马太福音 1:1-1:17

注释:

A.这是一份族谱。
Chit份族谱真特别，一开始就讲「耶稣基督是大卫ê后代，大卫是亚伯拉罕ê后代」，chit种ê讲法lóng是有特别用意ê。而且比较特别ê所在，是chit份族谱是tùi亚伯拉罕开始讲起，然后依序讲tio̍h后代。然后tī第17节特别强调tùi亚伯拉罕到大卫是「十四代」。

马太福音会án-ne tī一开始就写族谱，这是因为chit本福音书是为tio̍h beh写hō͘犹太人读来写ê。因为犹太人会通过族谱来确认kui个族群á是个人，kah上帝ê拯救有bē-tàng分割ê密切关系，所以对tī族谱ê重视免讲mā知。Tī圣经内面时常会读tio̍h chit种ê一句话讲：「亚伯拉罕ê上帝、以撒ê上帝、雅各ê上帝。」chit句话表面上看起来，是teh表明「约」ê延续，m̄-koh khah重要ê乃是teh强调族群血脉kah上帝之间紧密结合做伙。所以用族谱做开始来绍介耶稣ê身世，对犹太人来讲会感受tio̍h亲切，尤其是当「耶稣基督是大卫ê后代」chit句话做开场白ê时，马上就会掠tiâu犹太人ê眼光，因为犹太人对大卫王有一种无法度忘怀ê情结。先知以赛亚就有án-ne预言讲：「 Tùi 耶西ê 树头会发一支芛，tùi它ê 根所生ê 枝会结果子。(全民版)」（以赛亚书11：1）续落来koh讲：「到hit 日，耶西ê 根头khiā 做万民ê 大旗，列邦会归óa 上帝；伊安息ê 所在有大荣光。(全民版)」（以赛亚书11：10）chiah-ê话句lóng teh表明tùi大卫ê kiáⁿ孙中，会出现一位新ê王来带领以色列民族恢复大卫王朝hit种辉煌ê时代，á耶稣又koh是大卫ê kiáⁿ孙，这就是作者写chit份族谱ê主要用意。

B. Chit份族谱ê特色，就在tī它kā它分做三个「十四」代，就是tùi亚伯拉罕到大卫；大卫到以色列人民hông掠到巴比伦；tùi hông掠到巴比伦到耶稣ê时代等（参考马太福音1：17），á这「十四」tú好是「七」ê倍数。

「七」chit-ê数字，tī犹太人ê观念中有「神圣」、「完美」ê意思。作者kā族谱chit种ê分法，是有意想beh kā犹太同胞讲：大家注意à，时间到à，犹太人久长以来所期待ê hit位拯救者就是耶稣，他来à。

C.值得注意ê是tī chit份族谱中出现四位女性，chit点真无平凡，因为tī犹太人观念中，女性ê社会地位真低，而且族谱是bē出现女性名ê，chit-má却特别记明，表示chit四位女性tī以色列ê历史上有扮演过真重要ê角色。

第一位tī第3节，名叫「塔玛」。她ê事迹记载tī创世记第三十八章，原本是雅各ê kiáⁿ犹大kah迦南人书亚ê cha-bó͘-kiáⁿ结婚后所生长子珥ê bó͘，mā就是犹大ê媳妇。因为塔玛iáu无生kiáⁿ，丈夫珥就往生。珥ê小弟俄南娶阿嫂塔玛过门同房，m̄-koh mā是仝款iáu无生kiáⁿ就往生。M̄-koh犹大m̄ hō͘塔玛kah第三个kiáⁿ示拉同房，惊示拉mā往生。因此叫她tńg来后头厝。过一段时间了后，塔玛设法勾引已经bē记得媳妇ê ta-ke犹大上床，结果因此来有娠。犹大chit时chūn chiah知影家己无理，就将塔玛带入门来。

第二位tī第5节ê「喇合」。她ê事迹记载tī约书亚记第二章kah第六章22到25节。Tī chit两段经文中，thang清楚看tio̍h喇合原是一位妓女，bat帮助约书亚派入耶利哥城侦察实况ê探子。所以当约书亚率领以色列人民攻入耶利哥城了后，有保存喇合ê性命。

第三位mā是记载tī第5节ê「路得」。有关她ê事迹就是kui卷路得记。她是摩押ê cha-bó͘-gín-á，嫁hō͘以法莲支派ê以利米勒ê大kiáⁿ玛伦。玛伦kah小弟基连lóng有结婚，m̄-koh lóng无生gín-á就往生。以利米勒ê bó͘ 拿娥美决定beh tńg去故乡。路得跟tòe ta-ke拿娥美tńg来伯利恒，得tio̍h利米勒亲族波阿斯ê赏赐，波阿斯决定娶路得做bó͘，大卫就是án-ne koh再经过三代出世。Tio̍h注意ê是摩押chit-ê族群是乱伦ê kiáⁿ孙（参考创世记十九：34—38）。

第四位是第16节ê「马利亚」。有关马利亚ê背景，除了chit章18到25节记载外，也thang参考路加福音第一章26到56节。

Án-ne，thang看tio̍h前三位女性lóng有特别ê背景，独独马利亚只有绍介她是一位卑微ê cha-bó͘-gín-á而已。M̄-koh，卑微ê cha-bó͘-gín-á却是上帝所拣选完成他拯救旨意siōng重要ê器皿。

Tī第6节「大卫 tùi乌利亚 ê bó͘生所罗门」，简单ê一句话，却讲出大卫王犯奸淫罪ê事件(全民版)（参考撒母耳记落来第十一章）。Án-ne看起来，chit份族谱kā chiah-ê cha-bó͘人ê名写出来，hō͘读者清楚知影in ê背景，对讲究身分、背景、种族优越感ê犹太人来讲，必定会造成真大ê震撼。

马太福音 1:18-1:25

注释:

Chit段经文记载耶稣降生ê背景。作者特别强调耶稣ê降生，是「经由圣灵怀孕」（参考一：18），表明耶稣ê降生乃是上帝拯救ê计画，kah一般人ê出世大大无仝。圣经作者一再表达一个信仰观念：拯救ê工作，是上帝ê计画。M̄是用人ê气力ē-tàng达成，却是需要上帝ê手亲自做工。Á上帝ê作法就是用他圣灵ê气力来达成chit项计画。

Koh讲，tio̍h注意ê是马利亚当时是已经订婚，m̄-koh iáu未结婚。照犹太人律法ê规定，订婚就是已经确定婚姻关系。所以若是tī iáu无结婚就有娠孕，这对犹太人来讲是真大ê问题。上帝tī约瑟ê眠梦中，特别差遣天使来hō͘马利亚ê未婚夫约瑟清楚知影马利亚是藉tio̍h上帝ê圣灵有娠，koh赏赐名beh称做「耶稣」，chit-ê名tī犹太人社会是普遍ê，意思是teh指：耶和华上帝是帮助者。所以当约瑟醒起来了后，随时照上帝透过天使指示伊ê话去做，kā马利亚娶入门。
第22到23节所引用ê经文是用赛亚书第七章14节。

马太福音 2:1-2:12

注释:

马太福音tī记录耶稣降生ê时，讲有几个东方ê星象家来chhōe，后来因为tī东方发见一粒真特别ê星，chit粒星是teh代表犹太人ê王ê星，in就án-ne根据所看见ê星象，koh tī星ê引chhōa之下，in chhōe-tio̍h伯利恒，mā chhōe -tio̍h耶稣，就án-ne献上三项礼物：一是黄金、二是乳香、三是没药。

Chia所讲ê星象学家，mā thang kā伊称做「有智慧ê人」，用现代ê语言就是所讲ê「知识份子」，是有受过良好教育ê人ê意思。Chit种人必须随时teh chhōe上帝拯救ê记号，并且m̄惊艰苦去chhōe。Chiah-ê星象学家就是án-ne用心，终其尾chiah chhōe-tio̍h耶稣。

Siōng担忧chit件事ê人是统治犹太地区ê大希律王。因为犹太人不时有叛乱ê事发生，所以，伊一听tio̍h有一个新ê王降临，就假做真想beh认bat伊，就先问犹太人ê宗教领袖chit位新王会tī toh位出世。续落来，伊召见chiah-ê星象学家，ài in chhōe-tio̍h了后来回报。

马太福音 2:13-2:23

注释:

上帝真清楚chiah-ê tī世间掌权者ê心思意念，他知影大希律王并m̄是真正想beh拜见耶稣，却是想beh kā他杀害。因为伊想ê是chit位新王会威胁tio̍h伊ê统治权。所以上帝差派天使启示约瑟，ài伊chhōa马利亚kah婴á耶稣逃走去埃及避难。因为大希律王会为tio̍h beh维护家己ê权位来进行大屠杀。果然，大希律王kā伯利恒kah附近地区两岁以下ê cha-po͘-gín-á lóng刣死。In就án-ne tòa tī埃及，一直等到希律王往生之后，chiah koh tī上帝ê启示下，无tńg去伯利恒，却是去加利利地区ê拿撒勒定居。所以耶稣有另外一种称号，就是「拿撒勒人耶稣」。Chit-ê称号koh有另外一种意义：是teh指他确实是一个人，成长kah生活、工作lóng tī拿撒勒chit-ê庄头。

Chia讲「亚基老」继承了伊ê老父大希律tī主前4年往生后留落来ê王位。其实，大希律ê统治权留hō͘三个kiáⁿ分别掌管三个区域，犹大kah撒马利亚就是由亚基老掌管，加利利kah比利亚由安提帕管理，约旦河东北方由腓力所管辖。Chit位掌管犹大ê亚基老是一个暴君，动tio̍h to̍h会残害伊统治之下ê人民。所以罗马皇帝奥古斯lóng真无欢喜，bat ài伊好好á管理统治地区，好款待人民。M̄-koh，显然伊无遵照罗马皇帝ê要求，tī主后第6年to̍h hō͘皇帝kā伊除去王位。

Tùi马太福音ê chit段记事来看，koh再对照出埃及记第二章15节所记载ê：「法老听tio̍h chit-ê tāi-chì，就想beh 刣摩西，总是，摩西闪避法老，走去米甸地tòa，坐tī 古井边。(全民版)」然后tùi chia继续看tio̍h出埃及记第四章19到20节，讲后来想beh杀害摩西ê人lóng死去，摩西就kā bó͘-kiáⁿ chhōa teh，向埃及出发，准备ài beh进行上帝交带伊ê使命。出埃及记ê记事，对犹太人来讲非常清楚，mā tùi chia thang看tio̍h马太福音ê作者，伊是用chit种写法，有意思beh表明耶稣ê降生，就ná亲像旧约圣经时代ê摩西。

马太福音 3:1-3:12

注释:

「Tio̍h悔改，因为天国teh beh实现ā！」这是行洗礼约翰出来tī约旦河边传出上帝信息ê时所讲非常重要ê一句话。马太福音作者siōng欢喜引用旧约先知ê话语来佐证耶稣ê出现，就是kah先知ê预言有关。chit-má作者引用以赛亚书第四十章3节ê话，当做预备者ê行洗礼约翰，就是kah-ná先知玛拉基所讲ê，tī上帝「大koh thang惊ê日iáu未到ê chìn前，我会差先知以利亚到lín hia。(全民版)」（参考玛拉基书四：5），对照一下马太福音第十一章14节耶稣所讲ê：「Lín 若愿意接受chiah-ê 预言，chit-ê 人就是teh beh来ê 以利亚。(全民版)」Αń-ne就ē-tàng看出马太福音作者引用先知以赛亚chit句话ê用意，就是beh讲行洗礼约翰就是为耶稣ê来临做预备ê。Á行洗礼约翰出现时ê穿插，mā真亲像以利亚仝款，穿骆驼毛ê衫裤，縖皮带，食简单ê食物（参考列王纪下一：8）。

行洗礼约翰ê出现确实是对当时ê犹太人社会造成真大ê震撼，chit点tùi成群结队ê人群来接受伊ê施洗，以及「真chē法利赛人kah撒都该人mā来要求受洗」，就ē-tàng看出伊传出ê悔改信息确实是有撼动人心。伊对当时ê人讲：tio̍h悔改，若无悔改，即使有亚伯拉罕作犹太人祖先mā是枉然。会有chit种ê讲法，是因为犹太人拉比不时kā犹太人讲in ê祖先亚伯拉罕会tī地狱门口，以免犹太人进入地狱。M̄-koh，行洗礼约翰讲若无悔改，任何人lóng bē-tàng保证。伊强调悔改必须有实际ê行为来见证。

马太福音 3:13-3:17

注释:

犹太人认为是有罪ê人chiah需要受洗，á是外邦人有beh加入犹太人ê宗教信仰，就必须受洗，表示洁净。四本福音书lóng有记载耶稣受行洗礼约翰ê洗礼（参考马可福音一：9—11，路加福音三：21—22，约翰福音一：32—34），m̄-koh，其中约翰福音并无清楚记载耶稣tī水里受洗ê情形。Á马太福音真清楚强调行洗礼约翰知影耶稣ê身分，所以感觉耶稣kā家己ê身分降低来接受伊ê施洗，并无妥当。M̄-koh耶稣认为应该照规矩来，á他受洗是为tio̍h beh表示他kah所有罪人做伙，表明他beh带领大家同齐悔改、归向上帝。Á耶稣受洗之后，所出现ê圣灵降临之景象，tú好teh说明他kah上帝之间有密切bē-tàng分割ê关系。

马太福音 4:1-4:11

注释:

耶稣tī旷野受试探ê记事，tī马可福音第一章12到13节kah路加福音第四章1到13节lóng有记载，m̄-koh，马可福音kan-taⁿ用两节记载，无记载试探ê内容，非常简略。颠倒是马太kah路加chit两本福音书记载kah非常详细，只是tī第二、三个试探，chit两本福音书记录上ê顺序tú好颠倒。马太福音kā重点khǹg tī「世间万国ê荣华」对人ê诱惑，路加福音则kā重点khǹg tī宗教权力欲会致使人堕落ê方一向看。M̄-koh，三本福音书lóng强调试探ê时间长到「四十工」，而且lóng无lim食。

Tī chit三pái ê试探中，魔鬼siōng ài用ê一句话，就是「既然你是上帝ê kiáⁿ」，伊用chit句话ê主要目的是teh挑起耶稣抗拒上帝旨意ê念头，甚至想beh hō͘耶稣兴起kah上帝平行ê念头，m̄-koh耶稣真坚定ê拒绝魔鬼各种试探。即使魔鬼tī第6节引用圣经ê话语（参考诗篇九十一：11—12），m̄-koh，耶稣mā仝款引用圣经ê话回应过去。其实，耶稣三pái lóng是引用申命记ê话来排除魔鬼ê诱惑，第一pái是引用申命记第八章3节，第二pái是引用申命记第六章16节，第三pái是引用申命记第六章13节。

马太福音 4:12-4:17

注释:

Chit段经文是耶稣开始tī加利利地区传福音ê序文。Tī第12节先讲耶稣是tī行洗礼约翰被监禁了后，耶稣开始续接出来传福音。有关行洗礼约翰被关入监狱ê事，tī第十四章3到12节有详细记载。并且强调耶稣并m̄是tńg来到家己ê故乡拿撒勒，却是到迦百农去传福音。马太福音koh一pái引用以赛亚书第九章1节ê经文，说明耶稣就是tī乌暗中hō͘人看见ê亮光。

第17节thang清楚看tio̍h耶稣传讲ê信息kah行洗礼约翰仝款，lóng是劝人赶紧悔改。「天国」chit-ê词，kah马可福音、路加福音所用ê「上帝国」是仝款ê意思，lóng是表明上帝ê主权teh beh来临，而且是beh进行审判。

马太福音 4:18-4:22

注释:

有关耶稣呼召门徒ê记事，马太福音真清楚记载第一对兄弟档成做门徒ê，就是彼得kah伊ê小弟安得烈。第二对就是雅各kah约翰。In lóng是讨海人，以tī加利利湖掠鱼为生。

Chit句「来跟tòe我」，意思是「跟tòe tī我后面」，意思是跟tòe学习。Á「成做得人ê讨海人」，表明in会得tio̍h真chē人kah in仝款后来lóng跟tòe耶稣，chiah-ê人数会亲像in tī加利利掠鱼hit种，得tio̍h非常chē。

马太福音 4:23-4:25

注释:

Chit段经文是先为耶稣以后tī加利利地区传福音ê情形作一个简介，包括传讲天国ê信息，mā医病kah赶鬼，m̄-nā án-ne，有一大阵民众lóng近óa跟tòe tī他身边。

马太福音 5:1-5:12

注释:

马太福音共计有五段经文是所讲ê「耶稣言论集」：
Chit五段就是1.第五到七章；2.第十章5到42节；3.第十三章3到52节；4.第十八章2到35节；5.第廿三到廿五章等。每段话之后，lóng会用一句「耶稣讲完chiah-ê话」做结语。

第五到七章chit段所谓「山顶宝训」，是对门徒所讲ê，mā是一种训练ê意思。门徒是tùi各地来跟tòe ê人，chit时，伊iáu未拣选12位门徒。所以到山顶去听他教导ê门徒必定真chē，ná亲像第五章1节所讲ê「一大阵人」跟tòe他「上山」。

第五章1到12节：
Chit段经文是出名ê所谓「八福」。每一项lóng用「实在有福气」来表示。其实tī马太福音中，iáu有几个所在mā lóng提起「实在有福气」ê教导，亲像第十一章6节；第十三章16节；第廿四章46节等等。这「福」字mā teh表示内心ê满足有ê喜乐，就ná亲像诗篇第一篇1节所讲ê。

马太福音 5:13-5:16

注释:

Chit段经文真清楚teh说明ài做耶稣ê门徒应该有ê内涵，mā是kah一般人无相仝ê所在。

「盐」，这是调味品，m̄-koh mā是早期社会防腐必用之物。巴勒斯坦ê「盐」是属tī岩盐，所以若是失去气味ê功能，就会hông弃sak tī路上。

「光」，是引chhōa方向ê要素。诗篇ê诗人讲上帝ê话是「做我路上ê 光」(全民版)（参考诗篇一一九：105）。耶稣讲他就是世界上ê光，「 Tòe 我ê人无tī 乌暗中生活，颠倒
会有活命ê光。(全民版)」（参考约翰福音八：12）。耶稣tī chia强调「光」就是一种好ê行为，hō͘人thang跟tòe。

马太福音 5:17-5:20

注释:

Chit段经文主要目的是为tio̍h第21到48节做一个引言，lóng是teh谈原本旧约中ê律法问题。Tī chia耶稣特别强调，他m̄是beh废除旧约摩西律法kah先知ê教导，á是beh hō͘ chiah-ê被扭曲、误解ê内容重新呈现出真意，他特别指出经学教师kah法利赛人，teh暗示in有人故意曲解chiah-ê律法kah先知信息ê内容。Tī chit段经文中，耶稣强调任何正确教导chiah-ê律法真意ê人，lóng是teh为天国努力ê人，chit种人就是上帝所喜悦ê对象。

马太福音 5:21-5:48

注释:

Tī chit段经文中讲tio̍h：1是「bē-tàng刣死人」，2是「m̄-thang奸淫」，3是夫妻关系，4是论chiù-chōa ê问题，5是报复ê事，6是疼厝边ê问题等。Tī chit六项教导中，会看tio̍h一个重要ê特色，就是lóng是用「lín听过」开始，然后接落去就是「m̄-koh我kā lín讲」，表示过去经学教师á是法利赛人tī教导上有偏差，á是故意曲解原本ê意思。

第21到26节，chia用十诫ê第六诫「m̄-thang刣死人」做例。刣死人ê背后诱因就是嫉妒、受气。耶稣强调和好是避免chit种彼此之间残害生命siōng好ê途径，á m̄是用报复ê手段。主要原因是上帝会替受tio̍h冤屈ê人伸冤。这thang回应第五章7节所讲ê「以仁慈待人」，就是有福气ê人。

第27到30节引用十诫ê第七诫「m̄-thang奸淫」。耶稣强调内心ê意念khah赢过行为。行为ē-tàng隐藏内心ê意念。M̄-koh，上帝却是看人内心。

第31到32节，chit两节需要先参考申命记第廿四章1节，chiah会明白写休书hō͘ bó͘ ê律法规定。也thang参考马太福音第十九章3到12节，耶稣讲tio̍h有关休妻ê事。耶稣强调除非有不忠实ê事发生，mā就是今á日所讲ê「婚外情」，chia虽然是teh指bó͘，m̄-koh也应该用tī丈夫身上。

第33到37节讲tio̍h chiù-chōa ê事。圣经时代ê人chiù-chōa，lóng会指上帝ê名chiù-chōa。所以一定tio̍h真实。若是teh指上帝ê名chiù-chōa，soah koh无照所chiù ê -chōa去做，he就是teh乱使用上帝ê名，甚至会用上帝ê名chiù-chōa来隐藏内心ê邪恶意念。耶稣强调一个诚实ê人，知影上帝鉴察人ê内心，chit种人无chiù-chōa mā会知影诚实ê重要性。

第38到42节，chit段经文ê背景是tī罗马帝国强势统治之下，m̄是用硬tú硬ê方式，却是用疼来赢过恨。Chit段经文常常hông引用来做chit-má所谓「非武力运动」ê教材。

第43到47节，chit段经文thang先参考箴言第廿五章21到22节。Chit段mā是继续前段经文ê教导延伸出来。重要lóng是teh用疼赢过仇恨，mā只有chit种ê疼，chiah ē-tàng感化对敌。Tī上帝眼中，所有ê人lóng仝款。有好kah pháiⁿ之分，是因为人内心ê意念有偏差。

Tī顶面所讲chiah-ê教导中，耶稣lóng重新hō͘ in一个全新ê认知。Á tī最后第48节，耶稣用上帝ê疼当做学习准则，只有án-ne chiah会hō͘人koh khah完全。

马太福音 6:1-6:18

注释:

第六章ê教导是继续第五章所提起有关经学教师kah法利赛人教导上kah行为上ê问题，第五章讲tio̍h chiah-ê宗教领袖tī教导上有偏差，á是有曲解原本上帝律法ê旨意，chit-má第六章1到18节chit段经文则是teh指出in tī教导ê言行kah行为上，连结bē起来，结果形成一种假冒伪善ê样式出现。

耶稣tùi chiah-ê犹太人宗教领袖教导民众所认知ê生活中siōng重要ê三件事讲起，chit三件事是teh指一施舍、二祈祷、三禁食。Tī chit三项事顶面，lóng有一个共同强调ê中心：看会tio̍h你tī隐密中做事ê天父一定知影，而且会回应。

耶稣强调施舍m̄是为tio̍h beh得tio̍h别人ê o-ló，却是一种责任，mā就是第五章43到48节所提起ê疼别人，甚至连仇敌mā疼入去。人即使tī无任何人看见之下所行ê善，上帝会看kah一清二楚，而且会有奖赏回应。

祈祷mā是án-ne，是一件真隐密ê事，祈祷是kah上帝对话，m̄是beh向人祈祷。因为祈祷是生命ê告白，是内心真诚ê告解。所以祈祷必须清楚面对ê是上帝。Án-ne，祈祷不在话ê长短，á在tī诚实。上帝看人ê内心意念。

Tī第9到13节有编入一篇基督徒siōng熟悉ê主祷文。并且强调祈祷m̄是teh控诉别人ê错，却是原谅kah宽恕。Chit种祈祷表示出来ê意义是：上帝知影真清楚人所有ê一切言行举止。

禁食，这是一种哀伤、痛苦时真自然ê反应。犹太人用禁食来表示敬虔，这原本是beh用来表示忏悔ê（参考利未记廿三：26—32）。M̄-koh，忏悔m̄是hō͘人看见，忏悔是beh向上帝表白。有真正忏悔á无，这是内心ê事，上帝知影kah非常清楚。

