提摩太后书 1:1-1:18

注释:

使徒保罗写hō͘提摩太ê书信，thang确定ê是伊人当时是罗马帝国ê囚犯，tī诉讼期间，伊利用làng缝时间写第一封书信hō͘提摩太，交带伊留tī以弗所教会协助牧养事工。后来，伊koh继续写这另外一封书信hō͘提摩太，而chit封书信mā是最后ê一封书信，有点á ná亲像遗册仝款。使徒保罗写chit-ê书信主要是因为教会内出现无正确ê信仰认知，伊一定tio̍h出面澄清，不beh hō͘信仰误谬继续恶化而危kah kui个教会，因为án-ne，伊特别提醒提摩太，对以弗所教会ê信徒所犯之错误信仰认知，一定会严厉指责。而且对tī教会内部有人用侮辱ê话讥讽伊，讲伊是政府ê囚犯等事，则ài提摩太m̄免感觉见笑，因为伊是为tio̍h传福音ê缘故chiah受难。使徒保罗期待勉励提摩太，为tio̍h福音一定会坚守hit-ê「健全ê信息」，绝无法度妥协。

第1节，使徒保罗写phoe lóng会先自我绍介，这mā是新约圣经时代ê罗马人写phoe之格式，除了发信人ê自我绍介，mā有受信人ê名，以及踏话头ê请安语句等。使徒保罗tī phoe一开始随时提起家己就是「奉上帝ê旨意」作耶稣基督ê「使徒」，这tī伊其它ê书信中一再出现。

Chit句「奉上帝ê旨意」，意思已经包含家己被囚禁tī监狱ê苦难在内。M̄是事事顺利chiah是「奉上帝ê旨意」，却是做一个人tú-tio̍h困境á是陷入苦难ê时，mā有上帝ê旨意在内面。

「藉tio̍h耶稣基督所应允ê新性命」，chit句话teh表明：当一般人看死刑犯是一种侮辱ê时，使徒保罗却讲tī耶稣基督ê福音中，性命是全新ê，m̄是沉沦ê（参考哥林多后书五：17）。原因是耶稣基督已经koh活，带hō͘信ê人是koh活ê性命，是永恒ê性命。

第2节，tī前书伊讲提摩太是「信仰上ê真kiáⁿ」，tī后书chia是用「亲爱ê」。虽然用词上有差别，其实lóng teh表明使徒保罗对提摩太真信任，mā有真大ê期待，伊kā提摩太当做亲生ê kiáⁿ仝款。

第3到5节，chit段经文ē-sái讲是使徒保罗对提摩太ê鼓励，包括有：
一是伊日夜无停为提摩太祈祷。

二是想起提摩太kah伊分别ê时流出真诚ê目屎真感动。Tī提摩太前书
第一章3节，使徒保罗kah提摩太分开而流目屎，是因为伊beh去马其顿，所以吩咐提摩太继续留tī以弗所教会负责牧养ê工作。M̄-koh mā有可能是因为后来使徒保罗koh一pái被关进罗马监狱ê时，提摩太有去看伊，chit时chūn ê分离hō͘ in有ná父子分开一般ê艰苦心。

三是传承自顶一代ê美好信仰内涵。Chia使徒保罗hō͘咱看tio̍h一份珍贵ê资料，就是提摩太ê外祖母罗绮、老母友妮基，母女两人tī信仰上lóng有真美好ê见证，而提摩太mā传承chit份美好ê信仰品德。

第6到7节，chia使徒保罗koh一pái重述一pái tī前书第四章14节已经提过ê，tī伊为提摩太按手，差派伊为同工ê时，提摩太已经拥有圣神ê恩赐。Chit种恩赐有下列几点：

一是有火热ê心。火热ê心用tī传福音ê事工上ê时，就是随时随地lóng tī为传福音设想，bē被环境ê困难所挫败，mā bē馁志。

二是不懔neh。Chit句话对早期教会ê信徒来讲，是一门真大ê考验，因为ài面对罗马政府掠ê危险，mā ài面对家己犹太同胞ê威胁。不懔neh，是因为圣神就是上帝ê气力。

三是充满力量。这是teh指性命充满圣神力量ê人，必定会勇敢见证福音，hō͘人感受tio̍h伊ê性命充满活力，m̄-nā ē-tàng忍受困难，mā ē-tàng承担苦难，而且bē kah恶势力妥协。

四是充满疼心。这应该是本身是一个传道者应该有ê基本要件。无够额ê疼心，tī传福音ê事工上必定会抱怨连连。

五是充满自制。使徒保罗bat讲一个tī信仰上成熟ê信徒，会结出美好ê信仰果子，其中有一项果子就是节制（参考加拉太书五：23）。Mā就是知影满足，mā知影怎样过顶真ê生活。

