重新查询  A+放大  A-缩小
经文:

申命记 1:1-1:5

注释:

Ná亲像头前导言中已经讲过ê,「申命记」,chit-ê名词ê意思是「重申律法」,是根据申命记第十七章18节:「王登基了后,利未祭司beh抄写一份上主ê律法hō͘伊。」如果照chit节来看,chit本册ê号名应该是「重抄律法册」chiah-tio̍h。不过,讲它是「重申」mā对,因为chit本册大部分lóng是teh重复叙述出埃及记、利未记、民数记中已经有记载过ê律法条例。

Chit段经文thang讲是申命记ê序言。

第1节,chit节一开始就讲「本册是摩西ê语录」,chit句话mā为chit本册讲出一个明显ê特色,就是本经册teh叙述上帝ê时,真少是上帝直接对以色列人民讲话,lóng是透过摩西转述。因为án-ne,mā thang án-ne讲:申命记是摩西叙述上帝律法ê一本册。Án-ne,thang理解chit本经册中,有真chē律法规章是经过摩西解释了后来形成ê典章律法。Tī chit-ê节mā提供真chē漂流旷野期间停留过ê地点。

第2到5节,koh一pái说明以下所讲ê律法规章,lóng是tī出埃及了后ê第四十年十一月一日,摩西向以色列人民讲,chit-ê时间是摩西临死前一个gōa月,因为án-ne,差不多thang讲是摩西最后ê交带。值得注意ê,申命记作者ài kā出埃及记kah民数记所讲ê西乃山,kā它称做「何烈山」。Á「何烈」chit-ê词,表示不毛之地,呈现旷野ê景色。就tī约旦河东岸ê摩押之地,摩西向以色列人民解说上帝ê律法规章。



经文:

申命记 1:6-1:18

注释:

Chit段经文是摩西所讲ê第一篇。主要内容是tī两个主题:(1)回顾历史(一:6—三:29)。(2)勉励以色列人民(四:1— 40)。第一部分多数ê经文已经出现tī民数记里,mā有另外一部分是出现tī出埃及记里ê资料。第二部分则是申命记特有ê资料。

Chia一再强调续落来chit段律法规章,lóng是tī何烈山山脚ê时chūn,上帝所颁布ê。意思是ài以色列人民回顾过去听过。

第6到8节,「上主—咱ê上帝」,这是申命记特有ê用法,而且一再出现(参考一:25、41、二:30、33、36、三:3、18、四:7、五:2、24、六:4、20、24、廿九:18、29)。Tī chit段经文中,真清楚说明以色列人民teh beh进入迦南地区,mā就是上帝beh赐hō͘ in ê土地,chia则是teh指明土地ê范围。特别ê是koh一pái表明chit片土地是上帝kah以色列人民祖先――亚伯拉罕、以撒、雅各等立约应允beh赏赐hō͘ inkiáⁿ孙khiā起ê土地。注意第8节,chia讲以色列人民beh入去「占」有chit片土地。Chit-ê「占」字,表明in m̄是凭空得tio̍h,却是经过「武力」、「战争」chiah ē-tàng得tio̍h。因为án-ne,得tio̍h土地是经过付出性命ê代价,m̄-koh,因有上帝ê应允,上帝会kah in同在。

第9到15节,chit段经文直到第18节,thang参考出埃及记第十八章13到27节。头前已经提过ê,所谓「申命记」,意思是重新提起过去讲过ê事。Tī chia,就是teh重复叙述已经讲过ê事,因为án-ne,chia「我kā lín讲过」chit句话,表示这m̄是新ê事。

Tī chit段经文中,摩西提起会tī以色列人民中间设立管理in ê人ê因端,是因为上帝赏赐hō͘以色列人民「人口增加,像天顶ê星辰hiah-nih-chē」,表示虽然in漂流旷野期间,因为瘟疫等hō͘ 上帝惩罚á死去bē少人口,m̄-koh上帝iáu-koh赐福in,chiah hō͘人口无因为án-ne减少。M̄-koh摩西自承能力有限,无法度带领chiah-ni̍h chē人口,因为án-ne,需要tùi以色列人民中间各支派选出代表来协助负责管理ê工作,á chit件事mā是in「bat同意」过ê事。

第16到18节,chiah-ê代表就是beh协助处理以色列人民中ê纠纷,á in一定tio̍h是公正无私ê审判官员,除非in有困难,chiah来chhōe摩西。


经文:

申命记 1:19-1:33

注释:

Chit段经文是teh重复叙述民数记第十三章1到33节,就是每一个支派推举代表,进入迦南地去窥探当地实况。

第19到21节,摩西回顾过去发生ê事,讲伊bat鼓励以色列人民,mài惊惶,tio̍h勇敢,只要遵照上帝ê指示kah带领就ē-tàng。

第22到25节,以色列人民确实惊惶,in向摩西建议先派人入去窥探实况了后,koh来决定tio̍h行怎样ê路线入去。摩西同意,差派每支派一个代表进入窥探,结果是真kah顶面仝款帝应允ê时所讲ê,he是块「非常肥ê土地」。

第26到28节,m̄-koh因为chit件窥探tńg来引发ê事件,hō͘人认为是背叛上帝ê旨意,因为去窥探迦南地ê人tńg来,只有约书亚kah迦勒两位讲应该攻打入去,其他人lóng讲bē-tàng。Chiah-ê讲bē-tàng入去ê探子讲,迦南地ê人高大硕壮koh强悍,而且in ê城墙高耸入云。Chiah-ê人并且四界去散播chiah-ê言论,重重地影响tio̍h民心ê安定。

第29到33节,摩西一再劝勉in tio̍h相信上帝,m̄是以色列人民teh相刣,是上帝teh替以色列人民战争,伊特别举出tī埃及kah tī旷野,大家亲身经历过ê上帝奇妙作为。M̄-koh无论摩西怎样讲,以色列人民就是无愿意听从。就算是án-ne,chit位拯救ê上帝是慈爱ê,他头尾照所立ê约持守带领以色列人民,行过每一个旅程。

注意第33节所提起ê「夜间用火柱,日时头用云柱,带领lín ê旅程」,m̄-nā kan-taⁿ是表示上帝ê同在,mā teh说明上帝án怎保护in免tī死亡ê威胁;因为tī旷野,日时头艳阳高照,koh无树木thang遮荫,人真容易tio̍h痧昏倒,甚至因为口渴死去。M̄-koh有云柱teh遮阳光,hō͘ in感觉凉爽。Koh讲,旷野白昼kah乌夜温差非常大,日时头烧热度高,暗时则相当寒冷。因为án-ne,tī暗时,上帝用火柱温暖in ê身躯。

经文:

申命记 1:34-1:45

注释:

Chit段经文thang参考民数记第十四章20到45节。

第34到38节,chit段经文是in离开哈洗录,来到巴兰ê旷野扎营ê时,摩西派人去窥探迦南地ê tāi-chì件(参考民数记第十三、十四章)。

第37节tī记事顶面kah民数记ê记载有kóa差别;chia讲摩西kā上帝迁怒tī伊ê事件,kah以色列人民对进入迦南地ê懔neh、怀疑牵连做伙。若是照民数记第二十章1到13节ê记载,摩西kah亚伦后来hō͘ 上帝谴责,是kah in tī加低斯ê旷野tú-tio̍h缺水发怒、埋怨上帝ê事件有关。

第39到40节,chia讲只有当时iáu是gín-á ê人,tī in长大了后,chiah会进入迦南地去占领hit片土地。原因是上帝决定惩罚年满二十岁以上ê以色列人民,不准in进入迦南地。M̄-nā án-ne,in一定tio̍h行回头路,koh来一pái。原因是对上帝无信心ê人,就无资格进入上帝应允赏赐ê土地。这mā就是民数记第廿六章第二pái户口调查ê背景,因为hit-pái ê调查kah第一、二章ê头一pái户口调查之对象已经完全无仝à。

第41到45节,chit段经文是teh说明前段经文ê延续,就是当hiah-ê探子散布无法度进入迦南去khiā起,甚至连战争lóng无法度战胜ê谣言ê时,上帝真受气,kā in谴责,hō͘ in年满二十岁以上ê人无法度进入迦南地。Chit时有人改变心意,决定马上tio̍h进攻迦南地,m̄-koh,上帝已发出警告表示bē kah in同在。Ē-sái讲是chiah-ê人却无听摩西ê劝导,in认为óa靠家己ê兵力就ē-tàng进入迦南地,其实,这是错误 ê想法kah认知。结果in phah一pái大败仗,被亚摩利人追击、phah败,死伤惨重á哀求上帝救助。M̄-koh上帝lóng m̄-chhap in。圣经作者真清楚说明一点:若无上帝ê带领,以色列人民想beh靠家己ê气力生存落去是真困难ê。

第46节,chia讲为tio̍h án-ne以色列人民tī「加低斯tòa一段漫长ê时间」,chia并无清楚说明是jōa久,m̄-koh thang对照第二章1节所提起ê,以色列人民是「tī以东山区绕了一段真长ê时间」。

经文:

申命记 2:1-2:25

注释:

Chit章thang分做两个部分,一是第1到25节,是一个简短历史ê回顾。第二部分是第26到37节,描述in phah败亚摩利人ê经过。

Chit段经文kā过去历史做一个回顾kah简述。Chit段回顾ê事件lóng是发生tī约旦河东岸ê南部,kui个过程长到了三十八年ê时间。Koh讲,chia提供三个民族是不准以色列人民kah in交战ê对象,一是以东人,in是以扫ê后代,以扫是雅各ê孪生兄哥。Koh讲是摩押人kah亚扪人,in lóng是罗得ê后代,因为上帝bat应允罗得后代khiā起生活ê地区,因为án-ne,上帝禁止以色列人民占领á是搅扰in。

第1节,chit节是回应第一章40节。

第2到6节,chit段经文thang参考民数记第二十章14到21节,提起有关以色列人民一定tio̍h经过以东人ê地区。Chia讲以东人惊惶以色列人民,m̄-koh上帝禁止以色列人民「向in挑战」,原因是上帝早就kā以东人khiā起ê土地赏赐hō͘ in。不过,ē-tàng向in购买所需要ê食物kah饮料。

第7节,提醒以色列人民一定tio̍h遵守上帝ê命令,就会有满足,bē有任何欠缺。因为有上帝同在,就有一切。

第8到9节,chia提起in来到摩押人地方。上帝mā是仝款,不准in「搅扰摩押人,á是向in挑战」,原因是摩押人mā是in ê远亲,是罗得ê后代,á罗得是亚伯拉罕ê侄á。

第10到12节,上帝既然kā土地赏赐hō͘摩押人khiā起,就会帮助摩押人phah败比in身材iáu koh khah魁武ê原住民。这已经teh隐喻,ài以色列人民m̄免惊惶迦南地ê人jōa-ni̍h-á高大、魁武、强悍,只要上帝决定beh hō͘以色列人民进入迦南地khiā起,上帝就会帮助in得tio̍h hi̍t 所在。Ná亲像chia所讲ê,上帝帮助摩押人得tio̍h chit片土地。

第13到15节,chit段经文只有讲离开埃及ê第一代以色列人民lóng往生,并无说明经过这长到三十八年时间,in第一代ê人民Tī旷野中所tú-tio̍h ê各种经历。Á chiah-ê lóng tī出埃及记kah民数记有koh khah chē详细ê描述。

第16到19节,chit段是讲以色列人民新生代开始接棒,继续行到亚扪人ê地区。Ná亲像经过以东人kah摩押人ê地区仝款,上帝mā是不准in「搅扰亚扪人,á是向in挑战」,原因是亚扪人kah摩押人lóng是罗得ê kiáⁿ孙(参考创世记十九:30—38)。

第20到23节,ná亲像tī第10到12节ê记事仝款,chia讲上帝帮助亚扪人phah败当地ê原住民,即使当地「散组明」人ê身材高大,人口众多,是强悍ê民族mā是仝款。

第24到25节,chit两节讲上帝允准kā亚摩利人ê土地hō͘以色列人民,因为án-ne,以色列人民chiah ē-tàng kah in作战,而且占领in ê土地。Mā因为án-ne,hō͘各地ê原住民一听tio̍h以色列人民,lóng惊惶「惊惶phi̍h-phi̍h-chhoah」。Án-ne,in往迦南地推进ê时,就会顺利。	

经文:

申命记 2:26-2:37

注释:

Chit段经文是重述民数记第廿一章21到30节。

第26到29节,tī第29节特别强调讲以东kah摩押人lóng允准以色列人民经过in ê土地,照民数记第二十章14到21节ê记载,并无án-ne,却是被拒绝借路通过,甚至iáu派出大军beh kah in对敌。有一种可能讲法,就是以色列人民后来是「绕道」通过,并m̄是穿越á过。Chia是讲以色列人民kah亚摩利人谈判,希望ē-tàng够得tio̍h允准,采和平方式借路通过。

第30节,亚摩利王西宏拒绝chit件和平谈判,结果为in带来灾祸,因为逼会得thang色列人民一定tio̍h攻打占领in ê土地。

第31到35节,chit段经文siōng hō͘人感觉oh得接受,就是类似第33到35节所讲ê,以色列人民攻打希实本,ná亲像大屠杀仝款,刣了了所有ê人民。为甚么beh án-ne做?这确实是件真oh回答ê问题。Mā允准以tùi两个角度来看:(1)古代ê战争类似chit种例真chē,刣死对敌族群所有ê人,因为本身ê粮食不足,如果留落来对方人口,mā会影响tio̍h本身ê生存。(2)为保存本族人ê纯洁性,惊因为kah外族结合,致使神ê无欢喜,á hō͘家己ê族人带来性命ê威胁。因为án-ne,通常会kā所俘虏ê敌人献祭hō͘神。Chia主要说明,既然上帝ài以色列人民进入迦南地,任何阻挡这命令ê人lóng m̄得赦免。

作者án-ne描述,其主要目的teh强调:绝对m̄准in tī占领ê土地上学习当地人民ê生活风俗kah宗教信仰,因为án-ne,用chit种话句来形容「灭绝」,而且彻底ê消灭。M̄-koh事实mā证明以色列人民进入迦南地了后,并无完全án-ne做。若无,in就无可能学in ê宗教信仰。

经文:

申命记 3:1-3:11

注释:

Chit章thang分做三个段落,就是第1到11节,讲tio̍h以色列人民攻打巴珊地区。第二段是第12到22节,关系以色列人民tī约旦河东岸ê活动。第三段tùi第23到29节,讲tio̍h摩西无法度进入应允之地迦南。

Chit段经文ē-sái讲是差不多全部重复叙述民数记第廿一章33到35节。唯一差别是民数记用「以色列人」,chia用「咱」,是用摩西讲古ê方式说明历史经过ê脚迹。

Chit段mā kah前段第二章26到37节相关,以色列人民为tio̍h beh前进迦南地,先tú-tio̍h希实本国王ê拒绝。后来koh tú-tio̍h巴珊国王噩ê阻挡,伊iáu带兵来攻打以色列人民。结果in ê遭遇kah希实本所tú-tio̍h ê结果仝款。

第1到2节,chia讲上帝决定kā巴珊chit地区ê土地、城市等lóng交hō͘以色列人民。作者beh表达一个基本观念:m̄是以色列人民有甚么能力thang phah赢,却是上帝teh决定历史ê行向。

第3到7节,chit段讲述以色列人民攻打巴珊,一路势如破竹,所到ê所在,城池就沦陷,以色列人民大获全胜,共计占领了六十座城。特别是chiah-ê城池lóng有真好ê防御设施,á以色列人民对待chiah-ê城池ê手段,ná亲像对待希实本仝款。

第8到10节,chit段说明以色列人民已经占领了约旦河东岸整片地区,mā为吕便kah迦得chit两支派ê人留落来一记thang khiā起、m̄去约旦河西岸迦南地分配土地ê伏笔。

第11节,chit节特别提起巴珊王噩,伊ê棺材是用石头打造ê。Chit节主要teh说明以色列人民确实是phah败巴珊,chiah有办法连国王ê棺材lóng详细辨认,而且明确记落来棺材长到四公尺、宽两公尺,hiah-ni̍h大ê棺材所暗示ê是chit-ê民族是一个巨人族,án-ne mā回应了hiah-ê去窥探ê人tńg来ê报告,确实是相当大ê人种,hō͘ in真惊惶。M̄-koh,作者koh khah beh表达ê是,即使是chiah-ni̍h大ê人,只要是上帝亲自带领出战,就m̄免惊。

经文:

申命记 3:12-3:22

注释:

Chit段经文是重述民数记第三十二章1到42节,照民数记第三十二章1到2节ê记载:「吕便kah迦得两支族有真chē牛羊。In看见雅谢kah基列地区适合牧放牲畜,就去见摩西、以利亚撒,kah会众ê领袖。」希望ē-tàng hō͘ in分配hiah-ê土地,in无想beh tī迦南地得tio̍h土地。摩西要求in同齐kah其他十族ê同胞攻打迦南地了后,chiah thang tńg来约旦河东岸ê chit片土地。Á tī chia读起来会认为是摩西主动分配给in ê土地。

第12到14节,chia讲摩西除了kā约旦河东岸分配给吕便kah迦得chit两支派,koh kā它分配给半个玛拿西支派,表示约旦河东岸ê土地确实是一大片土地,而且mā是肥美ê所在。

第15到17节,这几节经文说明玛拿西半个支派所分配到ê土地范围。

第18到20节,虽然吕便、迦得,kah半支派ê玛拿西支族已经分得土地,m̄-koh有一个基本要件,就是in lóng tio̍h kah其他支派ê人同齐进攻约旦河西岸迦南地,直到所有支派lóng tī迦南地安居落来,in ê兵chiah thang tńg去东岸家己分配到ê地区去。因为án-ne,in一定tio̍h留落来bó͘-kiáⁿ、家畜等tī东岸。M̄-koh,thang先造好城池保护bó͘-kiáⁿ、家畜。

第21到22节,chit两节交带约书亚tio̍h领军攻过约旦河去占领西岸迦南地ê土地。

经文:

申命记 3:23-3:29

注释:

这是一段非常珍贵ê记录。摩西hiah-ni̍h辛苦chhōa以色列人出埃及,而且chhōa in行过hit种艰辛ê旷野旅程,m̄-koh,到头来却是bē-tàng允准进入迦南应允之地。chit-má,伊恳求上帝hō͘伊ē-tàng过约旦河去看māi hit片应允之地。M̄-koh,上帝并无允准伊ê请求,只允准hō͘伊到比斯迦山去了望。照申命记第三十二章48到52节ê记载,摩西讲出上帝m̄准伊kah亚伦进入迦南地ê原因,是因为伊tī以色列人民面前表示对上帝不忠。M̄-koh到底是怎样个不忠?并无说明实例。Kah-ná mā暗示:即使亲像摩西chit种奴仆,m̄是无缺点,iáu是仝款有人ê软弱。

第23到25节,摩西向上帝恳求,允准伊过去约旦河,「去看māi hit-pêng肥ê土地、壮丽ê山区,kah黎巴嫩山」,这表示上帝tī chit-ê chìn前,已经真清楚向伊表示过,m̄ hō͘伊过去。其实,mā thang án-ne讲,摩西ná亲像其他死tī旷野ê年满二十岁以上,第一pái出埃及ê以色列人民仝款。伊无比较特别,仝款lóng tio̍h死tī约旦河东岸。

第26到29节,摩西讲因为以色列人民ê缘故,上帝mā对伊受气。摩西kah-ná感觉家己受到à委屈。M̄-koh伊向上帝祈求过去约旦河看māi迦南地ê时,上帝拒绝,kan-taⁿ准伊到「比斯迦山顶去」眺望。M̄-nā án-ne,伊iáu koh khah负责教导约书亚,帮助伊坚定信心,带领以色列人民进入迦南地。Án-ne,mā thang看出约书亚角色ê重要性jú来jú重。

经文:

申命记 4:1-4:14

注释:

Chit章ē-sái讲是一篇摩西重要ê「讲道篇」,tùi第1到40节,是整篇讲道ê中心信息,主要内容是teh讲述以色列人民kah上帝之间所立之约ê意义。Kui章lóng tī说明上帝是一个遵守诺言ê上帝,因为án-ne,以色列人民应该遵守上帝,确实照kah上帝所立之约,kah他ê教导去遵行(第2、6、13、14、23、40节),并且iáu beh kā chit种信息传hō͘下一代kiáⁿ孙(第9到 10节),hō͘以色列人民永远lóng会记得祖先kah上帝所立ê约(第23、31、40 节)。

Chit段经文虽然开始是讲「我」,m̄-koh tio̍h注意第2、5节就清楚表示chiah-ê教导lóng是上帝ê旨意。摩西表示伊教导以色列人民ê,lóng是照上帝ê指示讲ê。

第1到4节,劝勉以色列人民一定会遵行上帝ài摩西传授hō͘以色列人民ê诫命,特别指出上帝bat kā hiah-ê去透过拜巴力偶像神明ê以色列人民hō͘消灭à。有关chit件事,thang参考民数记第廿五章1到9节。

第5到6节,以色列人民一定tio̍h顶真持守上帝ê律法诫命,透过in所遵守ê律法诫命,hō͘外国人了解in之所以有聪明智慧,是因为in遵行上帝律法诫命之故。

第7到10节,摩西真清楚kā以色列人民讲,从来m̄-bat有任何一个国家、民族ê宗教之神,亲像上帝kah他ê子民án-ne亲近,而且所教导ê律法是án-ne公正,á这律法诫命是tī「何烈山山脚」颁发hō͘以色列人民ê,当时in ê顶一代lóng亲目看tio̍h,甚至chit-má tī in中间有人小时候mā bat亲身体验过,摩西ài in Kā chit种亲身ê体验教导家己ê kiáⁿ。

