哈该书 1:1-1:15

注释:

Tī十二位小先知中，有六位teh做品中lóng有先绍介chiah-ê先知ê背景，chiah-ê有绍介ê就是何西阿、阿摩司、弥迦、西番雅、哈该，以及撒迦利亚等。有另外六位是无绍介身世背景ê，就是先知约珥、俄巴底亚、约拿、那鸿、哈巴谷、玛拉基等。有绍介身世背景thang帮助咱了解作者写作时代ê社会情况，进一步koh khah清楚明白册中ê信息意义。

	哈该书hō͘咱清楚知影伊ê时代就是tùi巴比伦被波斯帝国释放回乡tńg来后ê时代了，而且是参与重建圣殿ê工作。第一章就是谈起回乡后ê以色列人民对重建圣殿ê工作态度并m̄是真积极地，而先知哈该传出上帝ê话kā以色列人民讲一定tio̍h赶紧kā圣殿重建完成，因为圣殿是凝聚以色列人民siōng重要ê一股力量。伊甚至提出警告，若是疏忽了圣殿ê重建，就算拥有一切财富mā会重蹈亡国ê覆辙，所有ê一切lóng会丧失。

    第1节，「大流士做波斯皇帝ê第二年六月一日」，这应该是tī主前520年8月29日。

「哈该」，chit-ê名ê意思是「节庆」。以色列人民teh号名通常lóng kah出世ê背景有密切关系。

作者讲先知哈该传达上帝信息hō͘「撒拉铁ê kiáⁿ儿犹大省长所罗巴伯和约撒达ê kiáⁿ儿大祭司约书亚」。In两人lóng是犹太人，而且kah波斯皇室ê关系真好，chiah会被任命为官员。所罗巴伯是掌管政治事务，而大祭司约书亚则管理宗教事务。Tùi chia thang看tio̍h一个重要ê史料，就是所罗巴伯和大祭司约书亚（tī以斯拉记是用「耶书亚」chit-ê名字）这两人lóng是tī第一批回乡ê行列。

    第2节，上帝启示hō͘先知哈该chit种信息。原来tī chit批回乡ê以色列人民中间有人认为「chit-má m̄是重建圣殿ê时chūn」，chia用ê是「chiah-ê人民」之词，却m̄是用「我ê子民」，原因chiah-ê人民虽然表面上看起来是用色列人民，m̄-koh in ê心已经无koh是用上帝为性命ê中心，chit种人民kah上帝原本所拣选ê以色列人民是无仝款ê。

	第3到8节，这是上帝hō͘先知哈该转达hō͘以色列人民ê第一段信息。第4节真清楚指出上帝ê「圣殿荒废tio̍h」，而in各自却tòa tī「华丽ê厝」，意思是teh指有装潢美丽ê天花板。这表示in并m̄是无钱盖圣殿，因为in家己ê居家lóng装潢得真堂皇。这显明了in tī信仰上，无koh是用上帝为中心。所以先知哈该讲上帝ài in好好á「检讨」chit种信仰态度。这「检讨」一词tī第7节koh一pái出现，真清楚ài chiah-ê回乡ê以色列人民省思上帝tī in性命中ê地位。

	先知哈该传出上帝回应以色列人民chit种态度ê信息是：若是in继续án-ne落去，无论怎样努力，lóng会是白费心力，因为若无上帝赐福，就算「播种」真chē，收成却真少；有衫裤穿mā bē暖活；有饭食mā bē饱等等，chiah-ê teh表示失去上帝，等于是失去一切。Chia讲「工资无够维持生活」，tī中文《和合本》、天主教《思高圣经学会晓版本》，以及《台语汉字本》等lóng仝款记载为「thàn来ê工钱khǹg入破漏ê袋子中」，这意思真清楚，指即使工作thàn到工钱mā会失落，ná亲像裤袋有破洞仝款。先知哈该kā以色列人民讲，应该赶紧重建圣殿，因为有圣殿，in就会重新聚集做伙敬拜上帝，chiah会重新拾回过去kah上帝之间亲密ê关系。