第8到9节，使徒保罗kā提摩太讲，m̄-thang因为传福音tú-tio̍h迫害á是苦难，就感觉见笑，认为上帝无祝福kah带领，而是beh会因为为福音受tio̍h ê苦难，当做是teh分担耶稣基督ê苦难仝款。Mā tùi chit节看tio̍h chit时伊已经被关入监狱中，一定受tio̍h攻击讲he是一间见笑ê事，m̄-koh伊ài提摩太有「为福音分担苦难」ê看法。伊讲上帝呼召一个人，并m̄是因为伊真优秀，chit点对提摩太来讲有特别ê意义，因为伊当时tī以哥念、路司得两地是人人o-ló ê对象。Mā可能伊会认为家己就是有chit种条件，chiah会hō͘ 上帝透过使徒保罗所拣选。M̄-koh使徒保罗提醒伊tio̍h注意：上帝呼召一个人来成做他ê同工，是因为他ê计画kah恩典，并m̄是根据人ê条件，chit点认bat是非常重要ê。

第10到12节，chit节就是teh解释第九节，上帝拣选人来成做福音ê同工，siōng主要ê目的，就是beh藉tio̍h耶稣基督ê死kah koh活，彰显上帝拯救ê大爱。因为耶稣基督就是福音ê本身（参考马可福音一：1）。基督教福音ê中心，就是teh见证耶稣基督ê死kah koh活。M̄-koh传chit种耶稣基督koh活ê福音会tú-tio̍h苦难，并无因为án-ne有任何失志、馁志，因为知影「主koh来ê日子」，就ē-tàng坦然无惊惶交付上帝「付托」伊ê使命。

使徒保罗tī chia用「付托」chit-ê词，意思是teh指kā siōng贵重ê物件交hō͘一个thang信任ê对象代替管理。因为án-ne，thang án-ne了解：福音并m̄是某一个人所有ê专利品，是主人ê。主人kā福音「付托」hō͘信任ê奴仆代管。「付托」ê另外一面，就是beh忠实、不欺骗，chit点是非常重要ê。

第14到15节，提摩太是使徒保罗siōng得意ê门生，因为án-ne，伊对提摩太ê期待mā非常高，伊要求提摩太忠实地「坚守」伊tùi使徒保罗领受「hit-ê健全ê信息」，并且是用「疼心」kah「信心」持守tio̍h。使徒保罗tī chia特别强调，m̄是人有力量做福音ê事工，是圣神tī人ê心内中，án-ne chiah ē-tàng「持守」tòa上帝所「付托」ê使命。

第15到18节，使徒保罗Tī chit段经文中，提起「腓吉路kah乌摩其尼」，chit两个人是甚么人？甚么背景？只有名tī chia出现，其它资料都无。真可惜，无法度知影。Á「阿尼色弗」，真可能是使徒保罗tī以弗所传福音ê时，得tio̍h ê果子，伊ê全家lóng归属耶稣基督ê名，并且iáu积极参与使徒保罗传福音ê事工。当使徒保罗被掠ê时，一定有真chē人惊受tio̍h连累开始bih起来，mā有bē少人开始藉这攻击使徒保罗，m̄-koh阿尼色弗却m̄是án-ne；伊是勇敢地走到罗马去探监，这对伊来讲是一件真危险ê事，m̄-koh伊m̄惊因为án-ne会受tio̍h连累。M̄-nā án-ne，使徒保罗讲阿尼色弗iáu带hō͘伊真chē鼓励。伊mā tī chia祝福阿尼色弗。

提摩太后书 2:1-2:13

注释:

Chit章thang分做两个段落来看，一是第1到13节，这是伊对提摩太ê勉励。二是第14到26节，伊提醒提摩太教导以弗所教会信徒该注意ê事。

Chit段经文使徒保罗勉励提摩太，tio̍h亲像一个「忠勇战士」，mā像一个「赛跑ê人」。Chit两项lóng是传福音ê人一定有ê认bat，只有ē-tàng勇往直前，无法度有后退ê想法á是念头。这ná亲像tī第四章2节所提起ê，无论ê时机是m̄是理想，lóng tio̍h传福音ê意思。

第1到2节，chia一开始，使徒保罗就beh提摩太藉tio̍h「耶稣基督所赐ê恩典刚强起来」，这是因为使徒保罗chit时是hō͘关tī监狱里，伊希望提摩太bē因为án-ne受tio̍h影响。并且ài伊学习领受自使徒保罗ê样式，mā会栽培出ē-tàng信任「交付」福音使命ê人，继续承接传福音ê工作。

第3到4节，使徒保罗siōng欢喜使用ê材料之一，就是kā罗马军队hit种雄壮威武ê样式带入信仰起来看。Tī伊ê观念中，一个人若是信耶稣基督，就beh跟tòe耶稣基督ê脚步，chit种人一定会亲像一个「忠勇战士」。因为这是一场属灵ê战争，m̄是一般ê战争，若稍有疏忽，信仰ê基础真紧to̍h会瓦解。

