ê对象，就是「尼尼微」城，ná亲像第一章1节开始就讲先知beh传讲ê信息就是针对尼尼微讲ê仝款。

	「粉碎你ê势力已经到à」，这是teh指主前612年进攻亚述帝国ê巴比伦kah玛代联军兵临尼尼微城下ê情景。续落来「固守堡垒」、「严防通道，准备上阵」等等chiah-ê句话lóng thang看见指挥官teh呼喊守卫ê兵丁赶紧走到城堡上去防卫，mā teh指挥军队beh对准来攻击ê敌军，不beh hō͘对方有隙缝thang侵入。

	第2节，是后来圣经编者加上去ê，主要是teh说明上帝惩罚亚述帝国ê时chūn，mā是同时beh恢复kui个以色列民族tī大卫时代所建立起来ê「光荣」景况。

第3节，「红盾牌」、「红制服」，chit种用语mā thang解释做「染tio̍h鲜血ê盾牌」、「染红鲜血ê军服」。若是án-ne，就thang知影来进攻尼尼微城ê敌军已经沿路刣死bē少军民à。另外一方面，mā可能指出来攻击尼尼微城ê敌军，是一个身经百战ê军队，chiah会tī in ê盾牌kah身上留有真chē血渍。

第4节，kah第3节lóng有提起战车像「火仝款闪亮」、「像火炬仝款闪光」，这lóng用来描述敌人ê战车chē而且非常勇猛，chiah-ê战车tī阳光ê照射下闪闪发亮。而且，所有ê战车lóng是非常有强壮ê战马teh giú，chiah ē-tàng四界奔走，速度ná亲像sìh-nà般ê飞快「奔驰」。Án-ne看起来，chiah-ê马只lóng是强壮有力ê战马，它ê速度够额jiok-tio̍h想beh逃脱ê敌人，mā hō͘敌人lóng无遁形ê机会。

第5节，讲尼尼微城内ê高阶官员lóng被皇帝传唤去询问战况，先知那鸿讲chiah-ê官员ê脚步「摇摇晃晃」，表示in已经惊惶失措，连脚步lóng行bē稳。因为敌军已经来到「城墙」边，准备ài攀jú城墙à。

第6节，chit节真清楚讲tio̍h原本用来做保护城池用ê护城河，有大水闸thang控制tio̍h流水量，现在chiah-ê水闸却成做淹灭「宫殿」ê武器，因为敌人已经控制了水闸管制区。

第7节，chit节thang看见敌军已经攻入城墙，而且进入王宫。「皇后受掠去」，服侍皇后ê「宫女」mā必定同时受掠，甚至被强暴，in「ta̍k个捶胸悲泣」。其实，过去亚述帝国强盛ê时chūn，mā是用án-ne残酷ê手段对待以色列人民kah其它邻国ê人民。

第8节，chit节讲民众tùi尼尼微城「冲出」来，ná亲像「水坝决堤仝款」，表示城内ê居民看tio̍h hit-ê城teh beh毁灭，lóng惊惶地往外逃命，chit时chūn，无论甚么人大声hoah「khiā tòa！khiā tòa」，结果lóng仝款无人会听，因为大家只想beh逃命。

第9节，chit节tú好kah第8节颠倒；tī第8节描述尼尼微城内ê居民惊惶逃命ê款，而第9节chia是讲chiah-ê攻入尼尼微城ê军队四界「抢夺」、搜刮所有ê「金子」、「银á」等「财宝」。Mā tùi chit节thang看tio̍h尼尼微城内有真chē宝库，是过去tùi外国所搜刮得来ê财宝，现在lóng会丧失殆尽。

第10节，chit节清楚讲tio̍h「尼尼微毁灭了」，而且是彻底毁灭，呈现「一片荒芜凄凉」ê惨状，城内ê居民lóng因为惊惶而「双膝phi̍h-phi̍h-chhoah，气力消失」，而且是惊惶到面孔「苍白无色」。