马太福音 6:19-6:34

注释:

Chit段经文是讲tio̍h对物质生活应该有ê态度，这牵涉tio̍h对生命价值ê态度kah观念。

第19到21节，讲tio̍h真实财宝应该是存khǹg tī天顶，á m̄是tī地上。原因是积存tī地上会变质，m̄-koh存khǹg tī天顶就永远bē变pháiⁿ。若kā chit段经文参考箴言第十九章17节，以及路加福音第十二章16到20节耶稣ê比喻，就会koh khah清楚耶稣教导真实财宝ê意义。

第22到23节，短短两节讲出必须清楚生命ê方向。Chia用「光」kah「暗」做强烈对比来教导，这mā是耶稣教导上ê特色。

第24到34节，chit段经文是用第24节作基础，第25到34节lóng是进一步teh叙述第24节ê意义。人若对上帝忠实，知影倚靠上帝，chit种人永远会饱足，bē有欠缺。因为上帝是赏赐一切ê源头。

Tī chit段经文中，耶稣用生活ê例作教导，一般人会án-ne烦恼物质生活ê需要，是因为m̄-bat上帝ê缘故。对上帝有信心ê人lóng会知影知足，有知足之心ê人，就bē贪婪，chit种社会就bē有欠缺。耶稣劝勉门徒tio̍h先追求「上帝主权ê实现，遵行他ê旨意」，á这mā是teh提醒咱认bat上帝，以上帝做咱生命ê中心，咱倚靠他，chit种生命自然会丰富起来，chit种人就bē kā生命用来烦恼物质生活上ê事。

马太福音 7:1-7:5

注释:

1.第七章是继续第五章开始ê山顶宝训。作者强调tī山顶听tio̍h耶稣连串ê教导，大家lóng感觉非常惊惶，因为他教导ê内容确实是大大无仝，kah经学教师传统ê教导非常无仝。

2.第七章1到5节：
耶稣教导门徒kah群众，人kah人之间ê关系，先tùi自我反省开始。M̄-thang一开始就论断别人。伊希望人人先设身处地为别人设想开始，án-ne就比较容易体谅别人。他强调上帝chiah是真正审判者，因为上帝鉴察人ê内心（参考耶利米书十七：10）。

第3到4节ê「锯屑灰」kah「大梁」，这是极大ê对比，「锯屑灰」原本ê意思是「针」；后者「大梁」是teh指建造厝ê梁柱。

第5节所提起ê「伪善ê人」，表示tī「锯屑灰」kah「大梁」之间ê秩序颠倒。人tio̍h先kā大梁移徙了后，chiah会清楚到底是m̄是有锯屑灰。若无，永远看bē清楚。

马太福音 7:6-7:11

注释:

「神圣ê物件」，通常是teh指上帝ê名，á上帝ê名是神圣ê。「珍珠」thang看做是天国。Á「狗」kah「猪」lóng是teh指外邦人ê意思。Chia真清楚teh强调，将上帝ê国kah神圣ê名，讲hō͘ hiah-ê拒绝ê人听，是无效果ê，kan-taⁿ会带来koh khah大ê侮辱而已。

Tī第六章1到7节已经谈过祈祷应该有ê态度kah认bat。Chia koh一pái劝勉门徒kah民众，对上帝祈祷一定tio̍h抱tio̍h恒心，因为上帝赏赐hō͘人ê lóng是siōng好ê。

马太福音 7:12-7:14

注释:

这是一节重要ê教导，tī路加福音第六章31节mā有记载，m̄-koh路加福音将此节编辑tī疼敌人ê教导了后，表示kā期待别人ê心境，用来khǹg tī家己ê身上，就会koh khah清楚该怎样对待别人。耶稣强调摩西法律kah先知ê教导就是án-ne。

当福音书出现「摩西法律kah先知教示」chit种话句时，意思就是teh指旧约圣经。Án-ne，tùi第五章3节开始ê登山宝训，tī chia作一个总结。

「窄门」、「难行」ê路，kah「通向性命ê门」相连结，愿意选择而且chhōe-tio̍h chit-ê方向ê人非常少。相对ê，朝向「宽」ê门、「好行ê」路，kah「通向灭亡」ê道路去ê人却真chē。

马太福音 7:15-7:20

注释:

「Lín tio̍h 提防假先知」，chit句话thang看出新约时代ê假先知iáu-kú猖獗。耶稣tī预言末日景象ê时，koh一pái提起会有真chē假先知出现来迷惑人心，chiah-ê假先知甚至iáu会行神迹奇事（参考马太福音廿四：11、24）。

「绵羊」，通常会hō͘人用来形容「善良」、「温驯」，相对tī「豺狼」则khah常hō͘人用来形容是凶恶ê野兽，kan-taⁿ会欺负弱小ê羊羔。

Tùi日常生活行为就thang看出先知是m̄是真实，ná亲像好ê果子树，会结出好ê果子仝款，pháiⁿ ê果子树是结bē出好果子ê。

第19到20节，thang看出必定有严厉ê审判teh thèng候chiah-ê假冒ê先知。上帝ê审判是tùi人所做ê事kah心思意念来报应。

马太福音 7:21-7:23

注释:

续接前一段论到ê假先知ê问题，ná亲像第19节所提起ê，必定会有审判，chit-ê审判并m̄是teh评断甚么人有行神迹奇事ê能力，却是诚实ê心灵。

Chia ê「主ah，主ah」，有两种意思，一是teh指求救ê呼声（参考八：2、6、8、25），重复使用，表示非常迫切ê呼声（参考廿五：11）。二是teh指一种礼仪上ê欢呼，就ná亲像今á日ê人teh欢呼「万岁、万岁」仝款。

Ē-tàng á是bē-tàng受上帝所接受？Kah一个人是m̄是会行神迹奇事无关系。Siōng重要ê，就是第21节所讲ê，实行上帝ê旨意chiah ē-tàng入去。耶稣mā强调只要是实行上帝旨意ê人，lóng是他ê「老母和兄弟姊妹」（参考十二：50）。

马太福音 7:24-7:27

注释:

Chit段是山顶宝训最后一段，是延续第21节ê题旨：真正实践上帝ê旨意。

「石磐」kah「沙土」是相对ê；前者坚硬，后者松散。耶稣强调听见他ê教导了后，就tio̍h kā chiah-ê教导实践出来，这chiah是实在，ná亲像坚硬ê石磐仝款。Ná亲像摩西教导以色列人民，凡上帝所吩咐ê一切命令，lóng tio̍h切实去遵行（参考出埃及记廿四：7，申命记三十一：11—12）。

马太福音 7:28-7:29

注释:

「耶稣讲完chiah-」，这是马太福音收编耶稣五段言论集了后，会出现ê一句话（参考十一：1、十三：53、十九：1、廿六：1）。

民众听耶稣ê教导了后，lóng惊kah gāng去，甚至认为伊ê教导远比经学教师koh khah有「权威」。Chia ê「权威」，表示hō͘人ê心灵震撼ê意思。

马太福音 8:1-8:4

注释:

Chit件医癞ko病ê神迹是tī大家金金teh看之下teh行，m̄-nā án-ne，耶稣行chit件医神迹是「伸手摸」chit-ê癞ko病人，这mā表示伊接触tio̍h癞ko病人，ē-sái讲是他m̄-nā无被感染，颠倒是chit-ê人ê癞ko病是「马上消除，洁净」，表示耶稣身上有奇特ê气力，赢过当时社会siōng惊惶ê癞ko病。

Chhōe祭司检验kah照摩西ê规定献上祭物，thang参考利未记第十四章10到32节。
M̄-koh tī大家金金teh看之下ê医，却要求这病人「mài kā chit件kā 人讲」，chit种吩咐一再出现tī耶稣行医神迹了后（参考马太福音九：30、十二：16，马可福音五：43、七：36、八：26）。伊会án-ne吩咐，是因为无想beh tī福音ê事工上被扭曲á是受tio̍h阻碍。因为大多数ê人kan-taⁿ ài看神迹奇事，却无想beh听天国ê信息。

马太福音 8:5-8:13

注释:

这是马太福音记载第二件医ê神迹，医ê对象是外邦人，是罗马军官为tio̍h厝里ê奴仆来请求耶稣医，因为伊ê奴仆「半遂」，「非常痛苦」。

罗马军官会来请求，表示耶稣医ê名声已经远播，当耶稣决定beh去in-tau ê时，chit-ê罗马军官ê回应是m̄敢劳烦耶稣去in-tau，伊kan-taⁿ求耶稣hō͘伊一句「命令」就好，伊kā家己带兵ê经验，认为只要耶稣愿意出一句命令，伊ê奴仆就会得tio̍h医。

Chit位罗马军官ê信心，mā teh表明伊对耶稣ê认bat比犹太人iáu khah深，chit点是hō͘耶稣大感动ê原因。

Chit句「有真chē人tùi东tùi西前来」，意思是teh指真chē外邦人，in lóng tio̍h kah犹太人ê祖先同齐享受上帝拯救ê恩典。所谓「坐席」，表示是天国ê宴席ê意思，mā表示天国ê欢乐。

耶稣照chit位军官所祈求ê，耶稣kan-taⁿ用一句命令，就医好伊ê奴仆，chit句话是：「tńg去厝里，照你ê信心hō͘你成全！」信心坚定ê人，上帝必定会成全伊ê所求。

马太福音 8:14-8:17

注释:

Chit段经文记载两件事，第一件是第14到15节，讲彼得ê丈姆发烧，经耶稣「一摸伊ê手，就退烧」，续落来彼得ê丈姆就起来「接待耶稣」。马太福音chit种笔法表示：彼得ê丈姆服事耶稣，表示感恩ê意思。

Koh讲，chia提起彼得ê丈姆，表示彼得有结婚，而且tī后来出去传福音ê时，是chhōa bó͘同齐去（参考哥林多前书九：5）。

Tī第16到17节，chit两节虽然真简单teh说明耶稣ê工作，m̄-koh却是kā伊tī加利利所行各种神迹奇事，而且「kan-taⁿ用一句话就kā鬼lóng赶走，koh医好所有ê病人」，chit种话句，lóng是teh表示耶稣身上确实有特别ê能力。马太福音作者kā耶稣chit种一直为病人医ê工作，引用以赛亚书第五十三章4节ê经文来表示，hi̍t节经文原本表示上帝差遣来ê受苦奴仆，就是为tio̍h beh负担咱ê痛苦，chit种性命ê痛苦kah「罪」有密切关系。

马太福音 8:18-8:22

注释:

马太福音tùi第四章开始记载耶稣召门徒来tòe他传福音，伊是一面呼召人来做门徒（参考八：21—22、九：9—12），另外一方面是随时teh教导门徒认bat天国ê信息（九：35—38）。

第19节讲有一个经学教师对耶稣表示想beh跟tòe伊，这mā说明耶稣出来传天国ê信息了后，已经tī犹太人中间造成真大ê震撼。经学教师tī犹太人社会ê地位真koân，约翰福音第十二章42节记载有bē少犹太人领袖确实是信了耶稣，m̄-koh因为惊法利赛人反扑，m̄敢公开表态。因为án-ne，第20节就记载耶稣回应chit-ê经学教师，ài伊认真思考tio̍h付出ê代价。

第21节所讲ê「门徒」，就是跟tòe耶稣一kóa时间，m̄-koh并m̄是亲像彼得、安得烈、雅各、约翰、马太等等chiah-ê人专心一意跟随者，chit-má chit-ê门徒表示想beh专心跟tòe耶稣，m̄-koh想beh先tńg去等到in老父死后而且安葬妥当了后，koh来跟tòe。耶稣回应chit-ê人，既然án-ne就m̄免来跟tòe à，因为传福音ê事工，需要坚定ê毅力，有后顾之忧ê人，并无适合。

马太福音 8:23-8:27

注释:

Chit段经文记载耶稣有能力行奇妙ê神迹，hō͘自然界ê风kah涌lóng听伊ê命令，已经teh暗示耶稣kah一般人无仝款，tī伊ê身上有上帝创造ê能力，因为án-ne，就算有大风涌打击，甚至水涌盖过船，耶稣犹原ē-tàng安然困。

「主ah，救阮，阮teh beh无命à！」马太福音用chit种方式beh hō͘犹太人知影，表示耶稣就是性命ê救主、主宰。耶稣醒起来了后并无随时命令风kah涌停止，却是先对门徒讲：「为甚么hiah-ni̍h惊惶？Lín ê信心siuⁿ过细lah！」 Kah耶稣做伙，iáu teh担心性命ê安危，这就是无信心ê表现。
耶稣一下责备风kah涌，风kah涌lóng听他，án-ne chiah引起门徒大大tio̍h惊，in lóng提出chit-ê问题：「Chit-ê人究竟是甚么人？」 表示门徒对耶稣ê认bat真少。

马太福音 8:28-8:34

注释:

马太福音记载耶稣所行chit件神迹ê地点是tī「加大拉」，chit-ê庄头离加利利湖东南方约有十公里。

Chit两个hō͘鬼附身ê人，是tòa tī「墓穴」中，照摩西律法来看，in就是属tī无清气ê人（参考民数记十九：16）。福音书作者一再表示鬼认bat耶稣（参考马可福音一：23—24、三：11），chiah-ê鬼对耶稣讲表达出重要ê意义：

一是「上帝ê Kiáⁿ」，这表示in认为耶稣是弥赛亚、拯救者。

二是「你为甚么ài干涉搅扰阮」，chit句话表示耶稣来到in中间，hō͘ in想beh继续危害人性命ê事受tio̍h阻碍。

三是「时机未到」，鬼认为上帝审判ê末日iáu未到。表示in iáu ē-tàng继续危害人ê性命。

「猪」tī摩西律法中认为是属tī无清气ê动物，bē-tàng食用（参考利未记十一：7）。无清气ê猪，kah hō͘鬼附身来tòa tī墓穴ê人tú好是相配，lóng是属tī无清气ê。马可福音第五章14节讲chiah-ê猪只总共约有两千只，这确实是真大ê数目，应该是属tī社区ê共同财产。Chiah-ê鬼请求耶稣hō͘ in tùi这两人身上出来了后，进入猪群中。等于是in想beh tńg来到仝款是属tī「无清气」ê动物，án-ne in ē-tàng附体存在。结果chiah-ê猪群tùi án-ne冲入去湖中淹死。

湖，tī犹太人文化中是属tī鬼生存ê所在，mā是会危害性命ê气力。Tī chia teh暗示chiah-ê鬼tńg来到in所khiā起ê所在。M̄-koh，加大拉ê人并无因为chit两个hō͘鬼附身ê人得tio̍h医来感谢耶稣，颠倒是hiah-ê人看见chit件事ê反应是相当惊惶（参考马可福音五：15），in要求耶稣离开in ê所在。

马太福音 9:1-9:8

注释:

耶稣医人ê病，通常是因为当事人对耶稣有相当ê信心。M̄-koh mā有真chē pái，是因为病患周围ê人ê信心，hō͘耶稣施行医ê能力。亲像tī第八章1到10节，记载一位罗马军官为tio̍h伊ê奴仆破病，来求耶稣医，伊kan-taⁿ求耶稣赐hō͘伊一句「医」就有够，耶稣听真赞叹chit位罗马军官ê信心。

chit-má chit段经文ê chit-ê半遂病人，就是因为别人kā伊扛到耶稣面前来求医，耶稣看出chiah-ê人ê信心á医好chit-ê人ê病。有坚定信心ê人，m̄-nā对家己有帮助，mā会对同齐生活ê人有利益。

马太福音tī记载上有省略描述chiah-ê朋友怎样kā chit-ê半遂病人抬到耶稣面前ê过程，tī马可福音第二章1到5节kah路加福音第五章17到20节等等，lóng有真详细ê描述，讲chiah-ê人是kā病人抬到厝顶，拆开厝顶了后，kā半遂病人缒落到耶稣面前。In chit种举动大大感动耶稣。

Chiah-ê经学教师认为耶稣医chit-ê病人所讲「你ê罪得tio̍h赦免à」chit句话，有亵渎上帝之嫌。因为犹太人久长以来认为只有上帝chiah有权赦免人ê罪（参考以赛亚书四十三：25）。

福音书作者ài用「耶稣知影in teh想甚么」chit种句型来表示，耶稣有特殊能力，ē-tàng知影人ê心思意念（参考马太福音十二：25、十六：8、廿二：18，马可福音八：17，路加福音六：8、九：47，约翰福音六：15），á这是上帝chiah有ê能力。

马太福音 9:9-9:13

注释:

马太福音讲chit位抽税ê人名叫马太，tī马可kah路加福音书lóng讲是「利未」。Tī第十章3节记载耶稣门徒ê名单中mā是用「抽税ê人马太」，伊原本是一个犹太人眼中ê罪人（参考路加福音十九：7），竟然会hō͘耶稣接纳成做门徒，这是jōa-ni̍h-á大ê恩典ah！

「抽税ê kah pháiⁿ人」，chia所讲ê「pháiⁿ人」真可能指ê是妓女，á是tī犹太人社会中，不时hō͘人认为是无赞成法利赛人hit种严谨守祖先传统ê人。

Tī第13节，马太福音作者引用了何西阿书第六章6节ê经文，强调怀tio̍h怜悯ê心，比遵行kāu枝叶ê祭祀礼仪koh khah重要。这表示对社会上hō͘人鄙视（siùⁿ）、讨厌ê人，tio̍h存怜恤ê心来看待。

马太福音 9:14-9:17

注释:

禁食，这原本是真严肃ê一项信仰行为，是人teh表示谦卑、忏悔、悲伤ê态度。Tī旧约摩西时代规定每年赎罪节ê时chūn，全国人民lóng tio̍h禁食（参考利未记十六：29—34）。主前586年以色列人民亡国tī巴比伦帝国后，in增加禁食ê次数到四次（参考撒迦利亚八：19）。到耶稣ê时代，有敬虔派ê犹太人每一个礼拜禁食两pái（参考路加十八：12）。禁食，应该是人内心ê一种省思，m̄是用来比较个人信仰ê层次高低á是好bái ê方式（参考马太六：16—18）。

耶稣tī第15节用婚姻ê关系譬喻。犹太人ê婚宴长到七工，he是件大事，甚至tú结婚ê cha-po͘人，一年内lóng thang免除公务kah兵役（参考申命记廿四：5）。耶稣tī-chia隐喻家己就是新郎，伊当teh办婚宴，当然m̄免禁食。

「日子teh beh到」，这是teh指审判ê时刻to̍h是teh beh来临，新郎会hō͘掠去，表示伊受难了后，会有大ê迫害出现，hit时chūn，哀伤ê时刻mā会来临，hit时就一定tio̍h禁食。

第16到17节是犹太人流行ê谚语。古时chūn ê布因为需要先浸过水了后chiah ē-tàng做成衫裤。新布，是teh指iáu未浸过水ê，用新布来补旧衫裤，一定会ná补ná大孔。装酒ê皮袋mā是án-ne。

「Ài kā新酒装tī新皮袋里；án-ne，两项lóng会保全。」马太福音记载耶稣chit句话，真清楚teh说明旧ê kah新ê tio̍h分明，án-ne两种lóng会保存落来。

马太福音 9:18-9:26

注释:

Chit段经文kā两则医ê神迹编辑做伙。会堂ê主管，tī犹太人社会中lóng受尊崇。M̄-koh伊深信耶稣有特殊能力ē-tàng医伊ê cha-bó͘-kiáⁿ。

犹太人ê习俗是死后先埋葬，了后chiah通知亲友。因为耶稣到伊ê厝有小khóa延迟，当伊到ê时chūn，叶鲁ê cha-bó͘-kiáⁿ已经往生á准备ài出殡à。M̄-koh耶稣认为叶鲁ê cha-bó͘-kiáⁿ并无死，只是「困去à」，大家lóng感觉耶稣讲chit种话真好笑。因为明明是死去，chiah会请出殡ê鼓吹手来准备出殡ê事宜。耶稣进入这女孩ê卧室，拉起伊ê手，这女孩就koh活起来。

马可福音第五章42节讲这女孩当时是12岁。这年龄tú好kah致使延缓到叶鲁家去ê一位患有血漏症ê cha-bó͘人患病时间仝款，lóng是12年。摩西律法认为患chit种病ê cha-bó͘人是无清气ê（参考利未记十五：25—30），无法度参加任何聚会，mā无法度kah任何人有接触。因为án-ne，chit种cha-bó͘人通常会hō͘隔离出来，免得kah伊有接触ê人lóng成做无清气。可见chit-ê cha-bó͘人ê生活是非常痛苦ê。

「衣角」，这是犹太cha-po͘人衫裤边缘上所缝制ê缀子，用来提醒以色列人民tio̍h会记得遵守上帝一切诫命（参考民数记十五：37—41）。当chit-ê cha-bó͘人伸手摸tio̍h耶稣ê衣角ê时，tùi耶稣ê身上就有能力散发出来（参考马可福音五：30），医好chit-ê cha-bó͘人ê病。马太福音第十四章36节就有án-ne记载讲，有病ê人只要一摸耶稣外袍ê衣角，身上ê病lóng好了，这lóng teh说明耶稣身上有特殊能力。

马太福音 9:27-9:31

注释:

所谓「大卫ê kiáⁿ」，指ê是拯救者（弥赛亚）ê意思，这是根据先知以赛亚书第十一章1节、耶利米书第廿三章5、6节ê预言延伸来ê。Chit两个人虽然chheⁿ-mê，m̄-koh，in ê心无chheⁿ-mê。In可能只听tio̍h耶稣ê故事，就相信耶稣就是先知所预言ê救主，结果得tio̍h医。

马太福音提供chit种特别医ê资料，会强调「两个人」，主要teh强调这是有公开见证者（参考申命记十九：15），ná亲像tī加大拉tú-tio̍h两个被大群鬼附身ê人仝款。

如果盲人听tio̍h耶稣来ê消息，就会大声叫耶稣是「大卫ê kiáⁿ」，目金ê人应该会koh khah清楚chiah-tio̍h。

「阮信」，这是一句性命ê告白，耶稣mā因为án-ne「成全」in所期待ê，ná亲像伊成全了罗马军官所祈求ê仝款（参考马太福音八：13）。

「Mài kā chit项事kā任何人讲」，耶稣án-ne交带chit两个tú hông医好ê盲人，ná亲像他mā bat吩咐hit位癞ko病被医好ê人（参考八：4）。M̄-koh，chit两个人并无照耶稣ê吩咐，in四界去传扬耶稣tī in身上所做ê事，ná亲像马可福音第一章45节所记载hit位癞ko病得tio̍h医ê病人仝款，四界宣扬耶稣为伊所做奇妙医ê事，m̄-koh，反tńg影响了耶稣ê工作。

马太福音 9:32-9:33

注释:

「Hō͘鬼附身ê哑巴」，福音书作者ài用「鬼附身」来形容病症之严重，已经大大超过当时医生医能力ê范围。因为án-ne，当时ê人看见chit种病被医好了后，in ê反应就是「从来m̄-bat有见过chit种事」。

先知以赛亚书第廿九章18、19节án-ne讲：「Hit 日，臭耳聋ê 会听tio̍h 册内ê话，chheⁿ-mê-.ê ê 目睭会tùi 蒙雾乌暗中得tio̍h 看见。19 谦卑ê 人会因为上主来加添in ê 欢喜；世间ê sàn-chhiah 人会因为以色列ê 圣ê 来快乐。(全民版)」Αń-ne，马太福音ê作者teh描述耶稣ē-tàng有chit种力量医chheⁿ-mê、聋哑ê人，甚至hō͘死人koh活，他（耶稣）就是先知所预言ê弥赛亚。

马太福音 9:35-10:1

注释:

Chit段经文ê重点就tī第36节所讲ê：「当他看见一阵群ê人，动起怜悯ê心；因为in孤苦无助，像无牧者ê羊群一般。」

「动起怜悯ê心」，mā是kui本圣经teh绍介上帝拯救工作ê一个主要原因，是上帝看见人类ê苦难，他生出怜悯、怜悯ê心，展开拯救ê工作。

马太福音作者以耶稣四界传福音kah医医病人ê时，发见一：群众ná亲像无牧羊人看顾、养饲ê羊。二：等待收割ê庄稼真chē，m̄-koh收割ê工人少，接落去经文tio̍h叙述耶稣拣选门徒来协助传福音事工ê原因。

马太福音 10:2-10:4

注释:

马太福音直接就讲述耶稣「召集他ê十二个门徒做伙」，并且列出chit十二位「使徒」ê名单，然后随时tī第5节讲差派in出去传福音，为tio̍h beh hō͘他ê门徒tī福音事工上进行顺利，耶稣mā「赐hō͘ in驱逐邪灵kah医各种病症ê权力」。

第1节用「门徒」，第2节用「使徒」，前者表示「学习者」，后者表示「受差派」。前者是tī耶稣时代所用ê名词，后者是早期教会使用。「十二」，其实有含以色列民族「十二支派」ê意思。

「巴多罗买」，真可能就是约翰福音第一章46节所提起ê「拿但业」。

「收税ê马太」，mā就是马可kah路加chit二本福音书所讲ê「利未」。

「激进党」，这是当时犹太人社会ê一种政治党派，kah「希律党」ê人tī政治理念上颠倒。Chit字ê希伯来文是「Kama」，mā就是「狂热者」（zealous）ê意思。

「出卖耶稣ê加略人犹大」，三本福音书lóng kā它编排tī十二门徒之后，而且lóng强调「出卖耶稣ê」，表示chit-ê名单是tī耶稣死后chiah出现ê（参考马可福音三：19，路加福音六：16）。

马太福音 10:5-10:15

注释:

只有马太福音记载耶稣吩咐他ê门徒mài到外邦人地区，而且iáu强调mài进入撒马利亚人ê城市。Chit种吩咐一再引起讨论。因为耶稣家己mā进入撒马利亚人ê城市，而且iáu tòa两工，hō͘真chē撒马利亚人信了伊（参考约翰福音四：40—41）。耶稣mā bat进入外邦人ê城市，而且行了神迹奇事（参考马太福音十五：21—28）。他koh活了后，交带门徒tio̍h往普天下去传福音（参考马太福音廿八：18—20）。因为án-ne，到底是tī甚么情况之下会有chit种禁令出现，真oh理解。有可能kah第7节所提起ê「天国teh beh实现ā」有关，表示时间真紧迫，只好先tùi上帝ê子民以色列ê kiáⁿ孙开始chit件福音事工。

福音事工siōng重要ê态度，就是「白白得tio̍h，mā tio̍h白白hō͘人」，使徒保罗mā强调讲上帝是「白白赐恩典」，hō͘人得tio̍h耶稣拯救ê恩典（参考罗马书三：24）。

第9到10节thang看出传福音ê范围真细，平常生活所需要ê只要有人接待就bē有缺乏。犹太人koh有一种风俗，欢喜接待出外ê人，因为可能因为án-ne接待tio̍h天使（参考希伯来书十三：2）。
「愿lín平安。」这是一句祝福，平安是teh指享受上帝赏赐ê福气，心灵ê安息ê意思（参考马太福音十一：28—30）。

第15节thang参考创世记第十九章。

马太福音 10:16-10:25

注释:

Chit段经文讲述门徒受差派出去传福音一定tio̍h ài有ê认bat，mā说明传福音ài有牺牲性命ê准备，这讲出传福音并m̄是一件容易á是轻松ê事。Tùi chia想起耶稣吩咐门徒m̄免带任何身外之物，也kah chit种会面临苦难ê事有关。

「Kā羊送入去狼群中」，表示必定会有性命ê危险。Chit种情形tī基督教会历史上，发生真chē传道者殉难ê事件，就证实了耶稣chit句话。

传福音所ài面对ê是人，而且是罪恶jú深ê人，jú需要福音ê信息。因为án-ne，灵巧、猛醒亲像「蛇」乃是必要ê。M̄-koh，灵巧、机警并m̄是用来欺骗别人，á是图谋私利，却是知影怎样chiah ē-tàng kā福音ê信息传达出去。Koh讲，传福音ê人koh khah需要抱tio̍h善良ê心。

第17到20节已经讲出早期教会信徒tú-tio̍h ê困境背景，就是受tio̍h犹太教徒ê迫害。Chia所讲ê「法庭」，是teh指犹太人ê地方公会组织，由维护犹太会堂纪律ê委员会组成，人数大约二十三名，专门teh处理宗教kah民间ê事务。「鞭phah」，这mā是公会对被告判刑ê惩罚之一种。耶稣受犹太人siōng koân议会审问后mā受tio̍h类似ê惩罚（参考马太福音廿六：67）。使徒保罗bat受tio̍h chit种待遇（参考哥林多后书十一：24）。

第18节thang对照第五章11到12节，回应第16节所讲ê一定tio̍h灵巧ná蛇。另外一方面，上帝会赐福hō͘他ê奴仆，hō͘伊明白上帝ê旨意。

第21到23节，除了来自犹太宗教众领袖ê压迫外，koh khah严肃ê是来家己厝己ê厝内人。第22节ê「忍耐到底」，是teh指面对一切迫害、苦难，犹原bē改变心志，坚持为福音无惜牺牲任何代价ê意思。

第23节所谓「行遍以色列ê城市」，这应该是teh指巴勒斯坦地区ê范围，表示耶稣koh再临ê时间会真紧，chit点早期教会深信无疑。

对早期教会受迫害ê信徒来讲，第24到25节是真安慰，因为耶稣mā受tio̍h残酷ê迫害钉死tī十字架顶。因为án-ne，当耶稣ê门徒（á是基督徒）来讲，tú-tio̍h迫害时想看耶稣，án-ne就无甚么好感觉委屈ê。

「别西卜」，这是犹太所指称ê「鬼王」（参考马可福音三：22），mā是teh指魔鬼、撒旦ê意思。

马太福音 10:26-10:31

注释:

第26节是当时犹太社会ê谚语，意思是teh指人真有限，无法度隐藏家己ê身分，因为上帝是无所不在ê，他真清楚人ê一切行为，是性命真正ê主宰。人只有ē-tàng杀害身躯，却对灵魂lóng无办法。Chia讲「灵魂」kah「肉体」并m̄是分开，却是讲kui个性命包含chit两个部分，而且只有上帝chiah有权柄处置人性命中ê chit两个部分。

「雀鸟á」，这是当时鸟类中hông看做siōng卑微ê。Ná亲像人头壳顶ê头毛仝款，有时lak头毛，人mā bē致意，m̄-koh tī上帝眼中，他ê手所创造之物，他lóng珍惜看顾。人因为有上帝ê形像（参考创世记一：26），因为án-ne，受托付来管理上帝所造ê万物。Mā因为chit-ê缘故，人比一切万物有koh khah特殊ê使命，这是第31节所提起ê，主要teh安慰、鼓励为tio̍h福音受tio̍h迫害ê人。

马太福音 10:32-10:33

注释:

「认」，意思是teh指结连做伙，无法度分开ê。参考约翰福音第十四章6到7节讲ê，无认bat耶稣，就无法度认bat天父。另外mā thang参考路加福音第九章26节。

马太福音 10:34-10:39

注释:

这是一段真oh理解ê经文。天使传报耶稣降生ê信息ê时，是带「和平」hō͘ chit世界（参考路加福音二：14b）。先知以赛亚讲有一个为咱出世ê婴á，伊会是一位「和平ê君王」（参考以赛亚书九：6）。M̄-koh chia耶稣却讲他无带来「和平」，却是带「刀剑」，而且会引起厝内人á是亲朋好友之间ê纷争。其实，chit段经文mā讲出早期基督徒选择信仰时所tú-tio̍h ê现实问题，有时严重ê情况ná亲像战争仝款，是生死ê问题，甚至关系tio̍h kui个家庭ê存亡，因为罗马帝国后来施行迫害基督徒ê政策，就是采用连坐法，只要发见一个家庭里有人信耶稣，连带ê kui个家庭lóng会受tio̍h惩罚。

做一个人决定beh跟tòe耶稣ê时，就一定tio̍h先量家己是m̄是愿意giâ起十字架，这是必要ê先决条件，若无，就真oh继续。因为跟tòe耶稣是为tio̍h beh传福音，这福音是上帝拯救ê信息（参考罗马书一：16）。M̄-koh传福音可能会为性命带来苦难，这tī早期ê教会一再发生，tī近代ê极权国家mā是án-ne。

马太福音 10:40-10:42

注释:

Chit两节是chit章有关差派门徒出去传福音ê一个总结。Tī拣选门徒了后，耶稣差派十二使徒出去传福音，并hō͘ in知影可能会tú-tio̍h ê各种问题。耶稣tī第34到39节讲tio̍h真正ê问题，讲人ê仇敌是家己ê厝内人。然后tī chia回应好款待所有为福音事工奉献心力ê人，lóng会kah传福音ê人仝款得tio̍h上帝ê奖赏。换句话讲：传福音kah协助传福音ê人，即使是接待、支援等等，lóng是上帝所奖赏ê对象。因为只要是福音事工，就是参与上帝救人性命ê工作。Thang kā chit段经文kah第廿五章31到46节对照来看。

马太福音 11:1-11:15

注释:

「耶稣指示十二个门徒ê话讲soah了后」，chit句话是耶稣言论ê第二段ê结束。

有关行洗礼约翰派门徒去问耶稣身分ê事。Tī第四章12节bat提起行洗礼约翰因为批评希律乱伦ê事á被关tī监狱里。伊虽然tī监狱里，iáu teh关心「弥赛亚」来临ê事。因为不时听tio̍h门徒来传达耶稣传福音、医病ê事，因为án-ne，koh再派门徒去问耶稣，是有「koh一pái确认」ê用意。

第4到6节，耶稣ê回答是真具体ê，他ài行洗礼约翰ê门徒kā「所听见、所看tio̍h ê」tńg去向行洗礼约翰报告。他引用以赛亚书第廿九章18节，以及第三十五章5到6节ê经文，先知以赛亚书ê预言中提起以色列人民重新得tio̍h拯救ê日子来临时，就是：「Chheⁿ-mê-.ê ē-tàng看，臭耳聋ê ē-tàng听，跛脚ê ē-tàng像鹿跳跃，哑口ē-tàng歌唱。旷野会chhèng出大水；荒漠会流出甘泉。」Μā thang将chit段预言对照以赛亚书第六十一章1到2节。耶稣beh hō͘行洗礼约翰ê学生清楚，他就是以色列人民期待甚久ê拯救者、弥赛亚。

第7到11节，chit段经文讲tio̍h人真正ê问题，是无清楚家己看tio̍h甚么？Á是别人看tio̍h甚么？如果无属灵ê眼光，人所看tio̍h ê iáu是表面ê。除非有上帝ê启示，若无，人所看tio̍h ê iáu是肤浅ê现象。

耶稣引用玛拉基书第三章1节所记载ê预言，耶稣真清楚teh表示行洗礼约翰就是hit位teh beh来ê先知以利亚，án-ne，耶稣就是in所期待ê弥赛亚。

第11节提起有关行洗礼约翰tī天国里是siōng卑微，m̄-koh伊却比以往任何一位先知lóng khah伟大，原因是伊看tio̍h耶稣。M̄-koh耶稣是开创天国信息者，ná亲像行洗礼约翰家己所讲ê，伊连beh为chit位拯救者tháu鞋带、the̍h鞋á mā不配（参考马太福音三：11）。

第12节有真chē种解释：一是有人误kā天国当做地上ê政治王国一般，用各种方式想beh夺取。因为án-ne会剧烈用尽各种方法想beh占有。Tùi教会历史来看，chit种解释真接近。二是kā基督教会看做是地上ê天国，真chē人想beh占有教会ê地位。三是确实有认bat天国，想beh入去，却需付出相当ê代价，甚至会ná亲像第十章34到39节所讲ê，连家己ê厝内人mā隔绝关系。

马太福音 11:16-11:19

注释:

譬喻当时ê世代，耶稣bat指出他ê世代是一个「jōa-ni̍h邪恶、jōa-ni̍h不忠」ê时代，因为大家kan-taⁿ想beh看神迹，却对神迹显示出来ê意义一再轻视（参考马太福音十二：39）。他甚至明确指出无神迹thang看，因为hit-ê时代真正真「邪恶、淫乱」（参考马太福音十六：1—4）。

耶稣基督用两种生活中一再看tio̍h ê景况来譬喻；一是婚礼，另外一个是丧礼。他特别指出这是用细汉gín-á tī街路边sńg「办家伙á」ê来譬喻顶面所讲ê两种礼仪。说明人一方面teh期待拯救ê来临，m̄-koh心内却并m̄是真正án-ne想，却是kā它当做游戏、好sńg ê态度，就bē认真看chit-ê tāi-chì。

第18节，行洗礼约翰是属tī顶真、苦行ê传道者，伊kah门徒不时会禁食祈祷（参考马可福音二：18）。M̄-koh in讲行洗礼约翰明明是hō͘鬼附身ê人，因为一般人bē án-ne teh过生活。
第19节，论到耶稣，讲他并无亲像行洗礼约翰hit种ê圣洁，m̄-nā无禁食，甚至iáu允准他ê门徒tī安息日摘麦穗，koh jôe麦穗食（参考路加福音六：1），mā不时kah抽税ê人、pháiⁿ人做伙（参考马可福音二：15—16，路加福音十九：7）。基本上，批评耶稣ê犹太人只知影chhōe孔缝，用一大堆理由，只是无想beh认真去明白上帝拯救ê信息。

马太福音 11:20-11:24

注释:

Chit段kah前段有密切关系，m̄信ê犹太人，lóng是chhōe出真chē拒绝救恩ê理由，这tú好说明犹太人拒绝ê态度，即使看tio̍h真chē神迹iáu是m̄信，iáu继续teh走chhōe神迹显现（参考马太福音十二：38、十六：1）。

「伯赛大」、「哥拉汛」，这是设tī加利利河边ê村镇。耶稣bat tī伯赛大医好一位chheⁿ-mê人（参考马可福音八：22—26）。M̄-koh福音书并无记载有关耶稣基督tī哥拉汛传福音ê事迹。

「泰尔kah西顿」，这是两座外邦人ê城镇，kah伯赛大、哥拉汛chit两个犹太人ê村落tī信仰态度上tú好成对比。因为án-ne，所得tio̍h ê审判结果mā会有差别。

「所多玛」kah迦百农mā成对比ê状况；前者tī创世记第十九章，he是一个罪恶贯满ê城市，迦百农是耶稣siōng早行神迹、传福音ê城镇。甚至连耶稣家己家乡ê人mā知影他tī迦百农行过真chē神迹（参考路加福音四：23）。M̄-koh，看见ê神迹虽然chē，信心照常冷淡，怀疑ê态度犹原无减轻。

马太福音 11:25-11:27

注释:

Chit两节thang参考哥林多前书第一章18到25节，以人ê聪明想beh明白上帝ê旨意是愚戆ê想法（mā thang参考以赛亚书廿九：14）。只有谦卑ê人chiah会明白上帝ê神迹每工发生tī伊ê性命中。

第27节是耶稣明确讲出他kah上帝之间ê特殊关系――父kah Kiáⁿ。

马太福音 11:28-11:30

注释:

「枷担」是teh指重担。古早时ê枷担，是teh指套tī牛、马颔颈，用来驾驭牛马犁田用ê，mā是象徵一种性命ê锁枷。性命ê苦难，ná亲像一种重大ê枷担hē tī人ê性命中，mā ná亲像一种重担，hō͘人无法度承受仝款。M̄-koh，耶稣讲tī他内面，人性命ê chiah-ê锁枷lóng会减去，性命无koh是锁枷，mā无koh是重ê担，却是轻省ê。

马太福音 12:1-12:8

注释:

有关安息日ê问题，mā是耶稣传福音过程中，不时tú-tio̍h 犹太宗教领袖强力反抗ê问题。照申命记第廿三章24到25节规定：腹肚iau ê人，thang tī经过别人麦田ê时，摘麦穗来食，m̄-koh无法度the̍h镰刀割；经过葡萄园时，mā thang摘葡萄来食，m̄-koh无法度装tī篮á里带走。其实，耶稣ê门徒腹肚iau，摘麦穗来食并无错，in会hō͘法利赛人指责ê原因是，in摘了麦穗后koh用手搓tio̍h食（参考路加福音六：1），因为án-nehō͘人认为是违反安息日ê规定，就是违背十诫中ê第四诫，照摩西律法是beh判处死刑ê（参考出埃及记三十一：14—15）。

第3到5节，耶稣提出一个历史背景，是记载tī撒母耳记上第廿一章1到6节记载大卫王tī逃难ê时chūn，mā食祭坛上献祭用ê饼，he是只有祭司chiah ē-tàng食ê。耶稣ê意思是：如果大卫王不守摩西ê律法，为甚么众宗教领袖无谴责。当安息日lóng一定tio̍h遵守ê时chūn，祭司却thang为了献祭宰杀公羊，更换祭坛上ê祭品，chiah-ê举动mā是teh做工，mā是违反安息日ê规定，kah原本十诫规定ê全体守安息日之精神无仝。

第6到7节，这是耶稣第二pái引用何西阿书第六章6节ê经文，第一pái是马太福音第九章13节。伊强调tio̍h用上帝ê慈爱看人性命ê需要，khah赢过遵守kāu枝叶ê宗教礼仪koh khah能符合上帝对他子民ê教导。一个人如果是为tio̍h止饥来食物件，无遵行宗教礼仪ê限制继续iau落去，是ē-tàng被接受ê。

第8节，thang参考马可福音第二章27节，thang看出上帝设立安息日主要ê目的，是为tio̍h beh hō͘人ê性命会得thang延续之本意有密切关系。因为án-ne，安息日就是上帝赐福hō͘人ê一种特别恩典。上帝赐福既然是为tio̍h延续人ê性命，腹肚iau乃是对人性命ê威胁，án-ne，当人iau饿难耐ê时chūn，食物件止饥，mā等于是teh回应上帝赏赐性命ê疼。耶稣tī-chia强调：安息日siōng主要是表明上帝对人ê赐福。

马太福音 12:9-12:14

注释:

Kah前一段仝款，lóng是有关安息日引发ê问题。耶稣tī当时已经受tio̍h一般大众ê喜爱，因为伊ê讲道kah经学教师无仝，hō͘人认为有权威（参考马太福音七：29）。因为án-ne，每pái安息日耶稣去会堂ê时，大家就欢喜请伊讲解圣经。作者路加就是讲耶稣去会堂「教导人」（参考路加福音六：6）。

犹太人ê会堂，这是主前586年南国犹大被巴比伦帝国灭亡，以色列人民被俘虏到巴比伦去做奴隶后，tī俘虏营生活中发展出来ê一种聚会方式。规定只要有十个以上结过婚ê cha-po͘人就ē-tàng成立一间会堂。因为in已经无法度koh再tńg来到耶路撒冷圣殿去敬拜上帝了，所以用chit种方式来取代。会堂ê主要功能是读圣经kah祈祷，kah过去圣殿ê主要功能是献祭大大无仝。过去tī圣殿ê祭司，渐渐转变成会堂ê教师，教导受掠ê民众学习圣经上帝ê话。Mā因为会堂推动研读圣经、教导圣经，chiah有保存犹太人耶和华宗教ê信仰ē-tàng到taⁿ无变。主前538年，波斯帝国取代了巴比伦帝国，波斯皇帝塞鲁士决定tháu放所有以色列人民tńg去故乡重建家园，以色列人民开始tùi各地回乡，chit种tī异乡成立ê会堂型态m̄-nā无废除，反tńg是被存留落来。Mā因为会堂ê聚会，致使in ê信仰会得thang长存落来，甚至tī第二次大战期间，真成功地tī集中营，以及真chē寄居国延续落去。

第10节讲chit-ê人「一只手lian去à」，照规定，chit种病是属tī「慢性病」，因为án-ne，是ē-tàng等到安息日过了后，mā就是日头落山后chiah治疗。M̄-koh，chiah-ê宗教领袖却想beh利用chit-ê机会chhōe碴，因为án-ne故意提出「安息日医病是m̄是违法」chit-ê问题来问耶稣。

第11到13节，耶稣以羊作比较提出问题。羊，这是犹太人siōng常用ê献祭牲礼，mā是犹太人siōng重要ê经济物件之一。如果有羊tú好tī安息日掉落tī坑洞中，即使是tī安息日也tio̍h kā羊救起来，然后带去献祭，祭司mā会分tio̍h一部分ê羊肉。如果kā羊卖了，mā有kā所得ê十分之一带去奉献，án-ne圣殿koh有收入。因为án-ne，宗教领袖lóng会同意就算是安息日也tio̍h kā掉落坑洞中ê羊救起来。M̄-koh，对tī破病等待救助ê人，chiah-ê宗教领袖显然并无用同理心看待。既然动物lóng ē-tàng马上救起来，为甚么人破病了无法度马上救治？这mā是为甚么耶稣会用「人比羊khah贵重」chit句话来回应ê原因。

「Kā手伸直！」这是一句命令语，chit-ê人mā tòe耶稣ê命令伸出手，结果就马上得tio̍h医。

第14节，因为耶稣公然tī会堂里违反安息日ê规定，tī chiah-ê法利赛人眼中，耶稣ê医举动，就是teh藐视摩西律法ê尊严。因为án-ne，chiah-ê宗教领袖决定kā耶稣杀害。

马太福音 12:15-12:21

注释:

耶稣并无想beh kah宗教领袖起正面冲突，主要原因是伊并m̄是为tio̍h án-ne来到世间，伊是为传天国ê福音而来。M̄-koh群众爱耶稣，这mā是hō͘众宗教领袖一再感觉头壳痛，kah m̄知应该án怎下手杀害耶稣ê原因（参考马太福音廿一：46-廿六：5）。

真chē群众来跟tòe耶稣，伊「医好in所有ê疾病」，简单ê一句话，讲出当时民众欢喜来跟tòe耶稣，主要ê原因iáu是在tī伊ē-tàng医病，而且医各种ê疾病。

第16节讲耶稣一再要求被医ê人mài kā消息传扬出去（参考八：4、九：30）。

第17到21节是引用以赛亚书第四十二章1到4节奴仆ê诗歌。

第18节kah耶稣tī接受行洗礼约翰洗礼了后，tùi天顶传落来ê声音仝款（参考三：17）。上帝拣选ê奴仆ài beh宣告上帝审判ê主权。

第19节，说明上帝奴仆有谦卑ê态度kah隐忍ê毅力，m̄-koh绝对bē受限制tī强权á是妥协，真正福音并无需要大肆广告、吹嘘。

第20到21节，主要teh说明耶稣虽然被犹太人所拒绝，m̄-koh却被外邦人所接受，因为伊是「万民」ê救主（参考路加福音二：10）。Koh讲，即使人用尽一切办法想beh阻挡上帝ê信息，mā无法度抵挡。因为福音乃是上帝ê大能，就是为tio̍h beh拯救一切仰望上帝救恩ê人（参考罗马书一：16）。

马太福音 12:22-12:32

注释:

耶稣有一般人无法度明白ê气力，路加福音作者讲，he是因为「主ê能力kah耶稣同在，hō͘伊ē-tàng医好病人」（参考路加福音五：17）。当福音书作者用「hō͘鬼附身」，chit句话续落来某一种疾病时，主要是teh形容chit-ê人ê病已经严重到超越当时ê医疗能力。因为án-ne，当人kā chheⁿ-mê koh哑口ê病人chhōa来走chhōe耶稣ê医ê时，tī一般人看起来，he是无可能得tio̍h医ê，m̄-koh耶稣却医好chit-ê病人。