第11到14节,chit段经文thang参考出埃及记第十九章18节、第二十章18、21节、第廿四章17节等等,lóng有描述上帝出现ê时,云层密布、雷电交加。Á诫命是写tī两块石版上,并且ài以色列人民确实遵照诫命之教导去遵行。

经文:

申命记 4:15-4:31

注释:

Chit段经文主要teh强调一点:bē-tàng雕制任何偶像来拜,因为上帝并无hō͘以色列人民看见他ê形像。

第15到19节,chit段经文mā ē-sái讲是十诫ê第二诫之浓缩,bē-tàng为家己á是任何对象塑造形像来拜。

第20到24节,chia强调是上帝kā以色列人民tùi埃及「炽烈ê火炉里抢救出来」ê(20、37节),chit位上帝是用「大能大力」kā以色列人民救出来,这并m̄是任何神明ē-tàng做会到ê事。第21节摩西讲是为tio̍h以色列人民ê缘故,上帝不准摩西进入迦南应允之地。这thang参考第一章37节、第三章26节等等。摩西mā知影家己会死tī约旦河东岸,是伊kah以色列人民准备过去ê所在。虽然伊无法度过去,m̄-koh伊iáu是劝勉以色列人民一定ài会记得kah上帝之间所立ê约,一定会遵守他ê诫命,绝对m̄去拜任何偶像。

第25到31节,摩西Tī chit段经文真清楚提出严厉警告,若是以色列人民不听伊劝勉kah警告,成(chiâⁿ)实去拜偶像神明,伊「呼唤天地前来做证」,以色列人民会因为án-ne soah被灭亡,只有少数人ē-tàng存活,而且会被赶散去做奴隶。Chiah tī苦难中回想起拯救in离开埃及ê上帝。Chit位上帝iáu-koh是仁慈ê,会拯救in,会记起所立ê约。其实,摩西án-ne讲,是beh kā以色列人民讲,siōng好mài tú-tio̍h苦难ê时,chiah想起chit位仁慈ê上帝。意思是mài因为上帝仁慈,就无在意,认为他bē受气发怒,chit种观念是错误 ê。


经文:

申命记 4:32-4:40

注释:

摩西koh一pái呼吁以色列人民回头想看历史ê经历,看上帝怎样用他奇妙ê手kā in tùi埃及抢救出来,mā用怎样ê方式hō͘心硬ê埃及人惊惶。

Chiah-ê lóng是真好ê历史教材,需要珍惜当做教育下代kiáⁿ孙siōng好ê材料。

第32到35节,是讲述tī离开埃及chìn前ê经历,chiah-ê lóng是in中间有人亲身体验,á是tùi上代父老母耳听见ê故事。

第36到37节,chit两节讲tio̍h上帝kah以色列人民立约ê经过。

第38到39节,koh一pái强调只有chit位拯救in出埃及,koh tī旷野推进ê时chūn,保护in免受外族欺负ê上帝,chiah是天地间唯一真实ê上帝。

第40到41节,劝勉以色列人民,只有确实遵照上帝吩咐ê去做,án-ne chiah ē-tàng tī过去约旦河进入迦南地了后,事事顺利,hō͘ in kah kiáⁿ孙永远khiā起tī ná土地上。

经文:

申命记 4:41-4:49

注释:

摩西劝勉á是讲道ê内容,就tī第40节告一个段落。然后tùi第41节起,是另外一个段落。Chit段落thang分做两部分,一是讲tio̍h有关庇护城ê事,第二部分koh一pái讲tio̍h头前已经叙述过ê历史。

第41到43节,这是有关庇护城ê事,tī民数记第三十五章1到15节有记载。总共是六座,其中三座tī约旦河东边,另三座是tī迦南地。申命记特别提起ê是三座设tī约旦河东边ê城,就是吕便、迦得、玛拿西等三族所分配到ê城市,in三族lóng是tī河东定居ê支族。

第44到49节,摩西颁布chiah-ê律法ê背景,是tùi出埃及到kui个族群移动到约旦河东岸之地ê时,tī chit期间所颁发hō͘以色列人民ê。这ná亲像tī第一章5节所讲ê仝款,beh讲述chiah-ê律法来源ê背景。另外mā koh再叙述一pái目前in tī东岸所占领土地ê范围。

经文:

申命记 5:1-5:22

注释:

Tùi chit章到第六章,这两章ē-sái讲是kui本申命记ê中心经文,强调以色列人民如何在何烈山山脚kah上帝所立ê约。

第五章所记载ê内容thang tī出埃及记第二十章看tio̍h,而且差不多是仝款ê内容。M̄-koh如果详细比较一下,就会发见十诫ê第四诫有关遵守安息日ê规定,就是beh遵守安息日ê原因已经有明显ê差别。而且tī第十诫贪恋别人ê物,tī chia kā「bó͘」pái tī第一位,tī出埃及记则以「房屋」为优先。

Chit段经文thang对照出埃及记第二十章1到17节来看。Tī出埃及记是西奈山,tī chia是何烈山。

第1节,这是颁布十诫ê序言。m̄-nā beh以色列人民「注意听」,而且tio̍h「学习,并且切实遵守」。Mā只有án-ne,诫命chiah会有意义。

第2到5节,chia表示chit-ê诫命kah顶pái ê诫命,是仝款ê,m̄-koh对象是无仝ê;顶pái ê对象是离开埃及ê以色列人民,chit-má是当年离开ê人ê kiáⁿ孙,mā就是chit-má存活ê对象。

第6到21节,这是十诫ê内容。主要ê差别tī第四诫有关守安息日ê原因,tī出埃及记强调tio̍h遵守安息日,是因为上帝「因为六日内,上主创造天、地、海kah hit 中间ê 万物,第七日就歇困,所以上主赐福tī 安息日,设立它做圣。(全民版)」(出埃及记二十:11)á tī申命记则强调遵守安息日是为tio̍h ài in记tiâu「你mā tio̍h 会记得你以前tī 埃及地做奴仆,上主— 你ê 上帝用大权能ê 手,伸出来ê 手骨,chhōa你tùi hia 出来,因为án-ne,上主— 你ê 上帝命令你tio̍h 守安息日。(全民版)」(本章第15 节)这就在内涵上有明显ê无仝。这mā表示申命记ê十诫已经tùi出埃及后ê时代背景,转移到进入迦南地后,tī安定而且富裕ê物质生活中,以色列人民渐渐疏忽了上帝语,尤其tī经济发达ê社会生活中,安息日无koh是歌颂、o-ló上帝ê日子,反tńg是koh khah无闲tī经济活动,这mā是先知耶利米bat传出上帝严厉ê警语,ài in收敛,确实遵守安息日做圣日,若是不听,上帝一定会hō͘ in沦亡(参考耶利米书十七:21—24),á chit项事果然分别tī主前721年,北国以色列被亚述帝国所灭,á南国犹大则tī主前586年被巴比伦帝国所灭,人民lóng被贩卖á是hông掠去做奴隶。因为án-ne,遵守安息日,是teh强调ài会记得上帝大能ê手kah拯救ê恩典。Mā thang án-ne了解:申命记有相当chiok厚ê tùi受掠之地tńg来国内ê时代背景,chit段十诫就是tī chit-ê背景下,重新强调遵守安息日chiah是保存kui个民族命脉ê重要力量。

Koh讲,tī第21节ê第十诫命kā「m̄-thang贪恋别人ê bó͘」,排tī「房屋」ê头前,这kah出埃及记kā「房屋」排tī「bó͘」chìn前,mā有无仝ê意义。显然地,进入迦南地后,in已经有土地kah khiā起之地,m̄-koh,koh khah khah强调伦理道德,to̍h是人kah人之间,左邻右舍ê互动关系,kah对财产ê尊重是同等重要。这mā thang看出chit段十诫是khah晚期ê作品。

第22节,chit节强调上帝只颁布这十诫,无其他ê。并且chit-ê诫命是刻tī「两块石版上」交hō͘摩西颁布hō͘以色列人民去遵行。



经文:

申命记 5:23-5:33

注释:

Chit段经文thang对照出埃及记第二十章18到21节来看。这是teh描述上帝颁布诫命ê时ê天地景象,意义就是teh说明chiah-ê诫命lóng有一工地做证,违反诫命等于无法度见容tī天地仝款。摩西Tī chit段话中主要teh强调:遵守上帝ê诫命,m̄是kan-taⁿ tī chit-ê代,á是beh延续到kiáⁿ孙ê身上。Koh讲,遵守诫命siōng重要ê一点,就是bē-tàng是选择性ê,却是一定tio̍h全部lóng遵守。

第23到27节,chia真清楚说明以色列人民顶一代众长老聚集来对摩西讲,in亲目看见上帝ê神圣kah伟大。并且同心诚意地表示beh遵守上帝所颁布hō͘ in ê诫命。

第28到31节,摩西kā以色列人民讲,上帝确实听见in所表达ê 诚心实意,并且beh kā一切律法lóng付托hō͘摩西,beh hō͘伊教导以色列人民。这mā是为十诫以外ê律法规章之出现做一个交带,表示十诫以外ê所有规律,并m̄是无中生有,却是上帝ài摩西去设法订出来ê。

第32到33节,强调所有颁布hō͘以色列人民ê命令,bē-tàng减少á是轻视某一条,每一条lóng tio̍h确实遵守。Án-ne,chiah ē-tàng得tio̍h上帝ê赐福。

经文:

申命记 6:1-6:9

注释:

这是非常重要ê一章,特别是tī第4到9节,被以色列人民看做是「示玛」(Shema),意思就是终身谨记在心,bē-tàng bē记得ê事。用心读申命记,就会发见有一句话一再重复叙述,就是beh以色列人民记tiâu,in是上帝tùi埃及作奴隶之地抢救出来ê,并且赐福hō͘ in有一片广大ê土地thang安心khiā起。上帝会kā in tùi埃及抢救出来,并m̄是因为in有甚么好,á是有甚么特别,只因为为上帝疼in,遵守kah in祖先之间所立ê永远之约ê缘故。因为án-ne,遵守上帝,等于是肯定上帝对以色列人民性命ê koh再造之恩,相对ê,如果疏忽了上帝ê诫命、律例,等于是teh否定上帝拯救ê恩典。Mā因为án-ne,tī申命记里,一再出现「相对」ê语句:如果遵守上帝ê律法,就ē-tàng存活;如果无,就会灭亡。

Chit段经文mā ē-sái讲是kui本圣经siōng中心ê经文。特别强调遵守上帝诫命ê重要性,并且iáu beh kā chiah-ê诫命教导了后代kiáⁿ孙严格遵守。

第1到3节,chit三节mā thang看做是遵守诫命之重要性ê序言。只有遵守上帝所颁布hō͘以色列人民ê诫命,in chiah ē-tàng tī迦南上帝赏赐ê土地上长居久安。

第4到9节,chit段经文被以色列人民列为「示玛」经文,表示一定tio̍h kui世人暗念,绝对bē-tàng疏忽á是bē记得ê经文。第4节讲tio̍h十诫ê第一诫,上主就是唯一ê上帝,他就是创造宇宙万物ê独一上帝,mā是带领以色列人民离开埃及ê上帝。

第5节是kui本圣经siōng中心ê一节经文,chit节讲:「Lín tio̍h全心、全情、全力疼上主――lín ê上帝。」chit节被引用tī耶稣ê教示中(参考马太福音廿二:37—38)。之所以有chit种教示,主要ê原因就是圣经ê作者认为人kah上帝之间ê关系,应该ná亲像夫妻之间ê关系仝款,一定tio̍h绝对忠实,无法度有任何半点thang质疑ê所在,mā就是kā kui个人ê性命lóng投入。

第6到9节,chia kā以色列人民讲一定tio̍h kā诫命教导后代kiáⁿ孙,而且tio̍h防止kiáⁿ孙bē记得,iáu beh kā chit-ê诫命缚tī手里、戴tī额头,写tī门框顶,án-ne,无论gōa chē,lóng会知影而且谨记在心。后来以色列人民用两种方式,(1)是kā chit-ê诫命写tī「静电带」(是一种特制ê带,听讲thang帮助祈祷ê人专心,无其他意念)上,kā此带ân-ân缚tī手股头 á是额头壳顶。(2)In kā chit-ê写tī小片羊皮上,然后khǹg tī 随身包中,án-ne,无论gōa chē,á是任何时chūn,lóng thang the̍h出来读、默念。真类似今á日有基督徒kā圣经ê金句卡片khǹg tī身上仝款。Á写tī「门框上」,是进出ê时,lóng thang看见á重复念一pái,就会记tiâu tī心中。

经文:

申命记 6:10-6:25

注释:

摩西tī chia特别提起上帝是信实ê,伊对以色列人民祖先所立ê约,永远会持守tio̍h。M̄-koh相对ê,以色列人民mā应该用chit种态度来严守kah上帝所立ê约。

第10到15节,一开始摩西就提起上帝无bē记得他对以色列人民ê祖先—亚伯拉罕、以撒、雅各等所应允beh赏赐ê应允。就是hō͘ in有肥ê土地thang khiā起,有众多kiáⁿ孙繁荣成做大族、大国。因为án-ne,伊提醒以色列人民, mài认为以后有真chē丰富ê物产,就认为是家己ê能力,其实,是上帝应允kah赏赐。伊ài以色列人民会记得出埃及ê事件,这是kui个以色列民族之所以ē-tàng生存落来ê原因,mā tī-chia重申tio̍h敬畏上帝,bē-tàng去拜偶像神明。

第16到19节,chia提起以色列人民bat tī玛撒试探上帝ê事件,thang参考出埃及记第十七章1到7节。「试探」一词,thang解说做「怀疑」,甚至是出怨言。摩西提醒以色列人民beh去做上帝认为「正kah善ê事」,mā就是用上帝语做中心,做上帝喜乐ê事。

第20到25节,chit段经文是beh以色列人民随时lóng会记得k了后代kiáⁿ孙讲上帝怎样救in脱离埃及ê手,tùi奴隶之地,进入到chit块肥ê土地khiā起之故事。用chit种方式来教导kiáⁿ孙知影感恩,用敬畏ê态度遵行上帝ê命令、诫命。

经文:

申命记 7:1-7:11

注释:

Chit段经文thang讲是摩西ê第二篇讲章。Tī chit段经文中,摩西teh提醒以色列人民进入迦南地后,应该tio̍h注意ê事项。

Chit章thang分做两个段落来看,就是提醒以色列人民知影:上帝拣选ê重要性kah意义,mā tùi chia讲tio̍h kah上帝之间bē-tàng bē记得ê性命ê约。Koh讲,chit章mā koh一pái强调遵守上帝诫命ê重要性,等于是kui个以色列民族生存ê凭据。

Chit段经文mā出现tī出埃及记第廿三章20到33节。

第1节,chit节提起有七个族群,其中ê「革迦撒人」这族群,tī出埃及记kúi-nā pái提起迦南地民族ê时,lóng无被提起。M̄-koh tī约书亚记第三章10节则有提起,而且七个族群ê名完全仝款。

第2到6节,chit段经文siōng主要teh说明一点:以色列人民一定tio̍h kah迦南地ê人区隔出来,因为in是hō͘上帝拣选出来分别为圣ê民族。区隔ê方式,就是不准通婚,mā不准kā in留tī迦南地,一定会kā in赶离,并且摧毁in ê宗教信仰,主要原因tī第4节,认为迦南地ê chiah-ê原住民会诱惑in弃sak上帝,去拜偶像神明。以色列人民之所以容易受诱惑ê原因之一,是当时迦南地ê文化水准大大超过tùi奴隶之地出来,而且iáu是用游牧为主ê以色列生活文化,因为án-ne,in会对迦南文化有相当ê向往kah渴慕之心。成(chiâⁿ)实teh进入迦南地后,in kah迦南地人通婚á弃sak上帝ê例,m̄-nā Tī一般人民中发生,mā发生tī国王身上,亲像所罗门王(参考列王记上十一:1—3),koh khah严重ê是亚哈王,伊娶外国cha-bó͘-gín-á做bó͘了后,iáu为tio̍h取悦bó͘,替bó͘建造寺庙、祭坛敬拜偶像神明(参考列王记上十六:29—33),chit种例在列王纪ê资料中相当chē。Á tùi撒母耳记上第八章记载以色列人民向先知撒母耳要求设立君王制度,其实,mā是一个例thang说明迦南地tī政治制度上已经有一定ê水准,chiah-ê lóng hō͘以色列人民向往。Mā是因为有chit种经验,chiah致使in后来teh编写申命记chit本经册ê时chūn,强化了chit种观点。

第7到8节,chit两节真清楚提醒以色列人民,m̄是因为in有甚么thang取ê所在,á是甚么伟大ê族群,上帝chiah拣选in,却是因为上帝「坚守」他向以色列祖先所下ê「诺言」,是tùi in尚且是siōng弱小ê族群,iáu是做奴隶ê时chūn,上帝就拣选了in。Chit点mā是使徒保罗所讲ê,上帝拣选咱成做他ê子民,并m̄是因为咱有甚么好值得上帝疼,反tńg是当咱iáu是罪人ê时chūn,上帝ê Kiáⁿ基督耶稣已经先为咱献上性命(参考罗马书五:6—9)。

第9到11节,chia koh一pái强调回应上帝拣选ê疼,siōng直接而且siōng好ê方式,就是遵守上帝ê诫命,只有án-ne chiah ē-tàng kah上帝维持美好ê关系。

经文:

申命记 7:12-7:26

注释:

申命记ê作者一直保持一贯ê思想脉络――遵行上帝旨意ê人,必定存活;违背上帝旨意ê人,会hō͘ 上帝所唾弃(第9到11节)。Chit段经文mā koh一pái说明chit-ê信仰准则,作者tī chia特别tùi两个角度来强调:(1)ài会记得过去上帝tī历史中ê奇妙作为。上帝tī历史中所行过ê大能大事,过去án-ne,现今mā是án-ne。(2)m̄免惊惶,有上帝同在。性命tio̍h óa靠真正上帝,只要有上帝同在,就m̄惊敌人是甚么款ê,不管是人chē,á是对方ê武力有多强,chiah-ê lóng bē难倒上帝ê子民,因为tī战争中,上帝会kah他ê子民做伙,而且会为他ê子民á战。

第12到16节,上帝是赐福ê上帝,对tī忠实ê子民,他ê赐福是非常实际ê,m̄-nā tī物质生活上会有美好ê收成,tī身躯上mā会蒙福。只要上帝ê子民知影忠实遵守上帝ê诫命kah命令,就会享有chiah-ê特别ê福份。

第17到21节,上帝用大能ê手kā以色列人民带领出埃及,表示任何强悍ê族群、国家lóng无法度抵挡上帝。只要以色列人民真实信靠上帝,上帝一定会成做in ê帮助者。

第22到26节,上帝既然应允beh kā迦南地赏赐hō͘以色列人民khiā起,就表示会kā当地ê民族交hō͘ in处置。M̄-koh以色列人民一定会tī信仰上坚守对上帝ê忠实,绝对bē-tàng因为偶像神明身上有当地居民供献ê金银珠宝,就起贪念。只要是偶像神明lóng tio̍h彻底摧毁,包括其身上任何贵重物件,lóng是上帝所讨厌ê物件。

经文:

申命记 8:1-8:10

注释:

Chit章是一篇非常好ê讲章,chit篇ê主题khǹg tī「旷野」。旷野,这原本是出埃及记ê主题中心。上帝ài摩西去kā埃及国王讲,hō͘以色列人民离开埃及,去「旷野」敬拜他。Mā因为是听tio̍h去旷野ê缘故,hō͘埃及国王相当看bē起以色列人民ê上帝,认为他是真无水准ê上帝,是一个甚么lóng无ê上帝。M̄-koh上帝就是beh hō͘埃及国王kah人民知影,甚么是旷野?为甚么是旷野?埃及国王kah人民是付出真大ê代价chiah认bat chit位创造万物ê上帝,是带领以色列人民行出埃及、进入旷野,然后koh带领in进入siōng肥ê土地ê上帝。Á这旷野对以色列人民有相当重要ê意义,是转换性格、生活态度,kah信仰确认ê所在。

申命记作者认为,上帝训练以色列人民siōng重要ê所在,就是tī旷野训练摩西四十年,然后差派伊去埃及带领以色列人民出来,续落来tī旷野漂流经历四十年之久,chiah会得thang进入迦南地。有旷野ê经历,chiah有迦南流奶kah蜜之地ê福份thang承受。因为án-ne,旷野m̄-nā tī出埃及记是真重要ê一个中心主轴,包括民数记,kah chit-má所读ê申命记lóng是kā焦点khǹg tī 回忆旷野漂流时代ê各种记事。

Chit段经文koh一pái强调一个中心信息:ē-tàng hō͘以色列人民安然经过四十年旷野漂流生活,m̄是因为in有甚么本等,mā m̄是因为in家己双手之力,却是因为上帝teh指引。作者因为án-ne特别提醒以色列人民一定tio̍h tiâu tiâu记tiâu,遵守kah上帝ê约,忠实tī上帝,án-ne chiah ē-tàng永远存活。

第1到3节,tī chit-ê三节经文中就是先提醒in「一定tio̍h切实遵行」上帝ê一切律法,án-ne,in chiah ē-tàng生存落去,chiah ē-tàng tī上帝应允ê土地上蒙福。然后作者ài in回想beh tī旷野漂流四十年期间所经历过ê一切,到处lóng lóng是上帝ê考验,为tio̍h是beh hō͘ in谦卑落来,boài认为家己真有办法,却是因为有上帝。上帝tùi天顶降落in从来无食过ê吗哪,hō͘ in学习tio̍h一个性命功课:「人ê生存m̄-nā是靠食物,却是靠上主所讲ê每一句话。」第3节说明人性命ê存在m̄-nā是tī肉体上ê,mā是tī心灵上ê。人ê心灵上会得thang满足,就ē-tàng赢过肉体上ê欠缺。颠倒,人如果tī肉体上不欠缺,却tī心灵上缺乏上帝,则会一再感受tio̍h性命ê bē满足、有欠缺(参考阿摩司书八:11—12)。