第5节，chit节thang看tio̍h使徒保罗常提起竞技场上ê赛跑者，tī chia尤其强调守规矩，这是竞技场上siōng重要认知，只有遵守竞赛规定而得胜ê人，chiah有真正荣誉thang讲。若是有人作假，就ē-sái chit种竞赛失去公平ê基础，án-ne，即使是得tio̍h胜利，mā无法度得奖赏。

第6节，chit节用作穑人种作做譬喻，讲作穑人tāi先享受家己辛苦掖种、种作所得tio̍h ê果子。使徒保罗是讲「辛勤种作」chit句话，已经讲出一个siōng基本ê认bat：天下无白食ê午餐。用tī农事顶面koh khah清楚，因为想beh有好ê收成，就一定tio̍h有辛劳ê种作。

第7节，使徒保罗提醒提摩太，beh好好á「思想」伊chìn前所讲ê话，便ē-tàng领悟出一个基本ê认bat：传福音，bē-tàng pîn-tōaⁿ、懦弱，只有ē-tàng拚命，全力以赴。

第8节，chit节ē-sái讲是使徒保罗传福音ê中心：耶稣基督koh活ê信息。其实，伊tùi一个正港ê法利赛人，变成一个福音工作者，就是kah遇tio̍h koh活ê耶稣基督有bē-tàng分开ê关系。

第9到10节，使徒保罗说明为tio̍h传福音，伊受苦难是值得ê。因为这苦难，是为tio̍h hō͘所有得tio̍h福音信息ê人，thang藉tio̍h信耶稣基督kah上帝重建合宜ê关系，thang hō͘所有信徒因为án-ne而得tio̍h「拯救kah永恒ê荣耀」。

第11到13节，这是一首简短ê诗歌，却是使徒保罗写hō͘提摩太书信中siōng重要ê一段经文，因为chit首诗歌thang讲就是使徒保罗ê信仰告白仝款。使徒保罗tī chia提起几个重要ê信仰内涵：

一是：耶稣基督koh活，这就是福音。信chit-ê福音ê人，就是kah耶稣基督连结做伙，kah伊同齐「同死」，mā会kah伊「同活」（参考罗马书六：8）。

二是：为福音tio̍h忍受所有ê苦难到最后，án-ne chiah是真正认bat耶稣基督ê人（参考马太福音十：32—33）。

三是：上帝乃是个信实可靠ê神，chit点mā是kui本圣经ê中心信息之一。（参考申命记七：9，以赛亚书四十九：7，马太福音廿三：23，哥林多前书一：9、哥林多后书一：18，帖撒罗尼迦前书五：24、3）。

当圣经讲上帝是「信实」ê上帝ê时，chit句话有三种意义：
第一是teh指上帝永远遵守他kah人所订立ê约。无论人是m̄是继续遵守chit-ê约，上帝永bē改变chit-ê约（参考哥林多前书十：13，帖撒罗尼迦后书三：3，希伯来书十：2）。

第二是teh指上帝ê疼永bē改变。Chit种观念tī诗篇中一再出现（参考诗篇三十六：5、八十九：1、2、5、24、九十二：15、九十八：3、一○○：5）。

第三是teh指上帝ê审判是公义ê，而这公义有含怜悯ê意义tī内面（参考诗篇九十六：16、一四三：11，以赛亚书十一：5，约翰一书一：9）。

提摩太后书 2:14-2:26

注释:

Tùi第14节开始，使徒保罗koh开始kā提摩太讲怎样教导信徒，特别提醒伊注意tī教会中有kóa人传达错误ê信仰观念，应该tio̍h禁止chit种错误ê信仰认知tī教会内散布出来，这是伊写phoe hō͘提摩太ê时，开始就说明写此书信kah伊要求提摩太继续留tī以弗所教会ê主要原因（参考提摩太前书一：3—4）。Tī chit段经文中间，使徒保罗特别提起两个tī以弗所教会内传播错误信仰认知ê人，in ê名就是舒米乃（许米乃Hu-mé-nái） kah腓理徒。

第14节，使徒保罗kā提摩太讲，m̄-thang想beh tī信仰上用辩论取胜，因为想beh用辩论hō͘人来信耶稣基督，he是真荒谬ê想法。真正thang hō͘人相信耶稣基督ê，是用真实行动付出ê疼，chiah会感动人ê心（参考哥林多前书第十三章）。

第15节，使徒保罗特别劝勉提摩太三件事：

一是： tio̍h挡会tiâu考验。意思是teh指m̄-thang受tio̍h诱惑，m̄-nā tio̍h真清楚福音信息，mā tio̍h注意m̄-thang hō͘怪诞ê现象迷惑，致使离开圣经ê教导。

二是：ài做个无愧ê福音工人。这「无愧」意思是无kā家己ê工作看做是一件见笑ê事。

三是：tio̍h正确地讲解真理ê信息。注意chia「正确地讲解」之词，是由「直ê」（horthos）kah「切割」（temno）chit两个希腊字合并起来ê。意思是开拓一条道路，beh kā阻碍ê所在hō͘ in切开，亲像穿越山岭、磅空等，hō͘伊成做一条直ê道路。另外一方面，古早时ê石匠，为tio̍h beh取石材作桌面，就一定tio̍h正确地切开石头ê面，hō͘伊有笔直而且平滑ê切割面。使徒保罗kā提摩太讲teh解释圣经上mā tio̍h án-ne真适合，主要目的就是hō͘信徒ē-tàng明白圣经ê教示，并进一步koh欢喜阅读圣经。