第11到12节，chit两节lóng是teh形容尼尼微城已经陷入一个kah以前完全无仝ê景象；teh过去，尼尼微城非常坚固ná亲像一只「小狮」，被凶猛ê「公狮母狮」tī洞穴中照顾tio̍h，安全无比。M̄-nā thang食到新鲜ê肉，koh tī「洞穴里堆满小狮所需要ê「裂碎ê鲜肉」，chit句话是teh说明亚述帝国过去到各所在去相战，phah赢了后所掠夺得tio̍h ê财物堆满kui个仓库，咱人不愁食、lim、穿、用，这表示亚述帝国人民过去ê生活非常富裕，咱人生活享受lóng m̄免烦恼。现在无koh是án-ne，m̄-nā敌人冲入来抢夺掳夺，连皇后lóng被侮辱而且俘虏伊去，王宫破碎，人民ê财产被搜刮殆尽，koh khah严重ê，就是人民mā仝款hông掳去做奴隶。这就是先知那鸿tī chia所问ê「现在这大城tī tó位neh」，意思就是尼尼微城已经完全被摧毁了，看bē-tio̍h过去繁荣景象，过去hō͘人认为siōng坚固ê堡垒现在lóng phah m̄见去，因为上帝伸出手惩罚伊。

第13节，亚述ê毁灭，thang讲是上帝亲自成做亚述帝国ê「敌人」。Tī chit世界上，有甚么人ē-tàng抵挡会tiâu上帝ê惩罚？只要上帝出手，有甚么人ē-tàng抵挡会tiâu？过去亚述帝国皇帝西拿基立夸口讲，只要伊想beh the̍h落来ê国家，有tó一个神明ē-tàng保护得了？现在则是beh问亚述ê皇帝，现在上帝伸手打击，伊承受得了mah？连皇后lóng tú-tio̍h侮辱、受掠，伊iáu ē-tàng讲甚么？

「你ê使者ê声音koh khah án怎都听bē-tio̍h了」，chit句话就是当年西拿基立派兵去围攻耶路撒冷城ê时，派出大将tī城门外极尽所ē-tàng koh再侮辱以色列人民ê时所讲ê话，列王记下第十八章13到37节记载kui个经过ê情形。M̄-koh现在，当年hiah-ê讲出狂傲话ê大将，lóng m̄敢koh再出声了，因为in mā成做被俘虏ê囚犯。

那鸿书 3:1-3:19

注释:

Tī前两章先知那鸿所传出ê信息中，包括有传好消息hō͘耶路撒冷城内ê以色列人民，讲tio̍h注意看，看上帝怎样惩罚亚述。然后tī第二章就讲出亚述ê尼尼微已经被敌人攻陷，连亚述ê皇后mā被俘虏、宫女被凌辱，城内四界一片荒芜，ná亲像废墟。

先知那鸿书中siōng出名ê一句话，是tī第二章13节讲上帝beh亲自成做亚述帝国ê「敌人」，这是非常严肃ê一件信仰课题。甚么人成做上帝ê敌人，结果必定会遇tio̍h毁灭。

	第三章mā是续接第二章ê内容，teh描述上帝惩罚亚述帝国ê景象。
第1节，chia讲亚述ê尼尼微城过去是ná亲像是一个「刣人ê城市」。会án-ne讲，主要是teh说明亚述帝国刣人实在刣人刣过头了，chit点tùi「全城充满tio̍h诈欺kah强暴」ê势力，以及「抢劫掠夺」得来ê财宝看会出来。