第4到6节,chia特别提起以色列人民虽然是行艰困ê旷野,m̄-koh in lóng安然无恙,原因是上帝对待in,「像老父管教伊ê kiáⁿ」仝款,虽然严厉,却是充满tio̍h慈爱。因为án-ne,谨守上帝、诫命、律法,就是生存之道。

第7到10节,chia真清楚描述上帝应允beh赐hō͘以色列人民khiā起ê土地,确实是流奶kah蜜之地,会hō͘ in食得饱,无koh有任何缺乏,因为he是一块富饶、肥ê土地。

经文:

申命记 8:11-8:20

注释:

前段经文讲述tī旷野ê事,chit段则进入迦南应允之地了后,tio̍h确实注意ê事。作者koh一pái提醒以色列人民,只有ē-tàng遵守上帝ê诫命、律法,千万m̄-thang偏离开拜偶像神明,若无,一定会带来灭亡。

第11到15节,第11节ê「tio̍h小心」,tī第14节koh一pái提起,表示这是非常重要ê事。进入迦南地了后,会有丰富ê物质生活,却mā是诱惑siōng大ê所在,千万m̄-thang bē记得上帝。Á人siōng容易bē记得上帝,是因为骄傲。Tio̍h回想ē-tàng经过hit-ê荒芜、毒蛇、毒虫、干旱之旷野,是因为上帝ê带领,chiah hō͘ in生存落来。

第16到17节,koh一pái提起tī旷野tùi天顶降落吗哪ê神迹奇事,人ê能力绝对无办法,是上帝hō͘ in ē-tàng óa靠吗哪食了四十年之久,bē致使挨饿。

第18到20节,一定「ài会记得」,in chit-má富有,是因为上帝赏赐,á上帝会án-ne特别照顾in,是因为上帝信守kah in祖先之间所立ê约ê缘故。chit-ê约ê主要mā是唯一ê内容:独独chit位带领in出埃及ê上帝,chiah是真实ê、独一ê上帝,无其他ê神明。如果以色列人民无严格遵守chit项约定,一定会hō͘上帝灭亡。

经文:

申命记 9:1-9:11

注释:

Chit章mā是仝款teh提醒以色列人民,m̄-thang认为in ē-tàng进入迦南地是因为家己真有能力,其实,是上帝teh带领、保守,chiah hō͘ in ē-tàng phah败迦南地ê原住民。Chit章mā提起in过去tī旷野hō͘ 上帝严厉惩罚ê原因,就是in无听从上帝语所致。

Chit段经文真清楚teh提醒以色列人民,m̄-thang认为家己有甚么特别能力thang赶走当地ê原住民,是因为上帝出手帮助ê缘故。主要lóng tī提醒以色列人民一定tio̍h谦卑,以上帝为kui个民族ê中心。

第1到3节,chit两节thang讲是回应民数记第十三章,摩西差派人去窥探迦南地,tńg来后报告讲:「总是,hit 所在ê 人民勇壮,城mā 坚固koh 阔大, 阮tī hia mā 看tio̍h 亚纳族。(全民版)」(民数记十三:28)chit-má,上帝beh带领in进入迦南地,即使当地ê人民有ná「巨人」á是有高大ê城墙,以色列人民却ē-tàng得胜。这是因为有上帝tī头前带领ê缘故。

第4到6节,chit段经文特别提起以色列人民一定ài会记得上帝,是他ê缘故chiah ē-tàng顺利进入迦南地,并m̄是因为以色列人有甚么好ê德行、品行,却是当地居民败坏、邪恶。另外一方面是上帝为tio̍h beh履行他对以色列人民祖先所立ê约ê缘故。

第7到11节,摩西特别Tī chit段经文中提醒以色列人民,in bat tī旷野背叛上帝。换句话讲,若m̄是上帝怜悯、赦免,in早就死tī旷野了,无今á日ê机会。伊提起hit-pái引起上帝极大忿怒ê事件,当时伊上山tī hia停留四十暝日,领取上帝刻tī两块石版上ê十诫之诫命。

经文:

申命记 9:12-9:29

注释:

Chit段经文是讲tio̍h tī何烈山领受上帝十诫ê经过。Tī出埃及记第三十二章mā有记载chit件「拜金牛」事件。Hit时in因为摩西上山长到四十暝日,以色列人民认为伊已经出了意外,要求亚伦替in造金牛hō͘ in thang来崇拜,chit件事引起上帝大大受气,并且做出决定:beh tùi性命册上除掉hiah-ê犯罪ê人名(出埃及记三十二:33—34)。摩西重新讲述chiah-ê事件,主要是teh提醒in一定tio̍h注意过去所犯ê过错,千万m̄-thang koh再犯。一定会对上帝忠心,án-ne chiah ē-tàng tī上帝赏赐ê土地上永远khiā起落去。

第12到14节,摩西hō͘以色列人民知影,当上帝看见in弃sak他,铸造偶像神明teh拜ê时,非常忿怒,甚至想beh改变拣选ê对象,beh立摩西当做新ê族群,hō͘伊ê后代成做选民。

第15到21节,chit段经文thang tùi出埃及记第三十二章看tio̍h kui个背景。摩西hō͘这新生代知影,上帝非常忿怒in顶一代弃sak他,去拜金牛。摩西非常受气,kā刻tio̍h上帝颁布十诫ê两块石版,摔tī土脚破碎了,用chit种方式表示in kah上帝之间ê关系已经破坏à。M̄-koh摩西深惊上帝ê忿怒会消灭所有以色列人民,伊替以色列人民代求,恳求上帝怜悯赦免,特别是亚伦mā是tī伊祈求赦免之下chiah得tio̍h上帝ê赦免。Mā为tio̍h beh减轻上帝ê忿怒,摩西对以色列人民采取严厉ê惩罚,就是ài in kā所铸造ê金牛磨成粉,掖tī溪水里,hō͘人民lim下hiah-ê水,用chit种方式来表示认罪、悔改,kah洁净家己。出埃及记mā讲摩西iáu bat命令利未人lóng配剑,kā参与祭拜金牛偶像神明ê以色列人刣死,hit-pái大约有三千人被杀(参考出埃及记三十二:28)。同时摩西继续为tio̍h án-ne事祈求上帝ê怜悯kah慈爱,甚至愿意以家己ê名hō͘ 上帝删除来换上帝赦免以色列人民(参考出埃及记三十二:32)。

第22到24节,tī第22节所提起ê「伊备拉」,thang参考民数记第十一章1到3节ê资料,「伊备拉」这地名ê意思是:上帝ê火tī hia烧in,原因是in埋怨上帝,上帝tùi天顶降火烧in。「玛撒」,chit件事发tī出世koh名叫米利巴ê所在,以色列人民因为无水lim á埋怨摩西,上帝ài伊the̍h手中ê拐á phah石磐,结果石磐流出水(参考出埃及记十七:1—7)。「基博罗・哈伊瓦」,tī民数记第三十三章16节提起chit所在名ê意思是「贪欲ê坟墓」,á chit位称出现tī民数记第十一章34节,背景是以色列人民埋怨无肉食,上帝为tio̍h án-ne赐hō͘ in鹌鹑肉食,直到in因为拾拾siuⁿ chē肉,发生瘟疫,死去bē少人,in kā hiah-ê染上瘟疫á死ê人埋葬,所以有chit-ê名称。第23节ê「加低斯・巴尼亚」,背景记载tī民数记第十三到十四章,in因为听信hiah-ê探子ê 回报á惊惶,拒绝进入迦南地。为chit件事,in确实付出了siōng大ê代价,只要是tùi埃及出来、年满二十岁以上ê人,lóng无法度进入迦南地。摩西ê chit句:「tùi我认bat lín以来,lín不时背叛上主。」讲出以色列人民确实kah上帝所讲ê仝款,是心内真顽固ê子民(参考第6节)。

第25到29节,摩西tī chia一再提醒以色列人民,若m̄是上帝记念他kah祖先亚伯拉罕、以撒、雅各之间所立ê约,以色列人民早就hō͘ 上帝所灭亡消失à。上帝会留落来in ê性命,是因为他beh维护家己ê荣誉,m̄ hō͘迦南人、埃及人认为上帝无能力thang kā以色列人民带入去迦南地。因为án-ne,他一定会kā以色列人民带入去迦南地。Á这mā是摩西向上帝恳求chiah得tio̍h ê怜悯恩典。

经文:

申命记 10:1-10:11

注释:

Chit章koh一pái提起上帝重新kah以色列人民立约ê经过,并且koh一pái提起遵守上帝颁布ê诫命ê重要性。

Chit段经文mā thang参考出埃及记第三十四章1到10节。描写两件tāi-chì:一是上帝重新颁布两块刻有十诫ê石版,koh讲,是kā chit两块石版存khǹg tī特别制造ê约柜中。

第1到5节,原本记载tī出埃及记第三十四章1到10节,是有关上帝吩咐摩西koh一pái接受新ê法版,因为原来ê法版已经被摩西摔碎了(参考九:17)。这法版是刻tio̍h上帝ê十诫,mā是以色列人律法ê基础。M̄-koh tī chia mā会造约柜ê事一并加入ê记事,是记载tī出埃及记第廿五章10 到22节。重新颁布hō͘以色列人民两块十诫ê石版,表示上帝愿意kah以色列人民重新和好。

第6到9节,除了记载亚伦往生,以及伊ê kiáⁿ以利亚撒续接担任大祭司ê职务外,koh一pái重述利未人ê角色kah职分,m̄-nā是负责看守约柜,mā tio̍h担任祭司ê角色kah工作。约柜,这是属tī「上主ê」,因为án-ne其重要性不言thang知。因为它teh代表上帝临在以色列人民中间。M̄-koh khah重要ê,是约柜中存放tio̍h十诫,这teh代表上帝ê诫命。因为án-ne,若是无十诫石版,约柜就无甚么特别重要性。

第10到11节,仝款ê,chit pái摩西上山去领受上帝颁布hō͘以色列人民一定tio̍h遵守ê律法命令,并且tio̍h继续带领以色列人民朝向迦南地ê方向行去。

经文:

申命记 10:12-10:22

注释:

Chit段经文koh一pái提醒以色列人民一定tio̍h严格遵守上帝ê一切教示。绝对tio̍h尊崇上帝为唯一ê真神,只有án-ne,in chiah ē-tàng生存落去。Á遵行上帝ê教示,siōng基本ê,就是tùi生活环境中细微tāi-chì开始做起,如照顾孤儿寡妇,m̄收受o͘-se,实践公义ê道理。

第12到16节,chia重复第六章5节所提起ê教导,一定会用全部心力疼上帝,只有疼他、事奉他,chiah是回应上帝拣选ê疼。

第17到19节,koh一pái说明kui本圣经ê两大主题:其一是上段所讲ê,疼上帝,chia是beh疼「厝边」。而且chia所讲ê「厝边」,乃是指hiah-ê「外侨」kah孤儿、寡妇。In常tī社会中hō͘人所疏忽,á外侨koh khah是容易被排斥ê对象。上帝一再提醒以色列人民,ài in谨记家己mā bat tī埃及当过奴隶,应该比其他民族koh khah清楚身为奴隶ê痛苦。Tio̍h注意,chia ê「外侨」,mā有「寄居」者ê意思。Á这寄居一词,用tī以色列人民身上,mā thang表示奴隶ê意思。Tùi家己生存经验中所bat受苦难ê同理心,来对待kah看顾hiah-ê tú-tio̍h苦难ê人,这mā是圣经要求基督徒tio̍h尽ê责任。

第20到22节,劝勉以色列人民一定会敬畏上帝,对上帝tio̍h绝对忠心。只有án-ne,chiah会得tio̍h上帝ê赐福,赏赐hō͘ in无穷尽ê福气。Ná亲像当年雅各带领kui个家族进入埃及ê时,不过只有七十人,m̄-koh后来经过人口调查了后,单单是cha-po͘人,就已经超过了六十万人了(参考民数记廿六:51)。

经文:

申命记 11:1-11:7

注释:

Chit章thang分做三个段落来看,一是第1到7节,kā上帝带领以色列人出埃及ê经过,以及吕便后代叛变ê事hō͘浓缩。二是第8到25节,chit段是提醒in进入迦南地了后,一定会切实遵行上帝ê教导,m̄-nā是in tio̍h遵守,mā tio̍h kā上帝ê诫命、律法、命令lóng一一教导hō͘ in ê kiáⁿ孙遵行,只有án-ne,in chiah ē-tàng tī上帝赏赐ê迦南地长居久安。三是摩西真清楚表明:这是一种祝福kah诅咒之间ê选择。

Tùi第1、13、22节等等lóng一再提起仝款ê警语,就thang看出遵守上帝ê诫命是jōa-ni̍h-á重要。

第2到4节,chit段是针对chit群出埃及而且存活继续前往到约旦河东岸ê以色列人民讲,摩西kā出埃及ê神迹大部分作说明,hō͘ in重温当年出埃及亲目看见上帝怎样对付心硬ê埃及人、军队,kah in ê国王等,彻底kā hiah-ê tui-jiok以色列人民ê埃及军队hō͘全部灭亡。

第5到7节,这几节thang参考民数记第十六章,摩西简略地提起发生tī吕便家族ê事,就是大坍kah亚比兰叛变,认为摩西kah亚伦无资格当in ê领导者,甚至否认摩西ê领导权威,结果hō͘ 上帝严厉惩罚,kā in kah家族ê人lóng hō͘消灭。

经文:

申命记 11:8-11:25

注释:

Chit段是koh一pái重述过去ê历史经验,为tio̍h是beh以色列人民tiâu tiâu记tiâu上帝tī in历史中ê恩典。Ài in知影,疼上帝、谨守上帝ê诫命,就是生存之道。

第8到9节,koh一pái强调遵守上帝ê诫命,只有án-ne,上帝chiah会kah in同行,带领in进入迦南应允之地。而且hō͘ in kah kiáⁿ孙永远生活tī hit块土地上。

第10到12节,chia讲寄居tī埃及ê时代,in一定tio̍h辛劳chiah thang得温饱,m̄-koh tī迦南应允之地,整年lóng有上帝看顾,永远bē有缺乏。

第13到17节,chit段经文强调对上帝忠实,是比任何事lóng重要。因为谨守上帝,对上帝绝对忠心,án-ne,就会蒙上帝赐福,永远bē缺乏。相对ê,若以色列人民弃sak上帝,去拜偶像神明,就会惹起上帝忿怒,致使「土地干旱,五谷不生」,án-ne,就算迦南是一片流奶kah蜜之地,mā会真紧to̍h贫瘠,人kah所有家畜动物lóng会死亡。

第18到21节,chit段经文mā是申命记中ê第二段「示玛」(Shema)经文,kah第六章4 到9节ê内容仝款,lóng是beh暗念谨记在心ê经文,mā是用来教导子女暗念ê经文。Tī第21节增加遵守诫命ê应允:thang kah天地共存。这真清楚teh kā以色列人民讲thang无忧无虑安心生活tī迦南土地上,m̄免担心会有外族人入来攻打in。因为上帝必定会保守看顾in。

第22到25节,chit段经文真清楚表示:只要以色列人民谨守上帝,上帝一定会成做in ê带领者,tī in头前赶走所有进入迦南应允之地ê障碍。所有khiā起tī附近ê国家、民族,今后只要听tio̍h in,lóng会惊惶。因为有上帝kah in同在ê缘故。

经文:

申命记 11:26-11:32

注释:

Chit段经文ē-sái讲是第一到十章ê结论。摩西讲这是关系生kah死ê选择,是祝福kah诅咒间ê选择。遵守上帝,就是带来祝福,相对ê,是为家己带来死亡(诅咒)。

第26到28节,chit三节讲出祝福kah诅咒之间ê差别;祝福,是遵行上帝ê一切诫命。诅咒,就是相对tī祝福,无kā上帝颁布ê一切诫命落实出来。

第29到30节,「基利心山」,这是古代示剑城西北约三公里ê所在。Chia mā是撒马利亚人一再强调ê,是亚伯拉罕kā以撒献祭ê阿摩利山(参考创世记廿二:2)。因为án-ne,in一再强调tio̍h敬拜上帝,就一定tio̍h tī chit所在(参考约翰福音四:20)。Á北面就是「以巴路山」,两处tú好相对,形成一个峡谷,成做siōng容易防守ê军事要地。摩西bat吩咐以色列人民,当in pôaⁿ过约旦河ê时,beh khiā立一座记念碑tī chit-ê座山顶,tī碑ê顶面涂上石灰。摩西讲当进入迦南地了后,就用这两座山,讲出祝福kah诅咒,表示用这两座山当做儆醒ê记号。若是以色列人民一直坚守kah上帝ê约,确实遵照上帝去行,就会看tio̍h上帝赐福ê恩典,若无,就会看见敌人进入以巴路之地,á这就是诅咒ê开始。

第31到32节,chit两节就是总结:遵守上帝,就ē-tàng tī占领ê迦南地永久生存落去。

经文:

申命记 12:1-12:14

注释:

Chit-ê大段经文ē-sái讲有关以色列人ê「典章kah律例」。这几章提起以色列人民进入迦南地了后,关系宗教、家庭、社会等生活上应该有ê各种规范。

Chit章主要teh告诫以色列人民,当in进入迦南地了后,绝对bē-tàng接收当地人ê神庙改作敬拜上帝ê所在,「tio̍h选定一个特定ê场所」敬拜上帝(第14节),chit-ê观念一直贯穿tī kui本申命记里,亲像第十四章14、25节、第十五章20节、十六章2、5、7、15、16节、第十七章8节、第十八章6节、第廿六章2节等等。Chit-ê观念是成做后来大卫王计画建造耶路撒冷圣殿ê基础。之所以禁止接收当地人ê神庙做敬拜上帝ê场所,原因之一是惊以色列人民引用了当地人敬拜偶像神明ê方式,掺杂teh敬拜ê礼仪中,致使上帝ê纯洁、神圣受tio̍h污染。

Chit章mā有一个重大ê改变,就是关系食肉ê问题。原本以色列人将动物分做三种,一是无清气ê动物,这tī利未记第十一章已经有明确规定。二是一般人tī厝里食ê肉类。三是献祭ê动物。以前宰杀动物是为tio̍h beh献祭用,因此动物ê油脂一定tio̍h先khǹg tī祭坛顶烧,然后koh再献上动物ê肉(参考利未记十七:1—7)。chit-má是只要将血放掉,所有动物ê肉lóng thang食。这是放宽条例、禁令,为tio̍h是behm̄ hō͘以色列人民进入迦南地后,因为缺乏食物á起贪婪ê心。Chit种规定mā产生一个新ê危险:将宗教行为kah家庭生活区隔出来,to̍h是为tio̍h beh敬拜上帝,一定tio̍h行到一个规定ê所在,tī hia献祭。M̄-koh,tī厝里ê一切,lóng属tī世俗ê。主前586年以色列亡国tī巴比伦后,「会堂」敬拜kah研习律法、诫命,成做挽救kui个民族灭亡ê主要因素,á会堂就无koh有献祭ê行动à。明明确知影上帝ê话语,并且确实遵行tī生活中,远比献祭iáu koh khah重要,这mā是后来先知运动中一再呼吁ê(参考弥迦书六:6—8)。

Tī chit段长到廿五章ê篇幅中,大部分上thang án-ne分段落:一是第十二章1节到第十六章17节,是有关敬拜上帝ê事;二是第十六章18节到第二十章20节,谈及有关国家ê事;三是第廿一章1节到第廿三章1节,讲tio̍h有关家庭生活ê规律;四是第廿三章2节到第廿五章19节,谈及有关洁净ê事,mā包括了社会生活法则;五是第廿六章1到15节,讲tio̍h有关奉献ê事,以及十分之一奉献应该tio̍h遵守ê规章。

Ná亲像头前所讲ê,chit段经文主要强调只有ē-tàng选择一个敬拜上帝ê场所,做敬拜上帝ê所在。Tī十诫里真清楚,惟独敬拜创造万物ê独一上帝,bē-tàng敬拜其他受造物,mā bē-tàng雕刻in ê像做敬拜之用。Chit段经文则进一步细讲所拜ê上帝一定tio̍h有一定ê规范。

第1到3节,摩西kā以色列人民讲,进入迦南地了后,一定会遵守上帝hō͘ in ê「一切律法诫命」,而且是beh终生遵守。为tio̍h án-ne,一定会kā迦南地原住民族所崇拜ê偶像神明全部lóng除掉,包括拆毁in ê祭坛。Mā就是bē-tàng留落来in敬拜ê神明ê任何痕迹。

第4到7节,除了bē-tàng模仿in敬拜ê方式外,一定tio̍h tī各支派khiā起ê区域中,「选一个特定ê场所,hō͘人tī hia敬拜」上帝,做各种献祭礼仪之用,以及「献十分之一捐」,全家ê人lóng thang tī献祭ê场所食献祭之物。这mā说明敬拜上帝,m̄是只有派出代表,却是全厝内人lóng一定tio̍h参与ê事。

M̄-koh若是重大节期,全家lóng出动可能就会发生困难,m̄-nā是敬拜上帝场所ê问题,mā tio̍h预防附近族群藉机侵犯ê危险。所以虽然有chit种规定,却从来无实行过。

第8到14节,tī旷野漂流期间,无法度整合,m̄-koh teh进入迦南应允之地后,khiā起生活安定了,就进行整合敬拜ê方式。献祭ê时tī各族群中lóng有分配到利未人thang帮忙献祭ê礼仪。