第16到18节，tùichit三节经文thang看tio̍h以弗所教会内部ê问题所在，就是hiah-ê专门teh传讲错误信息ê人，对当时以弗所教会所造成真大ê影响。使徒保罗m̄-nā讲出舒米乃（许米乃Hu-mé-nái） kah腓理徒是当时ê信徒中传播错误信息ê人，而且讲出in所传讲ê，就是当时影响早期教会长到三个世纪之久ê「重智派」观念：耶稣基督无死，mā无koh活。此教派主张肉体是无好ê，因为án-ne，耶稣ê koh活只有灵魂，m̄是肉体ê koh活。这mā就是「使徒信经」chit份影响后来基督教会发展非常大ê信仰告白会出现ê主要原因。

第19节，使徒保罗tī chia强调真正属tī基督ê教会，其根基是tùi上帝来建造ê，是无可能会摇动ê。使徒保罗bat讲耶稣基督就是教会「惟一ê根基」，所有ê基督徒ná亲像tī chit根基上建造厝仝款（参考哥林多前书三：9b—15）。伊mā讲耶稣基督就是信仰大家庭ê「基石」，所有ê信徒就是连结tī chiah-ê大「基石」之上（参考以弗所书二：20—22），有án-ne稳固ê「基石」，就bē摇动。

第20节，koh一pái hō͘咱看tio̍h使徒保罗言论ê特色，就是kā教会形容成做一间厝、大家庭、身躯等，然后伊说明厝ê基础，就是耶稣基督，信徒就是kā厝建造tī耶稣基督ê基础上（参考以弗所书二：20）。使徒保罗努力beh提供一个信仰概念：tī耶稣基督内面，无koh分彼此，所有ê信徒lóng是为tio̍h耶稣基督而来到教会ê中间。

第21节，讲tio̍h tī教会服事ê工作中，m̄是teh分「特别」á是「普通」，却是在tī有洁净ê心thang为主所用。使徒保罗chit种观念取自以色列人传承落来ê一个重要观念：上帝是圣洁ê，所以上帝ê子民mā一定tio̍h是圣洁ê（参考利未记十九：1—2）。

第22节，chia使徒保罗koh一pái提起提摩太是一个「少年人」，tī前书第四章12节，使徒保罗就bat提醒提摩太别hō͘人看轻伊「少年」。chit-má则是beh伊m̄-thang「意气用事」，这是teh指hiah-ê少年人所比较容易呈现出来ê「轻浮、虚荣、易怒、好辩论」等毛病，lóng一定tio̍h尽可能避免。Á相对tī chiah-ê轻浮等事，则是beh追求正义、信心、疼心、和平。Chia使徒保罗用ê「追求」chit-ê词真特别，这原本是teh指如仝一个人出去狩猎，看准了猎物，就尽所有力量一定会kā猎物追到，恐惊小khóa有疏忽而会失去猎物仝款。

第23到24节，thang参考第14节，mā是teh强化第22节所提起ê「少年人意气用事」。Chia提起「bē-tàng争吵」，并无表示为tio̍h息事宁人而妥协，却是有所坚持，不轻易退hō͘。

第25到26节，chia讲对信徒tio̍h用「温柔苦劝对敌ê人」，是teh指像「老母养饲kiáⁿ一般」（参考帖撒罗尼迦前书二：7），是用疼hō͘ in开导，希望对方明白真正要理是甚么。Ná亲像tī第26节所讲ê，期待有án-ne ê一工，即使chiah-ê离开教会ê信徒因为行m̄-tio̍h去路，mā会「醒悟」而回转过来，án-ne，就bē因感觉见笑m̄敢回头。使徒保罗并无希望有人因为误入「歧途」，致使大家ná亲像仇敌一般，伊lóng是留hō͘对方有一个回头ê空间。

提摩太后书 3:1-3:17

注释:

Tī chit章经文中，使徒保罗提醒提摩太注意，在世界末日来临chìn前ê社会景象，chia提起ê，lóng是圣经中提起过ê，就是人犯罪行为ê证据。另外，伊mā提醒提摩太，一定会教导信徒认真学习圣经ê真理，这是siōng好mā是siōng强有力抵挡邪恶ê人欺骗之方。

第1节，使徒保罗讲「世界ê末期会有种种苦难」，chia所提起ê「苦难」，是teh指被魔鬼附身所带来ê折磨惨状。Koh讲，「苦难」ê另外一个意义，就是无法度控制家己，ná亲像无法度「自我节制」仝款。Iáu有，苦难mā是teh指来自外在ê攻击、威胁，这mā是初代教会一再有ê经历。