第9到11节，chit段经文是先知哈该传出ê第二段信息，mā是上帝警告ê信息。第9节所讲ê比第6节所讲ê koh khah严重，m̄-nā「歉收」，而且是kā kan-taⁿ有ê收成带tńg来储存在仓库里，mā会hō͘上帝用风「吹掉」。Chia「吹掉」一词，意思就是teh指腐pháiⁿ无法度食用。Koh讲，上帝mā hō͘天不落雨，大地炕旱，土地长bē出五谷，án-ne一来，连带ê是所有ê cheng-seⁿ、动物等lóng会欠缺粮食，无法度活teh。因为in只无闲「建造家己ê房屋」，却随在「圣殿荒废」，表示in对上帝ê轻视，完全bē记得in ē-tàng tńg去故乡，lóng是因为上帝极大恩典。

    第12到13节，chia讲「所罗巴伯、约书亚，kah所有tùi巴比伦流亡回国来ê人民」听了了后，就「遵照」上帝ê「命令去做」。「遵照」ê意思是teh指「敬畏ê心」，是teh指in知影tio̍h用上帝做中心，这表示in有改变，决定改正过来。所以上帝ài先知哈该转达kā in赐福ê信息是「答应」beh kah以色列人民同在。Chit句话tī哈该书连续出现三pái（参考二：4、5）。

    第14到15节，chia koh一pái提起时间是tī「大流士做皇帝ê第二年六月二十四日」，这是主前520年9月21日。人民领袖「所罗巴伯、大祭司约书亚，以及所有流亡tńg来ê人民」就开始进行「重建圣殿」ê工程。

哈该书 2:1-2:23

注释:

Chit章记载先知哈该鼓励参与chit项重建圣殿工作ê人民领袖kah所有以色列人民。只要in kā圣殿重建完成，耶路撒冷会恢复过去ê繁荣。M̄-koh若是无用真心实意ê态度重建圣殿kah献祭，所有一切lóng会成做污秽ê记号，chit点mā是先知信息中一再提醒ê事。

第1节，chia提起主前520年ê「七月二十一日」，mā就是「10月17日」。这时间mā ē-sái讲是犹太人三大节期中ê第三个节期—Tòa棚节。

Tòa棚节，koh名「收藏节」（参考出埃及记廿三：16b），这是收割五谷、果子等农作物了后，准备过冬ê时chūn，对以色列人民来讲是欢喜ê节期。因为chit节期有连续长到七工ê庆祝。Tī这节期中，大家会lim酒欢乐。

第2到5节，chit段经文是上帝ài先知哈该转告hō͘大家ê信息。上帝ài in回想过去ê耶路撒冷圣殿是「jōa-ni̍h-á华丽」，而chit-má「看起来m̄是一文不值mah」？chia ài beh特别注意ê是先知哈该并m̄是讲上帝要求in kā圣殿建造成ná亲像所罗门王时代仝款华美，因为论财力、人力lóng无法度kah当时相提并论。伊是teh鼓励以色列人民，m̄-thang因为chit-má能力有限就自卑。因为上帝并m̄是teh看外表ê美，而是beh看心内是m̄是真正尊崇上帝为性命ê主，án-ne chiah是siōng重要ê事。

会有chit种信息，真可能是因为以色列人民心中有不安、惊惶。In惊无能力kā圣殿盖得像所罗门王时代hit种美轮美奂。确实，in无chit种能力，虽讲tī in beh回乡ê时chūn，波斯帝国皇帝塞鲁士bat kā当年巴比伦帝国tùi圣殿搜刮ê所有一切财宝lóng归还hō͘回乡ê以色列人民。M̄-koh hiah-ê只不过是敬拜用ê器具而已，即使koh加上其他ê财宝，in ê财力mā无法度kah当年所罗门王相比。所以先知哈该一再鼓励in tio̍h「刚强，tio̍h努力工作」，不要害惊，因为上帝会kah in「同在」，会帮助in、带领in。

第6节，chit节到第9节ê经文是先知哈该传出hō͘伊转达ê信息。
Chit节「震动天地，摇撼海洋kah陆地」，chiah-ê lóng teh表明上帝ê审判来临必定有ê现象，而时间真紧to̍h beh来临。

第7节，chit节thang参考以赛亚书第六十章9节。Tùi先知以赛亚chit段诗歌thang看出，siōng主要是上帝恢复了耶路撒冷ê荣耀了后，就会有真chē seng-lí人客旅，以及来自世界各地ê朝圣者，到chia敬拜上帝。Án-ne，就会有koh khah chē ê资金涌入。这mā teh表明：圣殿ê美，并m̄是因为装潢美丽，却是讲有真chē人来敬拜上帝，hō͘圣殿内充满tio̍h朝圣者歌颂ê声音，这就是一种荣耀ê记号。