Chia提起十分之一奉献kah利未人ê事,特别强调利未族人并无家己ê土地,因此chiah-ê十分之一奉献是kah维护in生活有密切关系。Koh khah重要ê是tī第13到14节,表示只有ē-tàng tī上帝选定ê所在献祭,是teh指全国只有一个所在是敬拜ê场所,这已经kah头前第5节所提起ê tùi各支族ê地区中选出场所敬拜上帝无仝。所以第13到14节chia所表示ê,就是中央圣所,这mā为后来耶路撒冷圣殿做中央敬拜场所记落来一个伏笔。

经文:

申命记 12:15-12:28

注释:

Chit段经文koh一pái提起献祭tio̍h注意ê事项,mā koh一pái提起十分之一奉献kah照顾利未人ê需要,并且提起有关食肉食tio̍h注意ê事项。

第15到19节,chia讲任何动物ê肉lóng thang随意宰杀来食,以前是规定一定tio̍h带到圣所chiah thang,chit-má改变了chiah-ê规定。若m̄是为tio̍h献祭,只是生活上ê需要,就ē-tàng tī家己厝里宰杀来食。唯一tio̍h注意ê,就是无论tī tó位食肉,lóng tio̍h kā血放出来,bē-tàng食有带血ê肉,chit点是非常重要ê。Beh奉献hō͘上帝ê十分之一是属tī上帝ê份,就bē-tàng挪用。Koh一pái提醒in tio̍h会记得利未族人ê需要。

第20到22节,chit段经文特别提起若是khiā起ê所在离中央敬拜场所siuⁿ远,就ē-tàng tī家己khiā起ê所在宰杀家畜动物,并且食chiah-ê肉品。而且是不管甚么肉品lóng thang食,这kah过去规定礼仪上无清气ê bē-tàng食,已经大有改变。

第23到28节,chia koh一pái重复警告,绝对bē-tàng食含带有血ê肉品。因为血是性命ê记号,是用来献祭赎罪。献祭动物ê血tio̍h倒tī祭坛处,á tī厝里食ê动物之血tio̍h倒掉,án-ne真容易执行kah分辨。Chia mā强调:只要严格遵守chiah-ê规律,就会蒙上帝ê喜乐。

经文:

申命记 12:29-13:18

注释:

Chit段经文lóng是teh严厉警告以色列人民千万m̄-thang弃sak上帝,去拜偶像神明。若无,一定会引起上帝ê忿怒。Á为防止tī以色列人民中间出现chit种诱惑人民弃sak上帝ê人,只要查出来,一定会Kā chit种人处死,连siōng亲近ê人mā仝款,bē-tàng对chit种人存任何怜悯ê心。

第十二章29到30节,chit段经文thang对照第十二章1到3节,就ē-tàng清楚看出以色列人民进入迦南地了后,并无能力kā外族人á是当地原住民驱赶伊去。因为若是有能力,就m̄免担心学习当地风俗kah宗教礼仪ê行为出现。

第31节真重要,chia讲bē-tàng kā迦南人拜偶像神明ê礼仪引进耶和华宗教敬拜礼仪中。换句话讲,bē-tàng用拜偶像神明ê方式掺杂teh敬拜上帝ê事顶面。这就表示bē-tàng参观、拜访、询问。M̄-koh事实上,后来以色列人民进入迦南地后,深受当地ê宗教行为影响,连国王lóng用in献人为祭ê方式,祭拜偶像(参考列王记下十六:3、十七:17、廿一:6、廿三:10)。表示in m̄-nā无执行上帝警告,反tńg是领导者故意带头犯错。

第32节,chit节原本tī希伯来圣经是编辑tī第十三章1节。表明上帝ê命令、诫命、律法、规章、律例等,lóng bē-tàng随便加添á是更改。因为这是hō͘以色列人民成做圣洁上帝子民ê基础。

第十三章1到5节,chit段经文提起有假先知出现tī以色列人民中间,chiah-ê人会假借上帝ê名义讲虚假ê信息,搅乱人民对上帝忠实ê心。特别是chiah-ê人mā会行神迹奇事来迷惑人跟tòe in弃sak上帝。因为有chit种人出现,tú好thang考验以色列人民是m̄是对上帝忠实,是m̄是真心跟tòe上帝ê诫命做tāi-chì。摩西特别交带,若有发见chit种迷惑人心弃sak上帝ê人出现,就算in有能力行神迹奇事,mā tio̍h Kā chit种人hō͘处死。因为以色列人民惟有一位上帝,就是带领in行出埃及奴隶之地ê上帝,其他ê lóng无算是真正神,绝对bē-tàng敬拜。

第6到11节,前段讲tio̍h有假先知á是解梦者出现,chia是tī家族中siōng亲密ê人来诱惑,就算是siōng亲近ê人,mā tio̍h Kā chit种人除掉,无论是tī公开场合,á是tī暗中传达信息迷惑人心弃sak上帝,对chit种人lóng mài有任何一丝丝怜悯,一定会除掉,án-ne chiah ē-tàng吓阻迷惑人心弃sak上帝ê行为。Tī第9节强调惩罚chit种人ê方式,就是用石头phah死,表示chit种人ê行为是到à亵渎上帝之程度,罪bē-tàng赦。

第12到18节,chit段经文讲tio̍h tī城市内发生ê事。因为城市内人chē,容易隐藏chit种诱惑人心弃sak上帝之行踏,因为án-ne,chia规定koh khah严格,只要查到chit种人出现tī某一个城市,就beh kā hit-ê城完全、彻底ê消灭,连hit-ê城ê财货lóng bē-tàng存留。因为城市人chē势众,影响力mā大,若无án-ne处置,一旦扩散开来,就真oh挽救tńg来。

经文:

申命记 14:1-14:2

注释:

Chit章主要有两点,一是koh一pái区分清气kah无清气之动物。二是讲tio̍h有关什一奉献ê事。

Chit两节thang参考利未记第十九章27到28节。摩西律法清楚讲tio̍h上帝ê选民bē-tàng跟tòe一般人ê风俗,tio̍h确实kā家己分别为圣出来,是kah迦南地ê人民无仝款。

原因是迦南人teh办丧事ê时,家属有剃头kah割伤家己身躯ê风俗,chit种情形直到先知耶利米ê时代iáu存在tio̍h(参考耶利米书十六:6、四十一:5),可见以色列人民tī迦南地khiā起久了,已经kah当地人ê风俗掺杂做伙à。不准割伤身躯ê规定,是因为身躯tùi上帝来创造,绝对bē-tàng乱使用。

经文:

申命记 14:3-14:21

注释:

Chit段经文thang参考利未记第十一章,中间讲tio̍h所谓清气kah无清气ê动物。

第3到8节,chit段经文提出án怎分辨清气kah无清气动物ê方法。

第9到10节,这是关系甚么种类ê鱼thang食,甚么是bē-sái食ê鱼。

第11到18节,这是关系空中飞翔ê鸟类mā有清气kah无清气ê分别。

第19到20节,这是规定洁净á无ê昆虫。

第21节,自然死去ê动物之所以bē-tàng食,是因为自然死去ê动物肉里iáu有血。因为bē-sái食带有血ê肉,m̄-koh thang kā它送á是卖hō͘外邦人。

「bē-tàng用母羊ê奶煮小羊ê肉来食」,chit句话thang参考出埃及记第廿三章19节、第三十四章26节。真可能是迦南人用chit种方式来祭祀in ê神明,认为án-ne神明chiah会欢喜。因为án-ne,严厉禁止,表示bē-tàng Kā chit种祭祀偶像神明ê方式引用到敬拜上帝ê礼仪上。

经文:

申命记 14:22-14:29

注释:

这是一段有关十分之一奉献ê规定。Tī创世记第十四章20节,记载亚伯拉罕phah赢仗tńg来后,取出十分之一ê战利品hō͘祭司麦基洗德。雅各tī伯特利ê时chūn,bat向上帝下愿,ài kā上帝赐hō͘伊ê一切「献上十分之一」(参考创世记廿八:22)。Tī本册第十二章mā提起十分之一ê奉献条例(参考第6节、第11节、第17节)。十分之一,teh代表一个基本ê意义:一切tùi上帝来,因为án-ne,应该有一份是属tī上帝ê。换句话讲,十分之一奉献是teh提醒以色列人民m̄-thang bē记得上帝ê恩典。这十分之一有两种用途:(1)是提供给利未人ê需要,(2)是为tio̍h帮助hiah-ê外侨、孤儿kah寡妇,mā就是当做赈济sàn-chhiah人ê需要。

第22到26节,chia真清楚讲tio̍h十分之一,是包括所有收入。农业时代siōng主要ê收入,就是农作物。有时chūn mā有工钱。M̄-koh lóng tio̍h提拨十分之一奉献hō͘上帝。若是家畜á是大宗农作物,离敬拜上帝ê场所真远,有带上ê困难。Mā thang kā它变卖,kā钱带到敬拜上帝ê场所当做奉献。
第27到29节,chit三节清楚说明这十分之一ê奉献用途,是为tio̍h beh赈济外侨、孤儿,kah寡妇,mā包括无家己产业ê利未人。Á每三年最后一年之十分之一奉献,全部用tī chia。

经文:

申命记 15:1-15:11

注释:

Chit章提出两件重要ê事,一是关系安息年ê规矩,二是关系对待奴隶ê条例。最后koh一pái提起ài kā头胎生ê家畜动物分别出来,因为he是属tī上帝ê。

Chit段经文mā同时记载tī利未记第廿五章1到7节。所谓安息年,这是为tio̍h hiah-ê sàn-chhiah人所订ê律法,主要目的是beh hō͘ sàn-chhiah人有机会得tio̍h「重新koh来」ê机会,免得sàn-chhiah人因为负担利息á一直承受生活ê压力。Chit条律法mā teh表示整体以色列人民就kah-ná是一个大家庭,有钱人有义务kah责任照顾sàn-chhiah ê兄弟,án-ne chiah bē因为sàn-chhiah á一定tio̍h向外人举债,变成被外国人掌控ê民族,甚至沦落成做负债ê奴隶。

第1到3节,「每七年ê尾一年」,这表示第七年ê意思。Tī chit年「tio̍h豁免同胞ê债务」,表示kah上帝创造宇宙万物,第七年歇困有关系。安息,原本ê意思表示一切停止。Án-ne,thang hō͘家己kah土地lóng得tio̍h歇困、重新得力ê机会。Chia规定对外国人m̄免有安息年ê规定,m̄-koh对家己ê同胞,一定tio̍h严格遵行,无论家己同胞欠了甚么债务,lóng tio̍h豁免,无koh追讨。

第4到6节,只要照这规定去遵行,以色列人民中间就bē出现sàn-chhiah人,án-ne,国家就会富强,bē受tio̍h外国人ê箝制。因为上帝喜乐chit种子民。

第7到11节,chia提醒以色列人民tio̍h对sàn-chhiah人生出怜悯ê心,主动慷慨帮忙,kā sàn-chhiah人所需要ê hō͘ in协助kah借hō͘。不借、不伸手帮忙,就是犯罪。因为帮助是一种责任kah义务。

经文:

申命记 15:12-15:18

注释:

Chit段经文是关系对待奴隶ê条例,mā同时记载tī出埃及记第廿一章1 到11节。强调tio̍h好款待奴隶,主要是teh提醒以色列人民mā bat tī埃及当过奴隶,是上帝「tháu放」了in ê缘故。因为án-ne,in mā需要学习上帝ê仁慈,tháu放in中间ê奴隶。

第12节,chit节开始就说明chiah-ê奴隶是因为厝里sàn-chhiah á卖身举债。当服事六年了后,tī第七年就是安息年,就beh tháu放in tńg去,而且无条件地tháu放,hō͘ in重新得tio̍h完全ê自由。

第13到15节,chit段经文是非常人道ê。当安息年来到,tháu放奴隶ê时,bē-tàng hō͘伊空手á tńg来。因为伊就是sàn-chhiah chiah卖身来做奴隶。taⁿkoh教伊空手tńg去,伊iáu-koh sàn-chhiah。因为án-ne,一定tio̍h慷慨地hō͘伊够额ê羊kah五谷等食物,án-ne,当伊tńg去厝里乡ê时,厝边看见会认为伊是去外乡thàn钱tńg去,bē认为伊是卖身为奴。Chia特别提起以色列人民mā bat tī埃及当过奴隶,tio̍h离开ê时,上帝mā仝款hō͘ in尊荣地离开埃及,而且手上装满了埃及人hō͘ ê珠宝财物(参考出埃及记十二:35—36)。

第16到18节,tùi chia就thang看出有ê人做奴隶,是kah头前所提起ê举债有关系,因为欠钱举债,有时一定tio̍h用奴工来还债。因为án-ne,规定bē-tàng hō͘一个人永远成做奴隶,因为he m̄是上帝ê疼。除非是心甘情愿做奴隶,因为主人好款待伊,chiah hō͘ chit-ê人感觉有感恩图报一生ê必要。Á做一个人心甘情愿做奴隶ê时chūn,tī耳根穿孔,表示伊愿意终身为奴感谢主人,mā是teh表示当chit-ê奴工年老体衰ê时,主人无法度弃sak伊,因为主人有照顾奴隶ê责任。Án-ne好款待奴隶,mā是得tio̍h上帝赐福ê要件。

经文:

申命记 15:19-15:23

注释:

Chia提起头胎ê家畜lóng是属tī上帝ê,因为án-netio̍h献hō͘上帝。Mā thang参考出埃及记第廿二章29到30节。

第19到20节,头胎ê公牛、公羊是属tī上帝ê,因为án-ne,bē-tàng食,mā bē-tàng剪这公羊ê毛,á是kā chit头公牛带去种作。Á是beh kā它献祭hō͘上帝。然后teh献祭了后,食chit种牛羊ê肉。

第21到22节,chit两节提起有关残缺ê牛羊,虽然是头胎ê,m̄-koh因为身躯有残缺,就bē-tàng献祭hō͘上帝。Mā thang参考利未记第廿二章19到21节。第22节ê所谓礼仪上是「无清气ê」,是teh指做一个人因各种情况,变成无清气ê人,亲像摸到死人ê尸体,á是妇女tú-tio̍h生理周期来ê时chūn。

Siōng重要ê是bē-sái食带有血ê肉,就算是残缺ê头胎生之牛羊,tī宰杀ê时,mā是仝款,beh kā它ê血放出来了后chiah thang煮来食。

经文:

申命记 16:1-16:8

注释:

Chit章分别提起三个以色列人民看做siōng重要ê节日:Pôaⁿ过节、七七收成节、Tòa棚节。Chit三个节期ê规定mā分别记载tī出埃及记第十二章1到20节;利未记第廿三章15到21节,kah利未记第廿三章33到43节等等。Tio̍h注意ê是tī第16 到17节,chia讲以色列cha-po͘人每年至少chit三pái节期lóng tio̍h参加,而且是beh「到上主所选定ê场所敬拜伊」(第2节、第5节、第7节、第11节、第15节、第16节等等),这koh一pái强化了只有一个敬拜场所ê重要性,mā就是中央敬拜场所。

这是关系Pôaⁿ过节ê活动。

第1到2节,所谓「亚笔月」,这「亚笔」一词,是teh指新ê麦穗,á新麦穗发出来大约就是tīchit-má ê三、四月间,mā就是春天ê季节。Á「Pôaⁿ过节」真清楚,其由来thang参考出埃及记第十二章1到14节,是记念上帝拯救以色列人民行出埃及奴隶之地ê恩典节期。因为án-ne,这天一定会献上感恩ê祭品,表示感谢上帝ê拯救恩典。

第3到4节,讲beh食无酵饼「七工」,其实,这是包含Pôaⁿ过节ê隔工开始ê除酵节节期,á chit节期ê规定thang参考出埃及记第十二章15到20节。Koh讲chia对「无酵饼」有一个新ê解释,表示「苦难饼」,是记念脱离埃及苦难ê日子。

第5到8节,chia规定Pôaⁿ过节tio̍h献祭ê牲畜,一定tio̍h teh敬拜上帝ê场所chiah thang宰杀,而且tio̍h tī敬拜场所食献祭之物。Á tī接落去ê除酵节期间,lóng tio̍h守安息,bē-tàng做工, tio̍h专心敬拜,因为这是性命ê再生,值得献上感谢。

经文:

申命记 16:9-16:12

注释:

Chit段经文是关系收成节ê规定,mā是Pôaⁿ过节后面ê第二大节期,这收成节koh名「七七节」,mā就是后来ê「五旬节」,是采收五谷杂粮等农作物开始ê时间。

第9到10节,这是tùi Pôaⁿ过节过了后开始算第七个礼拜。Chit时tio̍h献上ê礼物,就是初熟ê农作物,表示感谢上帝赏赐。Chit节期只有一工。因为án-ne,献上感谢了后,就开始进行采收ê工作。

第11到12节,庆祝chit节期,一定tio̍h kah所有tòa做伙ê人,除了厝里ê亲人外,mā tio̍h kah贫困ê孤儿、寡妇、外侨(寄居者),以及无土地thang种植ê利未人同齐庆祝chit节期活动。Mā koh一pái提醒tio̍h举行庆祝,是因为离开埃及,进入迦南地,teh过自由ê生活,因为上帝赏赐chiah ē-tàng有土地thang种作。

经文:

申命记 16:13-16:17

注释:

Chit段是关系Tòa棚节,是以色列人民看做第三大ê重要节期。Chit节期koh kā它称做「收藏节」,顾名思义,chit节期就是kā收成ê农作物收藏起来,好准备过寒天。

第13节,chit节期有长到「七工」ê活动。Tòa棚,就是搭帐棚tī田地间。

第14到15节,表示欢喜庆祝ê节期,bē-tàng独享,á是beh kah所有ê亲人,包括厝里ê奴婢、孤儿、寡妇、外侨等lóng同齐参加庆祝。其实,chit节期mā会邀请附近村落ê人同齐参加,藉chit-ê青年男女有机会相识而成亲。

第16到17节,奉献ê礼物是照家己ê能力á为。Á庆祝ê地点,就是tī上帝所选定ê敬拜场所。

经文:

申命记 16:18-16:20

注释:

Chit段经文lóng是讲tio̍h有关以色列社会领袖ê问题。做一个领导者,非常重要ê工作,就是beh排解人民彼此之间ê纠纷,亲像解决财产ê问题、伤害ê问题等。Koh讲,做一个以色列民族ê领导者,一定tio̍h带领人民坚持遵守敬拜ê诫命,chit点chiah是chit段律法ê基本精神所在。换句话讲,chit段经文mā说明一点:ài做以色列人ê社会领袖,基本条件是beh有坚定ê信仰,对信仰有真清楚ê认bat,chit种人chiah ē-tàng tī人民中间成做领导者。因为好ê信仰者,bē接受o͘-se(参考十六:19),因为伊知影伊ê审判是teh代表上帝teh执行公义。另外一个特点:bē-tàng为家己积存金银,贪图财富(参考十七:17),chit种领袖chiah bē骄傲,á忽略因为sàn-chhiah受冤屈ê人。

Chit段经文讲tio̍h有关设立审判官处理人民之间纠纷ê事。Chiah-ê审判官ê选派,是一件相当重要ê事,基本要件是信仰。

第18到20节,有人ê所在,就会有纠纷,这是人ê软弱。因为án-ne,ài tī各城镇设立审判官,á chiah-ê审判官ê基本要求是:1.公正无私,不滥权。

Bē-tàng接受o͘-se。正确地讲,一个公正ê审判官,就bē接受o͘-se。会接受o͘-se,就bē是公正ê审判官。3.公正ê审判官会公正执法。只有tī chit种条件下,人民kah社会chiah会安定,有安定ê社会生活,chit种社会chiah ē-tàng长居久安落去。这mā是一般常讲ê「司法是一个国家、社会安定最后ê底线」。

经文:

申命记 16:21-17:7

注释:

Chit段经文真清楚讲tio̍h敬拜上帝就是beh纯净、圣洁,绝对bē-tàng含混不清,因为含混ê信仰态度是上帝siōng讨厌ê事。

第十六章21到22节,建造敬拜上帝ê祭坛,就是bē-tàng同时有拜迦南人偶像神明ê任何记号出现。「亚舍拉女神」,这是迦南人siōng普遍mā是siōng爱ê巴力神明之妻。迦南地ê人认为崇拜chit种神,ē-sái农作物生产丰富,mā ē-sái cha-bó͘人容易有娠生育。这女神用「木柱」做记号,á巴力则用「石柱」做记号,chit种石柱mā会雕刻男性生殖器官ê样式。会有chit种禁令出现,表示后来进入迦南地了后,以色列人民已经深受影响,有人一面敬拜上帝,一面去拜chit种迦南人ê神明,这等于是污秽了上帝ê圣洁,mā是亵渎上帝ê神圣、独一bē-tàng侵犯ê诫命。

第十七章1节,若是kā「缺陷ê牛羊献hō͘上主」,等于是藐视上帝ê赐福。Kan-taⁿ会引起上帝ê忿怒,一点好处mā无。

第2到4节,chit段经文koh一pái重述第十三章所提ê禁令,弃sak上帝去拜偶像神明者,一律处以石头之刑罚,一点mā不宽待。

第5到7节,chit三节经文mā thang参考第十九章15到21节。任何指控有人拜偶像ê事,就一定tio̍h有两个人以上做证人,chit种证言chiah会生效。当证人ê人,tio̍h先the̍h石头tàn向chit-ê被指控犯罪ê人,表示伊ê见证是真实ê。

经文:

申命记 17:8-17:13

注释:

Chit段经文若是续接tī第十六章20节后面,会koh khah畅顺。Lóng是讲tio̍h有关审判官审理人民案件ê事。

第8到10节,chia已经订出了法院层级,tùi地方渐渐往上升级,重大案件就由上级法院来审理,由利未祭司kah审判官判断。Tī chit层次ê判决确定了后,就bē-tàng koh再有任何意见出现。