第2到5节，tī chit段经文中，使徒保罗一连串提起在世界末期ê日子中，所出现各种hō͘人艰苦心ê现象，tī chia伊总共列举了十九项无好ê行为，m̄-koh thang kā它归类几点：

一是自私，只顾家己。这是基督教信仰上siōng无法度容许ê一件事。

二是自夸、狂傲，chit两个词句不时是连结做伙使用ê。所谓「自夸」，原来ê意思是teh指无真chiah实力，却夸口家己真有能力。「狂傲」，这是比「自夸」iáu koh khah严重ê毛病。Chit-ê词ê原意是teh指一个人khiā tī真koân ê所在，夸口家己ê才能。Á koh khah严重ê是，chit种人往往会kā家己当做是上帝仝款，以家己做中心。

三是「忤逆父母，忘恩负义」、「无亲情」，chit三个词句lóng有共通ê意思。父母ē-sái讲是子女siōng大ê恩人，而会忤逆父母ê人，基本上就是忘恩负义ê人。

四是「不圣洁」、「恨恶良善」，这是teh指有pháiⁿ ê念头，对人存心不良，chit种人真容易用无好ê计谋陷害别人。

五是「残忍」、「凶暴」，这是对苦难ê性命无怜悯之心ê意思。特别是tī he迫害ê时代，对hiah-ê被掠去关tī监狱中ê人，iáu存幸灾乐祸ê态度，chit种人就是残忍、凶暴。

六是「散播谣言」、「蛮横」，这是teh指一个人乱讲话，故意编造虚假ê故事，为tio̍h是beh侮辱别人，chit种行为真容易引起争端。

七是「出卖师友」，这是teh指昧tio̍h良心讲不诚实ê话，á是做伤害朋友、师长ê事。这已经是无道义thang讲，ná亲像犹大出出卖耶稣基督仝款。

八是「爱享乐过tī疼上帝」，这ná亲像路加福音第十六章十九到三十一节耶稣基督譬喻中ê hit位财主仝款，伊ē-tàng ta̍k工奢华宴乐，却无时间敬拜上帝。其实，chit种人tī心中根本就是藐视上帝ê神圣kah伟大。

九是假冒有信仰ê人，m̄-koh并m̄是真正亲像án-ne，chit种人mā是使徒保罗不时指出ê「假使徒」，m̄-nā发生tī哥林多教会（参考哥林多后书十一：5），mā发生tī加拉太教会中（参考加拉太书一：7），tī以弗所教会中mā出现chit种人（参考提摩太前书一：3—7、四：1—5）。

顶面所讲这十九种现象lóng是tī一个动乱不安ê世代中，不时会出现ê现象。

第6到7节，使徒保罗特别提起chiah-ê假教师siōng欢喜使用ê pián仙á，就是四界串门子，然后诱惑妇女弃sak真道。伊认为有kóa妇女比较容易受tio̍h hiah-ê ē-tàng言善道ê假教师诱惑，因为án-ne，ài提摩太特别注意妇女ê行动。

第8到9节，chia使徒保罗特别提起两个专门teh欺骗女信徒ê名，就是雅尼kah洋布雷。这两人到底是甚么人？除了chia出现之外，圣经中都无in两人ê资料。M̄-koh tī犹太人ê传说中，讲这两人就是埃及法老王身边ê「术士」，bat被指派去抵挡摩西（参考出埃及记七：11—13、九：11）。因为án-ne，使徒保罗kā雅尼kah洋布雷ê行为，譬喻tī法老王身边用来抵挡摩西ê术士，为tio̍h是beh hō͘当时ê信徒知影，反对圣经ê教示，就等于hiah-ê术士仝款，到最后受tio̍h伤害ê，就是in家己而已。

第10节，使徒保罗特别指出伊教导提摩太ê是，有正确ê人生观以及真好ê生活态度，m̄-nā有好ê行为，mā有信心、宽容、疼心、忍耐。这五项其实lóng thang tī使徒保罗传福音ê过程中看ê出来。Chia所提起ê「跟tòe」chit-ê词，是表示「真详细」ê意思。这是teh指提摩太跟tòe使徒保罗四界去传福音，对使徒保罗ê所行所为lóng真清楚。

第11节，chia提起tī安提阿，这是teh指彼西底ê安提阿（参考使徒行传十三：50）、以哥念（参考使徒行传十四：5）、路司得（参考使徒行传十四：19）等地tú-tio̍h迫害ê经验，使徒保罗lóng用极大ê容忍之心来承受。Chiah-ê受tio̍h迫害ê经历，提摩太lóng非常清楚。伊提醒提摩太，经历chiah-ê迫害ê苦难，若无救主ê拯救，就无法度脱离。

第12节，这是一节真有意思ê经文，thang参考约翰福音第十六章33节。Tùi chit节thang看tio̍h使徒保罗要求信仰一定tio̍h kah生活相连结做伙，m̄-koh对一个淫乱成性tī都会生活ê人来讲，过敬虔生活ê人反tńg会hō͘人认为是「异端」、「有问题」，可能因为án-ne就遇tio̍h亲朋好友孤立，甚至拒绝来往，严重ê iáu会hō͘排斥、受tio̍h压迫。