第23节ê「群众lóng tio̍h惊kah gāng去」，这是福音书不时出现ê词句，形容耶稣有非常大ê能力，ē-tàng医好各种疑难杂症（参考八：27、九：8、33、十五：31、廿一：20）。

「大卫ê kiáⁿ」，tī第一章1节ê开场白就已经提起过，是teh形容耶稣就是上帝差派到世间ê拯救者（参考以赛亚书十一：1、11）。

第24到32节，描述耶稣因为受tio̍h群众o-ló，mā有人认为耶稣可能就是in等待甚久ê「大卫ê kiáⁿ」，tùi án-ne引起当时犹太人社会有影响力ê法利赛人非常不满。In想tio̍h beh消灭群众对耶稣ê期待，á kā耶稣形容是hō͘鬼王别西卜附身ê。意思是teh指耶稣身上ê能力并m̄是tùi上帝来，却是hō͘鬼附身，而且hō͘鬼王所附身，chiah有能力赶走真chē鬼。

第25到26节，耶稣讲一个简短ê譬喻。Tī chit-ê chìn前，作者先讲耶稣知影chiah-ê法利赛人心中teh想甚么，福音书作者用chit种笔法是teh隐喻：耶稣kah上帝仝款，ē-tàng知影人内心ê意念（参考撒母耳记上十六：7，耶利米书十七：10）。

耶稣譬喻是用法利赛人用「鬼王」chit位号，耶稣回应是：如果此言当真，án-ne，鬼mā有它ê国度ê组织系统。鬼王必定会为tio̍h维护组织ê秩序，bē家己先破坏组织。

第27节，chit节看tio̍h法利赛人ê子弟mā赶鬼。如果in mā教导子弟赶鬼，án-ne，in ê能力岂m̄是比鬼王iáu koh khah大。M̄-koh耶稣赶鬼并无亲像法利赛人需要念类似用咒语ê方式，伊kan-taⁿ用简单一句话就ē-tàng kā鬼赶离人ê身上，mā因为án-ne chiah hō͘当时ê犹太人tio̍h惊kah gāng去（参考马可福音一：23—28）。因为上帝ê灵kah耶稣同在，mā藉tio̍h chit种方式hō͘民众看见上帝来到人间（第28 节）。

第29节，chia用「武士」teh代表鬼，「财物」表示鬼所控制ê对象。

第30节，信仰无所谓中间、phú色地带，he是性命ê选择，一定tio̍h明确。

第31到32节，亵渎圣灵，是teh指明明知影实况，却故意用污辱ê方式表示。耶稣指责法利赛人明明知影伊ê气力是tùi上帝来ê灵，m̄-koh chiah-ê法利赛人却故意讲耶稣是hō͘鬼王别西卜附身，这是污秽圣灵ê神圣，是bē-tàng原谅ê罪过。

马太福音 12:33-12:37

注释:

耶稣用当时流行ê俗语，清楚地表达出善kah恶之间ê差别，伊指出法利赛人tī信仰上ê基本认知有问题，chiah会án-ne。

第34节thang比较马太福音第三章7节，行洗礼约翰bat称呼hiah-ê想beh接受伊洗礼ê法利赛人kah撒都该人为「毒蛇」。蛇，tī创世记第三章1节被当做是siōng狡猾ê受造物，mā是诱惑人犯罪ê气力。毒蛇，则表示koh khah厉害。

第35节thang对照第33节看。一个人是m̄是善良，thang tùi伊外在ê行为举止看出来。因为外在行为kah内心ê意念相配合。

第36到37节，讲话mā会列入审判ê证据。换句话讲话不诚实，mā等于是害人，甚至会诱惑人弃sak上帝。Tī审判ê日子来临ê时，大家lóng beh向上帝交帐，而且会赤the̍h-the̍h呈现tī上帝面前，无任何thang隐藏ê空间（参考希伯来书四：13）。

马太福音 12:38-12:42

注释:

犹太人一向就是ài看神迹（参考哥林多前书一：22），因为án-ne，虽然耶稣tī迦百农城行了真chē神迹奇事，甚至包括hō͘死人koh活、癞ko病得医等，m̄-koh in iáu是向耶稣要求看神迹。每pái耶稣行了神迹奇事了后，in lóng会赞赏、惊kah gāng去。M̄-koh发出惊叹声了后，心底iáu是m̄相信。Tī第十一章16节，耶稣真感叹地问讲：ài the̍h甚么譬喻chit-ê世代？伊讲伊ê世代对伊传讲ê天国信息并无反应。chit-má伊进一步讲，伊ê世代根本就无甚么神迹thang看，因为人ê心若是对上帝不忠实，即使有神迹hō͘ in看见，mā是枉然，因为in iáu是bē相信。

经学教师kah法利赛人，chit两种人lóng是当时犹太社会菁英ê领导阶层。In来要求耶稣显现神迹hō͘ in看，并m̄是心存好意，这mā是为甚么耶稣ê回应是「这时代ê人jōa-ni̍h-á邪恶、jōa-ni̍h-á不忠」ê原因。In是表面上想beh看神迹，内心是想beh chhōe碴好陷害耶稣。

第39节，chia所讲ê「不忠」，意思是teh指人ê心中无kā创造ê独一上帝看做是唯一ê上帝。中文《和合本》用「邪恶淫乱ê世代」，就是teh指tio̍h人ê心中有其它ê上帝ê意思。犹太人tùi祖先传承落来ê观念：上帝是以色列民族ê丈夫，in是上帝ê bó͘，是有夫妻之间ê关系（参考以西结书十六：8，耶利米书三十一：32，何西阿书二：19—20，以赛亚书六十二：4—5）。因为án-ne，chia ài beh表达ê意思是：当时犹太人对上帝并m̄是忠实，ná亲像bó͘对丈夫无够忠实仝款。Chiah-ê宗教领袖是表面上看起来虔诚，其实内心并m̄是ná亲像外表hit种，只是虚假ê外表而已。

Tī chit段经文内底，耶稣特别指出约拿 ê记事来譬喻，约拿 ê神迹是犹太人人人知ê故事，就是记载人tùi犯罪到悔改。尼尼微城ê人民是外邦人，m̄-koh in听tio̍h上帝ê信息，就赶紧悔改认罪、归正了，上帝因为án-ne赦免in。M̄-koh犹太人是上帝ê选民，而且一再亲目看见神迹，亲耳听见耶稣传达天国信息，in却iáu硬心m̄相信。

「人子也tio̍h在地ê深处三工三暝」，耶稣用chit句话来隐喻伊teh beh受难死tī十字架顶，m̄-koh三工后会koh活。Ná亲像约拿被大鱼吞入腹肚中三工，结果出来后hō͘外邦ê尼尼微城人因听信福音来悔改得救。耶稣chit种譬喻已经teh kā chiah-ê宗教领袖讲，除非in悔改，若无上帝拯救ê信息，会传到外邦人中间去。

第42节是用对比ê方式来形容，南方ê女王是teh指示巴女王，伊为tio̍h beh亲目见识所罗门王ê智慧，无惜千里跋涉（参考列王纪上十：1—10）来访问。chit-má有一位比所罗门王koh khah有智慧者出现tī犹太人ê目chiu前，in却是拒绝注意听。

马太福音 12:43-12:45

注释:

Chit段经文用邪灵koh一pái tńg来寄居tī chit-ê时代ê人ê身上，tú好回应了前一段法利赛人kah经学教师一再teh走chhōe神迹ê心态上。值得注意ê，是chia用「带tńg来七个比伊koh khah邪恶ê灵来」，chia ê「七」，表示koh khah chē、koh khah大、koh khah厉害。换句话讲，人心ê堕落是jú来jú严重à。

马太福音 12:46-12:50

注释:

「甚么人是我ê老母？甚么人是我ê兄弟？」有人认为耶稣讲出chit种话真奇怪，其实，如果咱认真思考chit段经文，应该不难看tio̍h这基督教信仰精华ê所在。人kah人ê关系，若是限定tī血缘ê关系上，hit种ê世界kah社会是真狭隘ê。其实，种族ê冲突常常是tùi血缘关系ê扩大á产生ê，历史上兄弟拚房ê例俯拾to̍h是。kā chit段话用来比较路加福音第十章25到37节，耶稣所讲好ê「撒马利亚人」譬喻，就会清楚其中奥秘à。

耶稣强调「实行天父ê旨意」，就有亲密ê亲属关系，有ná一家人一般ê亲密。天父上帝ê旨意，就是teh指上帝ê疼。有爱ê所在，人kah人ê关系会phah破文化、历史、地理、习俗等等ê限制。

马太福音 13:1-13:9

注释:

马太福音第十三章是非常出名ê一章，总共记载耶稣所讲ê七个天国譬喻。Mā是马太福音耶稣言论集ê第二段。Tī chit七个譬喻中有两个譬喻是经过解释ê，包括掖种籽ê譬喻，以及掖稗á ê譬喻。

第1到2节，有「一大阵人」来到耶稣脚前，in lóng想beh听耶稣讲天国ê信息，m̄-koh必定mā有人是想beh来走chhōe耶稣ê医。为tio̍h beh hō͘大家lóng ē-tàng看见伊，伊hō͘群众khiā-tī岸边ê草地上，伊搭上船，向(ǹg)岸边ê群众传讲上帝国度ê信息。

第3到8节，犹太人ê田是旱田，掖种时通常会kā种籽khǹg tī袋子里，然后kā袋子khǹg tī驴ê尻川斗两pêng，tī袋á底ê角头剪孔，án-ne赶驴上田去掖种ê时，种籽就会跟tòe驴行路摇一下摇一下掖出来，不过，chit种方式掖出来ê种籽bē真规则，时常会ka-la̍uh tī「路边」，所讲ê「路边」就是类似台湾水田中ê田岸。

第二种是掖tī「浅土ê石头á地上」，这是kah巴勒斯坦ê地质有关，当地石头真chē。In平时真少整地捡石头，tī第七年安息年休耕过了后chiah整地。浅土ê石头á土地，根真oh深入土地。

第三种是掖tī「刺phè」中，这是teh指草丛ê意思。犹太人平时mā真少有除草ê习惯，chiah-ê草长大就是chia所讲ê刺phè。通常mā仝款是tī第七年安息年过了后，beh重新掖种ê时，chiah会进行除草ê农务。因为án-ne，chiah-ê刺phè草丛会影响tio̍h掖tī其荫下ê种籽成长。

第四种是掖tī「好土」ê种籽，chiah-ê种籽会成长kah非常chán。Siōng koân ē-tàng达tio̍h「一百倍」。M̄-koh好ê土需要排除刺phè、石头。换句话讲，好ê土是需要用时间去整理，mā就是施肥整地。

Tī犹太人观念中：五á是十ê倍数lóng是真好ê。这是因为in看上帝造人ê时，一只手有五根chéng头á，两只手有十只chéng头á，因为án-ne六十倍、á是三十倍lóng是真好ê收成，á一百倍意思就是代表siōng完美ê状态。

马太福音 13:10-13:17

注释:

耶稣讲譬喻应该是beh hō͘ 大家明白ê，m̄是故意beh隐藏甚么。门徒却因为听m̄-bat就来问耶稣，chit种情形发生过几nā pái，亲像第十五章15节，in mā是请耶稣解释譬喻ê意思。

「譬喻」是teh指「故事」、「证明」、「说明」ê意思。

「天国ê奥秘」，这是有关上帝主权ê事，chit种主权就是审判kah拯救ê工作。奥秘是只有tī上帝启示之下，人才ē-tàng了解。使徒保罗讲，上帝透过耶稣已经向听从伊ê人显明chit-ê奥秘ā（参考歌罗西书一：26）。Tī chia耶稣对门徒讲，chit-ê上帝主权ê奥秘已经启示hō͘门徒à。

第12节，表示门徒接受chit款天国ê信息kan-taⁿ会jú来jú chē，因为in一直紧跟tòe耶稣ê身边，听伊传讲天国ê信息。M̄-koh相对ê，是hiah-ê拒绝听从ê人，到最后会丧失所有ê一切。

第13节说明耶稣用譬喻教导民众，原本ê用意是beh hō͘ in一听就明白，而且愿意继续听从。M̄-koh hiah-ê心硬ê人，就算听mā无用，即使亲目看见mā bē相信。对chiah-ê人只有ē-tàng等待上帝ê审判。

第14到15节是引用以赛亚书第六章9到10节beh表示ê：人根本无想beh听天国ê信息，即使是听mā放hòng-hòng，chiah会变成chit种结果。

第16到17节，成做耶稣ê门徒siōng大ê荣幸，就是亲目看见，mā亲耳听见天国ê信息，koh khah重要ê，就是上帝ê kiáⁿ耶稣亲自启示in明白天国ê信息。古早时ê先知连chit种机会都无。

马太福音 13:18-13:23

注释:

Chit段经文是teh解释第3到9节ê譬喻。其实thang án-ne了解：耶稣所讲ê譬喻本身，就已经真清楚了，伊会用譬喻ê主要目的，就是beh hō͘人一听就明白，á ē-tàng赶紧接受天国福音ê信息。为甚么需要解释，可能是当福音传到外邦去后，因为外邦地区有kóa环境kah巴勒斯坦境内ê情况无仝。因为án-ne，虽然是简单ê掖种譬喻，却有kā它解释ê必要。

Koh讲，mā tùi chit段解释经文中看tio̍h早期教会ê信徒，有kóa人虽然传承信仰，却无好好á耕耘，kā信仰当做一种生活点缀，无认真追求。Mā因为án-ne，信仰ê根基真脆弱，容易受tio̍h诱惑。M̄-koh有kóa信徒却非常坚定，就ná亲像掖tī肥土地上ê种籽仝款，生长kah非常好。

马太福音 13:24-13:30

注释:

Chit段天国ê譬喻只有马太福音有保存落来。

基本上，天国ê信息ná亲像「好ê种籽」。因为天国就是上帝拯救ê信息，lóng是siōng好ê。kā chit种siōng好ê种籽「掖tī田里」，真自然会期待有好ê收成。

第25节讲tio̍h当田里ê主人teh「困ê时chūn」，表示无法度预防ê情况下。敌人来进行破坏，是kā「稗á」掖tī麦á中间。「稗á」是一种有毒ê草本植物，样式kah麦á真类似，如果m̄是相当内行ê人是分辨bē出来ê。Koh讲，chit种植物如果kah麦á掖做伙，它ê根会kah麦á ê根纠结做伙，因为án-ne就算是行家发见稗á时mā bē去马上拔除它，因为会伤tio̍h麦á ê根。

第26到27节，奴仆因为是teh困，所以m̄知甚么人做chit件破坏ê事。不过主人真清楚会来破坏麦田ê人，就是「敌人」。

第28到29节，奴仆问主人是m̄是beh kā稗á除掉？主人认为tio̍h过一kóa时间koh再处理。因为chit-má麦á kah稗á ê根部是缠连做伙，若是kā稗á拔除，恐惊mā伤害到麦á。

第30节，「收割ê时chūn」，这就是时机成熟时刻来到，自然就beh kā两种lóng同齐收割，kā稗á除掉，kā麦á收起来。

马太福音 13:31-13:32

注释:

「芥菜种」，chit种芥菜tī巴勒斯坦地方真普遍，尤其是tī约旦河边真chē。Chit种芥菜长大起来约有十五尺高，m̄-koh种籽却是非常细粒。这是一种强烈对比ê譬喻方式，讲hit种细小ê种籽却会发出hiah-ni̍h koân ê植物（chia用「它成做一丛树」），表示无法度想像会tio̍h，而且iáu ē-tàng hō͘真chē小鸟来做窝。表示天国ê气力大大超过人ē-tàng想像会tio̍h ê。

马太福音 13:33-13:43

注释:

「面酵」，是一种发了酵ê面团，却thang用来当做新面ê酵母。Kah芥菜种仝款，小小ê种籽却ē-tàng长大成树。面团mā是án-ne，只要一点点面酵就ē-tàng hō͘四十公升ê面团发了起来。表示其中蕴含ê气力是大大超过人ê想像kah估计。

Chit段经文teh解释第24到30节有关稗á ê譬喻。解释ê方式，就是kā「敌人」譬喻成魔鬼，是专门tehteh诱惑人弃sak上帝ê气力。最后ê审判会kā它弃sak tī「火里烧」。圣经ài用「火」来形容审判ê工作。

Tī火炉里「哀哭，咬牙切齿」，表示tī火炉里并m̄是死亡，却是受痛苦ê刑罚。相对ê是「义人」tī上帝审判中，却会看见性命ê亮光。Chia ê「义人」是teh指听从福音信息ê人。

马太福音 13:44-13:46

注释:

Chit-ê譬喻mā是马太福音特有ê资料。

古代中东地带有人ài kā财宝埋tī土脚（参考马太福音廿五：25），án-ne ē-tàng防止盗贼、土匪来抢劫。譬喻说明当人发见天国ê奥秘，就kah-ná发见宝贝仝款，宁可付出koh khah chē ê代价来换天国ê奥秘，就ná亲像人发见一块藏有财宝ê土地，mā会想出所有ê办法买hit块土地。

Chit段譬喻mā是马太福音特有ê资料。

「贵重ê珍珠」，kah第44节所讲埋有财宝ê土地是内容仝款ê譬喻。

马太福音 13:47-13:50

注释:

Chit-ê譬喻mā是马太福音特有ê资料。

Ná亲像头前第二个譬喻中ê麦á kah稗á，天国是beh区分好ê，kah pháiⁿ ê。

「Tùi好人中kā pháiⁿ人分别出来」，表示tī当今ê世界中，pháiⁿ人lóng是深藏tī好人中间，hō͘人无容易发觉。M̄-koh当审判ê日子来临ê时，pháiⁿ人一定会hō͘发见，并且分别出来。Pháiⁿ人kah稗á仝款，tio̍h tàn入去火炉里烧毁。

马太福音 13:51-13:52

注释:

Chit两节是顶面所讲天国譬喻ê总结。Hō͘耶稣感觉欣慰ê是众门徒lóng表示了解伊所讲ê譬喻。

由顶面所讲天国譬喻中，thang看见一个重要ê信息：有终末ê审判。而且当上帝进行审判ê时，「好」kah「pháiⁿ」会分得非常清楚，而且一定真严厉惩罚「pháiⁿ」ê部分。

Tùi「库房里搬出新kah旧ê物件来」，表示真正属tī天国子民ê人，无论是过去ê，á是新ê，耶稣lóng会hō͘ in新ê意义。

马太福音 13:53-13:58

注释:

为甚么拿撒勒ê人会m̄相信耶稣？真有可能是受tio̍h耶稣出身ê家庭背景所影响！tio̍h注意，上帝tī拯救ê工作上，是超越人间chit种荣华富贵ê背景。

Chia列出了耶稣厝里ê兄弟名单，后来chit位雅各（m̄是门徒）tī早期教会中扮演相当有影响力ê角色（参考使徒行传十五：12—21，加拉太书二：12）。

马太福音 14:1-14:12

注释:

行洗礼约翰ê死，kah伊「Tiāⁿ-tiāⁿ指责希律」王犯淫乱罪有关，因为in bó͘ iáu tī-.teh ê时chūn，竟然去娶小弟腓力ê bó͘希罗底做bó͘。希罗底比希律koh khah恨行洗礼约翰，因为án-ne，伊利用希律生日宴会，设计cha-bó͘-kiáⁿ跳舞，得tio̍h希律王ê报赏，结果因为án-ne要求希律杀害行洗礼约翰。M̄-koh希律王并无因为án-ne心安，却是担心行洗礼约翰已经koh活（参考马可福音六：16）。

马太福音 14:13-14:21

注释:

第13到14节，耶稣ê名声早to̍h传遍加利利各乡镇，因为án-ne，无论耶稣行到toh位，lóng是有一大阵民众tùi各地蜂拥来chhōe伊，跟tòe伊，想beh听伊传讲上帝国度ê信息。耶稣看见in中间有破病ê人，伊就生出怜悯ê心，医好in。有时耶稣看tio̍h群众渴望听tio̍h天国信息，mā是仝款生出「恻隐ê心」（参考马太福音九：36）。

五饼二鱼ê神迹，是唯一Tī四本福音书中lóng有记载ê一件神迹。

以色列人民计算人口ê标准是只有算cha-po͘人，而且是beh年满二十岁以上ê cha-po͘人才算（参考出埃及记三十八：26）。Chit-pái享受耶稣用五饼二鱼食到饱ê总人数，一定大大超过五千人，因为tī第21节特别强调讲「除了妇女kah gín-á，约有五千」。M̄-nā án-ne，而且是有chhun落来ê碎屑「装满了十二个篮子」。Chit种篮子是犹太人外出时随身带ê。

马太福音 14:22-14:33

注释:

耶稣「家己上山去祈祷」，伊不时离开众人去向上帝祈祷。伊并无带门徒同齐去，却是ài in先上船过湖到对岸。

这mā是耶稣第二pái tī加利利湖tú-tio̍h大风引起湖面ê水波浪颠簸ê记事，照约翰福音第六章18节ê资料，hit时mā是「狂风大作，浪涛翻腾」，第一pái是伊kah门徒同船（参考马太福音八：25）。Chit-pái耶稣无搭船，是门徒先坐船过湖，船行真慢，耶稣却是用行走tī水面ê方式jiok-tio̍h门徒。因为是暗时，伊ê门徒看bē清楚是耶稣soahtio̍h惊kah gāng去，认为是看见鬼魂。马太福音作者ê chit种笔法，mā是teh说明门徒对耶稣ê认bat无chē，in bē记得耶稣有能力行各式各种ê神迹。

马太福音siōng特别ê所在，是tī第28到31节记载彼得mā想学耶稣行走tī水面，耶稣应允hō͘伊有chit种力量，结果伊「一看见风势猛烈，心内惊惶」，就「开始沉落去」，伊大声叫耶稣救伊。耶稣讲伊「信心siuⁿ过细」。这kah第八章23到27节所记载ê情节类似。

马太福音 14:34-14:36

注释:

短短两节，强调耶稣身上充满tio̍h特别能力，只要有人摸tio̍h伊ê衫á裾ê须，所有ê病lóng ē-tàng得tio̍h医。Chìn前一位患tio̍h十二年血漏病ê cha-bó͘人就是一个见证（参考八：20—21、十二：15）。

马太福音 15:1-15:20

注释:

Tī耶稣ê教导中，伊对tāi-chì ê看法kah工作ê态度，引起众犹太人领袖极大不满，伊医病ê方式mā hō͘人认为有亵渎上帝之嫌（参考九：3），in认为耶稣本身是一个教师，怎样ē-tàng无教导门徒学习禁食，特别是tī安息日ê诫命上，竟然敢公然违背律法，做出这够额致使判处死刑ê行为（参考出埃及记三十一：14），m̄-koh耶稣用强koh有力ê回应阻挡in ê质疑，因为án-ne，in开始计画beh杀害耶稣。

犹太人流传落来饭前洗手ê规定，原本是tùi祭司上祭坛献祭前一定tio̍h有动作，表示in ê双手是洁净ê。M̄-koh经过一段时间，chit种传统附加了真chē新ê礼仪、动作，chit-má是扩大到所有ê人饭前lóng tio̍h洗手。耶稣ê门徒并无照chit种规矩，因为án-ne，chiah-ê宗教领袖来质问耶稣为甚么无照传统ê规定。