第11到13节,由这高层级审理,判决出来ê结果,无论甚么人lóng tio̍h接受,bē-tàng有任何违抗之举,若无,就用死刑论处,这mā thang防止作恶ê人有lām-sám告诉ê现象出现。

经文:

申命记 17:14-17:20

注释:

Chit段经文真重要,讲tio̍h tī新ê国王出现了后,应该tio̍h帮助chit-ê新ê王谨守上帝语治理国家。

第14到15节,chit两节thang参考撒母耳记上第八章4到22节,以色列人民后来要求先知撒母耳替in选立君王来统治in。先知撒母耳询问上帝,上帝同意in,ài撒母耳去膏立以色列人民历史上第一位君王扫罗。Chia规定选立ê国王,一定会tùi以色列人民中间选立出来,bē-tàng选外族人。因为选外族人,就表示in hō͘人统治,m̄是独立自主ê人民。

第16到17节,chia限制国王ê财富,免得君王因为拥有真chē财富á欺压人民,á是变成喜好穷兵黩武,不管人民死活。

第18到20节,chit三节siōng重要,说明一个国王谨记上帝,比甚么lóng重要。因为án-ne,祭司有责任「抄写一份上主ê律法」hō͘国王,á国王若知ài kā上帝ê话之册卷khǹg tī身边,随时研读,切实遵行,án-ne就bē因骄傲á做出违背上帝旨意ê事。

经文:

申命记 18:1-18:8

注释:

Chit章除了koh一pái提起祭司thang得tio̍h产业之份额外,特别提起有关续接摩西带领以色列人民ê领导者会来临。Á这mā成做以色列人民久长以来tī异族统治之下ê ǹg望。

Chit段经文提起有关利未支派ê祭司thang享受ê照顾。

第1到2节,chia讲「利未支族ê祭司」,chit位词thang án-ne了解:就是tī利未支派中选派出来ê祭司」。Tī民数记第十八章真清楚表示:只有亚伦ê家族kiáⁿ孙chiah thang当祭司。其他利未支派ê人kah in ê kiáⁿ孙,lóng一定tio̍h听从亚伦家族kah kiáⁿ孙当祭司者ê指令做tāi-chì,管理祭祀kah敬拜ê礼仪事务。因为án-ne,chia用「利未支派ê祭司」,表示chia ê资料是晚期ê作品,mā koh khah可能是hông掠去做奴隶,tńg来国内后当时ê祭司已经m̄是tùi亚伦家族kiáⁿ孙选出来à。

第3到5节,因为利未支派ê人被分散到各支派去协助祭祀礼仪ê工作,无土地thang生产作物饲家己,因为án-ne,chia规定ài kā献祭ê物件中分出来hō͘利未支派ê人,mā就是供养in生活所需要ê。

第6到8节,这表示利未人是thang移动khiā起ê。M̄-koh khah重要ê,就是tī设置中央敬拜中心了后,因为tī中央敬拜中心一定tio̍h主持国家siōng重要ê大典—Pôaⁿ过节、七七收成节、Tòa棚节等等(参考十六:16)。全国各地cha-po͘人纷纷来chia敬拜,必定需要koh khah chē利未祭司来协助。Tī无形中mā会塑造成「中心权威」感受。因为án-ne,chia规定中央敬拜中心bē-tàng拒绝来自任何其他地区ê利未祭司。意思是teh指若有来自外地城镇ê利未祭司,愿意到其他敬拜ê场合参与服事,lóng bē-tàng拒绝,án-ne chiah bē hō͘ in成做流浪者。Chia mā说明一个重要观念:任何祭司lóng thang到中央敬拜上帝ê场所参与事奉ê工作,中央场所ê祭司绝对bē-tàng藉故拒绝收容自愿来ê参与者,á是有轻视in ê态度出现。

第7节真可能是针对列王记下第廿三章8到9节ê后遗症á提出ê。因为当时约西亚王kā犹大各城ê祭司带到耶路撒冷后,hō͘ in有食物,却m̄ hō͘ in tī圣殿中参与服事。

经文:

申命记 18:9-18:13

注释:

Chia koh一明显确地讲出进入迦南地了后,一定会kah当地人民ê生活、风俗、宗教信仰隔离出来,绝对bē-tàng有一丝á模仿ê念头出现。可见in进入了后,并无能力kā所有外族人lóng消灭。

第9到11节,chia提起「邪恶风俗」,是表示拜偶像ê各种祭司礼仪,mā包括真chē巫术,像「占卜、观兆、行法术,用符咒,求问鬼神á是死人ê阴魂」等等。Chiah-ê lóng是一般民间宗教信仰ê特徵,tī台湾mā相当盛行。M̄-koh,上帝禁止他ê子民去听从相信。

第12到13节,明确讲出上帝讨厌做chit款tāi-chì ê人,因为这等于是污秽了上帝ê圣洁。Koh讲,上帝chiah是人性命ê主宰。因为所有万物lóng是上帝所创造。Chiah-ê行法术ê,lóng是teh讲性命ê运命,m̄-koh人ê运命是tī上帝手中,m̄是任何人ē-tàng主宰á是影响,甚至ē-tàng测知,这lóng是用骗人ê手路想beh引人弃sak上帝ê方式。

经文:

申命记 18:14-18:22

注释:

Chit段经文说明上帝子民kah迦南地人民之间ê差别。迦南地人听从hiah-ê巫师行法术来指点性命方向。M̄-koh上帝子民有上帝奴仆来带领in遵行上帝ê律法诫命。

第14到15节,上帝beh tùi以色列人民中间兴起一位「像我仝款ê先知」,chit句话一再hō͘人认为是新ê拯救者会来临。像摩西仝款,表示to̍h是teh beh来临ê chit位拯救者,是先知ê典范,thang面对面kah上帝讲话,而且不自私,只为人民生存向上帝祈求ê人。

第16到20节,chit段经文真清楚说明chit位先知ê态度:1.以色列人民犯罪ê时,会向上帝恳求赦免怜悯;2.讲上帝ài伊讲,而且一一地转告hō͘以色列人民;3.chit位先知就是上帝ê代言人,绝对m̄是假先知,乱用上帝ê名传讲虚假ê信息,却是忠实tī上帝ê奴仆。

第21到22节,chit两节教导以色列人民怎样分辨出真假先知,因为真先知传讲上帝ê信息,上帝一出,必定会实现。假先知就m̄是án-ne。

经文:

申命记 19:1-19:14

注释:

Chit章主要是讲tio̍h有关诉讼、纠纷ê问题。分做两个部分,一是有关人无辜犯罪了后,thang走chhōe庇护城保护性命。另外一个是beh控诉一个人,至少ài有两个以上ê证人举证chiah ē-tàng成立。

Chit段经文是记载有关庇护城ê设立,mā是摩西五经中第四次提起,第一pái tī出埃及记第廿一章12到14节;第二pái是tī民数记第三十五章9到29节;第三pái是tī申命记第四章41到43节。

chit-má chia是第四次记载。Tī申命记第四章讲tī约旦河东岸,mā就是吕便、迦得、玛拿西ê地区各设一城,共计三城。chit-má chia是讲beh tī迦南地区域内另外设立三城,án-ne共计是六个城市,用来做庇护城,主要是hō͘ hiah-ê无辜ê人thang得tio̍h保护。

第1到3节,当以色列人民进入迦南地,并且安定khiā起了后,就beh kā迦南地分做三块,每一块划出一个城市,chit-ê城市一定tio̍h tī市中心地带,án-ne方便附近居民,若因为无小心á是因无辜杀害别人ê人容易来到chit-ê庇护城市。

第4到7节,chia特别举例讲出何谓「无辜」á是「误杀」lóng无冤仇ê人。亲像斧头柄脱落á伤害别人致死ê,就是误杀。Á是tī逃亡ê时,却因距离庇护城siuⁿ远致使被亲人报仇杀害,chit-ê亲人因为m̄知实况á杀害这凶手,mā thang来chia走chhōe庇护,若无,会继续冤冤相报á无止尽。因为án-ne,规定tio̍h划出三个城当做庇护城。

第8到10节,这庇护城就是为tio̍h beh保护无辜杀害别人ê人。第9节所提起ê另外三座城,就是tī约旦河东岸地区。

第11到13节,m̄-koh庇护城并无庇护故意谋害别人性命者,就算chit种人逃到庇护城,hit-ê城ê长老mā tio̍h kā伊chhōa tńg去交hō͘受害者ê亲人报仇。因为故意杀害别人者,m̄免怜悯,án-ne chiah bē有人利用庇护城做出伤害伊人生命ê事。

Chit节thang参考第廿七章17节。另外thang参考第五章21节,十诫ê第十诫讲tio̍h bē-tàng贪图别人ê土地,因为土地lóng是上帝所赏赐ê。贪别人ê土地,等于是teh贪上帝ê物件,表示对上帝ê信心不足。

经文:

申命记 19:15-19:21

注释:

这是有关证人ê条例,规定一定tio̍h ài有两个人以上举证chiah算成立。Chit段经文mā出现tī民数记第三十五章30节,以及申命记第十七章6节,表示上帝绝对m̄准做假见证,即使有两个人以上做证,m̄-koh却是做假证,采取ê惩罚就是「报复」ê方式――以眼还眼,以牙还牙,以手还手,以脚还脚。列王记上第廿一章记载以色列王亚哈ê bó͘王后耶洗碧,买收人做假见证,害死葡萄园主人the̍h伯。结果上帝差遣先知以利亚去谴责亚哈王,讲狗tī tó位舐(chīⁿ)拿伯ê血,mā tio̍h tī hia舐亚哈ê血(参考列王记上廿一:19)。

第15到17节,这是teh指控诉案,一定tio̍h有两个人以上举证并愿意出庭做证chiah算是有罪。M̄-koh若是发见两个证人中间有一个做假证陷害别人,就一定tio̍h敬拜上帝ê场所,表示ài面对上帝chiù-chōa,hit时轮值ê审判官tio̍h详细调查,看甚么人做假证。

第18到21节,若查出有人确实做假证,这做假证ê人就beh承受本来被控告者应得ê罪。换句话讲,若本来被控告者是伤害别人ê目睭,m̄-koh这是冤枉ê,做假见证ê人就beh付出目睭来当做惩罚。用chit种方式来吓阻做假见证ê行为。

经文:

申命记 20:1-20:9

注释:

Chit章谈ê lóng是有关战争生死ê问题。Tī第七章17到26节已经讲tio̍h有关进入迦南地必定会tú-tio̍h战争,chit-má koh khah具体地论到关系战争tio̍h注意ê细节。以色列人民teh beh进入迦南地一定tio̍h面对ê战争看做是「圣战」。这「圣战」ê观念m̄-nā是因为迦南地是上帝所应允赏赐ê土地,koh khah重要ê是tī战争ê时,上帝会亲自kah in同齐kah敌人相刣,chit种观念早tī出埃及进入旷野时代,就已经建立起来。Mā tùi「圣战」ê观念中,thang看tio̍h以色列人民已经kā kui个民族完全kah「耶和华宗教信仰」结合做伙,无法度分开。

Chit段经文真清楚讲tio̍h,mài因为对敌ê一方人chē势众就惊惶。因为这是上帝允准ê战争,上帝一定会伸手参与,因为án-ne m̄免惊惶。

第1到4节,真清楚,只要是上帝同意ê战争,就会有上帝ê帮助。Tī上帝带领下ê战争,kah军队ê军事武力强弱无关,因为上帝就是以色列军队ê总指挥官(参考耶利米书五十一:27—28),这mā是诗人ê诗歌中所歌颂ê(参考诗篇三十三:16—18)。若是无上帝允准,即使真有士气,结果仝款kan-taⁿ会惨败(参考民数记十四:39—45),这mā是以色列人民tī旷野漂流期间亲身ê经验。

Koh讲,既然是有上帝ê允准chiah ē-tàng出征,因为án-ne,tī出征chìn前tio̍h由祭司先向军队进行鼓舞讲话,有ná今á日军队战前ê「精神训话」仝款。

第5到7节,这几节经文讲tio̍h几种m̄免出去战争ê人,一是tú建造好厝á iáu未举行新屋落成感恩礼拜ê人,这mā表示iáu未搬入去tòa ê意思;二是新栽种葡萄园iáu未收成初熟果子奉献hō͘上帝ê人,照利未记第十九章23到25节ê记载,ē-tàng收tio̍h初熟果子是第四年了后ê事;三是订了婚m̄-koh iáu未结婚ê人,照申命记第廿四章5节ê记载,结婚ê hit年,是无法度调去做兵ê。

第8到9节,规定惊惶相刣ê人mài出征,因为chit种人m̄-nā会影响士气,mā teh表明对上帝无信心。Chit种人m̄-nā bē-tàng出征,koh khah无法度担任指挥官,á是带兵官。

经文:

申命记 20:10-20:20

注释:

Chit段经文讲tio̍h有关攻打敌方ê时,tio̍h注意ê事项。

第10到15节,tī开战chìn前beh hō͘敌方有和谈ê机会,mài冲pōng,认为家己既然有上帝同意出兵,就lóng无顾忌。Mā beh hō͘对敌一方有商量讨论ê空间,然后chiah决定是m̄是tio̍h用武力进攻,á是beh用和平ê方式the̍h落来对方城堡。

第16到18节,占领了敌方ê城堡,就beh铲除hit-ê城堡内会影响tio̍h家己军队、人民信心、生活ê各种诱惑物。无法度因为phah了胜仗,却teh生活kah军纪上堕落,远离了上帝ê教导。因为这战争既然是上帝所允准,就无法度因为phah了胜战á远离上帝ê恩典。

第19到20节,chit两节是非常特别ê律法,以今á日ê人ê眼光á是通用语来讲,就是生态环境保护。只有ē-tàng食果子树ê果子,bē-tàng砍伐。即使beh造攻打城墙ê器具,mā只有ē-tàng采用已经枯干ê树木。Tī两、三千年前ê人会提出chit种看法,mā只有以色列chit种民族。台湾即使到à今á日iáu teh砍伐树头当室内ê桌椅á是壁饰,这是真严重ê 错误。Mā tùi chia ē-tàng看出,树木kah人ê生存环境息息相关。

经文:

申命记 21:1-21:9

注释:

Chit段经文是讲tio̍h属tī民事律法chit方面ê问题。

Chit章讲tio̍h有关iáu未破案ê命案(第1到9节)、女战犯处置问题(第10到14节)、大kiáⁿ ê权利(第15到17节),以及厝内出现逆子ê处理方式(第18到21节),以及死刑犯尸体处理方式(第22到23节)等。

Chit段经文讲tio̍h有关iáu未破案ê凶杀案,对尸体ê处置方式。

第1节,这是teh指进入迦南地后,有固定ê土地、城镇。进入安定生活后,却发生chit种谋杀案,m̄-koh chhōe bē-tio̍h凶手,á凶手真恶质,是会hō͘害人弃尸荒郊野外。

第2到5节,因为iáu无法度查出凶手是甚么人,因为án-ne,就需要先进行处理尸体ê事。看该尸体距离tó一个城镇khah近,由hit-ê城镇ê长老代表用献祭ê方式,表明kah被杀害者ê命案无关。Á负责审判ê祭司官员tio̍h监督chit项献祭礼仪,见证一切lóng有照规矩办理,chit点有ná现今ê验尸程序仝款。

第6到9节,距离hit-ê城镇最近ê长老,透过献祭礼仪向上帝表明,此凶杀案确实m̄是hit-ê城镇ê人民所为,免得因为藏匿凶手,á tú-tio̍h上帝严厉ê惩罚。因为献祭是献hō͘上帝,上帝清楚知影甚么人是真正凶手。因为án-ne,chit种献祭礼仪mā teh表明一种誓咒。

经文:

申命记 21:10-21:14

注释:

有战争就有俘虏,chit段经文讲tio̍h怎样处理想beh娶女性俘虏做bó͘ ê问题。古代社会女性地位甚低,战俘koh khah免讲。Chia提起ê女性战俘,就是phah败仗国家、民族ê女性被掠去做奴隶,m̄-koh若想纳做妻妾,就应该注意ê事项。

Chit段经文mā ē-tàng看出以色列人民是thang kah外族人通婚ê。特别是tī所罗门王身上看tio̍h koh khah chē外邦妻细姨。

第10到13节,因为对方是外族人,mā m̄是迦南cha-bó͘-gín-á,若想beh娶伊做bó͘,需要举行一种特别ê洁净礼,就是透过剃掉头毛、剪指kah、换上衫裤,表示伊kah过去无仝款,已经变成以色列人民之一份子。Chia讲beh「为伊父母举哀一个月」,意思是teh指伊kah原来ê家族切断了关系。其实,当俘虏就是án-ne,因为伊差不多无法度koh再tńg来后头厝省亲。加上宗教礼仪上ê关系,若是tńg去省亲,等于是接触「无清气」ê人,chit对夫家来讲是相当麻烦ê事。因为án-ne,娶女战俘,等于hō͘女战俘kah娘家ê关系「死」去仝款,为tio̍h án-ne举哀mā teh表示关系ê切断,因为这cha-bó͘-gín-á已经完全归化成以色列人à。

第14节,这是保障女性俘虏变成妻细姨了后siōng重要ê条例,mā就是当伊被主人纳做妻妾了后,就beh尊重伊是一个自由人,á无法度koh再当做俘虏á是奴隶看待。因为伊已经被正式娶过门,是以色列人民ê新妇。

经文:

申命记 21:15-21:17

注释:

这是讲tio̍h有关大kiáⁿ ê权利问题。Chit-ê条例有一个基本作用,防止作老父ê hō͘细姨ê kiáⁿ承受大kiáⁿ财产。伊会娶细姨,真有可能是因为讨厌本来ê bó͘。因为án-ne,保护大kiáⁿ ê名份成做chit条律法ê主要目的。Chit条例真亲像台湾过去风俗ê「长孙顶尾子」,意思是加分一份财产。

第15到16节,chia看tio̍h「偏爱」妻细姨ê问题。以撒kah利百加就是因为偏爱各自欢喜ê gín-á,后来雅各mā是偏爱拉结,结果造成koh khah chē家庭纠纷。Chia就清楚规定bē-tàng因为偏爱某一个妻细姨,就tī分配财产上有偏差。Chia只强调对大kiáⁿ ài beh特别保护,原因是大kiáⁿ tio̍h负起继承家业ê责任。

第17节,因为大kiáⁿ是beh负起继承家业ê责任,tī分配财产ê时,就beh多hō͘伊一份,这是「大kiáⁿ ê特权」。

经文:

申命记 21:18-21:21

注释:

对子女ê教导责任是属tī父母ê,á厝内有忤逆ê gín-á则父母性命ê重大负担。Chia讲tio̍h怎样处置chit种忤逆ê gín-á ê问题。

第18到20节,chia讲tio̍h「顽劣忤逆」chit-ê词,表示对父母ê劝勉m̄-nā不听,而且故意去做「酗酒放荡」ê事。Chia ê「放荡」mā表示违反社会秩序,造成koh khah chē人ê不安。Chit时chūn,父母既然无法度管教,就应该kā gín-á带到城里审案ê法官hia,hō͘法官来处理,ná亲像今á日ê少年法庭á是法院来仝款。

第21节,「城里ê居民就beh用石头phah死伊」,这等于是判处死刑仝款,是chit种忤逆ê gín-á犯了真严重ê罪。这kah十诫ê第五诫「孝敬父母」ê诫命有密切关系。会án-ne判chiah-ni̍h重ê刑罚,是因为ná kah上帝所应允ê土地有密切关系,忤逆父母,等于是轻视上帝所赏赐ê土地仝款。

原本摩西律法中就已经规定,凡「咒骂父母」ê,一定tio̍h处死刑(参考出埃及记廿一:17),「殴打父母」ê人,mā仝款tio̍h判处死刑(参考出埃及记廿一:15)。Á chia会hiah-ni̍h严厉ê惩罚,对tī少年一代ê子女mā是一个真重要ê警惕,hō͘ in知影一定tio̍h小心,若无,若是父母控告到长老ê所在,对in ê性命会是真大ê威胁。

经文:

申命记 21:22-21:23

注释:

Chia所讲ê「柱子」,mā thang讲「树木」。Tī旧约圣经中有kúi-nā个例lóng是án-ne处理囚犯á是敌人,亲像约书亚记第八章29节、第十章26到27节,撒母耳记落来第四章12节;第廿一章13节等等,chit种处罚ná亲像早期欧洲社会ê「绞刑台」仝款。kā受刑人ê尸体挂tī柱á顶「示众」,有thâi鸡儆猴之作用。Ná亲像非利士人kā扫罗ê尸体「钉tī伯・珊ê城墙上」仝款(参考撒母耳记上三十一:10)。Chia强调尸体一定tio̍h hit工埋葬,bē-tàng「留tī柱上到第二工」。请注意,chia ê「第二工」,mā表示tī hit工日落chìn前。因为以色列人民是tùi日落开始算第二工。

会有chit种规定,kah旧约圣经时代对死去ê尸体看法有关,in认为尸体会传染疾病,因为án-ne,摩西律法一再要求摸tio̍h过尸体ê人,一定tio̍h tī洁净了后,chiah thang koh再出现tī公众面前(参考民数记五:2—3)。M̄-koh chit种作法并m̄是因为in尊重死者,却是in认为土地乃是上帝所赏赐,hō͘尸体tī柱á顶加停留一工,会污染上帝赏赐ê土地。另外,留置过瞑,可能会引来豺狼、秃鹰等野兽撕裂、吞食尸体(参考创世记四十:19,撒母耳记落来廿一:10),á玷污了土地(参考民数记三十五:34)。上帝赏赐ê土地是神圣ê,因为án-ne,保持土地ê神圣非常重要,án-ne chiah ē-tàng hō͘土地有洁净ê性命力,养育上帝ê子民(参考创世记三:17—19、四:11—12)。

经文:

申命记 22:1-22:12

注释:

Chit章包含真chē单独ê条例,ná亲像teh苦劝、勉励,无jōa sêng律法条文。因为tī chia并无提起若是违背chiah-ê条文,会受tio̍h ê惩罚。

Chit段经文共计列了九条ê条文,chiah-ê条文lóng是kah一般家庭生活相关ê事件。

第1到3节,这是一种勉励人怎样kah厝边相处ê箴言,mā是劝人诚实相待, mài有贪ê念头出现。因为发生tī别人身上ê事,mā可能会发生tī家己身上。Á「羊」是当时社会ê经济来源,而且重要ê祭牲。「驴á」是重要ê交通运输工具,衫裤是生活一定tio̍h用品,mā可能是sàn-chhiah人óa靠取暖bē-tàng á是缺ê重要物件。

第4节,thang参考出埃及记第廿三章5节。「驴á á是牛跌倒了」,一个人ê气力无法度拉起来,一定tio̍h有koh khah chē人来协助。

第5节,禁止人穿异性ê衫裤á是打扮,主要是beh端正风俗,真可能当时迦南地民间宗教庆典活动,有人用chit种方式打扮,ná亲像台湾民间宗教祭祀礼仪中,mā有cha-bó͘人扮演cha-po͘人角色(亲像「五子哭墓」)。为避免耶和华宗教被混入chit种行为,因为án-ne,禁止扩大范围到一般生活中。若是对照申命记第廿三章17到18节来看,当时迦南地ê寺庙已真盛行娈童、娼妓。因为án-ne,有chit项禁令,表示需要严格保持神圣ê行为,包括tī穿插顶面ê要求,以示对耶和华上帝ê尊崇。仝款ê,chit项禁令m̄-nā是用tī宗教礼仪,mā用tī一般生活中。

第6到7节,这是非常人道ê作法,因为取行母鸟,会hō͘整窝ê雏鸟死去。Chia虽然讲「thang带走细只鸟á」,其实意思是teh指看见母鸟tī鸟巢里抚育小鸟á是孵蛋ê时,就mài去惊动,hō͘鸟á ê性命thang延续落去。

第8节,ài tī厝顶ê四周设置栏杆,chit项规定真可能kah以色列人民习惯tī厝顶平台顶祈祷、困、聚会有关。因为有chit种生活习惯,in ê厝顶通常lóng建造得真坚固(参考列王记下四:10)。有时in mā会tī厝顶平台顶曝粟á。Á peh上厝顶ê楼梯就tī厝ê外面,任何人lóng ē-tàng peh上厝顶。设置栏杆chit项措施thang预防意外ê伤亡发生。Á致意外发生ê时,mā thang免除屋主「流人血」ê罪名。

第9到11节,chit三节讲出三项kah自然现象不搭配ê禁令。这mā讲一个基本观念:各归其类,表明一种秩序ê意思。利未记第十九章19节mā真清楚提出chit种生存ê要件。「bē-tàng tī葡萄园里栽种别ê农作物」,其原本ê意思是teh指仝一个果园mài有两种果子树。Tī耶稣ê譬喻中,特别用chit种譬喻,讲出结果无收成(参考路加福音十三:6)boài hō͘「牛kah驴á并肩种作」,因为这是两种无仝ê家畜动物,牛ê种作力比驴á大。因为án-ne,若kā两个架做伙并肩种作,kan-taⁿ会造成事倍功半ê结果,甚至koh khah糟。因为chit两种力道无仝ê动物,真oh同负一枷担。「羊毛kah细麻纱」,这是两种无仝ê材质,同齐混织成布,真容易hō͘衫裤变形。Chiah-ê lóng tī说明一个基本要件:有秩序,不混杂。上帝ê子民应该知影秩序ê重要性。

第12节,参考民数记第十五章37到41节ê规定。有关衫裤tio̍h「thīⁿ缀」chit条法令,是用tī以色列成年人ê男子身上。其主要目的是teh提醒以色列人民,tio̍h会记得上帝「一切ê诫命,并且遵行」。Á上帝ê诫命中有两项siōng重要,就是「疼上帝kah疼厝边」(参考路加福音十:27)。耶稣就bat谴责过hiah-ê宗教领袖,故意kā衫裤ê缀加长(参考马太福音廿三:5),以显示家己ê地位,这是错误 ê信仰态度。因为若m̄是真实遵行上帝ê旨意,就算加长了chiah-ê缀,mā是枉然。

经文:

申命记 22:13-22:30

注释:

Chit段经文ê背景是kah十诫ê第七诫有密切关系,mā thang讲是tùi第七诫延伸出来ê,论到婚姻生活、社会伦理规范ê问题,mā包括属tī家庭方面ê伦理关系。Siōng主要ê重点tī保障妇女ê社会生活空间,因为古早时妇女ê社会地位已经真低了,如果koh再被污辱,in ê生存空间差不多微乎其微。因为án-ne,如果诬告á是强暴一个cha-bó͘-gín-á,等于是毁了chit-ê cha-bó͘-gín-á ê命。因为án-ne,诬告bó͘不贞ê丈夫,m̄-nā beh被罚,iáu koh khah被严格规定终身bē-tàng弃sa̍k bó͘,á tī外面kah别ê cha-bó͘-gín-á有染ê丈夫,mā tio̍h接受律法严重ê制裁。Chit种律法m̄-nā大大超过台湾早期社会ê标准,甚至比近代ê台湾社会iáu koh khah进步。

第13到19节,chit段经文真清楚说明侮辱一个良家妇女,是真重ê罪恶。「处女」用来表示一个cha-bó͘人ê贞洁、规矩,无随便放肆生活行为。侮辱chit种bó͘,诬告伊,等于是teh侮辱以色列人民ê cha-bó͘人仝款严重,对tī chit种cha-po͘人(丈夫)一定tio̍h hō͘ in严厉惩罚。

第20到21节,这是kah前段经文相对照,若是婚前cha-bó͘-gín-á已经kah别ê人有性行为,当时社会认为chit种cha-bó͘人已经犯了奸淫罪,mā会带hō͘厝里父母见笑。
第22到24节,thang参考约翰福音第八章1到11节,有关经学教师kah法利赛人带一位「当teh行淫」被掠tio̍h ê cha-bó͘人来问耶稣ê处置态度。Chia强调bē-tàng有混乱男女性关系ê行为出现,一定tio̍h是正当夫妻chiah thang有性关系。若无,就会hō͘人看做是犯了淫乱罪,无论男女lóng tio̍h用石头phah死。

第25到27节,这是惩罚强暴无助妇女ê罪刑,chit种cha-po͘人罪bē-tàng赦。

第28到29节,thang参考出埃及记第廿二章16到17节。这是一项玷污罪刑,只因为为cha-bó͘-gín-áiáu未确定婚姻ê对象。因为án-ne,cha-po͘人虽然有强奸ê行为,只要愿意娶该cha-bó͘-gín-á,就无算有罪。M̄-koh只要娶过门,就终生bē-tàng休弃chit-ê cha-bó͘人。

第30节,thang参考利未记第十八章ê记载,其范围koh khah阔,包含女方ê亲人。Bē-tàng kah继母有乱伦ê行为。雅各ê大kiáⁿ吕便就是做chit件事,hō͘ 雅各诅咒,甚至因为án-ne失去大kiáⁿ ê名份(参考创世记三十五:22、四十九:3—4,历代志上五:1)。

Tùi chit段经文ē-tàng看出以色列人民tī信仰上看婚姻ê关系,ná亲像kah上帝之间有ná「夫妻」ê关系仝款,婚姻关系一定tio̍h是绝对ê忠实。迦南地ê宗教信仰因为有含chiok厚ê性行为,因为án-ne,bē-tàng「乱性」mā成做以色列人民kah当地人民区隔出来ê一个主要因素,为tio̍h是beh「分别为圣」,已显示出上帝选民是圣洁ê族群。

经文:

申命记 23:1-23:8

注释:

第廿三到廿五章大多数条例lóng是kah生活规律有关。

Chit段经文是讲tio̍h耶和华宗教信仰一个siōng基本ê信念,就是圣洁。如果会影响tio̍h圣洁ê,lóng一定tio̍h排除在外。掠tiâu chit-ê思想,就会明白in为甚么会订出chit种律法。

第1到2节,禁止「生殖器损伤á是被阉割ê人」加入聚会ê行列,是因为迦南人ê民间宗教中,参与宗教祭祀礼仪ê人,lóng需要有chit种记号。因为án-ne以色列人民就一定tio̍h禁止,为tio̍h是beh严格区别耶和华宗教信仰ê绝对纯洁。生殖器被阉割,chit种人有ê是属tī宫廷太监,á以色列人民后来因为亡国沦为奴隶后,mā被徵入宫廷当太监(参考但以理书一:3—5)。

因为án-ne,先知以赛亚预言将来ê日子,chiah-ê人ē-tàng重新加入上主ê聚会(以赛亚书五十六:4—5)。Á私生kiáⁿ,是因为m̄是正式婚姻生落来ê gín-á,是属tī犯奸淫生落来ê gín-á。Chit种人通常lóng会被以色列人民看做是外邦人。

第3到6节,chit段经文提起亚们kah摩押人ê问题,摩押kah亚扪人出tī罗得kah cha-bó͘-kiáⁿ乱伦ê kiáⁿ孙(参考创世记十九:30—38),mā是属tī无清气ê族群,koh khah严重ê是in tī以色列人出埃及入迦南地途中,m̄-nā无协助,iáu设法阻止in前进,特别是摩押王iáu设计o͘-se巴兰去对以色列人民讲诅咒,并且iáu用cha-bó͘-gín-á诱惑以色列人民跟tòe淫乱(参考民数记第廿二到廿五章)。

第7到8节,有关以东人ê部分,thang参考申命记第二章4到6节。所谓是「亲族」,是因为以东人是以扫ê kiáⁿ孙(参考创世记三十六:1),á以扫是雅各ê兄哥。Mā bē-tàng轻视埃及人,因为以色列人民bat寄居tī埃及,koh tī埃及期间,hō͘ kui个民族壮大起来。

经文:

申命记 23:9-23:14

注释:

Chit段经文讲tio̍h相刣ê时,军营一定tio̍h保持洁净,m̄是因为卫生ê关系,却是因为上帝乃是以色列军队ê总司令,是上帝teh带领in相刣,因为án-ne,保持洁净mā等于是表明上帝tī in中间。

第9到11节,chit段经文是有关cha-po͘人梦泄ê事,thang参考利未记第十五章16到17节,这是牵涉tio̍h所谓「圣战」ê观念。因为梦泄kah意淫,á是梦见奸淫ê事,对tī「圣战」会造成无清气。因为án-ne,一定tio̍h透过洗涤来表示洁净。

第12到14节,chia所谈ê就kah卫生有关,特别是上帝是以色列军队ê司令官,kui个军营ê清气,表示圣洁ê上帝kah in同在。因为án-ne,排泄物就一定tio̍h用掩埋ê方式,除保持空气清气外,mā teh表明以色列军队ê圣洁ê意思。

经文:

申命记 23:15-23:25

注释:

Tùi chit段经文thang看出申命记确实是一本相当人道ê律法经册,tī经文中看tio̍h包括好款待奴隶,以及对iau饿ê人,一定tio̍h提供够额ê粮食(thang随便食园中ê葡萄、麦穗),借钱hō͘家己ê同胞,bē-tàng索取利息等等,chiah-ê规定即使tī今á日án-ne所谓「文明」ê时代mā是bē-tàng得。

第15到16节,chia所讲ê奴隶,真可能是tùi外邦人ê地区逃走来走chhōe庇护ê。Tī当时ê社会,奴隶是主人ê财产,而且贵重ê财产。逃脱ê奴隶被掠tńg去,m̄是被拍卖伊去,就是hō͘主人phah死。Chia规定以色列人民一定tio̍h庇护chit种奴隶,放in自由,m̄-nā bē-tàng独占,mā bē-tàng虐待in。

第17到18节,chia提起迦南地宗教行为,tī庙里有养庙妓。因为án-ne,上帝ê子民以色列人民,绝对bē-tàng有类似迦南人ê宗教行为出现。

第19到20节,chit段经文thang参考利未记第廿五章35到38节。Chia kā家己ê同胞kah外国人区隔出来,主要teh说明以色列人民是属tī上帝ê选民,一定tio̍h kah外国人无相仝,chiah ē-tàng凸显上帝子民ê特殊性。

第21到23节,下愿,表示向上帝祈求赐福。Ná亲像祈求上帝应允,结果得tio̍h所祈求ê,了后一定会按家己向上帝祈求ê时所应允ê去做。若无,就等于是teh讲白贼、欺骗。

第24到25节,这是为tio̍h beh照顾外出ê人、sàn-chhiah人所设立ê条例。Hō͘ sàn-chhiah人á是外出ê人bē致使因为sàn-chhiah á iau饿。Mā因为án-ne,chiah bē tī以色列人民中间,出现乞丐。M̄-koh进入人家ê园子,bē-tàng有贪婪ê心,tio̍h知影节制、知足。

经文:

申命记 24:1-24:5

注释:

Chit章除了讲tio̍h婚姻ê关系外,mā讲tio̍h怎样对待sàn-chhiah ê同胞。

这是关系婚姻关系ê问题,thang对照第廿二章13到29节来看。

第1节,这是一直引起争论ê一节经文。Bat有法利赛人the̍h关系离婚ê问题来问耶稣(参考马太福音十九:1—12),其实就是因为对chit节经文ê看法迥异。犹太人ê经学教师分做两派:(1)是「沙麦」学派(Shammai),这是比较保守派ê。(2)是称做「希列」学派(Hillel),这是比较自由派ê。这两派对圣经kah摩西律法ê解释就有真大差别。以第1节为例,「沙麦」学派认为除非是bó͘出轨(婚外情、犯奸淫),chiah thang离婚。M̄-koh,「希列」学派ê人认为只要丈夫看做无欢喜ê,lóng thang认为bó͘有「见笑ê行为」。Tī福音书中,对chit-ê问题ê看法,耶稣ê态度真清楚,采用ê是「沙麦」学派ê观点,认为「除非bó͘不贞」(参考马太福音十九:9)。

Tī旧约圣经时代,夫妻关系属tī家庭内ê事务,bó͘往往被看做是属tī丈夫ê财产,因为án-ne,有纠纷并无需要走chhōe法官(长老)ê同意,只需hō͘一份休书,就ē-tàng解除婚姻关系。被休ê bó͘凭tio̍h该休书thang koh再结婚。

第2到4节,被丈夫休弃ê bó͘就m̄是老父ê财产,因为án-ne,娶别人休弃ê bó͘ thang节省一笔聘金。M̄-koh,chit pái丈夫若是koh一pái休弃á是往生,致使chit-ê cha-bó͘人单身,过去休弃伊ê cha-po͘人就bē-tàng koh一pái kā伊娶tńg来。因为婚姻是圣洁ê,m̄是欢喜kah无欢喜ê问题,却是一种性命ê约定,bē-tàng随便,若无,就是犯奸淫ê罪,是上帝所无欢喜ê事。

第5节,tī第二十章7节提起已经订了婚iáu无结婚ê人,mā bē-tàng去做兵,恐惊战死沙场。chit-má则明文规定,tú结婚ê人一年内lóng m̄ thang kā伊徵召入伍。这主要用意,就是避免tú结婚iáu未生儿女,就hō͘ cha-bó͘人成做寡妇,是一种残忍ê事。

经文:

申命记 24:6-24:22

注释:

Chit段经文lóng是属tī社会生活ê规范。

第6到7节,「磨石」,这是每一个家庭生活必备ê器具,the̍h走人家ê磨石作抵押,等于是hō͘债务人陷入生活困境,是m̄-tio̍h ê。第7节mā thang参考出埃及记第廿一章16节,禁止欺压穷乏人,kā无法度还债ê sàn-chhiah人贩卖为奴,是恶质ê行踏,应该处死。这kah以色列人民bat tī埃及当过奴隶ê经验有关,主要teh警告in,bē-tàng逼sàn-chhiah人行上绝路。

第8到9节,所谓「患tio̍h传染性ê皮肤病」,是teh指癞ko病á是瘟疫,按照当时ê规定,患者一定tio̍h被隔离起来(参考利未记十三:45—46),这mā是Tī当时医药常识á是药材相当缺乏ê时代唯一thang阻绝传染病继续扩大ê方式。无论是甚么人,即使是摩西ê阿姊美莉安mā是仝款(参考民数记第十二章),无法度因为是摩西ê阿姊就享有特权。Beh保持一个民族整体ê福利、生存,就一定tio̍h一视同仁。

第10到13节,不准进入债务人ê厝搜刮财物,一定tio̍h是债务人家己感觉thang当做抵押ê物件,亲自the̍h出来hō͘债权人chiah thang,尤其是衫裤,he是遮盖御寒用ê,绝对bē-tàng作抵押品。因为tī巴勒斯坦,早暗温差非常大,暗时sàn-chhiah人若是无外衫,就失去用来取暖ê盖被à。

第14到15节,这是对雇工生活ê一种保障方式,避免穷乏ê雇工陷入生活困境。就算是寄居tī in中间ê外侨,mā一定tio̍h受tio̍h基本生活ê保障。这mā是一种bē-tàng欺负外侨ê律法规定。

第16节,chit节清楚说明甚么人犯罪,甚么人负责(参考耶利米书三十一:30),bē-tàng牵连别人。Án-ne thang避免有权势者对弱势者抄家ê恶质行踏,á是因为kah全家m̄ kah,á故意陷害入罪。

第17到22节,chit段经文mā thang参考利未记第十九章9节、第廿三章22节等等。Chia特别一再重复提起tio̍h关心孤儿、寡妇、外侨等生活ê需要,hō͘ in有基本生活ê条件。因为in lóng是社会上siōng弱势ê人。Á会有chit种规定,lóng kah以色列人民过去tī埃及当过奴隶,知影弱者被欺负á是被疏忽ê性命苦难。Chit点kah今á日台湾对所谓「低收入户」一定tio̍h hō͘ in生活补助仝款ê意思。

经文:

申命记 25:1-25:4

注释:

Chit章律法规定比较零散,比较值得注意ê,是tī第5到10节ê规定,说明延续家族性命好保护土地。

第1到3节ê chit段经文,是旧约圣经第一pái提起有关鞭刑ê细则,规定只有ē-tàng鞭phah三十九下,无法度超过四十下。这真可能是因为「四十」chit-ê数目,表达ê意思是teh指「完全」。因为摩西tī埃及王宫「四十」年、tī旷野「四十」年,chhōa以色列人民tī旷野经过「四十」年。Koh讲,无法度超过「四十」下,mā是teh表示he是一个人所ē-tàng忍受ê siōng koân 本等,如果超过,hit-ê受刑ê人会有性命ê危险,因为án-ne,只有ē-tàng phah到三十九下,免得因为多phah一下,造成死亡,就变成死刑à。使徒保罗bat提起家己为tio̍h传福音被鞭phah过三十九下(参考哥林多后书十一:24)。

第4节,chit节说明申命记ê特点,就是m̄-nā关心人,mā关心到动物ê需要(参考廿二:4、6—7)。新约时代,使徒保罗bat引用此节经文讲tio̍h有关传道者接受酬劳ê事(参考哥林多前书九:9,提摩太前书五:18)。

经文:

申命记 25:5-25:10

注释:

Chit段经文mā就是以色列人民所熟悉ê所谓「利未拉特婚姻条例」(Levirate Marriage)。主要目的就是beh保存祖先留落来ê土地,免得因为无kiáⁿ来致使失去家族生存ê基本要件。其实,这律法mā是teh保障寡妇ê生活,免得陷入困境。

旧约圣经中有两处经文记载kah chit段经文有密切关系,其一是创世记第三十八章犹大kah伊玛ê事件,另外一个是路得记,这两处经文lóng是用chit条律法做基础。设定chit种律法,siōng主要ê目的在tī保护已经过世m̄-koh却无子嗣thang继承财产ê家族,避免财产由别人家族继承。Koh讲,mā避免因为chit-ê缘故致使tī宗族里,chit-ê家庭ê名因为án-ne消失。Chit种条例对守寡ê cha-bó͘人来讲,是相当重要ê,至少伊thang免除因无法度继承财产致使变成乞丐á是妓女ê威胁。

第5到6节,chia真清楚说明「到亲」应尽ê责任,替兄弟保存生存ê命脉,这无推辞ê空间。

第7到10节,对tī无愿意负起照顾「到亲」厝里寡妇ê人,一定tio̍h tī公开ê审判场合,mā就是城门口ê所在,当众侮辱chit种人,方式是当众吐嘴澜tī伊ê面上,并且thǹg掉伊ê一只鞋á,hō͘城里ê人lóng看bē起chit种人。

经文:

申命记 25:11-25:16

注释:

Chit段经文讲tio̍h两件事,一是冤家而且有暴力ê行为。另外一个是市场规律。

第11到12节,tī当时ê人观念中,男性ê生殖器,m̄-nā是用来延续性命力,iáu表示性命ê尊严(参考创世记第廿四章,亚伯拉罕差遣伊ê老奴仆去哈兰kā以撒娶bó͘ ê故事,伊ài老奴仆kā手hē tī亚伯拉罕ê生殖器顶面chiù-chōa,表示愿意用性命ê气力、尊严作保证ê意思)。因为án-ne,tī相骂中间,妇人用手掠别人ê生殖器,表示beh kā hit人断绝繁衍后代ê能力,而且践踏了hit人ê性命尊严,chit种动作绝无法度被允准。

第13到16节,用诚实ê态度经商kah tī司法工作上,被看做是替上帝行公义ê责任。商,不厌诈,tī chia摩西是严格禁止chit种不诚实ê行为。另外一方面,公正ê法码mā teh表示司法审判ê意思,若是无公正ê司法,会hō͘弱势者被欺压。先知阿摩司ê时代,以色列人民因为犯chit种错误,被严词谴责,甚至认为是kah亡国有密切ê关系(参考阿摩司书五:10—24)。