第13节，「in欺骗别人，家己mā受欺骗」chit句话，ē-sái讲是针对hiah-ê假使徒讲ê，mā就是hiah-ê kā福音当做商品用来欺骗别人ê人，到最后in欺骗ê pián仙á一定会hō͘人看穿而遇tio̍h众人ê唾弃。

    第14节，「持守」kah「确信」，lóng是kah学习tio̍h ê真理有关。Á这真理就是耶稣基督ê koh活。使徒保罗ài提摩太无论án怎lóng tio̍h坚持，bē-tàng妥协。

	第15到16节，chit两节经文thang参考诗篇第十九篇7到10节、第一一九篇105节。Chia koh一pái hō͘咱看tio̍h使徒保罗对圣经ê重视。Tī第二章15节使徒保罗bat劝提摩太tio̍h「正确地讲解真理ê信息」，chit-má则koh一pái提起圣经ê重要性。

	第一世纪ê圣经，就是旧约圣经。使徒保罗tī chia提醒提摩太，一定会重视圣经。因为提摩太ê老母是犹太人，对提摩太来讲，伊就是tī老母教导之下，自细汉就开始学习认bat圣经。

	所谓「智慧」，是teh指认bat上帝（参考箴言九：10）。Á kui本圣经就是讲述上帝怎样藉tio̍h各种方式来拯救人类。

	Koh讲，使徒保罗tī chia讲全部圣经lóng是「受上帝灵感而写ê」，chit句话是teh指圣经ê作者是kā圣神感动in ê话写出来，kā in所知影ê事kā 当时ê信徒讲。Thang án-ne了解：全部新旧约圣经ê作者，lóng有一个共同目的，就是beh hō͘读者知影上帝ê疼kah拯救。In kā家己ê信仰告白kah对上帝ê认bat写出来，当做教导á是反省ê教材ê路用。因为是有上帝圣神引chhōa作者撰写in tī信仰上ê心路历程，chiah会感动人ê心，因为án-ne，chit本圣经就成做基督教会共同ê准则。若是无圣经，教会就会真容易陷入人为标准ê危险。

	第17节，chia使徒保罗说明白圣经ê人，就会成做上帝所欢喜ê奴仆，有能力去作「各种善事」，意思是teh指thang见证上帝ê疼ê事。

提摩太后书 4:1-4:22

注释:

Chit章kah-ná看tio̍h使徒保罗teh写告别册仝款，根据教会ê传统讲法，认为使徒保罗写完提摩太后书了后无久，就被处用死刑。因为这是使徒保罗最后所讲ê话，因为án-ne mā thang tùi chia看出使徒保罗对提摩太ê疼kah鼓励，就真正亲像同伊tī前书kah后书ê第一章踏话头所讲ê，kā提摩太看做是家己信仰上ê「真kiáⁿ」。可能因为知影家己chhun落来ê日子无chē，因为án-ne，伊希望提摩太赶紧去伊hit-pêng。伊mā tī chia kā一kóa加害tī伊、弃sak伊ê人lóng名列出来，只有非常亲密ê人chiah会知影chiah-ê事。Thang看出使徒保罗所以会kā chiah-ê成做信仰绊脚石ê人写出来，实在是hō͘伊看bē落去了，若无kā chiah-ê人ê名写出来，可能会hō͘ koh khah chē信徒离开真确ê信仰，因为tī kui个亚细亚省弃sak信仰ê人必定bē少，chiah逼kah使徒保罗一定tio̍h采取án-ne强烈ê手段来防范（参考提摩太后书一：15）。

第1节，使徒保罗讲tio̍h对人ê性命有审判主权ê，就是上帝kah耶稣基督，chit句话mā是teh否定罗马政府对人性命ê主宰权。使徒保罗当时是hō͘关tī监狱中，当伊án-ne写ê时chūn，等于teh kā罗马政府讲，伊m̄承认罗马政府对伊有性命ê判决权，chit种权柄只有创造性命ê上帝。

Koh讲，chit句「审判所有活人死人ê基督耶稣」，ē-sái讲是早期教会siōng重要ê信仰告白内容。Chit句话mā就是teh回应当时罗马政府对基督徒ê迫害，基督徒tio̍h表明并无惊惶chit种迫害，因为真正审判者就是koh活ê耶稣基督，伊审判ê对象包含活人kah死人。

第2节，使徒保罗kā提摩太讲无论tī甚么情况下，lóng tio̍h传福音，因为福音是kah性命ê得救á无有密切关系。M̄是欢喜ê时chūn chiah tio̍h传福音，mā m̄是tú-tio̍h挫折á是困境ê时，就对福音事工采取懈怠á是放弃ê态度。