耶稣回应ê方式是用十诫中ê律法规定，人人lóng tio̍h孝敬父母，m̄-koh，后来chiah-ê经学教师kah法利赛人教导民众讲，beh献hō͘上帝ê礼物，比照顾父母生活上ê所需koh khah重要，因有人kā原本beh hō͘父母ê生活物件the̍h去献祭，照律法规定献祭物件又ài分出一部分供养祭司。耶稣tī-chia用以赛亚书第廿九章13节做回应，认为in表面上看起来是敬拜上帝，内心并m̄是真正亲像án-ne。仝款，in只是表面遵行祖先传统，内心并m̄是真正án-ne。

Chit段经文是针对法利赛人听耶稣tī前一段回应犹太宗教领袖指责他ê门徒食饭前无洗手ê事，感觉相当「不服」，tī chit段经文耶稣进一步解释，并且强调讲人内心ê意念，chiah是真正影响一个人是m̄是洁净，m̄是tùi外表是m̄是洁净来判断。

第13节是简单ê譬喻。「天父所栽种ê植物」，这是teh指以色列人民是上帝所栽种ê葡萄树（参考诗篇八十：8，以赛亚书五：1—7、六十：21、六十一：3），m̄-koh若是无结出好ê果子，就会hō͘连根拔起。耶稣用chit种方式teh强调：上帝栽种ê是人，m̄是栽种律法、规矩。

第14节是另外一个譬喻。「chheⁿ-mê」，等于失去目睭ê人，chit种人无可能引chhōa人行正确ê路。耶稣án-ne讲，已经teh暗喻chiah-ê犹太人宗教领袖有ná chheⁿ-mê-.ê，听从in chit种引chhōa，bē有稳健ê脚步。

彼得来问chit两个譬喻ê意思，kah马太福音第十三章10节门徒来问譬喻ê意思仝款。第16到20节是耶稣进一步解释第11节ê譬喻。耶稣清楚指出，内心ê恶念chiah是hō͘人无清气ê主要因素，kah有洗手á无一点á关系mā无。

马太福音 15:21-15:28

注释:

泰尔kah西顿是外邦人khiā起ê城镇，设tī加利利湖西北方，mā是一个商业港口城市。这mā是比较oh得理解ê一段经文，因为tī耶稣从来m̄-bat拒绝求救tī伊ê人，chit种行为kah耶稣过去hō͘人ê认bat不相符。

第23到24节chit两节是马太福音特有ê资料。Chit两节mā反应出早期教会ê情况，就是外邦人加入教会，受tio̍h犹太人基督徒强烈ê反对。

第25节chit位迦南ê女人是属tī外邦人，伊会称呼耶稣为「主ah，大卫ê kiáⁿ」所表示ê意义就真特别，因为chit句话表示伊承认耶稣是救主，是弥赛亚。如果一个外邦ê女子会认bat耶稣是救主，án-ne，犹太人kiám无应该koh khah认bat耶稣！

第26节是一句流行tī当时犹太人社会ê谚语，mā讲出当时ê加利利人kah地中海沿岸地区外邦人之间ê关系紧张，是因为加利利人不时看见in生产ê粮食被运往泰尔kah西顿去供应当地ê需要，m̄-koh身为产地ê加利利却不时有缺乏、不足ê状况（参考使徒行传十二：20）。

第27到28节讲出这外邦女人对耶稣ê信心，tú好kah跟tòe耶稣ê门徒成强烈ê对比，门徒常被耶稣讲是信心不足（参考六：30、八：26、十四：31、十六：8、十七：20）。

马太福音 15:29-15:31

注释:

Chit种概述ê经文tī马太福音第四章23到24节、第八章16节mā出现过。

Chit段话ê背景若参考旧约以赛亚书第廿九章18到19节ê经文，就会清楚马太福音作者ê用心，伊就是beh hō͘犹太人知影耶稣乃是旧约先知所预言ê弥赛亚。

Tio̍h注意ê是tùi第31节chit句「o-ló以色列ê上帝」，讲出耶稣「到加利利湖边」，并m̄是到犹太人khiā起ê社区，却是外邦人khiā起ê乡镇，tú好反应前一段chit位迦南女子对耶稣有信心ê反应。表示耶稣所行ê神迹，tī外邦人看起来mā lóng会不由得称颂上帝ê恩典。

马太福音 15:32-15:39

注释:

这是另外一件神迹（参考十六：9—10）。请注意，犹太人对「七」ê数字观念是含有「完整」、「圆满」ê意思。Koh讲，chia所讲ê chhun落来ê篮子，是一种大型ê篮子，是kah使徒行传第九章25节所用ê「大篮子」仝款，m̄-koh kah第十四章20节剩余ê十二个小篮子无仝款，he是一般犹太人外出时tòe身携带ê篮子。Mā是仝款「除了妇女kah gín-á，有四千人」食饱，表示超过四千人食饱。Á这「四」数字，隐喻tio̍h包含了世上所有ê人。这mā反应了前段所叙述ê，外邦人mā会得tio̍h耶稣hō͘ in ê福音信息。

马太福音 16:1-16:4

注释:

这是马太福音第二pái记载犹太人领袖来要求耶稣显示神迹hō͘ in看，第一pái是tī第十二章38到42节。

「撒都该人」乃是犹太人ê一种宗教领导阶级，tùi in延伸出来ê，就是祭司。In m̄是无看过耶稣行神迹，「法利赛人」iáu bat因为看见耶稣行神迹，á冤枉耶稣是óa靠鬼王ê气力赶鬼（参考马太福音十二：24）。耶稣当然清楚知影in ê计谋，指责in既然会晓观察气候ê变化，mā应该会明白「时代ê兆头」。这兆头是teh指耶稣所行各种神迹奇事，kah伊所传天国信息带来ê新意义。因为án-ne，耶稣进一步讲当时是一个「邪恶、淫乱」ê时代，chit两个词lóng teh表示in对上帝无够忠实，án-ne当然无法度看见神迹。

马太福音 16:5-16:12

注释:

耶稣形容法利赛人kah撒都该人是「酵母」，这是真严厉ê评语。因为酵母，是teh指一种已经败坏 ê物件。耶稣用酵母比拟chit两种人，表示in真虚假，只是外表好看，内面空洞、不实在，甚至是已经发酸败坏 ê。

第8到10节，耶稣对tī门徒烦恼bē记得带饼ê事，讲in是「信心siuⁿ过细」，因为in lóng bat看见耶稣用「五块饼二尾鱼」分hō͘超过五千人食饱，而且后来koh bat用「七个饼」hō͘四千余人食饱，tī chit-ê两则神迹中m̄-nā人人食饱，而且lóng有chhun。

第11到12节，耶稣ài门徒mài学习顶面所讲chit两种犹太人领袖，kan-taⁿ会看tio̍h外表，á是重视外表之物，却bē记得tī chiah-ê神迹ê背后所表明ê意义。

马太福音 16:13-16:20

注释:

Chit段经文对基督教会历史有真大ê影响。

「该撒利亚・腓立比」这城，是希律腓力王为tio̍h beh感念罗马皇帝á建造ê城。Tī chia耶稣问他ê门徒两个问题：一是一般人讲他是甚么人？另外一个是ài门徒讲in认为他是甚么人？

第14节是犹太人民间teh议论ê耶稣，包括一是「行洗礼约翰」，m̄-koh伊已经被希律王安提帕王杀死去。第二是「以利亚」，伊是旧约圣经中hō͘人认为伟大ê先知，无死，hō͘ 上帝接tńg去天顶。第三是「耶利米」，伊mā是以色列人民认为伟大ê先知之一，m̄-koh从来m̄-bat有人提起伊kah弥赛亚ê预言有关。四是「先知中ê一位」，这是kah申命记第十八章15 kah 18节摩西ê预言有关，会有一位新ê先知来临。

第15节，耶稣问门徒in对伊ê认bat。彼得回答：「你是基督，是永远活ê上帝ê Kiáⁿ。」chia「永远活ê上帝」，表示创造万物ê上帝chiah是永恒ê。

第17到20节，chit段耶稣所讲是马太福音书特有ê资料，影响教会历史甚巨。
第17节，耶稣认为彼得是「有福」ê人，意指伊比别人koh khah有福气，因为伊得tio̍htùi天父来ê「启示」ê真理。

第18到19节，chit段经文是罗马天主教会siōng看重ê经文，in自认是tùi彼得传承来ê，而且得tio̍h「天国ê锁匙」。有真长ê一段时间，罗马天主教会强调：人若想beh得救，就一定tio̍h透过in教会。宗教改革后kā chit种看法改正过来，认为得救乃是上帝绝对ê恩典，是上帝ê主权，m̄是由人决定ê。

Koh讲，chia ê「教会」，只有tī马太福音出现，另外一处tī第十八章17节。「彼得，是石磐」，这是亚兰语，发音是「矶法」（参考约翰福音一：42）。Chia讲教会tio̍h建造tī「石磐顶」，是teh指教会beh建立ê基础就是第16节彼得所宣告ê耶稣「是基督，是永远活ê上帝ê Kiáⁿ」chit-ê信仰告白。

第20节，耶稣禁止他ê门徒kā chit件宣告他是基督ê事kā任何人讲，因为若公开宣告，必定会受tio̍h犹太宗教众领袖ê刁难，反tńg会影响福音事工ê宣扬。

马太福音 16:21-16:28

注释:

这是马太福音第一pái记载耶稣预言受难ê记事。

「长老、祭司长，kah经学教师」，chit三股力量组成犹太人siōng koân议会「三和林」（Sanhedrin）。耶稣提醒门徒他会tī chit-ê siōng koân议会ê权势之下受难，m̄-koh，「第三工会koh活」。

「koh活」就是超越死亡ê意思。
值得注意ê是：耶稣严词指责彼得想beh阻止他ê动作，讲彼得ê动作是「撒旦」，是「绊脚石」，「是人ê想法」。Kah伊原本宣告耶稣是「基督，是永远活ê上帝ê Kiáⁿ」á被耶稣赞赏，完全颠倒。

第24到28节，耶稣ài门徒好好á想看为甚么beh跟tòe他。Koh讲，chia他强调beh跟tòe他，就一定tio̍h giâ起家己ê「十字架」来跟tòe，á「十字架」表示ê意义就是苦难。耶稣ài跟tòe他ê门徒好好á深思chit件事。若是感觉家己无法度承受十字架ê苦难，tī iáu未到耶路撒冷chìn前，后悔iáu会赴。

早期教会ê时代，若公开宣告是耶稣ê信徒，就会面临受掠入狱，甚至送入竞技场受死ê威胁。

马太福音 17:1-17:13

注释:

Chit段耶稣带彼得、雅各kah约翰等三人上山去祈祷（参考路加福音九：28）。

第2节描述耶稣变形像，包括「面貌像日头仝款明亮，衫裤mā像光仝款洁白」，chiah-ê用词lóng teh表明性命ê记号。

第3节，chia出现「摩西kah以利亚」。「摩西」是teh代表律法，á「先知」是teh代表上帝ê话。Chit两个词连做伙teh代表旧约圣经ê意思。Chia用「以利亚」，teh代表先知。Á根据玛拉基书第四章5节ê记载，若是先知以利亚出现，表示上帝审判ê大日子to̍h是teh beh来临，mā就是基督（弥赛亚）拯救日子来到ê时chūn。

第4节，「帐棚」，这是teh指以色列人出埃及tī旷野漂流时代khiā起ê帐棚。表明上帝kah以色列人民同在ê意思（参考利未记廿三：43，掖母耳记下七：6）。

第5节，「云彩罩tiâu」表明ê意思是上帝临在。出埃及记kah民数记一再用chit种方式来说明上帝降临tī以色列人民中间。云中出现声音对这三位门徒讲话，ài beh门徒听从上帝所拣选、所kah意ê kiáⁿ—耶稣。

耶稣ài in tī伊「tùi死里koh活以前」，mài kā chit件事对kā任何人讲，原因是若in宣告，kan-taⁿ会遇tio̍h犹太人领袖ê逼迫，bē有任何帮助。耶稣mā hō͘这三位门徒知影行洗礼约翰，就是teh代表先知以利亚，á耶稣就是犹太人期待真久ê拯救者—弥赛亚。

马太福音 17:14-17:21

注释:

Chit-ê gín-á患ê病是hō͘ 鬼附身致使患tio̍h「癫痫病」。第15节是gín-á ê老父描述伊gín-á ê病况。

第16节，耶稣bat赋予他ê门徒有「驱逐邪灵kah医各种病症ê权力」（参考马太福音十：1），m̄-koh chit-má众门徒却「无法度医好」chit-ê gín-á ê病。若是对照第20节来看，原来门徒chit-pái ê医病失败，是因为in无信心。有kóa古卷加上第21节讲：「讲到chit-ê种鬼，只有靠禁食、祈祷chiah赶得出去。」án-ne看起来，chiah-ê门徒真可能因为过去赶鬼lóng成功，就认为家己真有能力，á bē记得需要透过禁食祈祷，恳求上帝赏赐力量，结果chit-pái chiah会失败。

第19到20节，chit两节thang看出门徒mā bē了解为甚么过去成功，chit-má却失败。In问耶稣所得tio̍h ê答案是in ê信心太小，连一粒细小ê「芥菜种籽」lóng khah输。

马太福音 17:22-17:23

注释:

这是耶稣第二pái预言伊teh beh受难。

第22节所提起ê「人子」，tī马太福音中耶稣siōng常用chit-ê词来代表伊家己。这「人子」一词，tī亚兰文是teh指「人」á是「我」。耶稣用chit-ê词来表示家己kah使命，这使命kah伊ê死kah koh活有关系。

第23节chia讲门徒听「非常忧愁」，是因为in bē明白。

马太福音 17:24-17:27

注释:

照摩西律法规定，每一个年满二十岁以上ê cha-po͘人lóng tio̍h缴纳圣殿税（参考出埃及记三十：13—14），缴纳ê税额是两个银币，这是当时两工ê工资。

M̄-koh tī新约时代，犹太人规定凡hit年满十三岁以上ê男子，就一定tio̍h负担圣殿ê维护责任，缴交圣殿税就是其中ê一项，á年满二十岁ê男子iáu一定tio̍h担起保护社稷安全ê义务。因为án-ne，缴圣殿税ê规定tī耶稣时代是无论男女，tùi年满十三岁就tio̍h缴纳，而且直到死去chiah免缴，这kah本来ê律法规定已经有差别。

第25节，耶稣确实有依规定缴纳圣殿税。伊无特权，kah大家lóng仝款tio̍h缴纳，他mā tio̍h教彼得mài去冒犯chiah-ê掌控圣殿权威ê人，并m̄是因为惊，却是无想beh被套上莫须有ê罪名。

马太福音 18:1-18:5

注释:

「Tī天国甚么人siōng大？」这确实是一个真有意思ê问题。天国ê意思就是teh指上帝ê主权，á是讲上帝teh管理。Tī án-ne ê所在，会想tio̍h甚么人大甚么人细ê问题，就是表明对上帝主权认bat有错误。

第2到4节，耶稣是用细汉gín-á做教材。他kā门徒讲「除非lín 回转，变成亲像细汉gín-á」，chit句话真清楚表明人tio̍h以纯洁ê心归向上帝，á是讲以「谦卑」忏悔ê态度tńg来到上帝面前，chiah ē-tàng成做「天国ê子民」，chit种人chiah是「siōng大」ê人。

第5节，为tio̍h耶稣á接纳一个hō͘人看轻ná亲像gín-á hit种无地位、卑微ê人，就是接纳耶稣；接纳耶稣，就是接纳上帝（参考马可福音九：37）。

马太福音 18:6-18:9

注释:

Chit段经文续接前一段ê「细汉gín-á」，tī chia耶稣用「无tap-sap」，表示任何人tī上帝面前lóng是贵重ê性命，上帝绝对bē轻忽。两个lóng是强调每一个性命ê得救，tī上帝看起来lóng是非常重要。相对ê，若是因为hō͘ hit-ê卑微如细汉gín-á ê人「弃sak」耶稣，he会是件真严重ê事。因为耶稣是上帝差派到世间ê拯救者。

第8到9节，是非常鲜明ê相对话句，用得tio̍h永恒性命做主轴来比较。如果人因为失去一只手á是一只脚á是一只目睭，却ē-tàng因为án-ne soah得tio̍h永恒性命，就应该tio̍h kā阻碍人得救ê气力隔绝、弃sak。这是一种选择，信仰就是性命ê选择。

马太福音 18:10-18:11

注释:

Tùi第1节开始到第14节，lóng有一个共同主题就是「无tap-sap」ê人，tùi细汉gín-á到无tap-sap ê人。chit-má则强调tī人看起来siōng「无tap-sap ê人」ê身上，mā有天使teh替上帝看顾tio̍h。

犹太人深信tī每一个细汉gín-á ê身上lóng有一位天使teh守护。

有ê古卷加上第11节写tio̍h：「因为人子来ê目的是beh拯救失丧ê人。」

马太福音 18:12-18:14

注释:

耶稣用「一百」比「一」，极大ê对比来形容「一」是属tī「无tap-sap」。「一百只羊」，基本上chiah-ni̍h大ê数目m̄是一个人ê财产，却是一个社区共有ê。因为án-ne，bē只有一个人放牧，却是kúi-nā位顾羊人同时看顾羊群。

第12节讲顾羊人发见有一只羊失迷tī「山野」，伊会「放下hit九十九只」，去「chhōe hit只失迷ê羊」，chit位去chhōe失迷之羊ê顾羊人，应该是siōng有经验ê牧者。其他ê顾羊人照顾其余九十九只羊。

第13节，当chit位顾羊人chhōe-tio̍h失迷ê hit只羊后，会真欢喜ê hō͘所有人知影。

马太福音 18:15-18:17

注释:

「得罪」ê另外一个意思，是teh指「犯罪」。耶稣教导门徒kah民众，tī chit种情形下bē-tàng公开指责，tio̍h私底下劝勉。这thang hō͘亲朋好友得tio̍h尊严á愿意改过归正。

第16节，若是有拒绝劝勉ê，就「请其他一两个人同齐去」，原因是摩西律法规定做见证者，至少有两人以上chiah ē-tàng成立（参考申命记十九：15）。

第17节koh一pái出现「教会」一词，mā tùi第16节thang看出，早期教会内部mā出现纠纷，需要有公正者来裁判，好维护教会ê秩序。

马太福音 18:18-18:20

注释:

第18节chi̍t句tī第十六章19节已经有出现过。chit-má是针对第17节所提起ê教会讲ê，mā看出当时ê教会已经拥有真大ê权柄。

第19节提起「两个人」，ná亲像第16节所提起ê共同见证ê意思，是同齐「同心合意」，chit-ê词thang参考使徒行传第二章46节、第四章32节等等，lóng teh说明一个重要ê基本观念：用真实ê心灵敬拜上帝，就算人真少，上帝mā bē轻忽，因为tī上帝眼中，重要ê m̄是tī数字ê chē少，是tī心灵ê真诚（参考约翰福音四：24）。

马太福音 18:21-18:35

注释:

犹太人对「七」ê观念真特别，认为有神圣、完美ê意思。当耶稣讲beh赦免人「七十个七pái」ê时chūn，表达ê意思是：这是一门永无止境ê信仰功课。

第23到34节是一则「天国」ê譬喻。

第23节「结账」chit-ê词，表示天国是有审判ê。Á「君王」就是teh指上帝，因为天国就是用上帝做中心。

「债务」表示亏欠上帝ê疼。上帝有「宽容」ê心，hō͘人thang「免了」所欠ê债。M̄-koh上帝chit种「宽容」kah「免了」ê举动，lóng因为他ê「慈心」。上帝mā希望所有ê人学习他chit种慈爱ê样式（参考路加福音六：36）。

第28到30节，chit-ê欠君王债务真chē ê人，竟然无学tio̍h君王对伊宽厚、仁慈ê心，伊用恶质ê手段对待欠伊债务、而且仝款是「奴仆」ê「伙伴」，m̄-nā无「宽容」伊，koh kā伊关tī「监狱」中。

第31节讲有人会向上帝报告chit种冤屈、不公平ê待遇。Á上帝是一个公义ê审判者，他一定会以他ê标准kah条件来量每一个人。

第32到34节讲出上帝重新审判chit-ê欠债koh khah chē（mā是得tio̍h koh khah chē恩典ê人）ê人，kā伊关入监狱中，无koh宽容伊。

第35节，chit节经文thang参考路加福音第六章37到38节。「tùi心内赦免」，表示真心诚意ê态度。

马太福音 19:1-19:2

注释:

「耶稣讲soah了后chiah-」，这是马太福音作者tī每篇言论集结束后，必定用chit句话来表明（参考七：28、十一：1、十三：53）。

「离开加利利，tńg来约旦河对岸ê犹太地区」，chit句话说明两种情形：一是chia「tńg来」一字真关键，表示耶稣mā bat tī犹太地区真chē pái，chit点tī约翰福音记载真清楚，m̄-koh tī马太福音并无记载伊有去过耶路撒冷á是犹太地区传福音事工ê记录。二是耶稣开始tī犹太地区，特别是tī耶路撒冷一带传福音ê事工（参考十九：1—廿七：66）。

第2节，耶稣每到一个地方，人群lóng是会tòe来kheh tī伊身边，mā chhōa病人来求他医，他lóng伸手医in。

马太福音 19:3-19:12

注释:

法利赛人koh再chhōe问题来问耶稣，主要是想beh「陷害」伊。Chit-pái in提出关系离婚ê事。

第3节，「咱ê律法」这是引用ê背景是申命记第廿四章1节ê律法规定。

第4到6节，耶稣以创世记第二章21到24节ê经文背景来回答，并且强调讲「上帝所配合 ê，人bē-tàng拆开」，表示休弃bó͘，并m̄是上帝所喜乐ê事。

第7到8节，chiah-ê法利赛人并m̄是m̄知创世记创造ê故事，却是故意beh问为甚么摩西会订定申命记第廿四章1节chit种律法。耶稣认为是以色列人民「心肠siuⁿ硬」，这是teh指in听不下上帝ê教导，弃sak上帝ê心真强。
第9节，耶稣坚持对婚姻ê看法，认为除非有发见「不贞」ê行为。Chit种不贞mā包括cha-po͘人对bó͘ ê态度，因为夫妻是同等ê。不贞等于「犯了奸淫」罪。

第10到12节，门徒听耶稣ê回答了后，有反应，认为án-ne「无结婚，倒好」。Á耶稣认为是m̄是结婚，并m̄是「人人lóng ē-tàng接受」，需要上帝「特别恩赐ê人才ē-tàng接受」，这是特别有毅力ê人才有办法。

「出世to̍h无适合结婚ê」，这是teh指先天性bē-tàng ê人、经过阉割ê人，另外有kóa人是为tio̍h beh专心传天国福音á无结婚，亲像有kóa宗教系统ê神职人员就是án-ne。

马太福音 19:13-19:15

注释:

细汉gín-á tī犹太人社会ná亲像女人仝款，无社会地位，常被疏忽、鄙视，属tī弱势族群。M̄-koh耶稣tī第十八章1到5节ê天国比喻中，已经有用细汉gín-á来作教材，beh hō͘大家kah细汉gín-á学。

当「有人chhōa gín-á来见耶稣，beh请耶稣hō͘ in按手祈祷」，chia ê「按手」，是teh指祝福ê意思。Ē-sái讲是门徒却「责备hiah-ê人」，可见in对耶稣ê教导并无清楚，chiah会有做出chit种举动。

第14节，耶稣讲「天国ê子民to̍h是像」chiah-ê细汉gín-á仝款ê人，chit句话mā koh一pái回应了第十八章3到4节耶稣所讲ê话。

马太福音 19:16-19:30

注释:

来问耶稣有关「永恒ê性命」chit-ê问题ê人，伊是一个财主。伊来问耶稣「我该做甚么善事chiah ē-tàng得tio̍h永恒ê性命」，意思是有甚么具体ê好行为thang chhōe。