经文:

申命记 25:17-25:19

注释:

Chit段经文真可能kah以色列人出埃及ê时ê经验有密切关系。

「亚玛力人」,照创世记第三十六章12节ê记载,是以扫ê后代。

摩西chhōa以色列人出埃及ê时,亚玛力人bat趁in tī siōng脆弱ê时chūn来突击以色列人民,m̄-koh被摩西派约书亚phah败(参考出埃及记十七:8—16),后来摩西要求kā该场战事hō͘记录落来,hō͘后代kiáⁿ孙知影一定tio̍h kā此民族消灭。民数记第廿四章20节记载巴兰ê预言中,bat讲:「伊koh 看tio̍h 亚玛力,就提起伊ê歌,讲:亚玛力本做chiah-ê 国ê 头,(全民版)」tī士师ê时代,in bat联合阿拉伯人kah米甸人侵入以色列(参考士师记六:33),先知撒母耳ê时代,bat吩咐以色列人tio̍h kā in消灭。撒母耳记上第三十章,记载大卫王bat亲自率兵攻打亚玛力人。因为亚玛力人一直是以色列人民生存、安定ê威胁,因为án-ne申命记作者写落来chit段经文ài后代kiáⁿ孙时刻记tiâu chit-ê tāi-chì,直到犹大王希西家时代,西缅支族ê后代chiah歼灭in(参考历代志上四:41—43)。

经文:

申命记 26:1-26:15

注释:

主要内容是koh一pái提醒有关奉献ê事。基本上,奉献是beh存真实敬虔ê心,chit种奉献chiah会有意义。Koh讲,奉献m̄-nā kan-taⁿ是用来感谢上帝,mā是透过chit种感谢,用来帮助真正需要ê穷乏人,以彰显上帝ê疼kah赐福。

Chit段经文先讲tio̍h奉献ê意义,是beh表示对上帝ê感谢。Koh来是用来帮助穷困ê人以表示感谢上帝ê疼。

第1到4节,chia讲beh kā tāi先收成ê各种土产奉献hō͘上帝。Á奉献是kah进入迦南应允之地thang种作有关。因为有土地thang种作,chiah有农作物thang收成。Chit项献祭是透过祭司kā奉献ê收成带到祭坛前进行礼仪来表明。

第5到10节a句,是献祭ê时祭司tio̍h颂赞ê祷词。表明上帝是救主,他用大能ê手带领以色列人民行出奴隶之地埃及,而且赏赐in迦南地thang khiā起、种作,chiah有今á日ê收成。

第10节b句到11节,收成是一件喜乐ê事,因为án-ne,mā tio̍h邀请利未人kah外侨同齐欢乐。Chit二个lóng因为无土地thang种作,感受bē出来chit种收成ê喜乐。因为án-ne,邀请in同齐欢乐,mā表示一种疼kah分享。

第12到15节,chia koh一pái提起每第三年beh kā收成ê十分之一,分hō͘利未人kah外侨,以及孤儿寡妇。前一pái是tī第十四章27到29节提过。真正án-ne做,chiah thang对上帝讲:「我无kā神圣ê十分之一捐留tī厝里;我已经遵照你ê诫命,kā它分hō͘利未人、外侨、孤儿,kah寡妇。我无违背á是bē记得十分之一捐ê条例。」用现代语讲,就是做宗教税(目前tī德国、瑞士、北欧等国家lóng有chit项税赋)kah社会福利ê路用。

经文:

申命记 26:16-26:19

注释:

Chit段经文thang讲是结束摩西tùi第十二章到廿六章15节ê演讲(á是劝勉),伊强调遵守上帝诫命ê重要性。因为这chiah ē-tàng表明上帝kah以色列人民之间有约ê关系存在。

第16到17节,摩西ài以色列人民切实遵守上帝透过伊颁布hō͘ in ê诫命。

第18到19节,遵守上帝所颁布ê诫命、律法,等于是teh承认家己kah上帝之间有立约ê关系,只有án-ne chiah ē-tàng蒙上帝ê赐福,m̄-nā成做强壮ê国家、民族,mā会成做圣洁ê子民。

经文:

申命记 27:1-27:10

注释:

Chit章kah第廿八两章,lóng是有关摩西ài以色列人民用一项特别ê礼仪,表示in愿意以顶真ê性命态度,遵守kah上帝ê约。

Chit段经文提起beh kā上帝ê「律法kah教示」lóng写tī「以巴路山」山顶khiā立ê大石块顶面,顶面tio̍h涂石灰,chiah-ê「律法kah教示」mā就是记载tī本经册ê第十二章到廿六章15节(m̄-koh mā有圣经学者认为是tùi第五章开始)。Chit种kā律法kah诫命书写tī大石块顶面ê情形,tī古埃及ê文化á是一kóa古老ê民族活动中ê时常常发见,亲像出名ê「汉摩拉比法典」(The Code of Hammurabi)就是写tī石头壳顶面。

第1节,tī申命记中真少提起摩西,kan-taⁿ有几pái是tī第四章44到45节、第五章1节。Chit-má koh一pái提起,而且由摩西kah以色列人民中ê长老共同发表ê声明,表示这是非常重要,而且带有共同应允之代表性话语。

第2到4节,chia清楚命令以色列人民tī pôaⁿ过约旦河了后,tio̍h用石头立碑,kā上帝ê诫命刻写tī顶面。Á地点就是tī「以巴路山」ê山顶,这应该是靠近示剑ê所在。Chia koh一pái强调迦南是块肥ê土地。

第5到8节,无论是khiā立ê石头之碑,á是beh刻写诫命ê铁器,lóng一定tio̍h是m̄-bat使用过ê新物件,表示圣洁ê意思。Koh讲,mā tio̍h tī he地方建造一座祭坛敬拜上帝。这mā teh暗示 pôaⁿ过约旦河了后, tio̍h tī示剑附近停留一段时间。

第9到10节,chit两节是表明beh立约ê序言,所有ê人tī立约ê时lóng一定tio̍h用顶真、审慎ê态度,安静ê心听摩西kah利未支族ê祭司对以色列人民讲话。Mā表明tio̍h透过献祭敬拜上帝,á敬拜ê主要用意,是teh听上帝语。Chit种「听从」,就是去实践上帝所颁布ê一切律法诫命。

经文:

申命记 27:11-27:26

注释:

Chit段经文是礼拜仪式,由祭司大声宣布诫命ê内容。其方式是现今台湾基督长老教会tī礼拜中siōng常使用ê「启应文」。由主领者用「启」,参与者「回应」。Chia是主祭者kā诫命一一念出,然后以色列人民一定tio̍h大声回应讲:「阿们。」此句「阿们」ê意思是:这是我心所愿意接受ê,mā thang讲「这是我用诚实ê心所讲」。

第11到14节,chia讲以色列人民tio̍h分做两pêng,用chit种相对应ê方式,mā ē-sái讲是面对面。值得注意ê是,若提起雅各ê十二个kiáⁿ,就有利未kah约瑟,m̄-koh若是提起以色列十二支派,就用以法莲kah玛拿西chit两个支派来取代利未kah约瑟。M̄-koh chia真特别提起ê名是teh指雅各ê kiáⁿ,无用支派ê名称。Koh讲,kā chit十二个支派分做两组分别khiā tī两pêng山顶成相对应ê方式。Chia mā提醒in祝福kah诅咒,lóng是kah上帝之间有约ê关系。

第15节,这是十诫ê第二诫。

第16节,这是十诫ê第五诫。

第17节,thang参考第十九章14节。这kah第八诫ê bē-tàng偷the̍h有关系,mā kah第十诫ê禁止贪心有关。

第18节,thang参考利未记第十九章14节。「故意」表示明知故犯,是违背圣洁子民应该有ê基本态度。Chia强调引领盲人误入歧途,是非常不应该ê行为。

第19节,thang参考申命记第十章18节、第廿四章17节等等。绝对bē-tàng欺负贫困ê人。

第20节,thang参考第廿二章30节,利未记第十八章8节。这是禁止淫乱,特别是乱伦ê行为。

第21节,thang参考出埃及记第廿二章19节,利未记第二十章15节等等。这是teh指无正确ê性行为,mā显示tī迦南地ê宗教信仰中有chit种行为出现,而且敬拜ê对象mā有kah兽类杂交ê行为,chiah-ê lóng列为禁止要件。

第22节,thang参考利未记第十八章9节、第二十章17节等等,这是禁止乱伦行为。

第23节,thang参考利未记第十八章17节、第二十章14节等等,mā是属tī乱伦ê行为。

第24节,这是十诫ê第六诫。Mā thang参考出埃及记第廿一章14节。

第25节,thang参考申命记第一章17节、第十六章19节等等,另外thang参考出埃及记第廿三章8节,利未记第十九章15、35节等等。

第26节,chit节是顶面所讲诅咒誓约ê结语,表示全部遵守顶面所讲宣布ê约定。所有顶面所讲ê宣言lóng用「阿们」来回应,以表示诚心诚意地遵守。

经文:

申命记 28:1-28:14

注释:

第廿八章1到14节是kah第15到68节相对照;前段落是肯定ê,因为遵照上帝ê旨意、诫命去行,上帝会赐一切福气hō͘以色列人民。颠倒,如果in违背上帝ê旨意、诫命ê时,会严重到连hō͘人贩卖做奴隶lóng bē有人买(第68节)。换句话讲,只有死路一条,这是相当严肃ê警告,ná亲像摩西tī最后以「生死福祸」pái tī以色列人民面前,hō͘ in家己选择仝款(参考申命记三十:15—20)。先知以赛亚mā用chit种话来形容遵守诫命kah背叛之间ê差别:「Lín 若甘心遵thàn,就会得tio̍h 地上ê 好物thang食。(全民版)」(以赛亚书一:19)

Chit段经文是属tī祝福ê部分。

第1到2节,「听从上帝」这是所有诫命ê基础。因为上帝是以色列人民生存ê基础,是上帝带领in离开奴隶之地,而且赏赐hō͘ in肥ê土地thang自由khiā起、生活。因为án-ne,立约就是teh表明承认上帝是in性命ê主宰。

第3到6节,chia先讲tio̍h上帝ê赐福有城镇、田园,这表示土地ê意思。续落来是人口增加,表示力量增强,mā连带ê是五谷丰收、牲畜繁生,续落来就是「平安」,表示无生活á是性命ê giâu疑。

第7节,chit节回应第6节ê「平安」,表示有上帝眷顾、保守,即使有敌人来侵犯,上帝mā会替in击退chiah-ê来侵犯ê敌人,hō͘ in落荒á逃。

第8节,chit节回应了第3到6节所提起ê。

第9到10节,这是典型ê立约之语,表示以色列人民若遵行上帝ê命令、诫命、律法,就表示in真是上帝拣选ê子民。因为是上帝ê子民,hō͘想beh欺负in ê人看tio̍h lóng会惊惶。因为上帝是神圣bē-tàng侵犯ê神。

第11到12节,只要是确实遵行上帝ê旨意、命令,上帝一定会赐福hō͘ in充满性命力量,m̄-nā kiáⁿ孙延绵,而且粮食够额,永远bē缺乏。Iáu thang帮助邻国够额有chhun。Án-ne,就bē成做他国ê奴隶(向别国借粮食ê意思)。

第13到14节,忠实tī上帝,遵守他ê诫命,siōng基本ê态度,就是不弃sak上帝,去拜偶像神明。

经文:

申命记 28:15-28:68

注释:

Chit段漫长ê经文lóng是讲tio̍h有关违背kah上帝所立ê约,无确实去遵行上帝ê诫命、律法,必定会受拖累,甚至致使灭国,人民hông掠去做奴隶。

第15节,chit节是chit段经文ê序言,说明若是弃sak上帝,违背他ê旨意,就会有下列ê灾难临身。

第16到19节,chit段经文kah本章第3到6节相对照。表示违背上帝ê命令,会带来土地荒废,五谷不生,人口减少,表示性命力脆弱,而且事事lóng带来诅咒,kah头前ê带来祝福颠倒。

第20到24节,chia提起上帝ê诅咒,包括传染病猖獗,影响所及包括死亡威胁,气候ê变化所带来ê,m̄是丰沛ê雨水,颠倒ê是风沙、尘埃。Chiah-ê lóng是对人kah生存环境极大ê致命伤。

第25到37节,chit段经文thang看出违背上帝旨意所带来ê惨状,是瘟疫横行,致使人民百病丛生;栽种无法度收成,因为敌人来侵犯,而且hông掠去做奴隶,收成kā白白供给敌人享受,á家己ê cha-bó͘-kiáⁿ被劫去做妓女等,受尽侮辱ê折磨。

第38到52节,田园会遇tio̍h荒废,致使饥荒续接teh来,tī食bē饱ê情况下,变成体弱多病,无koh是一个强壮ê民族。Chit时chūn,敌人真轻易就ē-tàng俘虏in伊去,无任何人会怜恤in,别认为有坚强ê城池就ē-tàng安心,无上帝ê庇护、保守,一切lóng会成做空虚,所有ê一切lóng kā失落。

第53到57节,chit段经文所叙述ê惨状,后来确实发生tī主前588年,当巴比伦帝国国王尼布kah尼掖率兵包围攻打耶路撒冷城ê时,围城长到十八个月之久,最后是全城被毁,圣殿被焚。只有留落来siōng贫困ê农民外,所有ê人lóng被俘虏到巴比伦去做奴隶(参考列王记下第廿五章)。就是tī he段围城ê日子里,犹太人民因为缺粮食,除了iau饿á死ê,mā有ê人是交换gín-á煮食来充饥(参考耶利米书十九:9,耶利米哀歌四:9—10,以西结书五:10)。

Tùi第15到68节整段关系叙述灾祸ê内容来看,mā是先知耶利米时代一再提起ê警语,上帝tio̍h用「战争、饥荒、瘟疫」来惩罚背叛他ê人(请参考耶利米书十八:21,廿一:7、9,廿八:8,廿九:17—18,三十二:24、36)。

经文:

申命记 29:1-29:9

注释:

第廿九到三十这两章是摩西第三段ê讲词。Tī chit段讲词中,siōng主要是koh一pái表明「重新立约」ê重要性,mā tùi chit点thang看出以色列人民kah-ná bē记得过去立约ê精神kah背景。所谓 「重新立约」,并m̄是有甚么特殊ê新内容,却是kā过去ê约koh一pái提起,hō͘ in知影实况到底是怎样一回事。因为án-ne,圣经学者认为这部分真可能是tī被掠到巴比伦了后ê作品,因为in tī亡国了后有深刻ê反省,知影之所以国家会灭亡,是bē记得kah上帝之间所立ê约所致。

Chit段经文是koh一pái提起过去出埃及进入旷野ê历史。Tùi chia ē-tàng看出以色列人民对历史ê重视,因为bē记得出埃及ê历史,等于是bē记得上帝ê救恩仝款ê严重。

第1节,chit节提起何烈山ê约,mā提起tī约旦河东岸摩押平原koh一pái立约ê经过。这teh表明以后以色列人民每年lóng会有一pái,kah上帝间所立ê约重复叙述一pái。

第2到4节,重新叙述tī出埃及chìn前,发生tī埃及国王kah人民身上ê灾难,用此来提醒以色列人民谨记一点:不听从上帝,发生tī埃及人身上ê灾难,mā会发生tī in身上。

第5到8节,chit段经文是讲述in tī离开埃及了后,进入旷野漂流四十年期间所tú-tio̍h ê经历之浓缩。

第9节,koh一pái提醒以色列人民tio̍h确实遵守上帝ê诫命。

经文:

申命记 29:10-29:15

注释:

Chit段经文表明一个非常重要ê观念:kah上帝ê约。chit-ê约是tùi祖先亚伯拉罕延续落来ê,是永远ê性命ê约。bē记得chit-ê约,等于kah祖先ê关系切断了仝款ê严重。

第10到12节,重新立约ê对象,包括了所有ê人,有族群中ê领袖,mā有一般平民,而且男女老幼,以及外侨(指奴隶)lóng包括在内,大家lóng tio̍h参与立约。换句话讲,kah上帝立约,是kui个民族ê事。

第13到15节,chit-ê约是tùi祖先亚伯拉罕、以撒、雅各延续落来ê,因为这是永远ê约。Chit句「接受lín作伊ê子民,伊beh做lín ê上帝」,是典型ê立约之语,表示双方ê关系。值得注意ê,是第15节讲chit-ê约会延续到后代kiáⁿ孙。这mā是为甚么tio̍h教导后代kiáⁿ孙认bat上帝语ê原因。

经文:

申命记 29:16-29:29

注释:

Chit段经文读起来并无生份,因为chit段经文主要iáu是teh kā以色列人民讲,teh生kah死、福kah祸之间一定tio̍h有一个明确ê选择。

第16到18节,chia先讲述以色列人民过去tī埃及ê生活景况,就是bē记得上帝,去拜偶像,结果是一片凄惨。因为án-ne,chit-má立约就是beh表明绝对bē koh再像过去仝款,弃sak上帝,去拜偶像神明。

第19到21节,chit段经文说明kah上帝立约,无任何人thang例外,任何一个人ê背叛,lóng会影响tio̍h整体民族ê存亡kah兴衰。换句话讲,以色列人民kah上帝之间ê关系,是kui个民族生死存亡ê关系,无个人thang独自例外tī chit-ê性命ê约。若有人不听从,上帝beh惩罚ê是kui个民族,头前所提起ê各项诅咒lóng会降临。

第22到28节,chia真清楚,上帝对kah他立约ê子民绝对严厉教导,对m̄遵守所立之约ê子民,会用koh khah严厉ê方式hō͘ in惩罚。这ná亲像先知阿摩司所讲ê:「Tī地上万族中,我只有bat lín;所以,我beh 办lín 一切ê 罪过。(全民版)」(阿摩司书三:2)

第29节,chit节强调上帝所颁布ê法令、诫命,就是他ê启示,只要确实遵行,就会明白他ê旨意。

经文:

申命记 30:1-30:10

注释:

Chit章ē-sái讲是非常重要ê一段信仰告白,摩西讲伊kā kui个民族ê生kah死、福kah祸、存亡kah兴衰pái tī以色列人民chìn前,mā thang tùi chia看出伊内心恳切地ê期待,伊ài以色列人民teh祝福kah诅咒之间做选择。

其实,mā tùi chit章thang看出是tī受掠了后,重新反思有ê作品。

Chit段经文真清楚讲出信仰一定tio̍h明确选择,无含糊ê phú色地带。对上帝有绝对ê信心,必定会得tio̍h上帝ê看顾kah赐福。

第1到2节,chit两节真清楚,就是讲tio̍h以色列人民hông掠去做奴隶ê时,chiah想起摩西bat kā in讲过ê警语。Chia讲若是亡国了后,知影「回心转意」,这就是一种希望,thang得tio̍h上帝伸出救援ê手,hō͘ in有重新koh来ê机会。

第3到5节,这几节真明显说明申命记ê背景是亡国tī巴比伦了后ê信仰反省心得。作者koh一pái强调,上帝是怜悯ê主,只要知影回心转意归向他,他一定会伸手救助,m̄-nā án-ne,iáu 会hō͘ in tùi受掠之地tńg去故乡,hō͘ in重新兴旺起来。Chia值得注意ê是上帝必定会hō͘ in ê人口koh khah chē,这表示会加添kui个民族ê性命力ê意思。

第6到10节,上帝对归向他ê子民,会hō͘ in真chē享用不尽ê恩典,这包括两个方面,除了恩待归向他ê子民,另外一方面,就是kā诅咒转向hiah-ê想beh欺负他子民ê敌人。M̄-koh这lóng有一个基本要件:专心一意归向上帝,并且遵行上帝所颁布hō͘ in ê律法诫命。

经文:

申命记 30:11-30:20

注释:

Chit段经文真清楚teh强调一个基本要点:m̄免chhōe任何理由来表示遵行上帝ê诫命真困难。原因是上帝ê诫命lóng是tī生活中就ē-tàng实践出来ê。

第11到14节,这是真有意思ê一段话,每一个时代tī上帝ê选民中,lóng会有人chhōe真chē藉口,讲遵守上帝ê命令真困难,包括讲hiah-ê律法窒碍oh行lah、bē合ê时宜lah等等chit类ê理由。M̄-koh,摩西tī chia强调,上帝lóng是ē-tàng遵行ê,若无,他bē ài他ê子民去实践出来,他甚至kā以色列人民讲,遵行上帝ê律法,其容易之情况ná亲像存在tī咱ê心中、嘴里仝款ê近,只要伸出手就thang the̍h-tio̍h,只要愿意,想得tio̍h,就ē-tàng做会到。使徒保罗mā采用第14节chit句话,讲出伊对罗马教会信徒ê劝勉讲:「上帝ê 话tī 你ê 身边,tī 你ê 嘴里,tī 你ê 心内。这就是阮所传ê 信ê 道理。你若用嘴告白耶稣是主,心内 mā 相信上帝 hō͘他tùi 死人中koh 活,你就会得tio̍h 拯救。(全民版)」(罗马书十:8—9)

第15到20节,chit段经文thang讲是申命记ê总结。

第15到16节,摩西koh一pái劝勉以色列人民一定tio̍h做出明确ê选择,到底是归向上帝,á是beh去拜别人ê神明,这绝对无法度两pêng lóng tio̍h。因为只有chit位带领in离开埃及ê上帝,chiah是真正上帝,是独一、创造宇宙万物ê上帝。只要坚守对上帝忠实ê心,就会得tio̍h上帝ê赐福,chit种赐福m̄-nā tī个人,而且kui个民族国家ê兴旺、稳定。