使徒保罗tī chia提起几个牧养工作ê重点：
一是beh「耐心劝勉」。这hō͘所讲ê「耐心」，是teh指无妥当协，m̄-koh原则真清楚ê意思。并m̄是为tio̍h讨好信徒，惊信徒弃sak信仰就采取睁一只眼、闭一只眼ê态度，m̄是án-ne。

二是「督责」，意思是teh指知影错误ê时，m̄是假做无发生，却是清楚hō͘信徒知影，错误tī甚么所在。

三是「鼓励，教导」。使徒保罗所使用ê词是积极式ê，意思就是无放弃任何thang掌握ê机会，tio̍h tī信仰ê事顶面用心，hō͘信徒明白甚么chiah是正确ê信仰。

第3到4节，tùi chit两节看tio̍h人性tī信仰上ê共同点，就是teh指想beh满足欲望ê需要，并m̄是真teh追求真理。Chia mā同时指出真假使徒ê差别，ná亲像旧约先知耶利米时代ê假先知仝款，讲ê不时是当时ê人欢喜听ê话，却m̄是上帝ài in讲ê，假先知常假冒上帝ê名讲虚假ê信息（参考耶利米书十四：14—15）。真正先知ná亲像先知米该雅所定义ê：「我指永生ê上主chiù-chōa，上主对我讲甚么，我就讲甚么。」（参考列王记上廿二：14）仝款ê，本身是一个福音ê传播者，伊主要ê使命就是见证上帝tī耶稣基督身上ê救恩，不是beh彰显家己ê能力；伊ê主要责任就是teh为福音做见证，却m̄是为tio̍h beh讨好信徒而讲好听ê话。

第5节，chia使徒保罗提起身为传道者应该有ê三点基本态度：

一是tio̍h「谨慎」，意思指tio̍h保持头脑清醒。

二是「忍受苦难」。传福音ê工作一定不轻松，特别是tī一个充满迫害ê时代，传福音甚至是会有性命ê危险。因为án-ne，使徒保罗ài提摩太有chit种心理准备。

三是「忠心履行你事奉ê职务」。这并m̄是讲非ài tī toh一间教会牧会jōa久chiah是teh履做tāi-chì奉ê职务，而是beh尽责任tī传福音ê事工，无论所tú-tio̍h ê境况是甚么，lóng m̄-thang放弃传福音ê使命kah责任。

第6到8节，tī chit段经文中，使徒保罗提起几点真值得注意ê事：

一是伊讲「离开人世ê时刻」到à。Tī chia伊讲「牺牲」是kā家己ê受难看做ná亲像献hō͘上帝仝款。

二是伊做自我评估，看tio̍h家己确实走完「ná值得竞争ê赛跑」。使徒保罗kā传福音当做是tī罗马竞技场上竞争仝款，是teh赛跑，看甚么人ē-tàng得tio̍h最后ê胜利而得tio̍h ná荣耀ê冠冕。伊讲家己是走尽全程，确实是一点mā无过份。

三是伊深信家己ē-tàng得tio̍h来自天顶所赏赐ê冠冕。伊讲chit项奖赏已经teh当等伊去领取，因为伊确实走尽了全程，而且无改变信仰，因为伊守tòa该守ê信仰。

第9到15节，chit段经文hō͘咱看tio̍h真chē珍贵ê历史资料：
一是医生路加是使徒保罗siōng好ê搭档，当真chē其他同工因为各种原因一定tio̍h离开使徒保罗ê时，路加一直teh使徒保罗身边协助伊、照顾伊。

二是约翰・马可koh一pái tńg来到使徒保罗身边，是一位好ê同工。原本约翰・马可tī使徒保罗第一pái kah巴拿巴去传福音ê时，是仝一个团队（参考使徒行传十三：5），m̄-koh m̄知为甚么约翰・马可忽然临时脱队，家己tńg来到耶路撒冷去（参考使徒行传十三：13），chit件事bat引起使徒保罗非常不快（参考使徒行传十五：37—40）。chit-má chia使徒保罗讲约翰・马可对伊tī福音事工上ê帮助非常大。

三是底马贪爱现世。照歌罗西书第四章14节ê记载，底马bat kah路加第一pái陪同使徒保罗tī罗马监狱中。除了路加用外，mā bat kah约翰・马可、亚里达古等人kah使徒保罗同为一个团队teh服事福音事工（参考腓利门书24节）。使徒保罗bē随便批评chiah-ê bat kah伊同工过ê人，m̄-koh chit-má却kā底马写做「贪爱现世」，可见底马tī信仰上确实有真严重ê问题，使徒保罗chiah会án-ne批评伊。

四是使徒保罗对提摩太有真深ê感情，tī伊teh beh往生chìn前，希望ē-tàng见tio̍h提摩太一面。M̄-koh同时，使徒保罗并无beh放弃以弗所教会ê福音事工，因为以弗所是当时亚细亚省ê省会，tī福音事工上扮演真重要ê角色，因为án-ne，使徒保罗特别差派推基古去接替提摩太。Chit封书信真可能就是由推基古带去hō͘提摩太ê。