第17节，耶稣ài伊遵守「诫命」to̍h ē-sái得tio̍h。Chia ê「诫命」，就是上帝ê教导。Chit-ê人想tio̍h清楚到底是toh一kóa诫命。

第18到19节，耶稣用十诫来回应，意思是只要确实kā十诫实践出来to̍h ē-sái。

第19节ê b句引以利未记第十九章18节b句ê教导「tio̍h疼厝边，亲像疼家己仝款」。Tī马太福音第廿二章38到39节，耶稣kā爱上帝kah疼厝边分列为第一kah第二诫命。换句话讲，爱上帝，就是tùi疼厝边开始做起。

第20节，chit-ê有钱人认为chiah-ê诫命伊lóng有尽到责任à。

第21节ê「beh达tio̍h koh khah完全ê地步」chit句话，耶稣ê意思是他并无完全尽到责任。Chia耶稣ài财主若想beh尽到责任，就是kā伊ê「产业」lóng卖掉，然后「Kā钱捐hō͘ sàn-chhiah人」，án-ne伊就会有「财宝积存在天顶」，当伊完成chiah-ê工作了后，chiah来跟tòe他。其实耶稣是teh kā chit-ê财主讲，伊并无实践诫命所讲「疼厝边」。

耶稣chiah-ê指引，hō͘ chit-ê少年财主失望到极点，「垂头丧气地行离开」，主要原因是「伊非常富有」。这说明财富成做伊得tio̍h永恒性命ê绊脚石。
第23节，「有钱人beh成做天国ê子民jōa-ni̍h-á难nah！」chit句话ē-tàng对照马太福音第六章24节，钱财确实是会hō͘人失迷方向，甚至错误地kā它当做神仝款看待。耶稣认为一定tio̍h tī chit二项之间做出明确ê选择。

第24节，「比骆驼穿过针眼iáu koh khah困难」，骆驼是庞大ê陆上动物。针，是家庭生活用具里siōng细小ê。kā chit两个用来对比，清楚讲出困难度极大。表明人若想beh用靠累积ê钱财进入天国，是绝对无可能ê事。

第25到26节，「人是无法度，m̄-koh tī上帝，事事lóng ē-tàng。」这是一句真值得深思而且tio̍h谨记在心ê话语。

第27节，彼得koh一pái发言，表示伊kah其他门徒lóng「放下一切来跟tòe」耶稣了，án-ne in会「得tio̍h甚么」？

第28到29节，耶稣回答讲有「百倍」ê报偿。Chia所讲ê「百倍」，是teh指完美ê境界，就是「永恒ê性命」，tú好是chit位财主想beh走chhōe却得bē-tio̍h ê。

第30节，「chit-má做tāi先ê人，真chē会变做路尾；chit-má做路尾ê人，会变做tāi先。」，这是一句俗语，tùi犹太gín-á ê舞蹈引伸出来，众细kiáⁿ会围成圆kho͘-á跳舞，转了一个方向，原本带头跳ê人，会变成最后一个，本来是最后一个，会变成tāi先ê。耶稣延伸意思是一个人若是ē-tàng转向正确ê路径，性命就会变kah无仝款。暗示chit-ê财主只要转个方向就对à。可惜，伊无。

马太福音 20:1-20:16

注释:

这是一则天国ê譬喻。天国ê事，tio̍h用「上帝ê主权」当做认bat ê基础。
第2节，chit节已经真明确地提起主人kah工人之间有「约」。这「约」是每工hō͘工人「一块银币」，是当时一工ê工资。

第3到4节，「会hō͘ lín公道ê工资」。「公道」kah第5节讲主人「照样」ê作法，chiah-ê lóng teh表明「约」ê意义。所以当发工资ê时chūn，主人对hiah-ê teh报怨ê工人所回答就是用in「同意」（第13节）chit-ê约来答覆。
第6到7节，「无人雇用阮」，表示chiah-ê人已面临生存ê危机，chit种危机可能连带影响tio̍h伊ê kui个家庭ê基本生活所需要ê。葡萄园主人mā请in入园去工作。

第8节，「beh暗á ê时chūn」发工资，这是摩西律法ê规定（参考申命记廿四：15）。Á第9节ê tùi最后来ê工人先领工资，tú好是第16节ê写照。

第10到15节，先进入葡萄园工作ê工人，工作ê时间mā是siōng长，m̄-koh领ê工资kah最后chiah进入葡萄园工作一个小时ê工人仝款，因为án-ne，in有真大ê不满。Á主人ê回答说明一个中心认知：有约在先。上帝是照约束来进行，天国就是照约束领赏。Koh讲，既然是天国ê事，上帝就有绝对ê主权。

马太福音 20:17-20:19

注释:

这是耶稣第三pái预言他teh beh tī耶路撒冷受难。第19节所讲ê「外邦人」，是teh指罗马统治者彼拉多，而且只有马太福音明确指出耶稣teh beh面临「钉十字架」ê死刑。M̄-koh三pái预言受难lóng强调「第三工，他会koh活」chit-ê重大信息。

马太福音 20:20-20:28

注释:

马太福音ê作者tī chia写出「西庇太ê bó͘ chhōa两个kiáⁿ来见耶稣」，马可福音ê作者真清楚指出是雅各kah约翰两兄弟（参考马可福音十：35）。

第21到22节，「tī你做王ê时chūn」，in认为耶稣teh beh进入耶路撒冷去得tio̍h王位。耶稣认为他ê门徒并无清楚家己teh讲kóa甚么，á是求甚么。伊提醒in进入耶路撒冷是去lim「苦杯」，表示死tī十字架顶ê苦难。M̄-koh雅各kah约翰lóng回应讲in「ē-tàng」lim。后来，雅各果然是门徒中第一个lim下苦杯ê人（参考使徒行传十二：1—2）。

第23节，耶稣强调他ê国度是属tī上帝ê国度（参考约翰福音十八：36）。因为án-ne，只有上帝chiah有权决定hō͘甚么人坐tó一个位置。

第24节，有争夺，就会有纷争；有纷争，就会有「恼怒」ê现象出现。

第25到28节，耶稣ài门徒学习「奴仆」ê角色，ná亲像他来到chit世界，mā是亲像奴仆仝款来「侍候人」（参考腓立比书二：7），而且「为tio̍h救赎众人á献出家己ê性命」。

重点tī第26节：「ē-sái讲是，lín却无是án-ne。」chit句话chiah是kui个事件ê主轴。基督教会是一个信仰团契，就一定tio̍h kah一般ê团体无仝，á跟tòe耶稣ê人如果对权位有企图心，he就是无明白耶稣ê教示。

马太福音 20:29-20:34

注释:

「耶利哥」是接近耶路撒冷ê城市。Chit两个盲人从来m̄-bat看过耶稣行神迹奇事，in极加是听tio̍h大街小巷中关系耶稣ê各种传说故事，包括所行ê神迹，以及他ê教示。M̄-koh只有因为án-ne伊就知影耶稣就是「大卫ê kiáⁿ」，确信耶稣有能力thang医in chheⁿ-mê ê目睭。Chit句「大卫ê kiáⁿ」表示拯救者ê意思。相对tī真chē人亲目看见、亲耳听见，却iáu是m̄信，尤其是hiah-ê犹太人领袖koh khah是án-ne。

当耶稣问in有甚么期待时，in ê回答真清楚表示希望「目睭ē-tàng看见」。

第34节，这是马太福音第三pái提起耶稣「动起怜悯ê心」（参考九：36、十四：14），然后伸手摸了in ê目睭，就hō͘ in马上ē-tàng看见。

马太福音 21:1-21:11

注释:

接近耶路撒冷chìn前，耶稣先派两个门徒入去头前庄头借用「一匹驴kah一匹驴á-kiáⁿ」。若是有人问kah为何牵驴，就讲是「主beh用in」，这是耶稣kah驴ê主人ê约定暗语。

第4到5节，是引用撒迦利亚书第九章9节ê经文。所无仝ê，是撒迦利亚书只有讲一匹驴，m̄-koh tī马太福音却是讲有两匹驴。

第6到8节，古早人用穿插来表示身分，因为án-ne kā家己ê衫裤铺tī驴á ê尻脊骿顶hō͘耶稣骑，á是铺tī路上hō͘耶稣骑驴过去，lóng是teh表示放低家己ê身分，愿意顺服ê意思（参考列王纪下九：13）。

第8节讲有人锉「树枝铺tī路上」，这是早期以色列人民庆祝Tòa棚节时ê方式（参考利未记廿三：40）。约翰福音第十二章13节特别指明民众是the̍h棕树枝，因为án-ne，教会历史上就kā它称做「棕树节」，chit工mā是受难周ê第一工。

第9节，chit句「颂赞归tī大卫ê kiáⁿ」，意思是讲「求上帝chit-má拯救」ê意思。第二句「愿上帝赐福hō͘奉主名来ê hit位」，chit句是引用诗篇第一一八篇26节。

第10到11节，耶路撒冷城朝圣ê民众纷纷询问是甚么人来à，显然询问ê人真chē是tùi外国回乡朝圣ê侨民。认bat耶稣ê群众回答：「伊是加利利省拿撒勒ê先知耶稣。」chia特别用「先知」来称呼耶稣，kah-ná有意思beh表明耶稣就是申命记第十八章15到18节，摩西转达上帝所预备hit位beh来带领犹太人ê先知。

马太福音 21:12-21:13

注释:

第12节讲「耶稣进入圣殿」，参考约翰福音第二章14节就会清楚，he是指圣殿ê外院，是所有民众thang聚集ê所在。Tī chit-ê外院ê所在设有兑换钱币kah贩卖粉鸟ê摊位，为tio̍h方便外地tńg来ê犹太侨民到圣殿献祭kah奉献时ê需要，chiah-ê摊位lóng是由圣殿ê祭司teh掌管。耶稣会kā chiah-ê摊贩lóng推倒，是因为他认为chiah-ê摊贩有欺骗ê行为，已经污蔑了圣殿ê圣洁，hō͘圣殿变成「贼窝」。伊引用以赛亚书第五十六章7节，认为圣殿原本是beh「作祈祷ê殿」，这表示圣殿是kah上帝对话ê所在，怎样ē-tàng有欺骗ê心á是行为？若此，ná会敢koh进入圣殿面对上帝？

马太福音 21:14-21:17

注释:

第14节，chit节thang参考第十九章2节。

第15节thang清楚看出当时tī圣殿握有权柄ê「祭司长kah经学教师」心中ê「恼怒」，其实就是嫉妒，因为民众对耶稣ê喜爱大大超过对in ê肯定。Mā因为án-ne，in m̄敢公然掠耶稣，深惊激起群众受气（参考马太福音廿一：46）。

Chiah-ê宗教领袖问耶稣是m̄是有听见儿童kah民众呼喊ê声音？耶稣用诗篇第八篇2节诗人描述连婴á lóng会歌颂上帝ê伟大。其实，耶稣已经teh隐喻一个重要信息：连tī圣殿里ê细汉gín-á看见耶稣所行ê神迹奇事，lóng会认出他就是tùi上帝来，却只有chiah-ê宗教领袖硬是m̄信。

马太福音 21:18-21:22

注释:

马太福音作者ài用果子树结果子来诠释实际行动kah信仰之间ê亲密关系（参考三：8、十二：33—35、十三：23、廿一：19、33）等。

无花果树通常是tī每年六到八月时chūn结果子，它ê特色是叶ákah果子是同时开出来。因为án-ne，只要看tio̍h叶á，就必定会chhōe-tio̍h果子，chit-má ê时间是大约三、四月间，应该m̄是无花果结果子ê时间，却会发出叶á来，表示这棵无花果树已经有问题。

第19节，耶稣指这棵无花果树讲「永远bē koh再结果子」chit种话，结果chit-ê无花果树就「马上枯干去」。

第20节，门徒「tio̍h惊kah gāng去」，in问这棵无花果树「为甚么会马上枯干」？In想问ê是「咱kám mā ē-tàng有chit种能力」，kah耶稣原本beh讲ê，无结出好果子ê树会hō͘砍掉（参考路加福音十三：7，约翰福音十五：2、6），已经有cheng差。因为án-ne，耶稣ê回应是「只要有信心」，他他所做ê，门徒mā ē-tàng做，chit种回应mā是马太福音第七章7节所教导ê。

马太福音 21:23-21:27

注释:

耶稣ē-tàng tī圣殿里教导群众，是因为民众对他ê教导有高度ê肯定，而且耶稣ê教导hō͘群众感觉有权威，这mā致使犹太人ê众领袖对他相当不满，因为án-ne，in对耶稣提出有关权威ê问题。

第23节讲耶稣当时正teh教导民众。因为án-ne，当chiah-ê领袖来问他「凭甚么权柄做chiah-ê事」ê时，可能是teh指：一是teh指他无祭司长同意，怎样ē-tàng tī圣殿公然做教师ê工作？因为耶稣m̄是经学教师。二是teh指他kā tī耶路撒冷圣殿ê摊贩lóng赶走。他m̄是祭司，mā m̄是圣殿管理阶层ê人，甚么人hō͘他chit-ê权柄？

第24到25节，耶稣知影chiah-ê领袖中间有真chē人对行洗礼约翰ê权柄并无认同，m̄-koh民众却是hō͘ 伊真koân ê肯定。就án-ne他反问in án怎面对行洗礼约翰ê权柄问题。Á这to̍h是in ê中间意见有分歧ê事，in m̄敢tī耶稣面前公开出来。

Á真正ê问题是第26节，chiah-ê犹太人领袖只惊群众。In m̄惊上帝，mā m̄惊人。因为án-ne，in回答耶稣，讲in m̄知行洗礼约翰ê权柄tùi tó位来。耶稣mā藉这拒绝回答in。

马太福音 21:28-21:32

注释:

这是马太福音特有ê资料，mā是一则鲜明ê譬喻。

第28到30节中，耶稣以两个kiáⁿ做譬喻，第一个kiáⁿ听老父ê吩咐后，当场讲「m̄去」，m̄-koh后来后悔，就照老父ê吩咐去做。第二个kiáⁿ是对老父ê吩咐讲「好」，结果并无去。

显然地，第二个kiáⁿ ê态度，就是犹太人宗教领袖ê缩影，kan-taⁿ会讲，bē做（参考马太福音廿三：3）。

第31节，beh「成做天国ê子民」，就是beh遵照上帝ê指示去做。因为天国就是用上帝做中心，听从上帝ê指示。

第32节是耶稣对这譬喻ê解释，表示「抽税ê kah娼妓」，原本是被拒绝进入葡萄园ê对象，却因为后来听行洗礼约翰传出ê信息，照所「指示」ê去做。M̄-koh，chiah-ê宗教领袖原本就应该去做ê，却是拒绝á是无去做，án-ne讲起来，抽税ê人kah娼妓比in koh khah快成做天国ê子民。

马太福音 21:33-21:46

注释:

Tùi chit-ê比喻thang看出耶稣kah犹太宗教领袖之间ê冲突真大。耶稣用chit段葡萄园比喻来讲述chiah-ê宗教领袖心态上thang议论ê所在，就是in有窃据上帝主权ê心思意念。

第33节，是采用以赛亚书第五章2节有关主人开垦葡萄园ê诗歌为背景。

第34节，葡萄园主人外出去旅行前，将葡萄园出租。依照利未记第十九章23到25节ê记载，开垦新种ê果子树，前三年收成ê果子lóng tio̍h当做无清气ê，第四年ê收成是属tī上帝ê初熟果子，第五年chiah是属tī家己ê。因此，chia讲「到à葡萄成熟ê季节」，mā就是第五年收成ê时，beh去收租金。Chia指出葡萄园主人「应得ê分额」，意思是in之间有契约关系。

第35到39节，chit段经文是佃户ê心态就是想beh霸占hit-ê葡萄园，因此，对主人派仆人去收租金，m̄-nā m̄ hō͘，koh kā收租ê仆人杀害。最后主人只好派出家己ê kiáⁿ去收租金，结果iáu是仝款遇tio̍h杀害。Kui个比喻ê中心经文是tī第38节，佃户想beh「夺取」园主ê产业，自命为园主。

第40到41节，真清楚，园主一定会采取行动，严厉惩罚chiah-ê恶劣ê佃户。然后收tńg来葡萄园，转租hō͘「ē-tàng按时交租ê佃户」。

第42节，chit节是引用诗篇第一一八篇22到23节ê诗歌，表示人所看bē起ê上帝ê仆人，tī上帝手中却是siōng贵重ê。

第43到44节，耶稣指出chiah-ê犹太宗教众领袖，根本就无份tī上帝国度，因为in kah想beh夺取葡萄园ê恶佃户仝款。

第45到46节，chiah-ê宗教领袖听了后，非常受气，因为in知影chit-ê比喻就是teh讲in，而且kā in比喻为无得救希望ê对象，in感觉lóng受侮辱，因此，想beh掠耶稣。因为he是tī圣殿范围内，in ē-tàng直接掠，koh送去siōng koân议会审判，m̄-koh in m̄敢án-ne做，原因是当时tú-tn̄g Pôaⁿ过节，耶路撒冷城内人潮真kheh，特别是群众lóng爱耶稣，而且认为伊是「先知」，万一掠耶稣引发群众情绪激荡á失控，in会受tio̍h罗马政府ê严厉惩罚。因此，m̄敢出手掠。

马太福音 22:1-22:14

注释:

这是一段无jōa容易bat ê譬喻，有可能是来自两个譬喻（第2－10节、第11－13节）合并做伙ê，mā有可能是原始资料有遗漏，hō͘ chit-ê譬喻读起来有点á衔接bē起来。

第2节，chit节提起天国kah-ná国王为kiáⁿ办婚姻ê宴席，chit种用婚宴来解释天国ê譬喻，tī第廿五章1到13节koh一pái出现。

第3节，因为是国王娶媳妇ê婚宴，lóng会事先邀请宾客，á被邀请ê宾客应该感觉相当荣幸chiah-tio̍h。「ē-sái讲是in无愿意来」，chit句话表示受邀请ê宾客根本就看bē起国王。

第4到6节，国王就án-ne「koh再差派另外一批奴仆」，并且宣告宴席已经准备好势，kan-taⁿ teh等宾客来就坐。M̄-koh受邀请ê宾客m̄-nā拒绝参加，koh chhōe出真chē理由推辞，koh khah严重ê是无爱来参加，mā就án-ne m̄来，koh phah国王派去ê奴仆，甚至kā国王ê奴仆刣死。Chit种譬喻真亲像第廿一章33到39节ê园主kā葡萄园租hō͘佃户仝款。

第7节，国王对宾客ê态度大忿怒，决定采取制裁行动，这说明天国是有审判ê。Á国王teh代表上帝kah受邀请宾客（上帝子民）之间ê关系。

第8到10节，因为本来宾客ê恶质态度，致使改变国王ê决定。伊ài beh奴仆去街á，只要「看tio̍h ê人，无论好bái lóng请来」，chit句话kah第十三章47到48节ê抛网之譬喻类似。M̄-koh mā因为无论「好bái」lóng邀请入席，chiah会继续下列ê审判。

「hō͘喜堂上人客坐满」，这原本是天国办宴席ê本意。M̄-koh却因为本来被邀请ê宾客m̄-chhap，chiah会改变原本计画，改去街路邀请所有tú-tio̍h ê人来参加宴席。

第11到13节，chit段真可能是另外一个譬喻，不过mā有可能是续接第10节所讲ê，只要去街á看tio̍h人就邀请入来，了后chiah来分别。

「无穿喜宴ê礼服」，表示对国王ê邀请态度轻视。因为án-ne，到国王问in ê时chūn，chiah-ê轻视国王邀请ê人，答bē出话来。国王对chit种鄙视（siùⁿ）伊邀请ê人，会采取严厉ê惩罚。表示鄙视（siùⁿ）上帝恩典ê人，上帝bē宽待、赦免。
譬喻ê重点是tī第14节所讲ê，被邀请ê人未必lóng是经过拣选ê人，如果kā chit节kah第十三章47到50节经文相对照来看就会koh khah清楚明白，该段经文讲，天国ná亲像抛网tī湖里，然后kā所有捞起来ê鱼分类，kā好ê hē tī桶里，pháiⁿ ê弃sak。这说明天国有分别为圣ê要件。

马太福音 22:15-22:22

注释:

所谓「希律党」，这是犹太人ê政治党派之一，另外一个kah此党派对立ê就是「激进党」（《和合本》译做「奋锐党」）。希律党ê人支持希律ê家族统治犹太，chit种看法tú好kah激进党ê人所持ê观点完全颠倒，in是坚持一定tio̍h由犹太人自治。一般讲起来，法利赛人是激进党派ê主要份子，因为án-ne，希律党派kah法利赛人tī政治理念上thang讲差不多是南辕北辙。M̄-kohtaⁿ却为tio̍h beh除掉耶稣chiah结合做伙，这已经m̄是第一pái，却是第二pái。第一pái是马可福音提供ê资料，讲耶稣tī会堂里医一位手枯干ê人后，in就共谋chit种计划（参考马可福音三：6）。

第16节，chit节tú好表明chiah-ê犹太人社会领袖ê虚假，in虽然开嘴讲o-ló耶稣，m̄-koh并m̄是真心诚意讲chiah-ê，主要目地是想beh「陷害」耶稣。

第17节，「向罗马皇帝纳税是m̄是违背咱ê律法」，chia ê「税」是teh指罗马政府徵收ê人头税，cha-po͘人只要hit年满十四岁，就一定tio̍h缴税到六十五岁，á cha-bó͘人满十二岁以上就tio̍h开始缴纳，mā是到六十五岁chiah停止。激进党派ê人不时发动抗缴，因为in认为若缴纳chit种税，等于表示顺服罗马帝国ê统治权，in认为只有上帝chiah是in惟一ê君王。Mā因为án-ne，激进党派ê人不时被罗马政府认为是叛乱份子。因为án-ne，若是耶稣认为该缴，激进党派ê人就会讲耶稣承认罗马皇帝是伊ê王。M̄-koh若是讲bē合律法，希律党派ê人就会向罗马政府控告伊，表示伊反对罗马政府，是叛乱份子。后来in就是向彼拉多指控耶稣鼓动民众抗缴税金（参考路加福音廿三：2、5）。

第18到19节，耶稣有特别能力，会知影隐藏tī人内心深处ê想法。因为án-ne，指责in是「假冒为善ê人」，然后ài in the̍h一个「纳税用ê银币」hō͘伊看。Chit种银币无法度the̍h去圣殿奉献。Ná亲像第20节所讲ê，银币顶面有该撒ê雕像tī顶面，hō͘人认为是偶像。M̄-koh罗马政府只收chit种银币。

第21到22节，耶稣回答ê chit句话，表示政府ê物件kah上帝ê是无仝ê，二者无法度混淆。这致使in原本想好beh陷害耶稣ê计谋因为án-ne破解，in只好离开。

马太福音 22:23-22:33

注释:

Tī阅读chit段经文chìn前，siōng好先读申命记第廿五章5到10节经文，mā就是所讲ê「利未拉特婚姻条例」。该律法原本是beh hō͘兄弟负起责任，关心家庭陷入困境ê兄弟来设。因为若是无生儿女，失去丈夫ê寡妇就无法度继承财产，对寡妇来讲是生活会陷入困境。

撒都该人m̄-nā m̄相信koh活，in mā m̄相信天使、圣灵（参考使徒行传廿三：8），in mā不接受先知ê书信，只相信摩西五经而已。

撒都该人mā用譬喻方式来问耶稣，若「兄弟七人」，前后lóng是娶仝一个cha-bó͘人，若是有koh活，hit-ê cha-bó͘人会是甚么人ê bó͘？这「七」，表示到最后实在是无人ē-tàng koh再娶hit位寡妇。