第17到18节,chit两节是相对tī前两节。Chit两节提起若是成(chiâⁿ)实去拜偶像神明,m̄-nā国家会灭亡,in mā会沦陷成做他国驱逐ê对象。

第19到20节,「呼唤天地来做证」,chit句话表示一种誓约ê方式。表示大家lóng看会tio̍h chit-ê约。「选择性命!」chit句话成做摩西hō͘以色列人民最后ê箴言。疼上帝,连带ê赐福就会延绵到后代kiáⁿ孙身上。最后第20节引用「亚伯拉罕、以撒、雅各」等以色列人民ê祖先,讲tio̍h上帝ê应允,mā teh表明若是以色列人民确实遵守kah上帝所立ê约,上帝对in祖先ê应允,就会继续落去,永bē改变。

经文:

申命记 31:1-31:8

注释:

Tùi chit章开始直到第三十四章止,ē-sái讲是摩西最后ê遗言。Tī chit段篇幅中ê第三十二到三十三章,lóng是用诗歌ê型态写出来。

摩西清楚家己tī世间ê时间已经近了,因为án-ne对全体以色列人民讲出最后ê劝勉,tī chit-ê劝勉中,siōng主要是宣示约书亚kā继承伊领导以色列人民进入迦南应允之地。

第1到2节,真明显看出摩西已经有120岁。Chit-ê数字mā有真chiok厚ê象徵性意味tī其中。因为以色列人民共计有十二支派。Á 120岁mā是创世记ê作者认为这是上帝hō͘人siōng长ê年岁(参考创世记六:3)。Án-ne,thang kā摩西ê一生分做三个阶段:(1)tī埃及王宫长大(参考使徒行传七:23);(2)逃离埃及后,寄居tī米甸丈人叶特罗家四十年,chit时tú-tio̍h上帝,然后被拣选并差遣去埃及chhōa以色列人民出来(参考出埃及记七:7,使徒行传七:30);(3)然后带领以色列人民tī旷野漂流四十年时间,准备进入迦南应允之地,最后tī 120岁ê时往生(参考申命记一:3、三十四:7)。伊真清楚家己并无得tio̍h上帝应允进入迦南地。

第3到6节,摩西先提醒以色列人民,上帝立约书亚继承伊来领导in,上帝会带领in继续前进并进入迦南地。伊ài以色列人民会记得一定会kā迦南地人民隔离出来。

第7到8节,chit两节是koh一pái公开宣告约书亚就是领导者,ē-sái讲是任命仪式之一。特别是tī民数记第廿七章bat详细记载公开任命约书亚为继承者ê经过,chia已经是第三pái记载有关约书亚被任命为继承者ê记事(参考民数记廿七:18—23,申命记一:38)。

经文:

申命记 31:9-31:13

注释:

Tī chit段经文中提起三件事,一是任命thang信任ê干部并交带ài做ê事。二是每七年tio̍h宣读摩西颁布hō͘ in ê律法。三是好thang保存这律法诫命。

第9到10节,利未祭司kah以色列长老,就是以色列人民ê中心领导者,每第七年mā是安息年,就是一定tio̍h tháu放奴隶kah取消债务ê hit年,ài做chit件宣读律法ê事。

第11到12节,beh tī敬拜上帝ê场所大声宣读chit-ê律法,hō͘所有ê以色列人民,无论是男女老幼,á是寄居ê外侨lóng tio̍h听从,明明确知影该遵守ê规律。Á chit年tú好是tháu放奴隶tńg去厝里ê安息年。Án-ne,就无人敢违背应该尽ê义务责任。而且gín-á mā tio̍h听,án-ne chiah ē-tàng代代传承落去。

第13节,这有一个主要目的,hō͘少年ê一代lóng thang学习上帝ê命令、规律,知影听从上帝旨意ê重要性。

经文:

申命记 31:14-31:29

注释:

有一种讲法,认为chit段经文是编者后来附加上去ê。不过mā tùi chit段经文中知影上帝早已经看出以色列人民tī经历了迦南富裕ê物质生活后,会晓背叛上帝去拜偶像神明(参考第16、20、27、29节),后来mā证明上帝ê预言确实是应验ā。上帝beh hō͘以色列人民知影,他是照kah以色列人民ê祖先所立ê约去行,m̄-koh,以色列人民并无遵守kah上帝之间所立ê约。申命记作者真可能就是tùi巴比伦奴隶之地tńg去了后,重新编撰此经册,目的就是beh提醒以色列人民mài重蹈覆辙。

第14到15节,chit两节thang续接第1到8节对约书亚ê任命。表示任命约书亚ê事,是上帝亲自按立ê。这thang确立约书亚ê领导权威。

第16到18节,chit段经文描述以色列人民teh进入迦南应允之地,原本thang享受美好ê生活,m̄-koh却tú-tio̍h极大苦难,原因是in后来弃sak上帝去拜偶像神明;摩西是一个强势ê领导者,m̄-koh伊死后,人民就开始弃sak上帝。其实,chit种讲法mā是teh强化第6节所提起,ài约书亚有坚忍kah毅力, mài hō͘人民放肆,mài惊顽劣ê以色列人民。照士师记第二章10节ê记载,以色列人民tī约书亚kah伊hit一代祖先lóng往生后,就开始背叛上帝。

第19到22节,chit段经文就是为第三十二到三十三章之诗歌作序言。该两章诗歌主要teh说明上帝确实守约,m̄-koh以色列人民却无。Á chiah-ê诗歌为tio̍h是beh hō͘ in tī暗念、吟唱ê时,保持清醒之心,mài真正弃sak上帝伊去,若无,灾难会降临到in ê身上。Mài认为上帝m̄知,上帝真清楚人ê心思意念。

第23节,koh一pái强化对约书亚领导权ê肯定。

第24到29节,上帝ài摩西kā所有以色列人民ê领导者带到圣幕上帝ê面前,kā伊写好ê诗歌kah上帝ê诫命交hō͘利未祭司好thang保存。Chiah-ê律法规章kah摩西ê诗歌,就khǹg tī约柜ê两旁。约柜内面放tio̍h十诫。Án-ne,以色列人民lóng知影chiah-ê律法规章是kah十诫仝款重要,并提醒in严格遵守ê重要性。若无,上帝绝对bē宽待,一定会严惩。利未祭司,in就是约ê守护者,当别人lóng弃sakê时chūn,in就beh用性命守护tio̍h。

经文:

申命记 31:30-32:14

注释:

Chit段是摩西以诗歌教导以色列人民(参考三十一:22),透过chit首诗歌来讲述上帝kah以色列人民之间「约」ê关系,á以色列人民弃sak kah上帝之间所立ê「约」。其实,chit首诗mā thang讲是上帝对以色列人民ê控诉,因为in后来iáu是背叛了他。Thang án-ne了解:(1)以色列人民tī旷野时代ê时常违背上帝ê旨意,不时抱怨摩西带领in出埃及tī旷野受苦,因为án-ne,mā预测到以后in进入迦南地,tī当地文化ê影响之下,必定会弃sak上帝,去敬拜偶像神明。Chit首诗是预言ê诗歌,为tio̍h是beh先警告in。(2)chit首诗歌可能是后来tī亡国后,想起出埃及tī旷野ê经历,以及in弃sak上帝后,致使亡国ê运命,因为án-ne,用chit首诗歌来做后代kiáⁿ孙ê警戒kah教示。

Chit段诗歌是tùi 回忆以色列人民过去受tio̍h上帝特别ê眷顾、拣选、带领等讲起,直到in进入迦南应允ê富饶之地后,chit段期间所发生ê事。

第三十一章30节到第三十二章4节,诗歌是读hō͘以色列全体会众听ê。事(tāi)先就以「呼唤天地来做证」ê方式唱出,表示chit-ê诗歌beh讲述ê内容,是kah性命ê存亡息息相关。Chit段诗歌先讲述chit位带领以色列人民离开埃及ê上帝,就是伟大ê创造者,mā是公义ê神,他ê审判公正、是值得信靠ê性命之主。

第5到6节,相对tī公正无私ê上帝,以色列人民就显得愚戆kah无知。实在不配做chit位上帝ê Kiáⁿ。以色列人民tùi siōng弱小ê民族thang成做伟大ê国家,其实,是chit位上帝ê赏赐,m̄-koh以色列人民确实是愚昧到不配。

第7到14节,摩西tī chit段诗歌中,ài以色列人民回顾历史,听听老一辈ê人讲述往事,看上帝怎样拣选in作家己特别ê子民。续落来讲出上帝像la̍h-hio̍h teh照顾小鹰一般关心保护看顾以色列人民,mā像他teh看手上ê明珠一般珍惜in。并且赏赐hō͘ in siōng好ê土地,thang tam味siōng好味ê食物,有肥ê田园kah丰富ê五谷,永远bē缺乏。

经文:

申命记 32:15-32:33

注释:

Chit段诗歌讲出以色列人民是一个忘恩负义ê民族,认为家己ê强壮是出tī家己ê能力,竟然弃sak了拯救in出埃及ê上帝,去拜hiah-ê以in家己ê手所雕刻出来ê偶像神明,这是致使上帝大发受气ê主要原因。

第15到18节,chit段诗歌真具体指出以色列人民犯了上帝siōng受气ê事,就是富裕起来就bē记得赏赐hō͘ in富足ê上帝,去拜假神,á chiah-ê假神lóng是in ê祖先从来m̄-bat,mā m̄-bat惊惶过ê。

第19到22节,chit段诗歌讲上帝受气à;他受气ê方式,就是无koh承认以色列人民是家己ê子女,另外就是用m̄是上帝所拣选ê子民来侵犯in,chiah-ê族群kā ná亲像怒火烧仝款来到以色列人民中间。

第23到25节,上帝惩罚以色列人民ê方式,就是战争、iau饿kah瘟疫,chit种惩罚mā是先知耶利米一再警告过ê事(参考耶利米书十八:21、廿一:7、9、廿八:8),结果原本强壮ê以色列民族,因为án-ne soah衰弱落来。

第26到33节,chit段诗歌讲出上帝原本thang hō͘以色列人民tùi án-ne灭亡,m̄-koh他无bē记得kah以色列人民ê约,因为án-ne,m̄ hō͘别人来消灭in,却是亲手惩罚in。Á上帝惩罚ê方式之一,就是无koh庇护in,hō͘ in失去力量,hō͘ in tam-tio̍h性命ê苦味。M̄-koh因为上帝实在太疼以色列人民,因为án-ne,chia虽然讲是tī惩罚in,实际上iáu是顾念in kah上帝ê约,因为án-ne上帝iáu是会留落来「余民」来继续「约」ê记号,chit点tú好是先知运动中siōng主要ê信息(请参考以赛亚书十一:11、三十七:31,耶利米书廿三:3, 弥迦书:七:18,撒迦利亚书八:11—12)。

经文:

申命记 32:34-32:44

注释:

Chit段诗歌继续讲述背叛ê以色列人民tī走投无路ê时,应该会知影tńg来到上帝chit pêng来,知影走chhōe上帝ê赦免kah怜悯。Chit时,上帝iáu是会伸手救助in,同时mā会记得hiah-ê对敌上帝子民ê人并惩罚in,因为chiah-ê人认为是in家己有能力,bē记得in mā是上帝ê奴仆。

第34到35节,所谓「ê时机一到」,是表示上帝审判ê 时刻。上帝会进行公正ê审判,任甚么人lóng无法逃避。无论是以色列人民á是外族人lóng仝款。

第36到38节,上帝会伸手救助hiah-ê重新tńg来敬拜他ê子民,m̄-koh mā会质问in为甚么会失败,是m̄是清楚家己为甚么失去所有ê一切?上帝会问in过去所拜ê hiah-ê无用ê神明,chit-má tī tó位?

第39到43节,只有创造万物ê主chiah是真正上帝,chit位上帝是公义ê,他一定会照公正ê方式惩罚悖逆ê子民,mā会严厉惩罚hiah-ê用残酷手段对待别人ê人。M̄-koh,上帝无bē记得beh疼惜悔改归tńg来他身边ê子民。

第44节,chit首诗歌是交hō͘约书亚来宣读朗诵,清楚说明约书亚已经继承摩西带领以色列人民ê角色,mā用chit种方式表示约书亚kā chiah-ê诗歌ê内容谨记在心,好带领以色列人民进入迦南地了后,顶真遵守上帝ê律法诫命。

经文:

申命记 32:45-32:52

注释:

Chit段经文讲述摩西kā死tī约旦河东岸,无进入迦南地ê原因。

第45到47节,chia koh一pái提醒以色列人民一定tio̍h严守上帝ê律法、诫命,并且tio̍h教导了后代kiáⁿ孙确实遵守。特别注意第47节所讲ê,上帝ê诫命m̄是空话,却是性命ê泉源(参考诗篇十九:7—10)。

第48到52节,chit段经文mā说明摩西最后死亡ê情形,伊kā死tī「尼波山」上,这是一座高约九百公尺ê山,设tī约旦河东岸ê摩押之地,kah耶利哥城相对,tùi chia thang眺望迦南地。伊虽然是chhōa以色列人出埃及ê人,却无法度进入迦南应允之地。第51节讲出上帝m̄ hō͘摩西进入迦南地ê原因,这thang参考民数记第二十章1到13节,以及出埃及记第十七章1到7节ê记载。M̄-koh摩西实际上是犯了甚么错,并m̄是真清楚。诗篇第一○六篇32到33节ê诗人有提起原因iáu是tī以色列人民。M̄-koh mā有学者认为kah摩西差派十二探子进入迦南地去窥探tńg来,讲出影响民心,摩西无马上阻止,chiah是真正理由。

初代教会bat tī chia建造一座教堂记念摩西,可惜目前已成废墟。

经文:

申命记 33:1-33:5

注释:

Chit章mā是用诗歌ê方式写出来,是摩西为以色列人民祝福ê诗歌。对以色列人来讲,长辈ê祝福是相当重要ê,因为he等于是性命最后ê财产,是无法度取代á是更改ê(参考创世记廿七:37)。

Chit章mā是teh回应创世记第四十九章雅各对十二个kiáⁿ ê祝福。整首诗歌thang分做下列段落来看;一是第2到5节kah第26到29节,chit两个段落lóng是teh o-ló上帝ê诗歌,主要内容就是上帝乃是以色列人民唯一ê上帝,无其他ê上帝。

二是第6到25节,chit段中是对十二支派ê祝福。不过Tī chit段祝福ê诗歌中,却欠缺对西缅支族ê祝福,真有可能是因为写chit首诗歌ê时,西缅支族已经并入了犹大族。

Chit段是o-ló上帝ê诗歌。Mā同时ài以色列人民用敬虔ê态度敬拜chit位伟大ê上帝。

第1节,chit节真清楚讲出是摩西往生chìn前为以色列人民祈福ê诗歌。

第2到5节,chia开始提起「西奈山」,就是teh提醒以色列人民ài会记得kah上帝ê约。上帝就是因为chit-ê约ê关系,赐福以色列人民,保守带领in行过旷野ê路径。所以需要kā上帝所颁布hō͘以色列人民ê诫命看做国家ê宝贝,因为有chiah-ê诫命,国家chiah ē-tàng生存。Mā因为有西奈山之约ê关系,上帝就是以色列人民ê君王。

经文:

申命记 33:6-33:25

注释:

Chit段诗歌是对十二支派ê祝福,ná亲像头前提起过ê,tī chit-ê十二支派中,已经看bē-tio̍h对西缅支派ê祝福。

第6节,这是对吕便支族ê祝福,chit支派并无进入迦南地,伊kah迦得两支派lóng tī约旦河东岸,后来约书亚koh分配东岸一部分hō͘玛拿西支派ê一部分。讲吕便支派ê「人数虽少」,这是后来发展ê结果。

第7节,这是犹大支族。chit支派siōng强,后来成做以色列民族ê领导者。「kah其他支派重新联合」,chit句话已经说明第六世纪末期tùi巴比伦回乡后ê实况,犹大支派是十二支派中siōng强,māteh带领所有支派重建家园。

第8到11节,chit段诗歌是kah利未支族有关。In是hō͘分散tī各支族中间,只因为为in是属tī祭司工作者,专门teh负责教育民众tī信仰祭祀礼仪ê工作。第8节提起「玛撒」kah「米利巴」chit两个地名,lóng是teh指出埃及记第十七章1到7节因为缺水ê事件引起ê抱怨。当时摩西kah亚伦lóng受以色列人民责难,á in两人lóng是属tī利未支族ê人。因为án-ne,teh代表全体祭司á是利未人接受考验。当利未支族ê人有坚忍ê心,ē-tàng兴盛,mā teh表示以色列民族ê兴旺,因为án-ne,chiah ē-tàng hō͘祭司ê工作顺畅。

第13到17节,这是属tī约瑟支族ê人。事实上,若有利未kah约瑟ê「支族」名出现,是表示雅各ê kiáⁿ。M̄-koh若是用玛拿西kah以法莲,就表示以色列民族ê支派;因为án-ne,第17节提起这两人ê名。Tī第16节有讲tio̍h约瑟支族「是兄弟中ê领袖」,chit句话表示两个层面ê意义:一是teh指约瑟tī埃及ê贡献。因为有约瑟,雅各家族ê人chiah会得thang进入埃及khiā起长到四百多年时间。二teh表示约瑟ê kiáⁿ以法莲后来成做北国以色列ê领袖。

第18到19节chit两节讲tio̍h西布伦kah以萨迦这两支族ê人,讲chit两支派tī海运kah通商ê事业上有成就。

第20到21节,chit两节是祝福迦得支族,thang扩张土地。其实,后来证实伊扩张ê to̍h是家己长兄吕便ê土地,这mā是第6节提起吕便ê人数渐少ê原因。因为该支族ê kiáⁿ孙渐渐衰微。

第22节,这是祝福「但」支族,thang看出这支族ê人相当凶悍、勇猛。

第23节chit节是祝福拿弗伊利支族。这支族得tio̍h上帝ê赐福,支族ê繁荣tī十二支族中真显明,kah这支族设tī加利利湖附近有密切关系。

第24到25节,这是为亚设支族ê祝福。这支族ê土地肥,种植ê橄榄树tī kui个巴勒斯坦siōng-kài出名。Mā hông称做巴勒斯坦ê粮仓。

经文:

申命记 33:26-33:29

注释:

这是一首o-ló诗歌,表明上帝ê赐福tī以色列民族中间,永远bē衰微。

第26到27节,chit两节koh一pái提起以色列人民知影,创造kah拯救ê上帝,无任何其他神明thang相提并论。Chit位创造kah拯救ê上帝,会永远庇护tio̍h以色列民族,成做in ê领导者。

第28到29节,虽然tī第28节用「雅各」,然后tī第29节用「以色列」,其实beh表达ê意思lóng仝款,指以色列人民ê意思。有上帝庇护tio̍h in,就算有敌人来侵犯,mā会hō͘上帝所击退,甚至敌人会因为án-ne向以色列人民投降,成做in ê附庸族群。因为上帝是以色列人民ê守护者。

经文:

申命记 34:1-34:4

注释:

Chit章应该续接tī第三十二章48到52节后面chiah顺。Chit章thang讲是tùi出埃及记到申命记ê一个总结,是摩西故事ê完结篇。Chit章是记载摩西ê死kah安葬。Mā tùi chit章thang知影所谓「摩西五经」是出tī摩西ê手所写ê,m̄-koh chit种讲法并无完全正确。因为如果是摩西所写ê,伊bē写「上主kā伊埋tī伯・比珥城对面ê摩押山谷;直到今á日,无人知影伊埋葬ê所在」chit种话句。比较khah正确ê讲法是:申命记有真chē资料,是摩西时代流传落来ê,特别是真chē律法规章,lóng kah摩西ê基本教导有密切关系。M̄-koh,经过整理,加添了真chē晚期ê资料。

Chit段经文续接第三十二章末尾提起摩西无法度进入迦南地,m̄-koh上帝hō͘伊到「尼波山」,tī耶利哥城对岸ê「比斯迦山」山顶上眺望pôaⁿ过约旦河ê迦南地美景。

Mā可能对摩西来讲,无进入迦南地,只有ē-tàng隔岸观望,是性命中一大遗憾,m̄-koh这mā说明自古以来一个现象:开拓前程者,并m̄是享受者。In ê伟大在tī开拓一个美好ê远景hō͘后代kiáⁿ孙。

第4节,上帝强调他履行了对以色列人民祖先亚伯拉罕、以撒、雅各等人ê应允,表示chit种应允之约,会继续流传到后代kiáⁿ孙。

经文:

申命记 34:5-34:12

注释:

Chit段经文讲摩西死了后,约书亚继续带领以色列人民进入迦南应允之地。

第5到8节,摩西kah一般人siōng大无仝ê所在,就是伊ê丧礼是上帝亲自为伊举办ê。因为上帝替伊埋葬tī摩押山谷,所以无人ē-tàng知影摩西埋葬ê地点。伊死ê时chūn是一百二十岁,m̄-koh续落来chit句:「犹原强健,视力真好」,表示摩西结束性命ê时,并m̄是身躯有甚么问题。其实chit句「视力真好」,就是teh指身躯iáu-koh健壮ê意思。以色列人民为伊举哀长到三十工,表示对伊深深ê怀念。

第9节,chit节是绍介约书亚,伊「充满智慧」,圣经作者teh讲「智慧」ê时,意思是teh指「认bat」上帝。而且chia特别强调约书亚因为有摩西tī众人面前为伊按手,以色列人民就完全信任、接受伊ê领导,表示愿意遵行上主藉tio̍h摩西颁hō͘ in ê诫命。

第10到12节,chit三节是对摩西「盖棺论定」。伊m̄-nā是一位伟大ê先知,而且一位深得上帝器重ê先知,因为伊m̄-nā bat kah上帝面对面讲话,而且ē-tàng行神迹奇事。因为án-ne,chia讲「以色列中从来m̄-bat有像摩西hit种ê先知」,chit句话hō͘伊siōng崇高ê敬意。

重新查询