第8节，chit节是teh回应第7节所提起ê圣殿之荣耀。所讲「金银lóng是我ê」，这表明了人间看做siōng贵重ê物件，每仝款lóng是上帝所赏赐ê。是上帝赏赐ê，上帝mā有权收tńg来（参考约伯记一：21）。

第9节，chit节讲出上帝hō͘ in以色列人民ê应允，上帝beh恢复耶路撒冷城ê荣光，hō͘圣殿比以前koh khah美丽好看，而且hō͘以色列人民过「安定ê生活」。

    第10节，chit节提起「大流士做皇帝ê第二年九月二十四日」，这时间是主前520年12月18日。离顶pái in回应上帝ê信息决定beh动工重建圣殿时间「六月二十四日」（参考一：15），有三个月时间à。就tī chit-ê时chūn，上帝ê话koh一pái临到先知哈该，ài伊传讲hō͘以色列人民听。

第11到12节，tùi第11到14节lóng提起两个kah圣洁有关ê问题，这背景kah利未记第六章有关素祭，以及赎罪祭ê条例有关。

照摩西律法ê规定，所讲ê「分别为圣ê祭肉」，这是teh指献祭用ê。祭司会用伊ê衫裤包chit块beh献祭ê肉，然后kā之带到祭坛献祭hō͘上帝。如果祭司用来包祭肉ê衫裤接触tio̍h其它ê物件，包括「饼、汤、酒、橄榄油，á是任何其他食物」ê时，是m̄是chiah-ê被tú-tio̍h、摸到ê物件mā会因为án-ne而成为「圣物」？

先知哈该会问众祭司这问题，可能是当时有有人认为若是beh献祭hō͘上帝ê物件，即使包tio̍h ê布巾、衫裤等，一tú-tio̍h其它ê物件，chiah-ê物件lóng会跟tòe成做「圣物」。换句话讲，当时流传tio̍h chit种「圣物」会有感染力ê功效。显然chit种讲法是kah利未记第六章27节所记载ê有关，认为只要「kah这牲祭接触lóng会受tio̍h神圣威力ê伤害」。

其实，利未记tī提醒包献祭用ê布，tio̍h看做是「圣布」，tio̍h保持chit块布ê洁净，m̄-thang koh再接触tio̍h人á是任何其它物件，这全然是为tio̍h beh保持洁净ê路用而已。

当然chiah-ê众祭司lóng真清楚先知哈该问这问题ê意思，因为án-ne in ê回答真清楚，明白表示「无算」。意思是teh指分别为圣ê物件，并无会因为chit-ê物件接触tio̍h其它ê物件，就连带ê hō͘ chiah-ê被接触tio̍h ê物件变kah神圣。

第13节，chia是哈该提问ê第二个问题。Chit-ê问题thang参考民数记第十九章11到13节，表示接触tio̍h死人ê尸体就会无清气长到七工之久。然后tī第22节讲chit种人若是摸过ê物件mā是无清气。这主要teh说明如果祭司无小心有触(tak)tio̍h到无清气ê物，特别是死去ê尸体，如果无经过洁净礼仪ê处理过，伊koh接触tio̍h其它ê物件，就会mā连带ê hō͘其它ê物件mā被污染à。Chit种讲法是非常符合卫生条件ê。M̄-koh tī摩西时代ê以色列人民kā它特别用来teh献祭ê礼仪kah祭司人员洁净ê规律上，就显得非常有意义。一则，希望chiah-ê祭司lóng会保持洁净ê身躯，án-ne teh献祭ê工作上chiah会神圣。二是所有beh献祭ê物件lóng一定tio̍h是洁净ê。如果一个祭司ê手不清气，伊所the̍h ê物件原本若是清气ê，mā会因为祭司ê手不清气而被污染à。