第29到32节，「m̄知上帝ê权能」，表示tī人看起来真困难、无解，m̄-koh tī上帝却事事lóng ē-tàng（参考马太福音十九：26）。Koh活ê事是上帝teh掌管，上帝hō͘死人koh活并m̄是甚么大不了ê事。Koh讲，上帝ài怎样管理「天顶ê天使」ê事，mā m̄是人ê能力ē-tàng理解。

「亚伯拉罕ê上帝、以撒ê上帝、雅各ê上帝」，chit句话主要teh表示上帝是永恒ê上帝。人有限ê性命无法度了解。

马太福音 22:34-22:40

注释:

「律法教师」用摩西律法来问耶稣，显然就是beh「陷害」耶稣，存心不良。

第37节，耶稣根据申命记第六章5节来回答，á chit节被看做是圣经中siōng重要ê经文，因为án-ne，第38节随时讲是第一重要ê诫命。

第39节，「tio̍h疼厝边，亲像疼家己仝款」ê教示是根据利未记第十九章18节ê经文引伸出来。耶稣讲这是第二重要ê诫命。

第40节，「摩西全部ê律法kah先知ê教示」，chit句话指ê就是kui本旧约圣经。

马太福音 22:41-22:46

注释:

头前连续三pái lóng是犹太人领袖来向耶稣挑战，想beh陷害耶稣。chit-má chia则换做耶稣提问向in挑战。

耶稣提出「基督」是「甚么人ê kiáⁿ孙」？犹太人根据先知ê预言，认为基督一定是「大卫ê kiáⁿ孙」（参考以赛亚书十一：1，耶利米书廿三：5）。

第43到44节，耶稣引用诗篇第一一○篇1节作题材，问in怎样解释chit段诗歌？基督就是拯救者ê意思。他藉tio̍h大卫ê kiáⁿ孙出世tī人类历史中间，kah咱共同生活做伙。因为án-ne，tùi人ê角度看，伊是大卫ê kiáⁿ孙。无错！m̄-koh，拯救者就是上帝本身，连大卫王mā一定tio̍h臣服tī他脚下。

第45节，耶稣ài beh强调ê是：bē-tàng kan-taⁿ用字面上ê词来解释圣经， tio̍h知影圣经字面背后所beh表达ê意义。基督固然是tùi大卫ê kiáⁿ孙出来，he是上帝差派ê拯救者藉tio̍h人ê家庭降生到世界上，chit位拯救者当然是比大卫koh khah伟大。当时有人kā耶稣称做「大卫ê kiáⁿ」，m̄-koh并无表示耶稣是一般人，却是超越大卫ê地位。只是chiah-ê犹太人领袖无愿意承认而已。

马太福音 23:1-23:12

注释:

Chit段经文是马太福音作者tī编辑手路特别ê所在之一，连续记载耶稣指责经学教师kah法利赛人ê「七」种问题，mā teh暗示 in ê问题非常严重，差不多到à无法度谅解ê状态。Á耶稣chit段叙述in ê问题是讲hō͘「群众kah他ê门徒」听ê。

第2到3节，耶稣承认经学教师kah法利赛人teh教导摩西律法上有权威，tio̍h听从，m̄-koh mài学习in ê行为。因为in「kan-taⁿ会讲，bē做」。

第4节，耶稣指出in kan-taⁿ会kā摩西律法加上真chē传统风俗，加重了人民学习ê困难。

第5到7节，讲出chiah-ê领袖爱面子，真虚假。

第8到10节，犹太人不时kā「老师」、「导师」、「老父」三词交替使用。耶稣tī chia kā它厘清，hō͘民众kah门徒知影mài混淆。大家应该彼此成做学习ê老师，tùi救主来学习牺牲性命救赎别人ê疼，mā学习认bat只有一位赏赐ê天父。

第11到12节，thang参考马太福音第二十章26节，腓立比书第二章7到9节。耶稣koh一pái强调会谦卑家己做奴仆ê角色来服侍别人，chit种人会hō͘人尊崇，á上帝一定会高举伊， 

马太福音 23:13-23:36

注释:

Chit段经文叙述法利赛人kah经学教师ê真实问题，共计有七种，每一种ê起头lóng是用「有灾祸à」来说明in所做ê chiah-ê事，lóng会遇tio̍h上帝ê惩罚。

第一种：第13到14节，in阻碍别人进天国ê机会。

第二种：第15节，带领外邦人信上帝，后kā chiah-ê加入ê新成员塑造ê比in koh khah惨，m̄-nā狂热，而且心胸koh khah狭隘。所谓「加倍ê pháiⁿ」，chit句话mā表示法利赛人kah经学教师kā受tio̍h「加倍」ê惩罚。

第三种：第16到22节，in会用chiù-chōa来掩盖(khàm)内心ê贪婪，表面上是teh向上帝chiù-chōa，事实上内心想ê是祭坛上ê贡品，chit种chiù-chōa明明就是teh亵渎神圣ê上帝仝款。

第四种：第23到24节，是关系十分一ê奉献固然重要，m̄-koh真正重要ê是对人ê ài有正义、仁慈、信实等品格，m̄-koh chiah-ê却常hō͘ in故意疏忽。

第五种：第25到26节，kan-taⁿ知影做好表面ê工作，内心充满tio̍h贪欲kah放纵ê念头。

第六种：第27到28节，粉刷坟墓ê主要目的，是beh帮助人bē因为无看见坟墓á触(tak)tio̍h变成无清气ê人。因为根据民数记第十九章16节ê规定，触(tak)tī坟墓边就属tī无清气。这原本是件好事，m̄-koh in ná亲像án-ne，只重视外表ê亮丽好看，m̄-koh in ê内心却是pháiⁿ死ê身躯，是无性命ê躯体仝款，充满tio̍h邪恶kah虚假，tú好显示了伊kah坟墓内埋葬ê死人仝款，本身就是无清气ê。

第七种：第29到33节，in修建先知ê坟墓，kah-ná真尊重先知，其实in却继续teh杀害先知。比起in ê祖先，in无好gōa chē。

以上七种lóng发生tī chiah-ê犹太人宗教领袖身上，而且继续teh发生，并无改善。因为án-ne，耶稣用第34到36节做结语，用真严厉指责in chit种恶质行踏。

第35节ê「亚伯」，这是创世记第四章1到8节，被哥哥该隐无辜杀害。

「巴拉加ê kiáⁿ撒迦利亚」，chia tī记录上有点á 错误，应该m̄是「巴拉加ê kiáⁿ」，却是「耶何耶大ê kiáⁿ撒迦利亚」chiah-tio̍h（参考历代志下廿四：20—22），是约阿施王执政ê时代，命令手下tī圣殿ê庭园里用石头kā伊phah死。

马太福音 23:37-23:39

注释:

耶路撒冷一直是犹太人ê宗教信仰中心，m̄-koh，对上帝ê奴仆却是采取迫害ê态度，旧约时代ê先知受tio̍h chit款ê遭遇，耶稣最后mā是tī耶路撒冷被杀害。

第38节，预言圣殿会成做「抛荒无人tòa ê所在」，chit句话tī主后70年应验，罗马将军提多kā它摧毁。时到taⁿ，圣殿iáu-kú iáu未重建，kan-taⁿ留落来一片「哭墙」（西墙）。

第39节，引用诗篇第一一八篇26节ê诗歌。「tùi-án-ni koh khah àn怎to见bē-tio̍h我」，chit句话表示终末ê时间teh beh来到。

马太福音 24:1-24:2

注释:

马太福音tī编辑上有真特别ê手路，亲像第五到七章，作者用连续三章ê篇幅kā耶稣ê言论汇集做伙；tī第十三章则用七个比喻讲述天国；tī第廿三章是连续指责经学教师kah法利赛人ê七个问题；第廿四章作者用七个景况teh描述有关末日ê灾难；第廿五章是用三个故事说明天国ê景况。

「耶稣tùi圣殿出来」，chit句话thang续接第廿一章23节ê「耶稣进入圣殿」，这中间lóng是马太福音所收集ê耶稣教导之言论。

「圣殿ê建筑」，这是大希律王tī主前20年开始扩建，经过46年ê时间chiah完成（参考约翰福音二：20）。完成后ê圣殿范围比本来ê大三倍，而且装潢kah koh khahsúi。M̄-koh耶稣讲它ê「每一块石头lóng tio̍h被拆落来，无一块石头会留tī另外一块顶面」，chit件事tī主后70年应验，tú亲像第廿三章38节所讲ê，「殿宇会成做抛荒无人tòa ê所在」。

马太福音 24:3-24:51

注释:

第3节，耶稣预言圣殿会被拆毁了后，门徒私底落来问chit-ê tāi-chì「甚么时chūn会发生」，因为一般犹太人认为，当耶路撒冷圣殿被拆毁ê时，mā表示末日就来到à。

Tùi第4节开始一直到第51节，耶稣连续讲七个灾难ê景况。

第一个是第4到14节：
有人会假借基督ê名，mā会有假先知出现来迷惑人，á战争、饥荒kah地动会无停地发生。先知耶利米teh描述上帝惩罚伊hit-ê邪恶ê时代ê方式，mā是用战争、饥荒kah瘟疫（参考耶利米书廿一：7、9、廿八：8、廿九：17—18、三十二：24、36）。M̄-nā án-ne，耶稣提醒他ê门徒，in会受tio̍h迫害，甚至会hō͘杀害。M̄-koh耶稣强调当福音传遍到全世界了后，世界ê路尾chiah会来到。

第二个是第15到22节：
Chit段经文用希腊帝国统治末期发生ê事件来讲述末日ê景象。

Tī第15节ê chit句「可恶ê毁灭者」，一再出现tī但以理书中（参考九：27、十一：31、十二：11）。背景是发生tī主前167年ê事件，hit时是希腊ê安提阿哥四世衣匹法纽（Epiphanes）带猪进入耶路撒冷圣殿到圣所ê祭坛献祭，结果引起犹大家族里ê马加比挺身出面，伊带领犹太人起来反抗希腊军队。后来tī主后40年，罗马皇帝卡利古拉（Caligula,37--41）mā bat威胁犹太人讲beh采取kah安提阿哥四世仝款ê行动亵渎圣殿。因为án-ne，chit句话mā teh暗示，若有类似chit种景况发生，就是大灾难koh teh beh来临ê时刻。
Á tùi第16到18节thang清楚看出，指示tio̍h赶紧逃离灾难。问题是这若是末日景象，tio̍h逃往去tó位？

第19到21节，提起期待灾难ê日子mài发生tī寒天，因为这kan-taⁿ会hō͘孕妇á是哺育婴á ê老母加倍痛苦，可能in会走bē振动，á是连带hō͘婴á受害。Mā mài发生tī安息日，因为in惊违反安息日ê规定。

第22节，chit节提起上帝tī苦难中施恩典，hō͘苦难ê时间缩短，án-ne ē-tàng留落来koh khah chē残存ê人民。

第三个是第23到28节：
Chit段经文主题hē tī假基督kah假先知ê出现。

第23 kah 27节kā第4到14节koh一pái提起假借基督kah先知ê名出现ê事件，表示迷惑人心ê事出现ê频率非常高。
第28节，这是一句谚语，是引用约伯记第三十九章30节。意思是只要注意，就会看tio̍h teh beh发生á是已经发生ê事。

第四个是tī第29到31节：
Chia提起「人子」teh beh来临，伊来临ê时天象会出现变异，圣经作者ài用chit种天象变化来说明he是上帝出重手惩罚ê记号（参考以赛亚书十三：10、三十四：4，以西结书三十二：7，约珥书二：10，阿摩司书八：9）。「号角ê声音tio̍h大tân」，这表示审判开始。

第五个是第32到35节：
耶稣用自然生态景象来教导门徒，ài in注意看hit-ê末日景象ê来临，其实tùi生态环境ê变化就会明白，就kah-ná看无花果树ê生长仝款，真平常无甚么特别。

「就tī门口」，意思指时间迫切，真紧，而且随时会来到。做好准备比猜测时间甚么来到koh khah重要。

第35节，chit节thang参考以赛亚书第四十章8节。耶稣ài大家相信他讲ê话。

第六个tùi第36到44节：
Chit段经文ê中心词字就是「警醒」，因为无人知影确实ê甚么时chūn会来临，就kah-ná「挪亚时代」mā是án-ne。另外一方面，无人知影甚么人会hông拯救，á是甚么人会hō͘留落来。会晓警醒ê人，知影随时「准备好」，因为末日会tī人「料想bē到ê时chūn忽然来临」。

第七个是第45到51节：
这是继续前段警醒ê chit-ê主题，一个奴仆若是警醒，伊bē去猜测主人甚么时会tńg来，因为主人随时lóng可能会tńg来。当主人tī奴仆「料想bē到」ê时chūn tńg来ê时，看tio̍h奴仆头尾非常忠实，主人一定会奖赏，m̄-koh对tī偷lán-si、不忠实ê奴仆，主人必定会用真严厉ê手路惩罚in。

注意，耶稣讲天国ê譬喻ê时，会提起关系审判ê事，讲末日ê问题mā是án-ne。

马太福音 25:1-25:13

注释:

Chit章用三个譬喻来说明天国，而且lóng kah终末ê审判有密切关系。Tī chit三个譬喻中ê第一kah第三个，lóng是马太福音特有ê资料，第二个譬喻tī路加福音第十九章11到27节mā有记载。

kā天国譬喻成婚姻ê筵席mā是耶稣譬喻中ê一个特色（参考马太福音廿二：1—14）。Koh讲，耶稣譬喻ê另外一个特色，就是采用极鲜明ê对比，chit种譬喻ê主要目的是beh hō͘当时ê人一听就马上了解伊所讲ê譬喻。

Chit-ê譬喻是讲kā十个少女分做两组，聪明ê五个一组，愚戆ê mā是五个一组。聪明者表示有准备，而且准备好迎接结婚ê新郎来到，thang加入庆贺ê人群中。耶稣就bat tī譬喻中隐喻他就是新郎（参考九：15）。相对ê另外五个，就是愚戆ê，in因为准备无够，thèng候新郎ê时间比预期延迟了，手上ê灯油耗尽了，想beh先向别人借来用，却得bē-tio̍h。Kui个譬喻ê中心是强调chit种准备是无法度借用别人ê，mā无人ē-tàng帮忙，因为大家lóng担心家己所预备ê无够用。

Koh讲，chia所讲ê「聪明」ê cha-bó͘-gín-á kah「愚戆」ê cha-bó͘-gín-á，ná亲像第七章24到27节所提起ê两组人仝款，「聪明」ê意思是teh指会实践所听tio̍h ê教导ê人，相对ê，愚戆ê就是听却m̄去实践ê人。

第13节，chit节是重复tio̍h第廿四章42节、44节、50节ê意思，lóng teh表示无人知影甚么时间，审判ê末日会来临。

马太福音 25:14-25:30

注释:

Chit段譬喻kah第廿四章45到51节ê譬喻类似，lóng是teh强调奴仆受主人ê交托管理家产。Tùi字面上看起来，chit段天国ê譬喻kah-ná是有三组人，其实只分两组，ná亲像前一个譬喻仝款，一组是「好koh可靠ê奴仆」，另外一组是「pháiⁿ koh lán-si ê奴仆」。耶稣teh讲天国ê譬喻ê时，lóng是kah审判有关。

Kui个譬喻ê重点tī第15节所讲ê，主人是按照奴仆ê「才tiāu」交托hō͘ in无仝ê工作量。

Chia讲一个hō͘五千，另外一个hō͘两千，第三个hō͘一千。第15节chia用「金币」来表示，表示数目相当庞大。

第18节讲出三个奴仆siōng大ê差别，就是前两个lóng是领主人交带ê金币后，就「动身」、「马上」去做seng-lí。只有hit位领一千ê，是tī土脚「挖一孔，kā主人ê钱埋起来」。

古早人，会为tio̍h安全ê缘故kā钱埋tī土脚（参考马太福音十三：44），chit-ê领一千ê并无照家己有ê「才tiāu」去做seng-lí。而且当主人tńg来结账ê时，伊iáu用了真chē理由（第24到25节）来辩解、推诿。如果讲kā钱存hē tī银行是siōng简单ê方法，án-ne，这应该是任何人lóng做会到ê事，m̄-koh chit-ê奴仆则连chiah-ni̍h简单ê事mā m̄做，iáu用真chē理由来推卸责任，he kan-taⁿ hō͘主人koh khah受气而已，无khah-choa̍h。上帝交托hō͘你jōa-chē？这是每一个人tio̍h家己反省ê问题，m̄是别人ē-tàng过问ê。

第19节，chit节是天国譬喻ê中心思想，he就是主人会tńg来「结账」，这表示审判。最后，主人判定hit-ê领一千ê奴仆是「pháiⁿ koh lán-si」，á头前两位被主人认为是「好koh可靠ê奴仆」，然后照in ê 才tiāu所努力之结果奖赏in，hō͘ in「管理」koh khah大ê数目。

第29到30节，是此譬喻ê结尾，说明只要尽心尽力努力，一定会有奖赏，áchit-ê奖赏会超过原本所有ê。相对ê，pîn-tōaⁿ ê人，上帝会连伊原本所有ê mā会失去。

马太福音 25:31-25:46

注释:

Chit段最后审判ê故事就kah头前两个譬喻仝款，mā是分做鲜明ê对比，重点teh强调无tap-sap ê事。Tī一般人看起来无tap-sap ê人á是事顶面，甚至人家己lóng bē记得ê事。M̄-koh，上帝记tiâu人所做ê每一件事。圣经作者讲每一个人lóng有一本性命册，身边lóng有一位天使teh记录你ê所讲所行，chiah-ê lóng会成做将来上帝审判ê根据（参考腓立比书四：3，启示录二十：11—15）。

Chit段譬喻用「绵羊」kah「山羊」作题材，并无表示绵羊比较好，是因为tī巴勒斯坦地区早暗温差大，日时头放牧ê时hō͘ chit两种羊做伙，m̄-koh到暗时会kā绵羊kah山羊分开，因为山羊需要烧火炭á是用草堆保暖。「正pêng」是teh指宠爱、祝福ê意思，相对tī「tò-pêng」，表明ê是失宠、诅咒。

马太福音 26:1-26:5

注释:

Chit章是记载耶稣受难ê故事。Tùi一个cha-bó͘人用香油膏抹伊，到kah门徒用Pôaⁿ过节暗顿后去客西马尼园祈祷，然后被犹太人siōng koân议会掠去、审问等等。

这两段经文lóng是kah犹大卖耶稣有关。Tī第1到5节中，耶稣koh一pái提醒门徒，他会「被卖，被钉死tī十字架顶」，这是第二pái提醒（参考二十：19），mā是他提起teh beh受难ê第四次。

第3到5节说明chiah-ê犹太人领袖确定beh除掉耶稣，m̄-koh惊引起群众暴动。理由in真清楚，是民众爱耶稣（参考廿一：8—11、15—16、46）。Tī Pôaⁿ过节期间，耶路撒冷城妇人人口会暴增到十倍以上，小khoá无注意，tī维安工作上就会失控。因为án-ne，in确定beh秘密进行chit项谋害ê tāi-chì。

马太福音 26:6-26:13

注释:

四本福音书lóng有记载有一个cha-bó͘人the̍h珍贵ê香油膏tī耶稣身上，只有路加福音ê资料比较特别（参考七：36—39）。

第6节提供chit件事发生tī伯大尼，是一位bat患癞ko病m̄-koh已经被耶稣医好ê西门厝里。

第7到9节讲有一个cha-bó͘人the̍h来「一个玉瓶，贮满珍贵ê香油膏」，马可福音第十四章3到4节特别指出he是「纯koh贵ê Ná-ta̍t芳油」，价值「三百gōa块银子」。伊kāchiah-ni̍h珍贵ê油膏倒tī耶稣ê「头壳顶」，chit种举动通常是圣经时代国王á是大祭司就任时chiah有ê。Thang看出耶稣tī chit位cha-bó͘ 人心中ê地位。门徒看tio̍h，无掠做当然，认为thang kā这瓶香油膏the̍h去卖，kā所得tio̍h ê钱用来赈济sàn-chhiah人。

第10到13节，耶稣认为chit-ê cha-bó͘人知影伊teh beh受难，因为án-ne，特别用chit种方式来为伊ê安葬作准备。耶稣chit种回答已经teh表明，chit-ê cha-bó͘人知影耶稣teh beh受难，m̄-koh门徒并无清楚。Koh讲，chit-ê cha-bó͘人为耶稣所做ê，kah加略人犹大所做ê事，呈现出来ê tú好完全颠倒。伊用多出犹大十倍价钱ê香油膏耶稣，相对ê是，犹大是用极低价出卖耶稣。

马太福音 26:14-26:16

注释:

犹太人领袖一心一意地设法beh掠耶稣，却m̄知伊tī暗时bih tī tó位？tú好耶稣门徒加略人犹大提供了合作ê意愿。马太福音作者tī chia真清楚地表示，是犹大主动去chhōe chiah-ê犹太人领袖（第14节）。

第15节，「如果我kā耶稣交hō͘ lín，lín愿意hō͘我甚么？」chit句话充分显示犹大确实是为tio̍h某种利益soah beh kā耶稣出卖。Á chia讲犹太人领袖hō͘伊「三十块银币」，chit-ê数目tú好是旧约时代一个奴隶ê价钱（参考出埃及记廿一：32）。Mā因为án-ne，一般lóng讲犹大为tio̍h钱出卖耶稣。Chit点mā是约翰福音作者暗示犹大对钱ê喜爱，讲伊是「贼」、「管钱，常盗用公款」（约翰福音十二：6）。

马太福音 26:17-26:25

注释:

「除酵节」，这是tùi Pôaⁿ过节隔工开始，共计有七工。因为Pôaⁿ过节mā一定tio̍h食无酵ê食物，因为án-ne，前后共计八天。Tùi犹太历正月14日ê黄昏开始算是Pôaⁿ过节（参考利未记廿三：5—8）。

第18节，耶稣早已经安排好伊beh kah门徒守Pôaⁿ过节暗顿ê地点。因为án-ne，ài beh门徒「入城去见某某人」，in beh tī伊ê「厝里守Pôaⁿ过节」。

第19到21节，「Lín中间有一个人ài beh出卖我」，chit句话mā是teh提醒犹大，耶稣真清楚伊心中ê企图、计谋。希望伊ē-tàng即时回心转意。
第22、25节，「一个一个问」耶稣，「m̄是我？」chit种写法真清楚teh表明犹大mā是kah其他ê门徒仝款，伊mā来问耶稣。这真正是真讽刺ê行为。

第23到24节，耶稣真清楚用一个动作teh暗示hit-ê kah伊「同齐tī盘里ùn饼食ê hit-ê人beh出卖」他，m̄-koh门徒显然无听进chit句话。因为「同齐蘸饼食」，表示关系良好，可能每一个门徒lóng有仝款ê举动，表明in kah耶稣亲密结连做伙。M̄-koh耶稣tī-chia特别提醒in，做chit种出卖老师ê人，会面临灾祸。

马太福音 26:26-26:30

注释:

Chia所记载ê最后晚餐形式，kah Pôaⁿ过节暗顿ê规定已经无仝，却是简略了真chē，而且比较接近早期教会守圣餐ê样式。使徒保罗tī哥林多前书第十一章23到25节mā写落来当时圣餐ê状况。

耶稣the̍h起「饼，先献上感谢ê祈祷」，这是真典型ê Pôaⁿ过节暗顿之方式。M̄-koh耶稣已经kā chit-ê饼ê意义重新诠释，讲he是teh代表伊ê身躯。

「phâng起杯」，mā是仝款先感谢，伊讲he是teh代表伊ê「血」。利未记第十七章11节讲血teh代表性命，thang用来赎罪。当耶稣án-ne解释时，已经teh表明伊beh牺牲性命来救赎人类ê罪à。