	第2节，chit节描述敌人庞（pâng）大军队进入尼尼微城内ê情景，所有街路lóng充满tio̍h敌人ê「战车」iáu有「战马」奔驰ê声音。

	第3节，讲出报复ê行动出现tī尼尼微城内，「骑兵」所到ê所在是「死尸堆积如山，尸骸无数」，连行路lóng会被「尸首绊倒」，表示城内ê惨状。

	第4节，chia讲尼尼微城ná亲像「妓女」，chit-ê用词有特别暗示性ê路用语。一是tī亚述帝国兴旺ê时代，就是tùi真chē它phah赢ê城市俘虏了真chē妇女tńg来，kā in贩卖成做妓女，chit-ê城市就变成一个淫乱充满、妓女满街ê所在。Koh讲，早期亚述因为拜偶像ê行为非常兴旺，而chiah-ê大型ê神庙中，内面养了真chē妓女，除了tī迎神赛会中用来酬神表演外，iáu提供给民众进行苟合ê行为。因为án-ne，附近真chē seng-lí人、人民lóng会设法来chia渡假嫖妓。第三，圣不时用淫乱来形容拜偶像神明ê宗教行为兴旺之景况。Mā就是讲，尼尼微城tī亚述帝国非常兴旺ê时，mā是一个崇拜偶像神明真兴旺ê城市。尼尼微城人ê错误信仰已经hō͘ in失去良知，带亚述人做出残忍杀害人命ê行为。

	第5节，chit节thang参考以赛亚书第二十章4节，记载亚述皇帝撒珥根命hō͘伊ê元帅攻击埃及kah非利士人ê亚实突chit两个城市ê时，讲过beh「剥光in ê衫裤」，beh hō͘ hit-ê城里ê人民「无论老少，lóng tio̍h赤身露体，光tio̍h脚，hō͘埃及蒙羞」。古早时对待phah败仗ê国家，就是用chit种方式hō͘ in ê人民感觉蒙羞到扛不起头。先知那鸿真清楚讲亚述帝国taⁿ mā tio̍h遇tio̍h仝款ê待遇，敌人会用仝款ê方法回应in过去所做ê。

	第6节，「Kā lah-sap物件丢tī你身上」，这「lah-sap物件」指ê就是尼尼微城人teh拜ê偶像神明。Chiah-ê tī上帝眼中就是性命污秽ê记号，mā表示in过去所崇拜ê偶像神明无法度庇护in，chiah-ê神明会hō͘侵入者kā它弃sak tī in身上，然后用「惊骇ê眼光盯tio̍h」in，chit种眼光mā带有轻视ê意味。

	第7节，taⁿ尼尼微城是一片荒废，自然就bē有人来chia城市出入，mā bē有人「同情」á是「愿意安慰」伊，因为深惊会受tio̍h连累，hō͘灾祸缠身。

第8到9节，「底比斯」是古埃及ê首府，设tī现在埃及首都开罗ê南部大约670公里ê所在。先知那鸿讲：如果连「底比斯」城lóng被摧毁，ná比「底比斯」城koh khah小ê尼尼微城怎可能安然无恙？而且先知特别提醒讲「底比斯」城有一道埃及siōng重要ê河流，就是「尼罗河」当做国防上ê天然屏障，并且iáu有非利士人ê古实大城、弗、利比亚等等chiah-ê国家kah家己ê国家埃及帝国做同盟国teh保护，怎样可能会tú-tio̍h被摧毁ê运命？Tī一般人ê想像中，ná绝对是不可能发生ê是，ē-sái讲是事实却tī主前663年发生，因为tī chit年它被亚述帝国所摧毁à。

第10节，先知那鸿teh描述被亚述摧毁了后ê「底比斯」城之惨状，就是婴á被侵入者摔死tī街路上，达官显要lóng被捆缚送到奴隶市场像货物一般被拍卖。

「婴á tī街头巷尾hō͘人摔死」，这是因为惊gín-á ê啼哭声hō͘敌人发见家己kah民众bih起来ê所在，而赶紧kā gín-á弃sak tī街路，有ê是gín-á活活hō͘别人tùi老母ê怀中抢去，á是敌人掠到à bih起来ê民众，然后kā chiah-ê抱tī母亲怀中ê婴á当tio̍h父母ê面摔死tī街路上。Chiah-ê lóng是teh描述战争ê恐怖（参考列王记下八：12）。做一个国家被敌军摧毁ê时chūn，连「达官贵人」lóng会被敌人「铁链锁tiâu，hō͘人带走，像货物仝款分了」，表示in被当做奴隶贩卖ê所得被侵占者瓜分à。