Chit种问题是非常清楚ê，所以chiah-ê众祭司ê回答mā是真清楚，就讲「会」。

第14节，先知哈该对chit两个问题做出ê结论。伊ê结论kah-ná m̄是真清楚，所以Tī圣经学界有无仝ê看法。

一是：当chiah-ê回乡ê以色列人民想beh建造耶路撒冷圣殿ê时，有撒马利亚人kah其他已经teh敬拜别ê偶像神明ê人mā表示愿意参与建造圣殿，并且愿意提供必要ê物件。以斯拉记第四章1到3节就有án-ne记载，讲chiah-ê撒马利亚人去见所罗巴伯和众族长，表示in beh参加建造圣殿ê工程。M̄-koh却被所罗巴伯、耶书亚，kah众族长拒绝，in回答chiah-ê热心ê撒马利亚人讲：「咱无需要lín ê帮助，来为上主—咱ê上帝建造圣殿。」（参考以斯拉记四：3）先知哈该ê chit段话真可能就是tī讲，若hō͘ chiah-ê撒马利亚人参与建造ê话，会hō͘圣殿被污染。所以拒绝in参与是对ê。Á另外一方面，mā teh提醒in，m̄-thang认为in因为建造圣殿就会比hiah-ê hō͘ in看做无清气ê撒马利亚人khah圣洁。In mā bē因为建造圣殿，就成做神圣ê族群，in一定tio̍h家己时时刻刻保持洁净chiah是正确之道。

二是：当chiah-ê回乡ê以色列人民决定beh建造圣殿ê时，却犹原kah撒马利亚人有往来，甚至向in购买建造圣殿ê用品。Á chiah-ê用品本身可能就是无清气ê。所以如果使用chiah-ê无清气ê用品，kan-taⁿ用手接触就已经是无清气ê了，chit-má koh用之来建造圣殿ê时，岂m̄是mā hō͘建造起来ê圣殿污秽了mah？

第15到19节，先知哈该ài chiah-ê回乡ê以色列人民用重建圣殿chìn前ê景象，对照重建圣殿了后发生ê情景。第16到17节就是tī重建圣殿工程chìn前，mā ē-sái讲是teh重复描述第一章9到11节所提起过ê经历，in受tio̍h炕旱ê侵袭，m̄-nā收成无如所期待ê，而且是比所期待得tio̍h ê iáu-beh少。原因是无得tio̍h上帝ê赐福。现tī in tī「九月二十四日」chit工，in动工进行建造圣殿ê工程。先知哈该看做是非常重要ê一工，伊tio̍h用色列人民注意chit一工，因为chit一工kā成做一个重要ê分界岭；chit一工了后，in teh beh开始有新ê现象出现。因为上帝kā kah in同在。In ê仓库里会有重新装满丰收得tio̍h ê一切。

第20节，「tī仝一工—九月二十四日」，mā就是重建圣殿ê日子，就tī chit工，上帝ê话koh一pái临到先知哈该。
第21到22节，上帝ài先知哈该kā他ê信息传hō͘ chhōa以色列人民tńg来故乡ê所罗巴伯，主要ê用意就是beh hō͘所罗巴伯知影，伊kā负起重建圣殿ê责任，并带领以色列人民恢复昔日上帝kah in同在光辉ê日子。Beh hō͘「犹大省长所罗巴伯」看见上帝怎样颠覆、摧毁过去欺负in ê人。Chit种信息是真大ê鼓励，因为以色列人民回乡ê mā不过只有五、六万人而已，四面ê仇敌lóng虎视眈眈，连撒马利亚人lóng会tī in想beh建造圣殿ê时chūn故意来chhōe孔缝，其他ê仇敌必定bē放过侵略in ê机会。所以当先知哈该对in讲上帝beh亲自为in抵挡仇敌ê时，对in来讲确实是一个非常珍贵ê好消息。

第23节，chit节对以色列人民ê领袖所罗巴伯来讲感受真无仝款，因为先知哈该讲上帝看所罗巴伯是「奴仆」。通常chit-ê词只用在先知ê身上，除非是真特别如巴比伦帝国ê皇帝尼布甲尼撒hō͘上帝呼召成做上帝ê「奴仆」（参考耶利米书廿五：9）。现tī上帝kā所罗巴伯看做「奴仆」，表示所罗巴伯tī上帝眼中有真无仝款ê身分。Chia《现代中文译本》用「统治」，tī中文《和合本》用「印」chit-ê字。Chit-ê词mā出现tī耶利米书第廿二章24节，上帝beh kā戴tī犹大王约雅斤手上ê「印á手指」摘除，这意思就是beh除掉约雅斤国王ê权威。古代社会用「印á手指」表示权威，á是证明身分ê路用。Án-ne，所罗巴伯hō͘上帝拣选成做有权威ê统治者，掌管tńg来国内后ê以色列人民。