第30节讲in「唱了一首诗」，通常是诗篇第一一三篇到一一八篇中ê一首。

马太福音 26:31-26:35

注释:

彼得有三pái否认伊kah耶稣之间有师徒关系，chit件事Tī四本福音书中lóng有记载。

第31节，耶稣引用撒迦利亚书第十三章7节ê经文，说明敌人会kā顾羊人掠去，羊群自然会四散去。伊用chit句经文来警告他ê门徒，当伊受难时，众门徒lóng会「弃sak」伊。

第32节，耶稣kah门徒有一个约定，当他koh活了后，会比门徒「先去加利利」，表示伊会tī hia kah门徒会合。然后马太福音tī第廿八章16节讲十一个众门徒确实是到加利利ê一座山顶去kah耶稣相会。马可福音并无这续后ê经文，á路加福音则认为门徒一直留tī耶路撒冷，而且koh活了后ê耶稣基督mā是tī耶路撒冷显现hō͘门徒看，然后chiah带门徒到伯大尼，耶稣tī-hia升天（参考路加福音廿四：50），然后门徒tńg来到耶路撒冷（参考廿四：52）。约翰福音记载耶稣kah门徒lóng有去加利利，只是门徒认bē出伊就是koh活ê耶稣，直到耶稣kā门徒讲怎样掠鱼，hit时，彼得chiah发见he是耶稣。

第33到35节，彼得虽然表示伊一定bē弃sak耶稣，耶稣却真肯定地kā彼得讲tī hit工暗时「鸡啼以前」，伊会有「三pái」否认kah耶稣相识。M̄-koh彼得koh khah坚定地表示，就算是beh死，mā会kah耶稣同死，á bē否认他。

马太福音 26:36-26:46

注释:

耶稣带门徒离开耶路撒冷，到橄榄山中ê一座「客西马尼园」去祈祷。所谓「客西马尼园」，意思是teh指榨橄榄油ê所在。约翰福音讲耶稣不时kah门徒来chia，mā因为án-ne，犹大chiah知影怎样带人去掠耶稣（参考约翰福音十八：2）。犹大若是无去通报chit-ê消息，犹太人领袖并m̄知耶稣kah门徒tī chia。

Ná亲像chìn前仝款，耶稣只带彼得kah「西庇太ê两个kiáⁿ」mā就是雅各kah约翰，离开其他门徒到另外一个地方。路加福音讲hit-ê距离大约有「hiat一粒石头」远（参考廿二：41）。然后伊koh离开in三个，独自一个人坦覆 (thán-phak）tī土脚向上帝祈祷。

第38节，chit时ê耶稣心内真「忧伤，强强beh死去」，这是做一个人必定有ê心境，因为伊知影离受难ê时间jú来jú接近。

第39节，耶稣向上帝祈祷，mài hō͘他lim hit-ê「苦杯」，这是teh指十字架ê死亡。M̄-koh伊iáu是清楚地表示，愿意顺服上帝ê「旨意」。伊án-ne祈祷，连续有三pái lóng仝款（参考第42、44节）。

耶稣每pái祈祷tńg来到chit三个门徒ê所在，结果看见in lóng困去à。耶稣对彼得kah门徒讲，tio̍h警醒祈祷，m̄-koh门徒确实真软弱，连续三pái，耶稣tńg来到门徒hia，lóng是看见in困去à（参考第40、43、45节）。就tī第三pái了后，耶稣kā门徒讲，出卖伊ê人带人来掠伊à。

马太福音 26:47-26:56

注释:

来掠耶稣ê人，是tùi犹太人siōng koân议会派出ê警卫，是犹大带队。这表示犹大知影怎样来客西马尼园chit-ê地点，就由伊带队，表示伊所提供ê消息确实可靠。

犹大用「chim」耶稣ê方式作暗号，hō͘来掠耶稣ê人看清楚。因为是深夜，若无注意，可能会掠m̄-tio̍h人。M̄-koh「亲」吻耶稣，这原本是teh表示非常欢喜、喜爱ê方式，tī巴勒斯坦ê地区ê学生mā用chit种来表示对老师ê尊敬。

当犹大用chit种方式对耶稣表示热情kah请安时，耶稣真清楚犹大所ài做ê是甚么，伊就回应伊：「朋友，你想beh做ê，赶快做！」其实chit句话是teh kā犹大讲：「你teh chhòng甚么，我lóng真清楚，m̄免用chit种方式来伪装。」

第51节讲有一个人拔刀出来「向大祭司ê奴仆砍去，kā伊ê一个耳á削掉」，chit-ê gia̍h刀ê人就是彼得，á hō͘伊削掉耳áê奴仆名叫「马勒古」（参考约翰福音十八：10）。M̄-koh耶稣随时kā马勒古ê耳á医好（参考路加福音廿二：51）。耶稣禁止门徒用武力ê方式处理tāi-chì。耶稣责备彼得chit种行为，ài伊kā刀收起来，伊讲gia̍h刀ê人，「一定会tī刀下丧命」，这mā真清楚讲tio̍h用武力ê方式，并无解决问题。耶稣mā责备hiah-ê带tio̍h刀棒来掠伊ê人，是kā伊当做「暴徒」看。

第56节，chia讲tio̍h「圣经上所讲」，这可能是引用以赛亚书第五十三章12节。

果然，ná亲像耶稣chìn前预言ê，就tī chit时chūn，他ê众门徒lóng「逃走」去à。

马太福音第廿六章57节到第廿八章20节

马太福音 26:57-26:68

注释:

当时ê大祭司是该亚法，伊mā是犹太人siōng koân议会ê主席，议会是由包括大祭司在内共计有71名议员组成，chiah-ê议员是由经学教师、祭司、长老等代表，议会名称「三kah林」（Sanhedrin）。除了bē-tàng tī夜间审问案件外，开会应该是tī耶路撒冷圣殿区域内ê一个名叫「掘石」（Hall of Hewn stone）ê大厅中开会审问。因为án-ne，ē-tàng看出chiah-ê犹太人领袖明明知影he是错误 ê行为，却为tio̍h beh杀害耶稣不择手段。

第58节是为第69到75节有关彼得三pái否认、伊kah耶稣之间ê师生关系先作一个前言交带，mā表示所有门徒lóng离开，m̄-koh彼得是「跟tòe耶稣，来到大祭司ê庭园」。伊混tī警卫中间，想beh知影耶稣受掠了后会有怎样ê发展。伊就是tī chia被认出来kah耶稣有关系ê。

第59到61节，chiah-ê犹太人领袖竟然是「chhōe假证据控告耶稣」，这是真无应该ê事，因为已经违背十诫ê第九诫，莫怪耶稣会用先知以赛亚ê 话kā in谴责，讲in虽然口口声声讲上帝，m̄-koh，心确实是远离了上帝（参考马太福音十五：7—9）。In虽然努力chhōe证据，iáu是chhōe bē出来，最后有「两个人上前指称」耶稣ê罪状，讲伊ē-tàng「拆毁上帝ê圣殿，三工内koh kā它重建起来」，chit句话是耶稣tī洁净圣殿所讲（参考约翰福音二：19）。

第62到63节，耶稣「默不作声」，chit种态度mā是伊差派门徒出去传福音ê时，hō͘门徒ê交带（参考马太福音十：19—20），chit种方式mā是受难奴仆呈现出来ê特点（参考以赛亚书五十三：7）。

「我指永远活ê上帝ê名命令你chiù-chōa」，这是一句真严肃，因为一定tio̍h用chiù-chōa来讲话，á犹太人chiù-chōa，一定tio̍h用上帝ê名chiù-chōa，表示上帝深深知影人内心ê意念。M̄-koh讽刺ê是出tī大祭司ê口。

「你是m̄是基督、上帝ê Kiáⁿ？」chit对耶稣来讲是一个攸关生死ê问题。如果耶稣讲「m̄是」，就无甚么问题。如果讲「是」，ná伊随时会hōng判做亵渎上帝，thang处死刑（参考利未记廿四：16）。

「这是你讲ê」，chit句话原本ê意思是「你讲ê是」，表示耶稣用肯定ê语句回答「是」。然后伊举出但以理书第七章13节，以及诗篇第一一○篇1节当做回答，耶稣表示家己就是tùi天顶beh降落来审判世界ê。

第65到66节，大祭司一听tio̍h耶稣chit种回答，心中认定耶稣已经陷落in设计ê陷阱中à。虽然表面上看起来伊用「撕裂了家己ê衫裤」来表示极大悲痛ê意思，其实内心应该是非常欢喜ê。伊讲耶稣「侮辱了上帝」连续讲了两pái，表示大家lóng m̄免koh再怀疑，耶稣真正讲出亵渎上帝ê话。就án-ne，大家lóng讲「伊该死」，就án-ne，in完成了久长以来就想beh除掉耶稣ê ǹg望。
第68节，chit节真清楚描述犹太人众领袖怎样侮辱耶稣，mā thang看出in心中确实是痛恨耶稣到极点。

马太福音 26:69-26:75

注释:

Chit段记载彼得连续三pái否认kah耶稣之间ê师徒关系，而且连家己是「加利利人」mā否认。

第69到72节，chit段经文中讲有两个婢女前后lóng认出彼得是kah耶稣有关系。「加利利人耶稣」，这表示tī加利利地区传天国信息、行神迹奇事ê耶稣。Á「拿撒勒ê耶稣」，表示伊确实是一个真实ê人，生活tī拿撒勒hit-ê小乡村。M̄-koh这两pái彼得lóng极力否认伊kah耶稣有任何关系，m̄-nā án-ne，伊iáu用「chiù-chōa」ê方式来否认。

第73节，koh有另外一个人出来指证彼得确实是kah耶稣仝伴ê人，因为伊ê加利利人「口音」hō͘人认出来伊就是加利利人。

第74到75节，chit节讲出彼得ê软弱，伊明明是讲白贼，iáu敢the̍h上帝ê名来chiù-chōa，这是真无应该ê事。因为既然tio̍h用上帝ê名chiù-chōa，就一定tio̍h诚实ê讲出来。如果无，就等于是teh乱使用上帝ê名，等于是做违背十诫之第三诫。当彼得tú用讲白贼来chiù-chōa ê时，「鸡啼了」，chit-ê叫，mā叫醒了彼得ê心灵，伊因为án-ne soah感觉见笑、艰苦心，行出去「痛哭起来」。

马太福音 27:1-27:2

注释:

犹太人领袖决定beh处死耶稣，m̄-koh，in无处死ê权柄，因为耶稣m̄是现行犯，á是tī圣殿里违反律法。因为án-ne，一定tio̍h送交hō͘罗马当局审判同意，chiah ē-tàng判处死刑（参考约翰福音十八：31）。In「商议」好，决定beh kā耶稣「处死」。

Koh讲，已经到清早时间，若是不赶紧kā耶稣移送hō͘彼拉多，万一被民众知影in掠了耶稣，恐惊引起koh khah大ê麻烦。

马太福音 27:3-27:10

注释:

除了马太福音有记载犹大ê死亡，其它三本福音书lóng无记载。另外，tī使徒行传第一章18到20节mā有记载。M̄-koh所记载犹大死亡ê经过，kah马太福音并m̄是完全仝款。

第3到4节，chit两节mā是引起讨论ê经文，kah-ná犹大并m̄是真正为tio̍h贪爱钱财chiah出卖耶稣，kah-ná另外有隐情ê款。伊kā三十块银子带tńg去见祭司长kah长老，表示伊做杀害「无辜ê命」，á这是上帝所无法度允准ê事。M̄-koh chiah-ê宗教领袖拒绝接受伊想退tńg来ê钱，因为hiah-ê钱沾满了无辜ê血。In ài犹大家己去承担chit种罪。Ē-sái讲是tī第24节，犹太人却因为chiah-ê宗教领袖ê煽动，表示愿意承担落来。其实，siōng需要承担chit种罪状ê，就是chiah-ê宗教领袖。

第5节，chia讲犹大是吊tāu自杀，á使徒行传第一章18节讲伊是因为「坠下，五脏逬裂来死」。

第6到8节，chia kah使徒行传第一章记载ê仝款，就是犹大所得tio̍h ê这笔出卖耶稣ê钱，后来就是买了一块当做埋葬出外人ê坟地，称做「血田」。
第9到10节，chit两节其实引用撒迦利亚书第十一章13节。M̄-koh马太福音作者特别指出是先知耶利米ê话。无错，先知耶利米有买过一块田地（参考耶利米书三十二：6—15）。不过耶利米书第十九章1到13节ē-tàng反应chit段马太福音chit两节经文ê意义。

马太福音 27:11-27:14

注释:

马太福音简略地叙述耶稣tī彼拉多面前受审，强调耶稣iáu是仝款，拒绝回答任何问题。Chit件事hō͘彼拉多感觉非常奇怪。为甚么耶稣不回答？因为耶稣真清楚知影，所有控告伊ê罪名lóng m̄是事实。

当彼拉多问伊「是犹太人ê王mah」？耶稣ê回答就是真简洁有力：「这是你讲ê。」chit句话mā有两种意思：一是「无错，我是犹太人ê王。」另外一种意思是：「你讲看，我是m̄是？」

Tùi第12节来看，chiah-ê宗教领袖显然iáu控告了耶稣真chē罪状，m̄-koh马太福音作者并无记录出来。

马太福音 27:15-27:26

注释:

已经无资料thang chhōe出甚么时开始，罗马统治当局会tī犹太人过Pôaⁿ过节ê时，tháu放一个死刑犯hō͘ in。

第16到18节，chia讲tú好有一个「出名ê囚犯叫『耶稣』巴拉巴」，马可福音第十五章7节讲伊是tī参与「暴乱」中thâi人。因为án-ne，彼拉多希望tháu放耶稣，取代kā原本就该处死ê叛乱份子chit位「巴拉巴」。马太kah马可chit两本福音书lóng强调，认为彼拉多清楚知影chiah-ê犹太人领袖是因为嫉妒耶稣chiah beh害死耶稣。

第19节，chit节是马太福音特有ê资料，说明耶稣的确是无辜ê。彼拉多ê bó͘因为作恶梦，梦tio̍h关系耶稣被谋害ê事。因为án-ne，伊希望彼拉多「mài管」，意思是希望伊tháu放耶稣。

第20到21节，koh khah清楚chiah-ê犹太人领袖就是一再传播假消息，hō͘民众陷入错误 ê认知中。这等于是kah作假见证陷害人仝款。In明明知影bē-tàng，却一再án-ne做。彼拉多无办法，只好顺tio̍h民众ê喊叫声，tháu放巴拉巴。

第22到23节，民众m̄-nā beh处死耶稣，iáu特别指明tio̍h kā耶稣钉死十字架，这tú好是耶稣tī第三pái预言家己teh beh tī耶路撒冷受难时，有讲过会hō͘人钉死十字架（参考马太福音二十：19）。

第24到25节，chit两节mā是马太福音特有ê资料，mā回应了第19节彼拉多ê bó͘警告丈夫ê话。彼拉多用「洗手」表示伊kah判耶稣死刑无关。另外一方面mā说明民众ê呼声赢过彼拉多该坚持ê公义审判。Á第25节民众表示愿意为chit件流无辜ê血付出代价，承担罪责。

第26节，彼拉多做出判决，tháu放巴拉巴，然后「鞭phah」耶稣，这tú好是耶稣ê预言提起ê事（参考马太福音二十：19）。

马太福音 27:27-27:31

注释:

这就是当时一个人beh被钉十字架chìn前受tio̍h侮辱ê情景。

第28节，「深红色ê棉袍」，这真可能是向罗马军官借用，m̄-koh khah可能是用纸糊起来染红色ê。

第29节，兵丁the̍h「藤条」，这是芦苇ê茎，kā它当做象徵国王ê权杖。然后koh再用chit支芦苇ê茎phah耶稣ê头。

第30到31节，罗马士兵用极尽侮辱耶稣ê方式，这通常lóng是teh对待被判钉十字架死刑ê囚犯，teh执行chìn前会tú-tio̍h ê经历，为tio̍h是beh hō͘囚犯感觉自卑到极点。

马太福音 27:32-27:44

注释:

第32节，当时ê罗马军人，有权强迫被统治ê人民做义务工作（参考马太福音五：41）。古利奈ê西门是tī-chiateh看耶稣giâ十字架去受刑，伊却因为án-ne soah被「强迫」替耶稣背上十字架。

第33到34节，「各各他」，可能是专门teh执行十字架之刑ê刑场。Chit种「搀tio̍h苦胆ê酒」，可能是有麻醉ê功效，m̄-koh耶稣m̄ lim。

第35到36节，kā受刑人身上ê物件归hō͘执行者，这是一种风俗。Mā是诗篇第廿二篇18节诗歌所提起ê。

第37节，十字架顶ê牌á竟然是写tio̍h：「犹太人ê王耶稣。」认真讲起来这mā对犹太人极大ê讽刺，因为表示被彼拉多钉死tī十字架顶ê人，m̄是一般人，却是犹太人ê王。

第38节，chia所讲ê「暴徒」，mā thang当做强盗。

第39到44节，民众lóng tī讥笑耶稣，而且kā耶稣teh讲in毁坏圣殿，伊tio̍h用三工重建起来，当做笑话来讽刺伊。In m̄知耶稣ài做ê是一场心灵改革，而且是beh用伊ê死来完成。

Chit句「tùi十字架顶落来」，就kah-ná魔鬼teh试探耶稣ê时所讲ê，ài他tùi圣殿siōng koân ê所在跳落来仝款（参考马太福音四：6）。大家lóng teh讥笑耶稣，连hit-ê被钉十字架ê「暴徒」mā是án-ne。这ná亲像耶稣tī十字架顶所讲ê，in m̄知家己teh做甚么（参考路加福廿三：34）。

马太福音 27:45-27:56

注释:

马太福音只记载耶稣tī十字架顶讲「我ê上帝，我ê上帝，你为甚么弃sak我」chit句而已。Chit句话是引用诗篇第廿二篇1节a句。罪，siōng大ê特徵，就是hō͘人kah上帝隔离。耶稣是背负tio̍h人类ê罪死tī十字架顶，mā因为背负ê罪极重，感觉就是kah上帝隔离。

第50节讲耶稣「koh大喊一声，气就断了」，chia作者并无说明ná大喊一声讲ê是甚么内容，约翰福音第十九章30节讲伊喊「成了」了后「气就断了」。

第51到53节，圣殿里ê「帐帷」，这是隔开到圣所kah祭司院ê布帘，忽然「tùi上到下裂做两半」，这是有象徵性ê意义，表示因为耶稣ê死，hō͘人kah上帝之间原本ê隔阂，重新修复（参考希伯来书十：19—20）。

Chit段经文是马太福音特有ê资料，讲tio̍h原本已经往生ê圣徒，lóng因为耶稣ê死，tùi坟墓中koh活起来。

第54节，军官kah士兵看见此景lóng非常惊惶，因为in从来m̄-bat看过chit种景象，tùi án-ne lóng同声见证耶稣「真正是上帝ê Kiáⁿ！」

第55到56节，只有留落来看耶稣被钉十字架ê，是一kóa「妇女」，in是「tùi加利利跟tòe耶稣来服事他ê」。Chiah-ê妇女一直是耶稣传福音事工支持ê主力。In无逃走，而且守tī坟墓边（参考第61节）。

马太福音 27:57-27:61

注释:

马太福音作者讲chit位安葬耶稣ê亚利马太ê约瑟，伊既是财主，mā是「耶稣ê门徒」。伊mā是犹太人siōng koân议会ê议员（参考马可福音十五：43），过去可能因为惊犹太人kā in赶出会堂，á m̄敢公开承认kah耶稣ê关系（参考约翰福音十二：42）。当伊向彼拉多请求收殓耶稣ê身躯时，真紧to̍h得tio̍h允准。然后伊kā家己新买来凿成ê墓穴当做耶稣安葬ê路用。

第59节，约瑟用「清气ê麻纱包裹」耶稣ê身躯，约翰福音第十九章39节讲伊kah尼哥德慕同齐用30公斤重ê香料，抹tī麻纱顶糊tī耶稣ê身躯。

犹太人ê坟墓是凿磅空而成，因为án-ne，封守坟墓ê方式，是用另外一块大石头挡teh磅空ê洞口。抹大拉ê马利亚kah另外一个马利亚同齐守tiâu坟墓。

马太福音 27:62-27:66

注释:

犹太人领袖惊耶稣koh活，因为án-ne，除了石头挡teh坟墓外，in另外chiah-koh请求彼拉多「下令严密守护坟墓」。In强调这至少tio̍h过三工，因为三工后身躯就会腐烂，依in ê看法，三工后就bē有死人koh活ê可能性出现。M̄-koh in bē记得拉撒路是tī坟墓中四工，而且身躯lóng腐烂臭à（参考约翰福音十一：39），m̄-koh耶稣iáu是hō͘伊koh活起来。Chiah-ê犹太人领袖ê请求得tio̍h彼拉多ê同意，m̄-nā带封条去贴tī石头壳顶，而且派兵看守。M̄-koh koh活是上帝奇妙ê作为，岂是人ê气力阻挡会tiâu？

马太福音 28:1-28:9

注释:

是妇女tāi先看tio̍h koh活ê主耶稣，m̄是门徒。而且iáu是in kā耶稣koh活ê信息传达hō͘众门徒知影ê。

「强烈ê地动」发生，「主ê天使tùi天顶降落来」，天使「Kā石头滚开」。「容貌像sìh-nà」以及洁白ê衫裤，这真亲像耶稣chhōa三个门徒上山去祈祷ê时，耶稣变形像ê样式（参考马太福音十七：5）。

第5到7节，这是天使对chit两位马利亚讲，ài in去kā门徒讲耶稣已经koh活，而且beh tī加利利kah in相会。耶稣被钉十字架ê时chūn，门徒先走。M̄-koh，chiah-ê妇女是留落来，而且看守到耶稣死去，被埋葬。门徒iáu teh bih起来ê时，众妇女则勇敢去探墓，结果in tāi先知影耶稣koh活ê大好消息，两个之间cheng差好大ah！

第8到10节，koh活ê耶稣亲自显现hō͘ chit两位妇女看，koh一pái叮咛in去kā门徒讲。Tio̍h注意第9节，chia讲妇女「揽耶稣ê脚拜他」，表示koh活ê耶稣是实体ê koh活，m̄是虚幻ê，á是一般人所讲ê只有「灵魂」。

马太福音 28:11-28:15

注释:

第11到12节，除了妇女看见坟墓发生ê大事，连顾守ê兵丁mā看见。因为án-ne，有人去通报犹太人领袖，chiah-ê犹太人the̍h钱o͘-se罗马ê兵丁。

第13到14节，chiah-ê犹太人领袖m̄-nā tī害死耶稣ê事顶面作假见证，连耶稣koh活ê chit件大事mā是仝款，用钱财o͘-se ê方式想beh阻止上帝奇妙ê神迹传扬出去，可见in心中根本to̍h无上帝。

第15节，罗马兵丁原本就是爱钱财赢过事实，因为án-ne，in听从了chiah-ê犹太人领袖ê话。M̄-koh上帝ê神迹并无是án-ne就ē-tàng挡teh bē传出去。

马太福音 28:16-28:20

注释:

门徒照耶稣kah in ê约束，tńg去加利利相会，chia并无说明是tó一座山，mā有可能是耶稣变形像ê hit座山。

第17节，chit节讲tio̍h in一看见耶稣就拜他，m̄-koh tī in中间有人iáu是「心内giâu疑」。怎样会án-ne？Á chit种giâu疑一直到五旬节圣灵降临ê时chiah全部清醒起来。

第18到20节，这是耶稣hō͘门徒ê使命，ài in去世界各地宣扬福音，带领人来受洗。Chit种讲法已经是早期基督教会带领人来加入信仰团契之规矩，一定tio̍h受洗chiah算。