第11到13节，chit段经文koh一pái重tńg来到尼尼微城受毁灭chìn前ê情形，当hit-ê城听tio̍h有敌军来攻击ê时chūn，in heⁿh惊kah赶紧修筑防御工事，加强国防，m̄-koh先知那鸿预言说，he是无啥路用ê补救，因为无论亚述帝国无论怎样努力，上帝已经决意beh kā它摧毁，in ê努力只是白做无功而已。

先知那鸿ê描述是：一亚述ê防御工事ná亲像已经成熟ê无花果一般，只要微风一吹，就会ka-la̍uh tī土脚；二亚述ê军队ná亲像懦弱ê cha-bó͘-gín-á，敌人m̄-nā thang轻易攻破城门，甚至thang用火来烧毁城门ê门闩。先知那鸿tī chia用「软弱ê cha-bó͘-gín-á」来形容亚述ê军队，其实是对亚述帝国ê一种极大讽刺，因为古早时cha-bó͘人不可能成做军人，妇女代表ê就是懦弱、无力ê记号。如果kā一个国家ê军队形容为cha-bó͘人，he是一种极大ê侮辱。

第14节，chit节thang看tio̍h先知那鸿确实是一个真无仝款ê先知，伊对国防军事有研究。Chia伊提起「水」，tī战争期间，「水」比其他物资lóng重要。伊讲尼尼微城ê人为tio̍h beh坚固防御ê工事，特别储存了够额ê水。因为无水ê话，只要敌人围城几工，就会hō͘城不攻自破。M̄-koh先知那鸿讲即使尼尼微城内ê人储存了真chē ê水mā无用，因为敌人放火烧城门ê门闩，chit时chūn到底是beh用chiah-ê储存ê水来灭火？iáu是beh留tio̍h解渴、煮饭？chit-ê定会hō͘领袖kah咱人lóng感觉头壳痛ah！

「踩泥做砖、预备砖模」，chit句话描写ê非常入神。这是teh表示预防城墙被敌人攻击有破洞ê时，tio̍h赶紧修补缺口，若无，会hō͘敌人tùi破洞中侵入。M̄-koh当敌人攻破城墙造成缺口ê时，一定bē退tńg来缩手，hō͘城内ê人有机会修补，敌人一定会趁机会挥兵攻入。先知那鸿用这方式teh说明一件事：无论尼尼微城ê人怎样努力beh防御hit-ê城，lóng是无用ê。

第15到17节，lóng是用「草蜢」来譬喻尼尼微城所tú-tio̍h ê灾难，ná亲像草蜢过境一般无法度抵挡。先知那鸿用草蜢来去ê快速形容亚述帝国ê辉煌ná亲像án-ne，过去尼尼微繁荣ê景象，lóng kā像草蜢过境瞬间消失。先知那鸿讲亚述帝国「大臣像一阵草蜢」，意思就是国势强盛ê时chūn，大官员chē kah ná草蜢，m̄-koh，当国家遭遇危难时刻，chiah-ê将领、高官、贵人却马上逃得无踪无影。

第18到19节，chit两节是对亚述皇帝讲ê，tī第18节chia用「大臣」来形容亚述ê领导阶层。希伯来原文是用「牧者」，感觉koh khah贴切。因为牧者若是死去，羊群就会四散伊去，甚至会hō͘野兽食掉（参考以西结书三十四：7）。Chia讲亚述帝国因为伤口之大，大到「无法度医」，这mā表示亡国ê意思。Tio̍h注意ê是当亚述帝国毁灭ê时，所有被它欺压过ê国家、人民lóng会「拍掌欢呼」，因为对in来讲，这是一个极大ê好消息，in就án-ne m̄免koh再担忧chit-ê手段残酷ê帝国会koh来欺负in。