五是铜匠亚历山大对使徒保罗ê伤害真大。Chit一位亚历山大到底是甚么人？并无清楚，真可能就是kah提摩太前书第一章20节所提起ê hit位「亚历山大」仝一个人。到底是怎样伤害使徒保罗ê？mā无明确资料thang循，m̄-koh使徒保罗tī chia所用ê「害」chit-ê字，tī希腊文是用「endeiknumi」，chit-ê字是「显露」、「陈列」ê意思，mā有含「举证」ê意义。换句话讲，真可能亚历山大就是一个告密者，向罗马政府告密有关基督徒聚会ê事，chit对早期教会来讲，是真严重ê一件伤害事件。因为án-ne，使徒保罗m̄-nā tī chia提起，iáu特别ài提摩太提防chit-ê人。

第16节，一直被圣经学界讨论真chē，到底chia所提起ê「第一pái为家己辩护」，这是teh指甚么时chūn ê第一pái？有bē少学者认为应该是tī第二pái伊被关tī监狱ê时，hit时因为看起来情况并无乐观，而且迫害ê情形jú来jú严重，有淡薄á有风声鹤唳ê气氛，tùi án-ne敢公开去探监ê人无了，大家lóng有已经自身难保ê危机意识。

第17节，使徒保罗讲上帝hō͘伊力量，hō͘伊ē-tàng kā耶稣基督koh活ê信息传出来。其实，使徒保罗siōng希望做ê一件事，就是kā耶稣基督koh活ê信息传扬出去，特别是希望ē-tàng会koh活ê信息传hō͘罗马统治阶层ê人。为tio̍h án-ne，就算会hō͘关、被刣mā m̄惊，对伊来讲，一切lóng是为tio̍h传扬耶稣基督koh活ê信息ê缘故。

第18节，tī chia使徒保罗并m̄是认为家己会tùi监狱中得tio̍h tháu放，因为伊已经知影得救ê希望渺茫，chiah会ài提摩太替伊the̍h需要ê衫裤kah书籍，并且ài提摩太赶紧到罗马去kah伊相会，因为án-ne，chia伊讲「主一定会救我脱离一切邪恶」，指ê乃是hō͘伊有坚定ê信心，不受tio̍h任何外力ê诱惑，甚至为tio̍h保存性命ê安全而妥协，á是对家己过去所传扬ê信息做任何伤害真理ê应允。伊深信因为传福音ê缘故而受tio̍h迫害á是丧失性命ê，终必得tio̍h上帝ê赏赐，这就是tī上帝国内面得tio̍h永恒ê性命。

第19到21节，tī chia提起一份真齐全ê名单，这mā是后书kah前书之间siōng大ê差别。

「亚居拉kah百基拉」，chit-ê对夫妻原本就是织帐棚ê人，tī哥林多城使徒保罗相tú，因为是同业（参考使徒行传十八：1—3），而且koh有共同ê信仰，因为án-ne，一直是使徒保罗tī福音事工上siōng好ê伙伴。In mā为tio̍h福音ê缘故，特别kā家己ê厝开放成做聚会ê所在（参考哥林多前书十六：19）。

「阿尼色弗」，是一位真疼惜使徒保罗ê同工，为tio̍h chhōe使徒保罗，伊chhōe遍了罗马城，chiah知影使徒保罗被囚禁ê所在（参考提摩太后书一：16—17）。

「以拉都」kah提摩太两人lóng是使徒保罗真深爱ê门徒á是同工，bat被使徒保罗差派去马其顿（参考使徒行传十九：22）。Chia soah讲以拉都留tī哥林多，tī hit-ê城ê教会见证福音ê信息。后来可能就是一直khiā起tī罗马城，协助hit-ê城教会ê事工（参考罗马书十六：22）。

「特罗非摩」，伊是使徒保罗ê同工，却mā因为伊ê缘故，被犹太人掠tio̍h机会，认为使徒保罗就是故意带领非犹太人ê特罗非摩进入圣殿，chit种行为是藐视上帝圣殿ê神圣，因为án-ne kā使徒保罗掠送官去审判（参考使徒行传廿一：28—29）。

第21节chia讲beh提摩太赶tī寒天chìn前到罗马来，主要原因就是寒天船会停止航行，若是koh再延误一kóa ê时日可能提摩太就无法度前来，m̄-koh伊真希望看tio̍h提摩太最后一面。

「友布罗、布田、利努、喀劳底雅」chit四位是甚么人？目前chhōe bē-tio̍h koh khah chē ê资料。不过这mā是使徒保罗写书信ê一个特色，就是会tī写phoe ê时kā kah伊同工而且在身边ê人，一并附上请安ê口信。

第22节，chia真特别，前一句是用来对提摩太讲ê，因为án-ne，所用ê是单数代名词「你」，而下半句则用复数代名词ê「Lín」，指ê就是对众人所祝福ê话，chia ê众人真可能就是用弗所教会ê兄弟众姊妹。